N‑dakueʼne Judas mee‑s
27
Nu n‑tuu kɨu kuu uu,
te n‑ka kida ɨnuu dutu ka taxnuni xiʼin sexaʼnu ka taxnuni nuu ñayiu Israel xa kaʼni koio‑s Jesús.
2 N‑ka duku ñaʼa‑s te xndeka ñaʼa‑s juaʼan nuu se kuu gobernador romano nani Pilato.
3 Xaxeʼe xa n‑xini Judas,
se n‑kida xa n‑ka tnɨɨ juxtixia Jesús,
xa xá n‑ka jaʼan‑s xa io kuechi Jesús te kaʼni koio‑s‑ia,
xijan kuu xa n‑natu ini‑s,
te n‑xeʼen‑s veñuʼu xa n‑nangoneʼe‑s oko uxi tvini kuu plata jan nuu dutu ka taxnuni xiʼin nuu sexaʼnu ka taxnuni nuu ñayiu Israel.
4 Xiaʼan‑s:
—N‑kida‑da kuechi chi n‑kida‑da xa tnɨɨ juxtixia ɨɨn se ña tuu na kuechi n‑kida.
Ka xiaʼan‑s:
—¿Nax kada koio‑r u?
Dian koto mee‑n.
5 Te n‑dajane Judas tvini jan xiti veñuʼu Jerusalén te n‑kee‑s.
Juaʼan‑s,
te n‑xe dakueʼne‑s mee‑s.
6 N‑ka ndoneʼe dutu ka taxnuni jan tvini jan,
te n‑ka xiaʼan tnaʼa‑s:
—Ña vaʼa xa dakeé‑ro tvini yaʼa alcancía veñuʼu chi yaʼu ndɨyɨ n‑kuu.
7 N‑ka kida ɨnuu‑s xa jueen koio‑s ñuʼu ɨɨn se kidavaʼa koʼo xiʼin kɨdɨ ñuʼu xa koo ɨɨn nuu ku nkonduxi ñayiu toʼo.
8 Xijan kuu xa nde vitna,
dandee ñayiu ñuʼu ijan Ñuʼu Ndɨyɨ.
9 N‑xetnaʼa tnuʼu n‑chidotnuni Jeremías,
se n‑jaʼan nuu ñayiu xa n‑jaʼan Ianyuux.
Duʼa n‑chidotnuni‑s:
“Oko uxi moneda kuu plata kuu yaʼu‑s.
Yaʼu n‑xantuu se Israel kuu.
10 N‑ka tnɨɨ‑s tvini n‑ka niʼi‑s xa n‑ka diko‑s‑sɨ,
te n‑ka xe jueen‑s ñuʼu ɨɨn se kidavaʼa koʼo xiʼin kɨdɨ.”
Dɨuni n‑chidotnuni‑s:
“Duʼa n‑taʼu tniu Ianyuux xa kada‑da.”
N‑xee Jesús nuu Pilato
11 N‑xee Jesús nuu se kuu gobernador jan,
te n‑xijan tnuʼu‑s‑ia:
—¿Mee‑n kuu se taxnuni nuu ñayiu Israel a?
Te n‑jaʼan Jesús:
—Joon.
12 N‑ka tekuechi neñuu dutu ka taxnuni xiʼin sexaʼnu ka taxnuni nuu ñayiu Israel‑ia,
te ni ɨɨn tnuʼu ñatu n‑jaʼan‑ia.
13 Xijan kuu xa n‑xijan tnuʼu ñaʼa Pilato:
—¿Ñatu chinuu‑n xa ka jaʼan‑s xa io kuechi‑n a?
14 Xaxeʼe xa ni ɨɨn xa ña tuu nax n‑jaʼan‑ia nuu‑s,
tuku n‑kuu ini‑s.
15 Ntnaʼa kuia n‑xo dayaa gobernador jan ɨɨn se yɨndiʼu vekaa kɨu kuu viko Paxcua.
Dayaa‑s davaʼa nga se ka kaxí niʼno ñaʼa ñayiu ka xko yuku viko jan.
16 Tiempu ijan yɨndiʼu ɨɨn se nani Jesús Barrabás.
Ntdaa ñayiu n‑xo xini xa se loko kuu‑s.
17 N‑ka nataka ñayiu nuu Pilato te xiaʼan‑s:
—¿Ndeda ɨɨn‑s ka juini‑n xa dayaa‑r,
Barrabás a Jesús,
se ka jaʼan‑n xa kuu‑s Cristu a?
