Ná ka kuu ñayiu n‑tnundaʼa ka kuu ñayiu ka jandixa ley Ianyuux
7
Mee‑n,
ñayiu ka xini ley Ianyuux,
ka xini‑n xa io xa jandixa‑ro ley jan hora xndito‑ro te nux n‑ka xiʼí‑ro ñatuka io xa jandixa‑ro ley jan.
2 Ná kuu ɨɨn ñadɨʼɨ n‑tnundaʼa ka kuu‑ro xa ka jandixa‑ro ley jan.
Ɨɨn ñá n‑tnundaʼa,
ma kuu xa dandoo‑ña yɨɨ‑ña xa natnundaʼa‑ña xiʼin ɨnka‑s chi daa io ley Ianyuux xaxeʼe xa n‑tnundaʼa‑ña xiʼin‑s.
Ko nux n‑xiʼí yɨɨ‑ña ña tuu nax kuu xa natnundaʼa‑ña xiʼin ɨnka‑s.
3 Nux tuu yɨɨ ɨɨn ñadɨʼɨ te n‑chitnaʼa‑ña xiʼin ɨnka seyɨɨ,
kida‑ña kuechi,
ko nux n‑xiʼí yɨɨ‑ña,
ñatu io ley jaʼan xa ma kuu xa natnundaʼa‑ña xiʼin ɨnka seyɨɨ.
Ña tuu na kuechi kada‑ña xa natnundaʼa‑ña xiʼin ɨnka‑s.
4 Ná kuu ñadɨʼɨ n‑xiʼí yɨɨ ka kuu‑ro xa ñatuka taxnuni ley n‑chidotnuni Moisés nuu‑ro chi kuenda kɨu n‑ka xiʼí‑ro na n‑xiʼí Cristu,
te kuenda kɨu n‑ka nandoto‑ro xiʼin‑ia na n‑nandoto‑ia xa n‑xiʼí‑ia,
te n‑xeka ñaʼa‑ia xa na kuaʼa na kada‑ro xa juini Ianyuux.
5 Kueʼe kuechi n‑ka xo kida‑ro na n‑ka xo kuu anu‑ro xa kada‑ro xaloko xaduʼa xaxeʼe xa n‑ka xo kaʼu‑ro ley Moisés chi daa vaxi‑ro ñuñayiu.
Xaxeʼe xijan dandoo ñaʼa Ianyuux nɨkava nɨkuita n‑kuu.
6 Kuenda kɨu ñayiu n‑ka yaa nuu xtoʼo‑i ka kuu‑ro xa ñatuka io xa jandixa‑ro ley n‑chidotnuni Moisés.
Ñatuka io xa jandixa‑ro ley jan chi kuenda kɨu n‑ka xiʼí‑ro te n‑ka nandoto‑ro xa junukuechi‑ro nuu Ianyuux.
Ñadu xaxeʼe ley n‑chidotnuni Moisés xinokuechi‑ro nuu‑ia vitna,
chi xaxeʼe xa kidatniu‑ia anu‑ro daa ka kuu anu‑ro.
Kida Spalu kuechi
7 Vaa kachi koio‑n vitna xa:
“Ñatu xiniñuʼu ley”,
xaxeʼe xa duʼa jaʼan‑da.
Maxku duʼa kani ini koio‑n chi xiniñuʼu ley chi nuu ñatu n‑xio ley n‑chidotnuni Moisés,
ma kutnuni ini‑da xa kuechi kuu ɨɨn xaloko kida‑da n‑kuu.
Nuu ñatu n‑yodotnuni,
“Maxku kukajan ini‑n xaxii ñayiu”,
ma uun kani ini‑da xa kuechi kuu xijan n‑kuu.
8 N‑kunuu kuechi nuu ley jan chi yo n‑xo kukajan ini‑da xaxii ñayiu.
Juini kueʼe xa n‑ka xo kida ñayiu,
na ta koo ka ley,
ko ña yoo n‑jaʼan xa kuechi kuu xa n‑ka xo kida‑i.
9 Ña tuu nax n‑xo kuu anu‑da hora n‑xo kida‑da kuechi,
chi ñatu n‑xini‑da nax kuu ley,
ko kɨu n‑xini‑da xa io ley,
n‑kuu ka anu‑da xa kada‑da xaloko.
10 N‑xani ini‑da xa jandixa‑da ley jan te kutuu‑da nuu tuu Ianyuux nɨkava nɨkuita,
ko ñatu n‑kuu xaxeʼe xa ñatu n‑jandixa ndɨʼɨ‑da ley jan.
Te xaxeʼe xijan n‑xio xa dandoo ñaʼa‑ia n‑kuu.
