N‑kaxi Ianyuux ñayiu Israel
9
1-2 Jaʼan ndaa‑da;
ñatu jaʼan vete‑da,
chi kunduu‑da xiʼin Cristu.
Ñatu jaʼan vete‑da.
Xandaa xakuita xa yo vichi kukoʼyo ini‑da xaxeʼe daʼya dana Israel.
Ndaʼu yaʼa‑da hora najaʼan‑da‑i.
Dani jaʼan Espíritu Ianyuux nuu‑da xa jaʼan ndaa‑da tuku.
3 Date nuu n‑xio xaxeʼe xa dandoo ñaʼa Cristu nanitaʼu ñayiu ñuu‑da xiʼin yatnuʼu‑da,
diko kajan taʼu‑da nuu Ianyuux xa na dandoo ñaʼa‑ia n‑kuu.
4 Roo xa ka kuu‑ro daʼya dana Israel,
ka kuu‑ro ñayiu n‑kudaʼya ñaʼa Ianyuux.
Xixitna‑ro n‑ka kuu ñayiu n‑dandeʼa ñaʼa Ianyuux mee‑ia na n‑koko‑ia nuu n‑ka xo yuku‑i.
N‑kida‑ia xiʼin‑i ɨɨn tratu.
N‑xiaʼan‑ia ley‑ia,
te n‑jaʼan‑ia janda kada‑i xa ndadakaʼnu‑i‑ia,
dɨuni n‑xiaʼan‑ia tnuʼu‑ia xa taxi‑ia ɨɨn xa xá n‑taxi‑ia roo xa ka kuu‑ro daʼya dana Israel.
5 Yatnuʼu‑ro n‑ka kuu daʼya yɨɨ Israel.
Uxi uu‑s xa ntdaa‑s.
Ijan vaxi yatnuʼu‑ro xiʼin Cristu.
Kuu‑ia Ianyuux te taxnuni‑ia nuu‑ro ntdaa‑ro xiʼin nuu ntdaa xa io.
Io xa ndadakaʼnu‑ro‑ia nɨkava nɨkuita.
Amén.
6 Ñatuka io xa ku jaʼan‑ro xa ka kuu naʼi dava daʼya dana Israel ñayiu Israel xaxeʼe xa ñatu ka kida‑i na io xa kada‑i.
Ñatu ka jandixa‑i Ianyuux,
ko kida naʼi Ianyuux xa n‑jaʼan‑ia xa kada‑ia.
Xetnaʼa tnuʼu‑ia.
7 Ñadu ntdaa daʼya dana Abraham n‑jaʼan Ianyuux xa ku kuu daʼya dana‑s chi yodotnuni tnuʼu n‑jaʼan‑ia nuu‑s:
“Diko ni daʼya dana Isaac ku kuu daʼya dana‑n.”
8 Ña ntdaa ñayiu ka kuu daʼya dana Abraham ka kuu daʼya Ianyuux chi diko ni ñayiu n‑jaʼan‑ia nuu‑s xa ku kuu‑i daʼya‑ia ka kuu daʼya‑ia.
9 Te dɨuni n‑jaʼan Ianyuux nuu Abraham tnuʼu yaʼa:
“Kɨu n‑xantuu‑r xa kixi‑r,
kixi ntuku‑r,
te kɨu ijan kajan Sara ɨɨn daʼya yɨɨ.”
10 Ñadu ni Sara n‑xajan daʼya chi dɨuni n‑xajan Rebeca daʼya.
Cuati n‑xajan‑ña,
te Isaac n‑kuu taa daʼya‑ña.
11-13 Na ta kaku ka cuati ñuʼu xiti Rebeca,
n‑jaʼan Ianyuux nuu‑ña:
“Se juindodo nuu kaku junukuechi nuu se kandijun nga.”
Juini ta kada ka‑s ɨɨn xavaʼa a ɨɨn xaloko,
xá ama n‑jaʼan‑ia xijan.
Dɨuni yodotnuni:
“N‑xemani‑r Jacob te n‑xini uʼu‑r Esaú.”