18 Duʼa n‑jaʼan‑s chi n‑kutnuni ini‑s xa n‑ka tekuechi neñuu‑s‑ia xaxeʼe xa n‑ka kukuedi ini‑s.
19 Nɨni nukoo Pilato jan nuu xko nukoo‑s xa ndadandaa‑s kuechi ñayiu,
n‑tundaʼa ñadɨʼɨ‑s ɨɨn tutu nuu‑s.
Duʼa n‑chidotnuni‑ña:
—Maxku ñaʼa kada‑n té dian chi n‑daxene ñaʼa‑te na tuu datne vitna,
te ndaʼu n‑yaʼa‑da,
te té vaʼa kuu‑te —kuu‑ña,
xiaʼan‑ña.
20 N‑ka dajaʼan dutu ka taxnuni xiʼin sexaʼnu ka taxnuni nuu ñayiu Israel se xyuku ijan xa jaʼan koio‑s nuu gobernador jan xa dayaa‑s Barrabás te na kaʼni‑s Jesús.
21 Te n‑xijan tnuʼu ntuku gobernador jan ñayiu:
—¿Ndeda‑s ka juini‑n xa dayaa‑r?
Ka xiaʼan‑i:
—Barrabás.
22 N‑xijan tnuʼu ka‑s‑yɨ:
—¿Te nax kada‑r Jesús,
se ka jaʼan‑n xa kuu‑s Cristu?
Ka xiaʼan‑i ntdaa‑i:
—Katakaa dika‑n‑sɨ.
23 Te xiaʼan‑s:
—¿Nakuenda?
¿Na kuechi n‑kida‑s?
Xee ka n‑ka kana‑i.
Ka xiaʼan ntuku‑i:
—Katakaa dika‑n‑sɨ.
24 Xaxeʼe xa ña n‑kundee tnuʼu Pilato xa daxino ini‑s ñayiu xiʼin xa xee ka n‑ka kana‑i xiʼin xa n‑ka ndundeʼe‑i,
xijan kuu xa n‑nandaʼa Pilato nuu‑i.
Xiaʼan ntuku‑s nuu‑i:
—Ña tuu na kuechi‑r xa kaʼni‑n‑sɨ.
Kundido kutau koio mee‑n‑sɨ.
Xaxeʼe xijan n‑nandaʼa‑s.
25 Te ka xiaʼan‑i ntdaa‑i:
—Kundido kutau‑da ntdaa‑da xiʼin daʼya dana‑da‑s.
N‑ka xakundee se ka kuu soldado Jesús
26 Ijan dada n‑dayaa Pilato Barrabás te n‑taʼu tniu‑s nuu soldado‑s xa na kani koio‑s‑ia chirrión ñɨɨ,
te katakaa dika ñaʼa koio‑s.
27 Xndeka soldado ka xinokuechi nuu gobernador jan Jesús juaʼan vetniu te n‑ka nadataka‑s ntdaa soldado yɨndaʼa‑s nuu nujuiin Jesús.
28 N‑ka tava‑s daʼma‑ia te n‑ka dakandixi‑s‑ia ɨɨn capa tndee kueʼe xndixi se taxnuni.
29 N‑ka kava niʼno‑s tnuyɨkɨ te n‑ka kidavaʼa‑s ɨɨn corona.
N‑ka tnaa‑s dɨkɨ‑ia te n‑ka xaʼnu‑s ndaʼa kuaʼa‑ia ɨɨn vara te n‑ka xakundee‑s‑ia.
Ka xiaʼan‑s:
—Na najuetnuʼu‑ro se taxnuni nuu ñayiu Israel.
30 N‑ka tudɨɨ‑s nuu‑ia,
te n‑ka tnɨɨ‑s vara neʼe‑ia,
te n‑ka jani‑s dɨkɨ‑ia.
31 Nu n‑yaʼa xa n‑ka xakundee‑s‑ia,
te n‑ka tava‑s capa niʼno‑ia te n‑ka dandukutu‑s‑ia daʼma mee‑ia.
Ijan dada xndeka‑s‑ia juaʼan xa katakaa dika‑s‑ia.
32 Nu n‑ka kee soldado xiʼin‑ia xa nkatakaa dika‑s‑ia,
te n‑ka xe juntnaʼa‑s xiʼin ɨɨn se nani Simón.
Se Cirene kuu‑s.
N‑ka taʼu tniu soldado jan xa kadoko‑s curuxi Jesús.
