Ndeka Espíritu Ianyuux ñayiu
8
Ma jaʼan ka‑ia xa io kuechi roo,
ñayiu ka kunduu xiʼin Cristu Jesús,
ni ma jaʼan‑ia xa io xa chiyaʼu‑ro kuechi‑ro.
2 Xaxeʼe xa ka kunduu‑ro xiʼin‑ia n‑kixeʼe Espíritu Ianyuux xa taxnuni‑ia nuu‑ro.
Ka kuu‑ro ná ka kuu ñayiu n‑ka yaa nuu xtoʼo‑i vitna.
Ñatuka kuu anu‑ro xa kada ka‑ro kuechi n‑ka xo kida‑ro,
te xaxeʼe xijan ma dandoo ñaʼa Ianyuux,
te kutuu‑ro andɨu nuu tuu‑ia.
3 Xaxeʼe xa ñatu ka ndaku ñayiu xa jandixa‑i ley kundido kutau‑i kuechi‑i n‑kuu,
te ntdaa‑i jɨʼɨn andea.
Ñatu ka ndaku‑i xaxeʼe xa ka kuu‑i ñayiu ñuñayiu.
Xaxeʼe xijan n‑tundaʼa Ianyuux Daʼya Yɨɨ‑ia ñuñayiu xa kuú‑ia xaxeʼe kuechi‑ro xiʼin‑i.
Ná xndaa roo,
ñayiu ka kida kuechi,
n‑kaa Daʼya Yɨɨ‑ia.
Idii mee‑ia n‑ndaku xa n‑jandixa‑ia ley Ianyuux.
N‑xiʼí‑ia xa na kuaʼa ndaku‑ro xa jandixa‑ro ley‑ia.
4 Ndaku‑ro xa jandixa‑ro ley vitna chi ñatuka ka kida‑ro xa n‑xo kuu anu‑ro xa kada‑ro.
Ka kida‑ro xa juini Espíritu Ianyuux chi ndeka ñaʼa‑ia.
5 Ñayiu ka kida mee ni xaloko xaduʼa,
te ka kukajan ini‑i xa io ñuñayiu yaʼa,
mee ni xijan xñu ini‑i.
Ko ñayiu ka xani ini ná xani ini Espíritu Ianyuux,
ka kuu anu‑i xa kada‑i mee ni xa juini mee‑ia.
6 Ñayiu ka kida xa ka kuu ini mee‑i,
te ka kida‑i xa ka kuu anu‑i xa kada‑i,
kuenda kɨu n‑ka xiʼí‑i chi ñatu ka kunduu‑i xiʼin Ianyuux.
Ñayiu ka xani ini ná xani ini Espíritu‑ia,
kutuu‑i nuu tuu‑ia nɨkava nɨkuita,
te kundaa kuvatu anu‑i chi n‑ka natu ini‑i xa n‑ka kida‑i kuechi.
7 Ñayiu ka kida xa kuu ini mee‑i ka xini uʼu‑i Ianyuux,
te ñatu kuu anu‑i xa jandixa‑i ley‑ia,
ni ma ndaku‑i xa jandixa‑i.
8 Ñayiu ka kida xa kuu ini mee‑i jan,
ma ndaku‑i xa kada‑i xa tna ini Ianyuux.
9 Daa ka kuu ñayiu yaʼa,
ko ndixi,
xaxeʼe xa kunduu‑n xiʼin Espíritu Ianyuux,
ñatu daa ka kuu‑n chi ñuʼu ñaʼa‑ia.
Ñayiu ñatu ñuʼu ñaʼa Espíritu Cristu,
ñatu ndeka ñaʼa Cristu.
10 Juini na kuú koio‑ro xaxeʼe xa ka kuu‑ro ñayiu ka kida kuechi,
ko nux kunduu‑ro xiʼin Cristu,
nandoto‑ro te kutuu‑ro xiʼin‑ia nɨkava nɨkuita.
11 Xaxeʼe xa ñuʼu ñaʼa Espíritu Ianyuux,
Ia n‑nadandoto Jesús na n‑xiʼí‑ia,
nadandoto ñaʼa Ianyuux roo na kuú‑ro tuku.
12 Kidajuexa Ianyuux xa maxku kada‑ro xaloko kuu anu‑ro xa kada‑ro.
13 Nux dani ka kida dava‑n mee ni xa loko kuu anu‑n xa kada‑n,
dandoo ñaʼa Ianyuux,
ko nux na dandoo‑n xijan,
kutuu‑n nuu tuu‑ia nɨkava nɨkuita.
Espíritu Ianyuux kida xa dandoo ñayiu xijan.
14 Nux Espíritu Ianyuux,
ndeka ñaʼa,
daʼya Ianyuux ka kuu‑ro.
15 Ñatu kida Espíritu Ianyuux xa ku yuʼu‑ro nuu Ianyuux ná n‑ka xo yuʼu‑ro.
