N‑nandoto Jesús
20
Kɨu kiʼna nuu semana,
juaʼan María Magdalena yau kava jan.
Datne neʼe kuu,
dani iin nee ka.
N‑xini‑i xa ñatuka ndiʼu yuú yau.
2 N‑kendava‑i,
n‑naxee‑i nuu tuu Simón Spedru,
xiʼin ɨnka se n‑dakuaʼa Jesús,
se yo n‑xemani‑ia.
N‑jaʼan‑i nuu‑s:
—N‑ka kineʼe ñayiu yɨkɨ kuñu Xtoʼo‑ro yau kava,
te ña xini‑da ndexu n‑ka kida ñaʼa‑i.
3 Ijan n‑kee Spedru,
xiʼin se ijan,
ɨnka se n‑dakuaʼa Jesús kuu‑s,
te ka xeʼen‑s,
nduu‑s,
yau kava.
4 N‑ka kendava‑s nduu‑s,
ko xee ka n‑kendava se ijan.
Ɨnka se n‑dakuaʼa Jesús kuu‑s,
te kiʼna ka se ijan n‑xee yau kava.
5 N‑xajan nenu‑s xiti yau kava,
te n‑xini‑s daʼma ndi Jesús kandodo ijan,
ko ña n‑kɨu‑s yau kava.
6 Ndijun ka Simón Spedru n‑xee,
te n‑kɨu mee‑s yau kava,
te n‑xini‑s daʼma ndi Jesús kandodo ijan.
7 Te dɨuni n‑xini‑s daʼma n‑xo daʼu nuu‑ia kandodo ijan.
Ña kandodo kaʼnu daʼma jan xiʼin ɨnka daʼma.
Nuu kandodo dɨɨn daʼma katnaʼnu.
8 Ijan dada,
n‑kɨu se ijan,
ɨnka se n‑dakuaʼa Jesús kuu‑s,
xiti yau kava.
Kiʼna ka‑s n‑xee,
ko ña n‑kɨu‑s ijan.
N‑xini‑s,
te n‑jandixa‑s.
9 Te tnuʼu Ianyuux n‑ka chidotnuni seyɨɨ xá n‑kuu kueʼe kuia,
jaʼan xa io xa nandoto Jesús nuu n‑kuu‑ia ndɨyɨ.
Ko se n‑dakuaʼa‑ia,
ta kutnuni ini koio ka‑s tnuʼu yaʼa.
10 Te ka nuʼu se n‑dakuaʼa Jesús veʼe‑s.
N‑kixee Jesús nuu María Magdalena
11 Te nujuiin María Magdalena yata yau kava jan.
Te ndaʼi‑i.
Nɨni ndaʼi‑i,
te n‑xajan nenu‑i xa kundeʼa‑i xiti yau kava.
12 N‑xini‑i uu ángel,
ia ka xinokuechi nuu Ianyuux.
Xniʼna‑ia daʼma kuixi,
te xtuu‑ia nuu n‑kaa ndi Jesús.
Ɨɨn‑ia nukoo nuu n‑kaa dɨkɨ‑ia,
ɨnka‑ia nukoo nuu n‑kaa xeʼe‑ia.
13 N‑ka jaʼan‑ia:
—Ñadɨʼɨ,
¿nakuenda ndaʼi‑n?
N‑jaʼan‑i:
—Xneʼe ñayiu yɨkɨ kuñu Xtoʼo‑da juaʼan,
te ña xini‑da ndexu n‑kida‑i.
14 N‑jaʼan‑i tnuʼu yaʼa,
te n‑konenuu‑i.
N‑xini‑i Jesús nujuiin‑ia ijan,
ko ña n‑najini‑i‑ia.
15 N‑jaʼan Jesús:
—Ñadɨʼɨ,
¿nakuenda ndaʼi‑n?
¿Jundu nanduku‑n?
N‑xani ini‑i xa se ñunuu jardín kuu‑s,
te n‑jaʼan‑i:
—Dito,
nux mee‑n n‑ndeka‑ia juaʼan,
kachitnuñaʼa‑n ndexu io‑ia,
xa kuaʼa‑da xa kandeka‑da‑ia jɨʼɨn.
16 N‑jaʼan Jesús:
—¡María!
N‑konenuu‑i,
te tnuʼu hebreu n‑jaʼan‑i:
—¡Raboni!
(Te raboni juini kachi:
maestru.)
17 Te n‑jaʼan Jesús:
—Maxku tnɨɨ ñaʼa‑n,
chi ta ndaa ka‑r nuu tuu Taa‑r.
Juaʼan nuu xtuu ñani‑r.
Juña tnuʼu‑n nuu‑s:
“Nuʼu‑r nuu tuu Taa‑r.
Taa mee‑n kuu‑ia tuku.
Ianyuux jandixa mee‑r kuu‑ia,
te Ianyuux ka jandixa mee‑n tuku.”
18 N‑xee María Magdalena nuu xtuu se n‑dakuaʼa Jesús.
N‑jaʼan‑i nuu‑s:
—¡Xá n‑xini‑da Xtoʼo‑ro vitna!
