N‑nandoto Jesús nuu n‑kuu‑ia ndɨyɨ
16
Na n‑yaʼa kɨu ndetatu,
n‑ka xeen ñadɨʼɨ yuku xeʼen vaʼa,
xa jɨʼɨn‑ña jɨn dakuchi‑ña ñɨɨ ndi Jesús.
María Magdalena xiʼin María,
dɨʼɨ Jacobo,
xiʼin Salomé.
San Marcos 16:1-20
2 Kɨu kiʼna nuu semana,
neʼe n‑ka kee‑ña xa xee‑ña nuu kaa yɨkɨ kuñu ndi Jesús.
Na n‑tuu,
n‑ka xee‑ña yau kava jan.
3 N‑xijan tnuʼu tnaʼa‑ña:
—¿Jundu dita toto ndiʼu yuyau?
4 Ko hora n‑ka xo ndeʼa‑ña,
n‑ka xini‑ña xa xá n‑xiko juiin toto yuyau.
Yo loko kaʼnu toto jan,
yo vee.
5 Na n‑ka kɨu‑ña xiti yau kava,
n‑ka xini‑ña ɨɨn solteru nukoo ɨɨn lado ndaʼa kuaʼa.
Niʼna‑s daʼma kuixi,
daʼma kani.
Te n‑ka yuʼu‑ña.
6 Ko n‑jaʼan‑s:
—Maxku yuʼu ka‑n.
Nanduku‑n Jesús,
se ñuu Nazaret,
se n‑xitakaa nuu curuxi.
Ko xá n‑nandoto‑ia,
ña yoo‑ia yaʼa.
Kundeʼa koio‑n nuu n‑kaa‑ia.
7 Juan nuʼu‑n.
Juña tnuʼu koio‑n se n‑dakuaʼa‑ia xiʼin Spedru:
“Ditna ka mee‑ia naxee Galilea.
Ijan kundeʼa koio‑n‑ia,
nani n‑jaʼan‑ia nuu‑n.”
8 Xino‑ña n‑ka kee‑ña yau kava.
Xnɨʼɨ‑ña,
te ka yuʼu anu‑ña.
Ña n‑ka jaʼan ka‑ña ni ɨɨn tnuʼu nuu ni ɨɨn ñayiu,
chi n‑ka yuʼu anu‑ña.
N‑kixee Jesús nuu María Magdalena
9 Neʼe datne,
kɨu kiʼna nuu semana,
n‑nandoto Jesús.
Ditna ka n‑xee‑ia nuu María Magdalena.
Te xá n‑kuu kueʼe kɨu,
n‑kineʼe‑ia uxa tachi uʼu anu‑i.
10 Te mee‑i juan juña tnuʼu nuu ñayiu n‑ka xo kunduu xiʼin‑ia.
Ñayiu jan,
kueʼe n‑ka xo tnau ini‑i,
te n‑ka xo ndaʼi‑i.
11 Na n‑ka teku‑i xa n‑nandoto Jesús te n‑xini María Magdalena mee‑ia,
ña n‑ka jandixa‑i xa n‑nandoto‑ia.
N‑kixee Jesús nuu uu se n‑dakuaʼa‑ia
12 Na n‑ñini ka,
ka xika uu seyɨɨ ichi juaʼan yuku.
N‑xee Jesús nuu‑s,
ko tuku kaa‑ia.
13 Juan nuʼu‑s,
te n‑ka xian tnuʼu‑s nuu dava ka‑s,
ko dani ña n‑ka jandixa‑s mee‑s.
“Juan juña tnuʼu koio‑n tnuʼu vaʼa Ianyuux nituʼu ñuñayiu”
14 N‑ñini ka,
n‑ka nukoo uxi ɨɨn se n‑dakuaʼa‑ia,
xa kax koio‑s,
te n‑xee Jesús nuu‑s.
N‑kudeen‑ia nuu‑s,
xaxeʼe xa ña ka jandixa‑s,
te ña juini anu‑s xa jandixa‑s.
N‑kudeen‑ia nuu‑s,
xaxeʼe xa ña n‑ka jandixa‑s ñayiu n‑ka xini‑ia xa n‑nandoto‑ia.
15 N‑jaʼan‑ia nuu‑s:
—Juaʼan koio ntdaa ñuu ñuñayiu,
juan juña tnuʼu koio tnuʼu vaʼa Ianyuux nuu ntdaa ñayiu.
16 Davaʼa nga ñayiu jandixa ñaʼa mee‑r,
te juendute‑i,
te dakaku ñaʼa Ianyuux mee‑i,
xa ma jɨʼɨn‑i andea.
Davaʼa nga ñayiu ma jandixa ñaʼa mee‑r,
ma dakaku ñaʼa Ianyuux mee‑i.
17 Nux jandixa ñaʼa ñayiu mee‑r,
te kada‑r xa kada koio‑i milagru,
te kada‑r xa kineʼe koio‑i tachi uʼu anu ñayiu.
Jaʼan koio‑i tnuʼu xee.
18 Nux tnɨɨ koio‑i koo,
ko ña tuu nax kada ñaʼa‑tɨ.
Te nux koʼo‑i ɨɨn xa kuu venenu,
ma kada dañu ñaʼa.
Kajan ndodo koio‑i ndaʼa‑i ñayiu kuʼu,
te ndvaʼa ñayiu kuʼu.
Juan nuʼu Jesús nde andɨu
19 Na n‑yaʼa xa n‑jaʼan‑ia tnuʼu yaʼa,
n‑nakueka Ianyuux Xtoʼo‑ro Jesús juan nuʼu nde andɨu.
Ijan nukoo‑ia vitna,
ndaʼa kuaʼa Ianyuux.
20 Te n‑ka xeʼen se n‑dakuaʼa‑ia nituʼu ñuñayiu.
N‑ka xian tnuʼu‑s tnuʼu vaʼa Ianyuux nuu ñayiu.
Te n‑chindee Xtoʼo‑ro Jesús mee‑s.
N‑kida‑ia xa n‑ka kida‑s milagru,
te duʼa n‑ka jandixa kueʼe ñayiu tnuʼu‑s.
Amén,
duʼa na koo.