N‑ka xo yuʼu‑ro ná ka yuʼu ñayiu ka kidatniu duʼa nuu xtoʼo‑i.
Ñatuka yuʼu‑ro chi kida‑ia xa jaʼan‑ro nuu Taa‑ro Ianyuux:
“Abba.”
(Taa‑ro kuu tnuʼu mee‑ro.)
16 Nani xini Espíritu‑ia xa ka kuu‑ro daʼya Ianyuux,
dani xini roo.
17 Hora na juñaʼa Ianyuux taʼu Cristu,
niʼi‑ro xa n‑jaʼan‑ia xa taxi‑ia xaxeʼe xa ka kuu‑ro Daʼya‑ia.
Xijan kuu taʼu‑ro.
Xaxeʼe xa ndaʼu ka yaʼa‑ro ná ndaʼu n‑yaʼa Cristu,
ndukaʼnu‑ro xiʼin‑ia.
Yo vichi ku ndukaʼnu‑ro andɨu
18 Yo ndaʼu yaʼa‑ro tiempo yaʼa,
ko vichi vaʼa kada ñaʼa Ianyuux chi yo vichi ku ndukaʼnu‑ro.
19 Ntdaa ñayiu xiʼin ntdaa ka xa n‑xani ini Ianyuux xnaʼa xa dandeʼa‑ia‑i jundu ka kuu daʼya‑ia.
Yo ka kuu anu‑i xa jini‑i daʼya‑ia;
naxku na jini ñaʼa‑i vitnadii.
20 N‑kida Ianyuux xa ña ndaku ka ntdaa xa n‑kidavaʼa‑ia xiʼin ñayiu xa kada‑i ɨɨn xa ka kida‑i ná io ná juaʼan.
Ñadu kuechi mee‑i kuu xa ña ndaku‑i xa kada‑i ɨɨn xa kada‑i ná io ná juaʼan chi daa n‑juini mee Ianyuux xa yaʼa.
Ñatu daa n‑ka juini mee ñayiu xiʼin xa n‑kidavaʼa‑ia xa yaʼa.
Juini daa kuu vaxi,
ko xee kɨu ma daa ka yaʼa.
Jandixa‑ro
21 xa kada Ianyuux xa ma tɨu ka davaʼa nga xa tɨu vaxi,
ni yɨkɨ kuñu‑ro ma tɨu ka chi kada Ianyuux xa ma tɨu ka xaxeʼe xa ka kuu‑ro daʼya‑ia.
Naka vaʼa.
22 Ka xini‑ro xa ndaʼu ka yaʼa ñayiu xiʼin ntdaa ka xa n‑xani ini Ianyuux xaxeʼe xa tɨu ntdaa xa io ñuñayiu.
Ná ka yaʼa ñadɨʼɨ hora kaku daʼya‑ña,
ka yaʼa‑i.
Ná ka tnana‑ña,
ka tnana‑i.
23 Ñadu ni xa n‑xani ini Ianyuux xiʼin dava ka ñayiu ndaʼu yaʼa te ka jan kuechi‑i,
chi dani roo xa ka kuu‑ro ñayiu kiʼna ka n‑keé ñaʼa Espíritu Ianyuux,
ndaʼu ka yaʼa‑ro,
te xñu ini‑ro xa xee kɨu nakueka ñaʼa Ianyuux.
Nadandoto ñaʼa‑ia na yaʼa xa kuú‑ro,
te ma kuú ka‑ro.
24 N‑kukanu ini‑ro xa xandaa xakuiti daa yaʼa.
Xaxeʼe xa ta yaʼa ka xijan,
dani xñu ini‑ro xa yaʼa,
te ma kande ini‑ro.
25 Nux ta jini ka‑ro xa yaʼa ɨɨn xa n‑kukanu ini‑ro xa yaʼa,
ñu ini naʼi‑ro xa daa yaʼa.
26 Ñatu ka xijan taʼu‑ro nuu Ianyuux ná io ná juaʼan,
ko chindee ñaʼa Espíritu‑ia.
Yo kakuneʼe ñaʼa‑ia hora xijan taʼu‑ia nuu Ianyuux,
te tnau ini‑ia.
Ñatu jaʼan‑ia nuu Taa‑ro Ianyuux hora xijan taʼu‑ia xa kuu‑ro xavaʼa ná ka xani ini roo chi tuku xijan taʼu‑ia.
27 Xini Taa‑ro Ianyuux nax xani ini Espíritu‑ia,
te dɨuni chinuu‑ia janda ka kuu anu‑ro.
Hora xijan taʼu Espíritu‑ia nuu Taa‑ro Ianyuux xa kuu‑ro xavaʼa,
xijan taʼu‑ia nuu‑ia xa kada‑ia xa xá ñu ini Taa‑ro Ianyuux xa kada ñaʼa‑ia.
