N‑nandoto Jesús
28
Kɨu kixeʼe semana ntanene ka juaʼan María Magdalena xiʼin ɨnka María xa koto koio‑ña yau kava nuu n‑kaa‑ia.
2 Danaa ndeʼe n‑tnaa.
N‑juun ɨɨn ángel,
ia xinokuechi nuu Ianyuux,
nde andɨu.
N‑xetuʼa‑ia yau kava jan te n‑dita‑ia yuú tkute ndiʼu yau kava jan,
te n‑nukoo‑ia nuu yuú jan.
3 Kaa‑ia na kaa taxa hora kee.
Kuixi daʼma niʼno‑ia na kuixi yuʼa juun.
4 N‑ka yuʼu soldado xndee yau kava jan.
N‑ka nɨʼɨ‑s te n‑ka kuyutnu‑s na kuyutnu ndɨyɨ.
5 N‑jaʼan ángel,
ia xinokuechi nuu Ianyuux,
nuu ñá xnii ijan:
—Maxku yuʼu koio‑n.
Xa naʼa‑r xa Jesús,
Ia n‑xitakaa dika ka nanduku‑n.
6 Ñayo ka‑ia.
¿Ñatu xnaʼa‑n xa n‑jaʼan‑ia xa nandoto‑ia u?
Juan ndeʼa nuu n‑kaa niʼni‑ia.
7 Juan juña tnuʼu koio se n‑dakuaʼa‑ia xa n‑nandoto‑ia,
te ñadu xa ku kukuee koio‑n.
Kiʼna ka‑ia nuʼu Galilea;
ijan dada nuʼu koio‑n ijan,
te kundeʼa‑n‑ia.
Xaʼa kuu xa kachi tnuʼu ñaʼa‑r —kuu ángel,
ia xinokuechi nuu Ianyuux,
xiaʼan‑ia.
8 Ñatu n‑ka kukuee‑ña xa n‑ka ndee‑ña yau kava jan chi hora ijan ni n‑ka ndee‑ña.
N‑ka yuʼu‑ña te dɨuni n‑ka kudɨ ini‑ña.
N‑ka kendava‑ña.
Juan nuʼu koio‑ña xa kachi tnuʼu ñaʼa‑ña ntdaa daña,
se n‑dakuaʼa ñaʼa Jesús.
9 Nɨni juan nuʼu koio‑ña,
n‑ka nanitnaʼa‑ña xiʼin Jesús.
Xiaʼan‑ia nuu‑ña:
—Vaʼa nga taʼu kuu‑n.
N‑ka xetuʼa‑ña‑ia te n‑ka xe juiin xiti‑ña nuu‑ia.
N‑ka nundee‑ña xeʼe‑ia te n‑ka nakuetu‑ña nuu‑ia.
10 Xiaʼan‑ia nuu‑ña:
—Maxku yuʼu koio‑n.
Juan juñaʼa‑n ñayiu n‑dakuaʼa‑r xa na nuʼu koio‑i Galilea.
Te ijan nanitnaʼa‑r xiʼin‑i.
N‑ka najani soldado xa n‑yaʼa nuu n‑xe konduxi Jesús
11 Juan nuʼu koio‑ña te dɨuni juan nuʼu dava soldado n‑ka xo ndee yau kava nuu n‑kaa yɨkɨ kuñu‑ia Jerusalén xa juña tnuʼu‑s dutu ka taxnuni ntdaa xa n‑yaʼa.
12 N‑ka kida ɨnuu dutu jan xiʼin sexaʼnu ka taxnuni nuu ñayiu Israel xa juñaʼa koio‑s kueʼe tvini soldado jan.
13 Ka xiaʼan‑s nuu soldado jan:
—Jaʼan koio‑n nuu ñayiu xa nɨni ka kidi‑n n‑ka xeʼen se n‑dakuaʼa ñaʼa Jesús xakuaa ijan,
te n‑ka duʼu‑s yɨkɨ kuñu‑s.
14 Te nux na teku gobernador,
juñaʼa koio‑r nuu‑s xa maxku ñaʼa kada ñaʼa‑s te jandixa‑s xa jaʼan koio‑r nuu‑s —kuu‑s,
ka xiaʼan‑s nuu soldado jan.
15 N‑ka tnɨɨ‑s tvini te n‑ka kida‑s na n‑ka taʼu tniu‑s nuu‑s.
Te nituʼu nación Israel n‑ka teku ñayiu xijan.
Nde vitna duʼa ka najani ñayiu.
N‑tetutniu Jesús ñayiu dakuaʼa‑ia
16 Ijan dada juan nuʼu nɨn uxi ɨɨn daña,
se n‑dakuaʼa ñaʼa Jesús Galilea.
Nu n‑ka naxee‑da ijan,
te juaʼan koio‑da ɨɨn yuku nuu n‑taʼu tniu‑ia xa jɨʼɨn koio‑da.
17 Nu n‑ka xini‑da Jesús ijan,
te n‑ka xe juiin xiti‑da nuu‑ia.
N‑ka nakuetu‑da nuu‑ia,
ko n‑ka xe tnɨɨ anu dava ñayiu chi n‑ka xani ini‑i xa ña dɨu‑ia.
18 N‑xetuʼa ñaʼa Jesús te n‑jaʼan‑ia nuu‑da:
—N‑kida Ianyuux xa taxnuni‑r andɨu xiʼin ñuñayiu ná taxnuni mee‑ia.
19 Juaʼan koio te kada‑n xa na kukanu ini ñaʼa ñayiu ntdantuʼu ñuu ñuñayiu ruʼu.
Dajuendute koio‑n ñayiu kukanu ini koio Taa‑ro Ianyuux,
Daʼya Yɨɨ‑ia xiʼin Espíritu‑ia.
20 Juñaʼa koio‑n nuu‑i xa na jandixa koio‑i ntdaa xa n‑taʼu tniu‑r.
Jun ini koio‑n xa kunduu‑ro ndɨkɨu ndɨñuu,
te dani kunduu naʼi‑ro nde kɨu na naa ñuñayiu —kuu‑ia,
n‑jaʼan‑ia nuu‑da ntdaa‑da.