Ñayiu kuu ini mee Ianyuux xa kutuu‑i xiʼin‑ia kuu ñayiu kaxí‑ia xa kutuu‑i xiʼin‑ia.
Ñadu xaxeʼe xa vaʼa ñayiu kaxí‑ia‑i chi xaxeʼe xa xa daa nga ñu ini‑ia xa kaxí‑ia‑i xa kutuu‑i xiʼin‑ia,
te kida‑ia xa teku‑i tnuʼu‑ia xa na kuaʼa nanitaʼu‑i.
14 Maxku kachi‑ro xa ñatu kida Ianyuux ɨɨn xavaʼa xaxeʼe xa duʼa kida‑ia.
Ni ɨɨn kɨu maxku daa kani ini‑ro.
15 N‑jaʼan‑ia nuu Moisés:
“Kundaʼu ini‑r ñayiu kuu ini‑r xa kundaʼu ini‑r.
Tnau ini‑r xaxeʼe‑i chi daa kuu ini‑r.”
16 Ñayiu kundaʼu ini Ianyuux kaxí‑ia xa kutuu‑i xiʼin‑ia.
Kaxí Ianyuux ñayiu ijan xaxeʼe xa kundaʼu ini‑ia‑i,
ñadu xaxeʼe xa ka kuu ini ñayiu ijan xa kaxí‑ia‑i,
kaxí‑ia‑i.
Ni ñadu xaxeʼe xa ka ndukundee‑i xa kaxí ñaʼa‑ia,
kaxí‑ia‑i.
17 Dɨuni yodotnuni xa n‑jaʼan‑ia nuu Faraón.
Duʼa n‑jaʼan‑ia:
“N‑kida‑r xa taxnuni‑n te n‑kida‑n xa n‑kida‑n na kuaʼa jini ñayiu ñuñayiu xa kuaʼa‑r kida‑r davaʼa nga xa jaʼan‑r xa kada‑r,
te jaʼan koio ñayiu ñuñayiu xa kuu‑r Ianyuux ndixa xaxeʼe xijan.”
18 Kundau ini Ianyuux ñayiu kuu ini‑ia xa kutuu xiʼin‑ia xaxeʼe xa daa kuu ini‑ia,
te nux kuu ini‑ia xa ku kulilu naʼi dava ka ñayiu,
dani ku kulilu‑i.
19 Vaa ku jaʼan koio‑n:
“Nux duʼa io ¿nakuenda jaʼan‑ia xa io kuechi ñayiu ka kida kuechi?
Kida Ianyuux xa kuu ini mee‑ia xa kada‑ia,
te mayo ku dadaʼan.”
20 ¡Nuda xijan ku jaʼan ndixi!
Maxku yoo ñayiu ku jaʼan xa nuu io vaʼa xa kida‑ia a ñatu io vaʼa.
Ñatu jaʼan ɨɨn kɨdɨ nuu se n‑kidavaʼa:
“¡Nuda duʼa kaa n‑kidavaʼa ñaʼa‑n u!”
21 Kidavaʼa ɨɨn se kidavaʼa kɨdɨ ñuʼu kɨdɨ kuu ini mee‑s.
Idii ni ndeʼyu kidavaʼa‑s kɨdɨ vaʼa kaa xiʼin kɨdɨ ndaʼu kaa.
22 Kiti ini Ianyuux nuu ñayiu ñatu n‑ka natu ini xa n‑ka kida‑i kuechi.
Xaxeʼe xijan io xa naa‑i.
Ñatu n‑xo kida uʼu ni‑ia‑i chi n‑xo xo ndetu kuee‑ia xaxeʼe xa n‑juini‑ia xa na natu ini‑i xa n‑ka kida‑i kuechi.
Kada uʼu‑ia‑i na kuaʼa na jini koio‑i xa kiti ini‑ia nuu‑i.
Dɨuni juini‑ia xa jini ntdaa ñayiu xa taxnuni‑ia nuu‑i.
