10
Yo xijan taʼu‑da nuu Ianyuux xa nanitaʼu koio ñayiu ka kuu daʼya dana Israel.
Yo kuu anu‑da xa nanitaʼu koio‑i.
2 Ka kuu anu‑i xa junukuechi‑i nuu Ianyuux,
ko ñatu ka xini‑i janda io xa junukuechi‑i nuu‑ia.
3 Ñayo‑i n‑kutnuni ini janda kada‑i xa ma kundido kutau ka‑i kuechi n‑ka kida‑i.
Ka ndukundee‑i xa ma kundido kutau ka‑i kuechi n‑ka kida‑i,
ko tuku ka kida‑i,
te tuku juini Ianyuux.
Xaxeʼe xijan dani xndido xtau‑i kuechi n‑ka kida‑i.
4 Ñatu ka xini‑i xa Cristu kuu Ia n‑jandixa ntdandituʼu ley Ianyuux n‑chidotnuni Moisés xa na kuaʼa maxku kundido kutau ka roo,
ñayiu ka kukanu ini‑ia kuechi n‑ka kida‑ro.
5 Na n‑jaʼan Moisés nax kada ñayiu xa maxku kundido kutau ka‑i kuechi n‑ka kida‑i,
n‑kakuneʼe‑s ley Ianyuux,
te n‑chidotnuni‑s:
“Ñayiu jandixa ley‑ia,
kutuu‑i xiʼin‑ia nɨkava nɨkuita.”
6 Roo xa ka kuu‑ro ñayiu n‑kida Ianyuux xa ñatuka xndido xtau‑ro kuechi n‑ka kida‑ro xaxeʼe xa kukanu ini‑ro Cristu,
ñatu ka jaʼan‑ro ná jaʼan dava ñayiu:
“Na nkaa‑ro andɨu.”
Ñayiu daa jaʼan kuu ñayiu kuu xa jɨn juneʼe‑i Cristu.
7 Ni ñatu ka jaʼan‑ro ná ka jaʼan dava ñayiu:
“Na keé‑ro nua ña xe ndɨʼɨ.”
Ñayiu daa jaʼan kuu ñayiu kuu xa natava‑i Cristu nuu ka xani ini‑i xa n‑xe konduxi‑ia.
8 Ñatu ka xini‑ro xa daa ku jaʼan‑ro chi ka dakuaʼa tnaʼa‑ro xa n‑chidotnuni Moisés.
Duʼa n‑chidotnuni‑s:
“Xá n‑kixee Tnuʼu Ianyuux.
Xá ka teku‑ro.
Xá ka xini‑ro.
Xá ka xko jaʼan‑ro xa n‑jaʼan‑ia nuu ñayiu.”
Xijan n‑chidotnuni‑s.
Xa ka jaʼan‑ro nuu‑i kuu xa io xa kukanu ini‑i Cristu.
9 Nuxa xandaa xakuita ka jandixa‑ro xa n‑nadandoto Ianyuux Jesús,
te nux ka jaʼan‑ro nuu ñayiu xa Jesús kuu Ianyuux,
nanitaʼu‑ro.
10 Xaxeʼe xa kukanu ini‑ro Jesús,
ma kundido kutau ka‑ro kuechi n‑ka kida‑ro,
te nanitaʼu‑ro xaxeʼe xa jaʼan‑ro nuu ñayiu xa kuu‑ia Ianyuux.
11 Yodotnuni tnuʼu Ianyuux:
“Ma uun jaʼan ñayiu kukanu ini‑i‑ia xa n‑dandaʼu ñaʼa‑ia.”
12 Nani kudaʼya Ianyuux ñayiu Israel ka xijan taʼu nuu‑ia,
dani kudaʼya‑ia ñayiu ñatu ka kuu ñayiu Israel ka xijan taʼu nuu‑ia.
Ntdaa‑i kuu daʼya‑ia.
Yo vaʼa kida ñaʼa‑ia ntdaa‑ro.
13 Ntdaa ñayiu ka xijan taʼu nuu Ianyuux nanitaʼu.
14 Ka xijan taʼu ñayiu ijan nuu‑ia,
ko ñayiu ta kukanu ini ka‑ia,
ñatu ka xini‑i xa kajan taʼu‑i nuu‑ia.
Xaxeʼe xa ta teku ka‑i jundu kuu Cristu ñatu kuu xa kukanu ini‑i‑ia.
Nux mayo dakuaʼa ñayiu ijan xa n‑jaʼan Ianyuux,
ma kuu xa teku‑i tnuʼu‑ia.
15 Nux mayo tundaʼa ñayiu dakuaʼa ñayiu ijan,
mayo dakuaʼa‑i.
Duʼa yodotnuni:
“Naka ka kudɨ ini‑ro xaxeʼe xa n‑ka kixee ñayiu ka jaʼan nuu‑ro xa n‑jaʼan Ianyuux.”
16 Juini ka dakuaʼa‑ro ñayiu xa n‑jaʼan Ianyuux,
ko ñadu ntdaa‑i jandixa xa ɨɨn xandaa kuu xa ka teku‑i.
Duʼa n‑jaʼan Isaías nuu Ianyuux.
Xiaʼan‑s:
“Taa‑ro Ianyuux,
xaku ni ñayiu jandixa xa ɨɨn xandaa kuu xa jaʼan‑da nuu‑i”,
kuu Isaías,
xiaʼan‑s.
17 Ndoñuʼu xa teku‑i xa n‑jaʼan Cristu na kuaʼa na kukanu ini‑i‑ia.
Kakuneʼe‑ro Cristu hora ka dakuaʼa‑ro‑i.
18 Maxku ku jaʼan‑ro xa ñatu n‑ka teku ñayiu jan xa n‑ka jaʼan‑ro,
chi n‑ka teku‑i.
Dɨuni duʼa yodotnuni tnuʼu Ianyuux:
Ntdantuʼu ñuu io ñuñayiu n‑ka teku ñayiu nax kuu xa n‑jaʼan Ianyuux.
Nde dɨkɨ ñuñayiu xiʼin nde xeʼe ñuñayiu ka xini ñayiu nax n‑kida‑ia.
19 Na jaʼan ntuku‑da,
“Ñadu xa ña n‑ka teku ñayiu Israel tnuʼu‑ia chi n‑ka teku‑i.”
Moisés kuu se kiʼna nuu n‑kakuneʼe xaʼa,
te n‑chidotnuni‑s xa n‑jaʼan Ianyuux nuu ñayiu Israel.
N‑jaʼan‑ia:
Kada‑r xa ñayiu ña tuu na nación io kada xa kukuedi ini koio‑n.
Kada‑r xa ñayiu ñatu xe ini tnuʼu jaʼan‑r dakiti ini ñaʼa.
20 N‑teku Isaías xa n‑jaʼan Ianyuux,
te n‑kuyɨɨ‑s xa n‑chidotnuni‑s.
Duʼa n‑jaʼan‑ia:
Ñayiu ñatu n‑ka xo xini jundu kuu‑r,
ka xini‑i jundu kuu‑r vitna.
Ñayiu ñatu n‑ka xijan tnuʼu jundu kuu‑r,
dakuaʼa‑r‑yɨ,
te ka xini‑i jundu kuu‑r vitna.
21 N‑kakuneʼe‑ia ñayiu Israel na n‑jaʼan‑ia:
“Ntdaa kɨu xko jaʼan‑r nuu ñayiu xa na jandixa ñaʼa‑i,
ko ñayo‑i ka juini.
Unu xe ini‑i.”