Ijan dada n‑jaʼan‑i nuu mee‑s ntdaa xa n‑jaʼan Jesús nuu mee‑i.
N‑kixee Jesús nuu se n‑dakuaʼa‑ia
19 Na n‑kunee kɨu kiʼna nuu semana,
daa n‑ka nataka se n‑dakuaʼa Jesús.
Vaʼa ndiʼu yeʼe,
chi n‑ka yuʼu‑s nuu se Israel.
Ijan n‑xee Jesús,
te n‑nujuiin‑ia meʼñu mee‑s.
N‑jaʼan‑ia:
—Na kada Ianyuux xa kutuu vaʼa koio‑n.
Jesús se aparece a los discípulos (Juan 20.19-31)
20 Na n‑jaʼan‑ia tnuʼu yaʼa,
n‑dandeʼa‑ia‑s ndaʼa‑ia xiʼin yɨkɨ naʼa‑ia.
Xijan kuu xa yo n‑ka kuvete se n‑dakuaʼa‑ia,
na n‑ka xini‑s Xtoʼo‑ro.
21 N‑jaʼan Jesús ɨnka vuelta:
—Na kada Ianyuux xa kutuu vaʼa koio‑n.
Ná n‑tundaʼa ñaʼa Taa‑r mee‑r,
da tundaʼa ñaʼa mee‑r mee‑n.
22 Na n‑jaʼan‑ia tnuʼu yaʼa,
n‑tutachi‑ia nuu‑s,
ntdaa‑s,
te n‑jaʼan‑ia:
—Juejoon koio xa kadatniu Espíritu Ii anu‑n.
23 Ɨɨn ñayiu,
nux taxkanu ini‑n kuechi‑i,
xá n‑taxkanu ini Ianyuux kuechi‑i.
Nux ma taxkanu ini‑n kuechi‑i,
dani tuu‑i xiʼin kuechi‑i.
N‑xini Tomás xa n‑nandoto Jesús
24 Ko Tomás,
se n‑ka xo danani‑s Cuati,
ña n‑xo tuu‑s xiʼin‑s hora n‑xee Jesús.
Se n‑dakuaʼa Jesús kuu‑s,
ko xakuaa ijan,
ña n‑xo tuu‑s xiʼin‑s.
25 Xijan kuu xa n‑ka jaʼan ɨnka se n‑dakuaʼa Jesús nuu‑s:
—¡N‑ka xini‑r Xtoʼo‑ro vitna!
Ko n‑jaʼan Tomás nuu‑s:
—Io xa jini‑r ndaʼa‑ia,
nuu n‑ka keé ndɨi kaa.
Xiʼin dɨkɨ ndaʼa‑r,
io xa tnɨɨ‑r nuu n‑ka keé‑i.
Xiʼin ndaʼa‑r,
io xa tnɨɨ‑r yɨkɨ naʼa‑ia.
Dada kuu xa jandixa‑r xa ka jaʼan‑n.
26 Nuu una kɨu,
ɨnka vuelta n‑ka nataka se n‑dakuaʼa‑ia xiti veʼe jan.
Te vuelta yaʼa n‑xo tuu Tomás xiʼin‑s.
Juini n‑xo ndiʼu vaʼa yeʼe,
ko n‑xe kɨu Jesús xiti veʼe,
te n‑nujuiin‑ia meʼñu mee‑s.
N‑jaʼan‑ia:
—Na kada Ianyuux xa kutuu vaʼa koio‑n.
27 Dada n‑jaʼan‑ia nuu Tomás:
—Xiʼin dɨkɨ ndaʼa‑n,
tnɨɨ ñaʼa yaʼa.
Kundeʼa ndaʼa‑r.
Xiʼin ndaʼa‑n,
tnɨɨ yɨkɨ naʼa‑r.
Te maxku ku kuu ka‑n ɨɨn se ña jandixa.
Jandixa ñaʼa.
28 N‑jaʼan Tomás:
—¡Xtoʼo‑da kuu‑n!
¡Ianyuux jandixa‑da kuu‑n!
29 N‑jaʼan Jesús:
—Xaxeʼe xa xiʼin nuu‑n n‑xini ñaʼa‑n,
vitna jandixa‑n.
¡Naka kuvete koio ñayiu ña n‑xini ñaʼa xiʼin nuu‑i,
ko dani jandixa ñaʼa‑i!
Libru yaʼa n‑kuaʼa, xa jandixa ñayiu Jesús
30 Kueʼe ka milagru n‑kida Jesús xa n‑ka xini se n‑dakuaʼa‑ia,
ko ñatu yodotnuni yaʼa.
31 Ko n‑kidavaʼa‑da tnuʼu yaʼa,
xa jandixa koio mee‑n xa Jesús kuu Cristu,
Ia n‑tundaʼa Ianyuux,
te kuu‑ia Daʼya Yɨɨ Ianyuux.
N‑kidavaʼa‑da tnuʼu yaʼa,
xa jandixa koio mee‑n mee‑ia,
te duʼa kutuu vaʼa koio mee‑n,
xiʼin mee‑ia kuia ma jɨn ndɨʼɨ.