Ndaʼu ka yaʼa‑ro vitna xa xtuu‑ro ñuñayiu, ko xee kɨu kutuu‑ro andɨu
28 Roo,
ñayiu ka kuvaʼa anu nuu Ianyuux,
juini ndaʼu ka yaʼa‑ro a ña tuu nax ka yaʼa‑ro,
ka xini‑ro xa nduu‑ro ñayiu vaʼa ka.
Ka kuu‑ro ñayiu kida‑ia xa teku‑ro tnuʼu‑ia xa na kuaʼa nanitaʼu‑ro chi daa n‑juini‑ia.
29 Ñayiu xa daa nga ñu ini Ianyuux xa ndudaʼya ñaʼa‑ia,
n‑kida‑ia xa ka kuu‑i daʼya‑ia vitna ná kuu Daʼya Yɨɨ‑ia;
xa daa nga n‑ñu ini‑ia xa kada‑ia xijan.
Daʼya Yɨɨ‑ia kuu Ia kunuu ka nuu roo xa ka kuu‑ro daʼya‑ia tuku.
30 Dɨuni n‑kida Ianyuux xa ka teku dava ñayiu tnuʼu‑ia na kuaʼa nanitaʼu‑i.
Dɨuni kida‑ia xa ñatuka xndido xtau‑i kuechi‑i,
te kada‑ia xa ndukaʼnu‑i.
31 Xaxeʼe xa vaʼa kida ñaʼa Ianyuux vaxi,
ña tuu nax kuu xa ka kida uʼu ñaʼa ñayiu.
32 Daʼya yɨɨ ka‑ia ñatu n‑kukuiʼa kuu‑ia xa kixi‑ia ñuñayiu xa kuú‑ia xaxeʼe‑ro ntdaa‑ro.
Naka xa kada ñaʼa‑ia kueʼe xavaʼa ku kukuiʼa kuu‑ia.
33 Ña tuu nax kada xa ka jaʼan ñayiu nuu Ianyuux xa io kuechi roo,
ñayiu n‑kaxi ñaʼa Ianyuux xa ku kuu‑ro daʼya‑ia chi naʼa‑ia xa ñatuka xndido xtau‑ro kuechi‑ro.
34 Ni mayo jaʼan nuu Ianyuux xa io xa chiyaʼu‑ro kuechi‑ro chi naʼa‑ia xa n‑xiʼí Cristu Jesús xaxeʼe kuechi‑ro.
Ñadu ni xijan n‑kida Cristu Jesús chi dɨuni n‑nandoto‑ia te nukoo‑ia lado kuaʼa Taa‑ro Ianyuux xa taxnuni‑ia,
te kakuneʼe ñaʼa‑ia hora xijan taʼu‑ia nuu‑ia.
35 Xemani ñaʼa Cristu,
te dani ku juemani ñaʼa‑ia,
te mayo dadaʼan.
Maxku kani ini‑ro xa ñatu xemani ñaʼa Cristu hora ndaʼu ka yaʼa‑ro,
a hora ka tnau ini‑ro xaxeʼe xa ka yaʼa‑ro ɨɨn xa ka yaʼa‑ro chi dani kuvaʼa anu‑ia nuu‑ro.
Ni maxku kani ini‑ro xa ñatu xemani ñaʼa‑ia hora ka kida uʼu ñaʼa ñayiu xaxeʼe xa kukanu ini‑ro‑ia,
a xa ña tuu nax io xa kaxi xa koʼo‑ro,
xa kundix kudaʼu‑ro,
a hora xtuu‑ro nuu io kuu a nuu ka kuu ñayiu xa kaʼni ñaʼa‑i.
36 Nakaxtnaʼa xaʼa xiʼin xa n‑ka xiaʼan ñayiu nuu Ianyuux,
te yodotnuni:
Xaxeʼe‑n ntdantuʼu kɨu ka kuu ñayiu xa kaʼni ñaʼa‑i.
Kuenda kɨu tkachi xa io xa kuu‑tɨ ka kuu‑da.
37 Juini daa ka yaʼa‑ro,
ko ña tuu nax kuu chi kee‑ro xavaʼa xaxeʼe xa xemani ñaʼa‑ia.
38 Xandaa xakuiti xemani ñaʼa Ianyuux,
te dani ku juemani ñaʼa‑ia.
Xemani ñaʼa‑ia chi n‑xiʼí Cristu Jesús,
Ia kuu Xtoʼo‑ro xaxeʼe‑ro.
Ndito‑ro a n‑xiʼí‑ro,
ko dani xemani ñaʼa‑ia.
Mayo ku dadaʼan xa ma juemani ñaʼa‑ia.
Ni ángel ma dadaʼan,
ni xaloko taxnuni ma dadaʼan.
Ni xa io vitna,
ni ɨɨn xa ta koo ka ma kada xa ma juemani ñaʼa‑ia.
39 Ni xa ndeʼa‑ro andɨu,
ni xa yɨʼɨ kaʼa ñuʼu,
ni ɨnka xa n‑kidavaʼa‑ia io ñuñayiu a io andɨu ma ku dadaʼan xa ma juemani ñaʼa‑ia.