33 N‑ka xee‑s xiʼin‑ia nuu nani Gólgota.
Gólgota kuu Yɨkɨ Dɨkɨ Ndɨyɨ.
34 Te n‑ka xiaʼan‑s‑ia vinu daka kava kɨtɨ.
N‑xitotnuni‑ia,
ko ña n‑juini‑ia xa koʼo‑ia.
35 N‑ka xatakaa dika‑s‑ia te n‑ka dadɨkɨ‑s suerte‑s daʼma‑ia.
36 Te n‑ka nukoo‑s ijan xa kundee‑s‑ia.
37 N‑ka chidotnuni‑s nuu tutu nakuenda n‑ka xatakaa dika ñaʼa‑s te n‑ka tenee‑s dɨkɨ curuxi‑ia.
Duʼa yodotnuni:
“Se yaʼa kuu Jesús.
Taxnuni‑s nuu ñayiu Israel.”
38 Dɨuni n‑ka xatakaa dika‑s uu ñaduʼu.
Ɨɨn‑s diñi kuaʼa‑ia,
te ɨnka‑s diñi datni‑ia.
39 Dava ñayiu n‑ka xee ijan,
n‑ka xetuʼa‑i curuxi‑ia,
te n‑ka jan kuiʼa‑i‑ia.
Dɨuni n‑ka dakuiko‑i dɨkɨ‑i xaxeʼe xa ka xini uʼu‑i‑ia.
40 Te ka xiaʼan‑i nuu‑ia:
—Ndoʼo n‑jaʼan xa kanu‑n veñuʼu Jerusalén te nuu uni kɨu nadaxino‑n.
Xaxeʼe xa ɨɨn xa ña yoo ka kuaʼa kada‑i kuaʼa kada‑n,
dakaku mee‑n vitna.
Nux kuu‑n Daʼya Yɨɨ Ianyuux,
tanuu nuu curuxi de.
41 Dɨuni n‑ka xakundee dutu ka taxnuni xiʼin se ka tuʼa vaʼa ley n‑chidotnuni Moisés xiʼin sexaʼnu ka taxnuni nuu ñayiu Israel Jesús.
Ka xiaʼan tnaʼa‑s:
42 —N‑dakaku‑s dava ñayiu,
ko ña ndaku‑s xa dakaku‑s mee‑s.
Nux kuu‑s se taxnuni nuu roo,
ñayiu Israel,
na nuu‑s nuu curuxi vitnadii te kukanu ini‑ro‑s.
43 Na dakaku ñaʼa Ianyuux chi n‑jaʼan‑s xa kukanu ini‑s‑ia.
Nuxa yo tna ini ñaʼa‑ia,
na dakaku ñaʼa‑ia vitnadi chi n‑jaʼan‑s xa kuu‑s Daʼya Yɨɨ‑ia —kuu‑s,
ka xiaʼan tnaʼa‑s.
44 Dɨuni n‑ka jan kuiʼa ñaʼa ñaduʼu xtakaa dika diñi‑ia.
N‑xiʼí Jesús
45 Nituʼu ñuñayiu ñatuka ndii nde kaa x‑uu xiʼin nde kaa uni xañini.
46 Te hora ijan ni xee xa xee n‑kana Jesús:
—Elí,
Elí,
¿lema sabactani?
—kuu‑ia.
(Tnuʼu yaʼa kuu:
Taa‑ro Ianyuux,
Taa‑ro Ianyuux,
¿nakuenda n‑dandoo ñaʼa‑n?)
47 N‑ka teku dava se xnii yatni xeʼe curuxi xa n‑jaʼan‑ia,
te n‑ka jaʼan‑s:
—Elías kana‑s.
48 Hora ijan ni n‑kendava ɨɨn se tnaʼa nuu ñayiu xyuku ijan.
N‑xe jeʼen‑s ɨɨn esponja,
te n‑dakee ndita‑s nuu vinagri,
te n‑tendijun ndee‑s dɨkɨ ɨɨn vara,
te n‑tenee ndee‑s esponja jan yuʼu‑ia xa tɨʼu‑ia vinagri jan.
49 Dava ka‑s,
n‑ka jaʼan:
—Daa na koo naʼi‑s.
Na koto‑ro nuu na kixi Elías te dakaku‑s‑sɨ.