11 Xaxeʼe xa n‑kunuu kuechi nuu ley jan ñatu ndaku‑da xa jandixa‑da,
te ñatu n‑xee xa kada‑da ná n‑xani ini‑da.
Xaxeʼe xijan n‑xio xa dandoo ñaʼa Ianyuux n‑kuu.
12 Ii ley Ianyuux n‑chidotnuni Moisés,
ii ɨɨn ɨɨn tnuʼu n‑jaʼan‑ia na n‑taʼu tniu‑ia,
te dɨuni vaʼa.
Jaʼan ley xa io xa kada‑ro ɨɨn xa ka kida‑ro ná io ná juaʼan xa kada‑ro.
13 Vaa kachi koio‑n:
“¿Nakuenda xa jaʼan‑s xa vaʼa ley,
te dɨuni jaʼan‑s xa xaxeʼe ley ijan dandoo ñaʼa Ianyuux?”
Vaa daa kani ini koio‑n,
ko ñadu ley n‑kida xa n‑xio xa dandoo ñaʼa‑ia chi xaxeʼe kuechi n‑ka kida‑ro n‑xio xa dandoo ñaʼa‑ia.
Vaʼa ley jan.
Nu n‑kaʼu‑da ley,
n‑kutnuni ini‑da xa kueʼe kuechi n‑kida‑da te xaxeʼe xijan n‑xio xa dandoo ñaʼa‑ia.
Dɨuni xa n‑kaʼu‑da ley n‑xini‑da xa yo kiti ini Ianyuux nuu ñayiu ka kida kuechi.
14 N‑xani ini Ianyuux ley xa kachitnuʼu ñaʼa‑ia ndeda xa kuu xavaʼa kada‑ro,
ko xaxeʼe xa kuu‑da ñayiu ñuñayiu,
kida‑da kuechi.
Ná kuu ɨɨn se jandixa xtoʼo‑s kuu‑da xa daa kida‑da.
15 Ñatu xini‑da nax tnaʼa‑da xa naa xa kada‑da xavaʼa kuu anu‑da xa kada‑da,
daa xa ñatu kuu anu‑da xa kada‑da kida‑da.
16 Xaxeʼe xa xini‑da xa io vaʼa xa ka jandixa‑ro ley jan,
io anu‑da xa jandixa‑da.
17 Ñadu mee‑da io kuechi xa kida‑da kuechi;
kida‑da chi daa vaxi‑da ñuñayiu.
18 Najandixa‑da xa ña tuu nax vaʼa ñuʼu anu‑da xaxeʼe xa kuu‑da ñayiu ñuñayiu.
Juini kuu anu‑da xa kada‑da xavaʼa,
ko ñatu ndaku‑da.
19 Ñatu kida‑da xavaʼa juini‑da xa kada‑da,
chi daa xaloko ña kuu anu‑da xa kada‑da kida‑da.
20 Xaxeʼe xa ñatu kuu anu‑da xa kada‑da xaloko,
xijan kuu xa ñadu mee‑da io kuechi xa kida‑da kuechi;
kida‑da kuechi chi daa vaxi‑da ñuñayiu.
21 Juini kuu anu‑da xa kada‑da ɨɨn xavaʼa,
ko ñatu kida‑da xavaʼa chi mee ni xaloko xani ini‑da.
Duʼa yaʼa‑da.
22 Io vaʼa xa io ley Ianyuux.
Tna ini‑da,
23 ko xaxeʼe xa io ɨɨn xa dadaʼan xa kada‑da xa ñu ini‑da xa kada‑da,
ñatu ndaku‑da xa jandixa‑da ley jan.
Xa dadaʼan kuu xaloko ñuʼu anu‑da.
Ná kuu ɨɨn se yɨndiʼu xa ñatu kuaʼa xa kuikonuu kuaan‑s kuu‑da.
24 Naka vichi tnau ini‑da xa daa yaʼa‑da.
Ndaʼu‑da.
¿Jundu kada xa ma kada ka‑da kuechi nɨni na kutuu ka‑da ñuñayiu?,
25 nani Ianyuux.
Idii mee‑ia kada xa ma kada ka‑da kuechi xaxeʼe xa n‑xiʼí Jesucristu,
Ia kuu Xtoʼo‑ro xaxeʼe‑ro.
Na kutaʼu‑da nuu‑ia.
Ɨɨn se kidatniu duʼa nuu xtoʼo‑s,
io xa jandixa‑s xtoʼo‑s.
Vitna dada n‑kutnuni ini‑da xa io xa jandixa‑da ley Ianyuux ná jandixa se ijan xtoʼo‑s,
ko xaxeʼe xa kuu‑da ñayiu,
kida naʼi‑da kuechi.
Ná kuu ɨɨn se kidatniu duʼa nuu xtoʼo‑s kuu‑da xa kida naʼi‑da kuechi.