N‑kixee Jesús nuu uxa se n‑dakuaʼa‑ia
21
Na n‑yaʼa xaʼa,
te ɨnka vuelta n‑dandeʼa Jesús mee‑ia nuu se n‑dakuaʼa‑ia.
Xaʼa n‑kuu yuʼu ndute mar,
mar nani Tiberias.
Jesús en el mar de Galilea (Juan 21.1-25)
2 Ijan n‑ka nataka Simón Spedru xiʼin Tomás,
se n‑ka xo danani‑s Cuati,
xiʼin Natanael,
se ñuu nani Caná distrito Galilea,
xiʼin uu daʼya yɨɨ Zebedeo,
xiʼin uu ka se n‑dakuaʼa Jesús.
3 N‑jaʼan Simón Spedru nuu‑s:
—Jɨʼɨn‑r,
jɨn tava‑r chaka.
N‑ka jaʼan‑s:
—Jɨʼɨn koio mee‑r tuku.
Ka xeʼen‑s te n‑ka keé‑s barcu.
Te xakuaa ijan,
ñayo‑s n‑ka tava ni ɨɨn chaka.
4 Neʼe datne,
nujuiin Jesús yuʼu ndute,
ko ña n‑ka najini ñaʼa se n‑dakuaʼa‑ia xa mee‑ia kuu‑ia.
5 N‑jaʼan Jesús nuu‑s:
—Sekuechi,
¿n‑ka niʼi‑n chaka u?
N‑ka jaʼan‑s:
—Ni ɨɨn‑tɨ.
6 N‑jaʼan‑ia:
—Dakeé koio ñunu nuu ndute diñi kuaʼa barcu,
te tnɨɨ koio‑n chaka.
Duʼa n‑ka kida‑s,
te ña n‑ka kundee‑s xa natava koio‑s ñunu,
xaxeʼe xa kueʼe xa kueʼe chaka n‑ka keé xiti ñunu.
7 Se n‑dakuaʼa Jesús,
se yo n‑xemani‑ia,
n‑jaʼan‑s nuu Spedru:
—Xtoʼo‑ro kuu‑ia.
Na n‑teku Simón Spedru xa se ijan kuu Xtoʼo‑s,
yachi n‑ndɨu nuu‑s daʼma‑s,
chi xa n‑dita‑s daʼma‑s xa tnɨɨ‑s chaka,
te n‑keé‑s nuu ndute,
n‑kida nadari‑s xa kexio‑s yundute.
8 Dava ka‑s n‑ka dakaka barcu xa xee koio‑s nde yundute.
Ñatu yo xika,
vaa ɨɨn cientu ni metru.
N‑ka natava‑s ñunu n‑chitu chaka.
9 Na n‑ka nane‑s barcu yundute,
n‑ka xini‑s kayu ñuʼu te xá kaʼya chaka,
te io tuʼa tila tuku.
10 N‑jaʼan Jesús nuu‑s:
—Kaneʼe ɨɨn uu chaka neʼe.
Kɨtɨ dijan n‑ka tnɨɨ‑n vitna.
11 N‑keé Simón Spedru barcu,
te ñuʼu‑s ñunu n‑keé nuu ñuʼu.
Chaka naʼnu n‑chitu xiti ñunu.
Ɨɨn cientu uu diko uxi uni‑tɨ.
Ko juini ñuʼu kueʼe xa kueʼe‑tɨ,
ko ñatu n‑taʼnde ñunu.
12 N‑jaʼan Jesús nuu‑s:
—Neʼe koio,
na kadi ini‑ro.
Ni ɨɨn se n‑dakuaʼa‑ia ña n‑juini xa kajan tnuʼu‑s jundu kuu‑ia,
chi n‑ka kutnuni ini‑s xa Xtoʼo‑s kuu se ijan.
13 N‑kuyatni Jesús nuu kayu ñuʼu,
te n‑tnɨɨ‑ia tila,
te n‑dakexio‑ia tila nuu‑s.
Te dani n‑kida‑ia chaka.
14 Vuelta yaʼa kuu vuelta kuu uni,
xa n‑nadandeʼa Jesús mee‑ia nuu se n‑dakuaʼa‑ia,
na n‑yaʼa xa n‑nandoto‑ia nuu n‑kuu‑ia ndɨyɨ.
N‑jaʼan Jesús xiʼin Spedru
15 Na n‑yaʼa xa n‑ka xadi ini‑s,
te n‑xijan tnuʼu Jesús nuu Simón Spedru:
—Simón,
daʼya yɨɨ Jonás,
¿xemani ñaʼa ka mee‑n dada se yaʼa u?