23 N‑xo ndetu kuee‑ia chi dɨuni n‑juini‑ia xa natu ini roo,
ñayiu n‑kundaʼu ini‑ia xa n‑ka kida‑ro kuechi xaxeʼe xa n‑juini‑ia xa jini‑ro xa kada‑ia xa ndukaʼnu koio‑ro nuu tuu‑ia.
Dɨuni n‑kidatniu‑ia anu‑ro xa n‑ka nduu‑ro ñayiu vaʼa.
24 Ñadu ni roo xa ka kuu‑ro ñayiu Israel n‑kida‑ia xa teku‑ro tnuʼu‑ia xa na kuaʼa nanitaʼu koio‑ro,
chi dɨuni n‑kida‑ia xa teku ñayiu ñatu kuu ñayiu Israel tnuʼu‑ia.
25 Nani jaʼan‑da ya,
dani n‑jaʼan Ianyuux nuu Oseas,
te n‑chidotnuni‑s:
Ñayiu ñatu n‑ka kuu daʼya‑r kuu daʼya‑r vitna.
Ñayiu ña n‑xo xemani‑r,
xemani‑r vitna.
26 Ñayiu n‑xo jaʼan‑r nuu‑i:
“Ñatu ka kuu‑n daʼya‑r.”
Ñayiu ijan ku kuu daʼya‑r xa kuu‑r Ianyuux ndixa,
te ndito‑r.
27 Duʼa n‑jaʼan se n‑xo nani Isaías te n‑chidotnuni‑s:
“Kueʼe daʼya dana Israel io ná kueʼe ñuʼu kuchi io yuʼu mar.
Kueʼe‑i io,
ko xaku ni‑i nanitaʼu.
28 Vax kuyatni kɨu kada Ianyuux xa jɨn tnaʼa xa n‑jaʼan‑ia nuu ñayiu ñuñayiu”.
29 Dɨuni n‑jaʼan Isaías te chidotnuni‑s:
Nuu ña n‑dakaku Ianyuux dava daʼya dana Israel,
ma koo koio‑da n‑kuu ná ñayo ka daʼya dana ñayiu Sodoma xiʼin daʼya dana ñayiu Gomorra io.
Ñatu n‑ka kukanu ini dava ñayiu Israel Jesucristu
30 Xaxeʼe xa ka kukanu ini ñayiu Cristu,
ñatuka xndido xtau‑i kuechi n‑ka kida‑i,
juini ñatu n‑ka xo kuu anu‑i xa jandixa‑i Ianyuux.
31 N‑ka kuu ñayiu Israel xa jandixa ndɨʼɨ‑i ley Ianyuux xa ma kundido kutau ka‑i kuechi n‑ka kida‑i,
ko ñatu n‑ka ndaku‑i.
32 N‑ka kuu‑i xa ndaku‑i xa jandixa koio‑i ley Ianyuux na kuaʼa maxku kundido kutau ka‑i kuechi n‑ka kida‑i,
ko ña yoo‑i ndaku xaxeʼe xa ñatu n‑ka kukanu ini‑i Ianyuux.
Kuenda kɨu ñayiu ndeʼe ka xe kɨʼɨ yuú hora xndijun‑i ɨnka ñayiu,
ka kuu‑i xa ñatu jandixa‑i‑ia.
33 Dɨuni yodotnuni tnuʼu Ianyuux:
Kunaʼa koio xa tundaʼa‑r Ia xee Sión.
Kada‑ia ɨɨn xa ta uun ka jini ñayiu dian.
Te xaxeʼe xijan ma jandixa ñaʼa ka‑i.
Kuenda kɨu ɨɨn yuú a ɨɨn toto katuu,
te ka xe kɨʼɨ ñayiu te ka ndua‑i ku kuu‑ia.
Kuenda kɨu ñayiu ndeʼe ka xe kɨʼɨ yuú hora xndijun‑i ɨnka ñayiu ku kuu ñayiu ma kukanu ini ñaʼa,
ko ñayiu kukanu ini ñaʼa,
ma jɨn kɨʼɨ‑i,
ni ma uun kujanuu‑i xa kukanu ini‑i‑ia.