50 Xee xa xee n‑kana Jesús ɨnka vuelta te n‑xiʼí‑ia.
51 Hora ijan n‑ndata dava cortina ndita dava xiti veñuʼu Jerusalén.
Nde dɨkɨ‑i xiʼin nde xeʼe‑i n‑ndexio xa n‑ndata.
N‑tnaa,
te n‑ka taʼu toto.
52 N‑ka najaan yau kava nuu xyɨnduxi ñayiu n‑ka xiʼí,
te n‑ka nandoto kueʼe ñayiu n‑kida Ianyuux xa nduu‑i ñayiu ii.
53 N‑ka kee‑i yau kava na n‑yaʼa xa n‑nandoto Jesús,
te n‑ka ndɨu‑i Jerusalén,
ñuu ii,
xa na jini ñayiu ijan xa n‑ka nandoto‑i.
54 Nu n‑ka xini centurión xiʼin soldado n‑ka xo ndee xiʼin‑s Jesús xa n‑tnaa,
yo vichi n‑ka yuʼu‑s.
Te ka xiaʼan tnaʼa‑s:
—Xandaa xakuiti xa se yaʼa kuu Daʼya Yɨɨ Ianyuux.
55 Kueʼe ñadɨʼɨ n‑ka xo ndeʼa xika xa n‑yaʼa Jesús.
Nde Galilea n‑ka xe kuitandijun ñaʼa‑ña xa n‑ka chindee ñaʼa‑ña,
te dani xndijun ñaʼa‑ña n‑ka xee Jerusalén.
56 Nuu ñá yaʼa yɨtnaʼa María Magdalena.
Yɨtnaʼa María dɨʼɨ Jacobo xiʼin José.
Yɨtnaʼa dɨʼɨ daʼya Zebedeo du.
N‑xe konduxi Jesús
57 Nu n‑kutuku nuu ñuʼu,
te n‑xee ɨɨn se kuika n‑jandixa Jesús ijan.
Se Arimatea kuu‑s.
José nani‑s.
58 Ijan dada n‑xe nundajan‑s Jesús nuu Pilato.
Te n‑taʼu tniu Pilato xa na najuñaʼa koio soldado‑s‑ia.
59 Ijan dada n‑xe juneʼe‑s‑ia te n‑chiduku‑s‑ia ɨɨn daʼma lino io ndoo.
60 Te n‑xajan niʼni‑s‑ia ɨɨn xiti yau kava dijan n‑ka kaan se ka xinokuechi nuu‑s xa kava ndɨyɨ.
N‑xadɨ‑s yau kava jan ɨɨn yuú tkute kaʼnu n‑datuu‑s,
te juan nuʼu‑s.
61 Yatni nuu kaa niʼni yɨkɨ kuñu‑ia n‑ka xo nukoo María Magdalena xiʼin ɨnka María.
N‑ka xe kondee soldado nuu n‑xe konduxi‑ia
62 Kɨu kuu uu juaʼan koio dutu ka taxnuni nuu ñayiu Israel xiʼin se fariseu nuu Pilato.
Kɨu ka xko kida ñayiu Israel ntdandituʼu tniu‑i xa na ndetatu koio‑i ɨnka kɨu kuu.
63 Ka xiaʼan‑s nuu‑s:
—Dito,
ntdaa‑da ka xini xa n‑jaʼan se n‑dandaʼu ñayiu jan:
“Nuu uni kɨu nandoto‑r”,
kuu‑s,
n‑jaʼan‑s na n‑xo ndito‑s.
64 Xaxeʼe xa daa n‑jaʼan‑s taʼu tniu‑n xa yo vaʼa na nkondiʼu yau kava nuu kaa‑s.
Vaʼa na kundiʼu uni kɨu na ñaʼa jɨʼɨn koio se n‑dakuaʼa‑s te duʼu‑s yɨkɨ kuñu‑s te jaʼan koio‑s nuu ñayiu xa n‑nandoto‑s.
Nux daa na kada koio‑s,
naka kueʼe ka nayiu dandaʼu‑s dada xa kiʼna —kuu‑s,
ka xiaʼan‑s nuu Pilato.
65 Te xiaʼan Pilato nuu‑s:
—Kandeka koio soldado juaʼan xa na kundee‑s yau kava jan,
te vaʼa kadɨ koio mee‑n.
66 Te juaʼan koio‑s xiʼin soldado Pilato yau kava jan,
te yo vaʼa n‑ka xadɨ‑s.
N‑ka tenee‑s sellu nuu yuú ndiʼu nuu kaa‑ia,
te n‑ka taxndee‑s soldado jan.