N‑jaʼan‑s nuu‑ia:
—Joon,
Xtoʼo‑da,
naʼa mee‑n xa xemani ñaʼa‑da.
N‑jaʼan‑ia nuu‑s:
—Ná ka kuu tkachi kuechi,
ka kuu ñayiu jandixa ñaʼa mee‑r.
Juñaʼa xa kax koio tkachi kuechi‑r.
16 N‑xijan tnuʼu‑ia nuu‑s vuelta kuu uu:
—Simón,
daʼya yɨɨ Jonás,
¿xemani ñaʼa‑n a?
N‑jaʼan‑s nuu‑ia:
—Joon,
Xtoʼo‑da,
naʼa mee‑n xa xemani ñaʼa‑da.
N‑jaʼan‑ia nuu‑s:
—Junuu tkachi‑r.
17 N‑xijan tnuʼu‑ia‑s vuelta kuu uni:
—Simón,
daʼya yɨɨ Jonás,
¿xemani ñaʼa‑n a?
N‑tnau ini Spedru,
xaxeʼe xa n‑xijan tnuʼu‑ia‑s vuelta kuu uni:
“¿Xemani ñaʼa‑n a?”
N‑jaʼan‑s nuu‑ia:
—Xtoʼo‑da,
naʼa mee‑n ntdantuʼu.
Naʼa‑n xa xemani ñaʼa‑da.
N‑jaʼan Jesús nuu‑s:
—Juñaʼa xa kax koio tkachi‑r.
18 Xandaa kuu xa jaʼan‑r.
Na luchi ka‑n,
n‑ndukutu‑n daʼma‑n,
te n‑xikonuu‑n davaʼa nga nuu n‑juini‑n.
Ko na xee xa kuxaʼnu‑n,
diko nga kuita ndaʼa‑n,
te ndadakutu ñaʼa ɨnka ñayiu,
te kandeka ñaʼa‑i jɨʼɨn,
nuu ma tna ini‑n xa jɨʼɨn‑n.
19 Te duʼa jaʼan Jesús nanda kuu hora kuú Spedru.
Hora ijan kada Spedru xa kutnuni ini koio ñayiu xa kunxaʼnu ka Ianyuux.
Te n‑jaʼan‑ia nuu‑s:
—¡Kunduu naʼi xiʼin mee‑r!
Se yo n‑xemani Jesús
20 N‑konenuu Spedru,
te n‑xini‑s se yo n‑xemani Jesús ndijun ñaʼa‑s.
Se ijan kuu se n‑xo nukoo diñi Jesús,
hora n‑xaxdini‑ia xiʼin se n‑dakuaʼa‑ia ɨnka xakuaa ijan.
Hora ijan,
n‑xijan tnuʼu se ijan nuu‑ia:
“Xtoʼo‑da,
¿ndeda‑da kuu se diko ñaʼa?”
21 Te n‑xini Spedru se ijan xa ndijun ñaʼa‑s,
te n‑xijan tnuʼu‑s nuu Jesús:
—Xtoʼo‑da,
¿te nax yaʼa mee‑s?
22 N‑jaʼan Jesús nuu Spedru:
—Nux juini‑r xa ndoo naʼi‑s nde na ndixi‑r,
te maxku kɨ ini mee‑n xaxeʼe‑s.
¡Kunduu naʼi mee‑n xiʼin mee‑r!
23 Xijan kuu xa n‑ka tekutnuʼu ñani‑ro,
kuʼa‑ro xa ma kuú se ijan,
se n‑dakuaʼa Jesús.
Ko ña n‑jaʼan Jesús xa ma kuú‑s.
N‑jaʼan‑ia:
“Nux juini‑r xa ndoo naʼi‑s nde na ndixi‑r,
te maxku kɨ ini mee‑n xaxeʼe‑s.”
24 Se ijan,
se n‑dakuaʼa Jesús kuu‑s,
se jaʼan ndaa xaxeʼe xaʼa,
se n‑kidavaʼa tnuʼu yaʼa kuu‑s.
Te xnaʼa‑da xa jaʼan‑s xa kuu xandaa.
25 Te io kueʼe ɨnka xa n‑kida Jesús.
Nux n‑yodotnuni ɨɨn ɨɨn n‑kuu,
te xani ini‑da xa yo kueʼe xa kueʼe libru koo,
xa ni ma kueʼe ñuñayiu n‑kuu.
Amén.
Duʼa na koo.