N‑dakuaʼa Sua Bautista ñayiu nuu ñayo io
3
Tiempu ijan n‑kuu uxi koon kuia taxnuni Tiberio César.
Daa n‑taxnuni Poncio Pilato distrito Judea,
te n‑taxnuni Herodes distrito Galilea,
te n‑taxnuni ñani Herodes,
se nani Slipe distrito Iturea xiʼin nuu nani Traconite,
te Lisanias n‑taxnuni distrito Abilinia.
2 Dutu taxnuni ka n‑ka kuu Anás xiʼin Caifás.
Tiempu daa n‑jaʼan Ianyuux nuu Sua,
se kuu daʼya yɨɨ Zacarías.
N‑xo tuu‑s nuu ñatu nga juun dau,
te ñayo io.
3 N‑xeʼen‑s ntdaa ñuu kuechi xndatuu yuʼu ndute xika Deʼva Jordán xa n‑xo jaʼan‑s nuu ñayiu ijan xa na natu ini‑i xa n‑ka kida‑i kuechi te na juendute‑i xa na taxkanu ini Ianyuux xa n‑ka kida‑i.
4 N‑jaʼan‑s nuu ñayiu ná n‑chidotnuni Isaías,
se n‑xo jaʼan tnuʼu Ianyuux nuu ñayiu.
Duʼa n‑jaʼan Isaías:
Xee kana ɨɨn se kutuu nuu ñatu nga juun dau,
te ñayo io:
“Kada tuʼa‑n mee‑n ɨɨn ɨɨn‑n na kuaʼa na xe ini‑n Ianyuux,
Ia kuu Xtoʼo‑ro.
Kuenda kɨu ichi ka kuu‑n.
Ndadandaa‑n ichi jan.
5 Nadachitu‑n deʼva,
ndada ndaa‑n yuku xiʼin tnduu.
Ndineʼe ndaa‑n ichi.
Ndada ndaa‑n nuu kuiʼa kaa.
6 Te jini ntdaa ñayiu Ia dananitaʼu ñaʼa”,
kuu‑s,
xiaʼan‑s.
7 Kueʼe ñayiu n‑ka xo xeʼen nuu Sua xa dajuendute ñaʼa‑s.
N‑xo jaʼan‑s nuu‑i:
—Daʼya Kuiʼna ka kuu‑n.
¿Jundu n‑kachitnuʼu ñaʼa xa kaku koio‑n nuu Ianyuux?
¿Ka kachi ini‑n xa ma kiti ini‑ia nuu‑n na kixi‑ia u?
¿Jundu n‑kachitnuʼu ñaʼa xa ma ndadandaa‑ia kuechi‑n?
8 Nux xandaa xakuiti n‑ka natu ini‑n xa n‑ka kida‑n kuechi,
kada koio xavaʼa.
Maxku ku jaʼan koio‑n:
“Ndandɨʼɨ‑ro nuu Ianyuux chi daʼya dana Abraham ka kuu‑ro”,
chi ruʼu jaʼan xa kuaʼa Ianyuux xa kada‑ia xa yuú yaʼa nduu daʼya dana Abraham.
9 Ka kuu‑n kuenda kɨu yutnu taʼnde xa xá katuu kaa xeʼe‑tnu.
Ntdaa yutnu ñatu juun xavidi vaʼa,
taʼnde‑tnu,
te keé‑tnu nuu nuʼu koko.
10 Te n‑ka xo xijan tnuʼu ñayiu Sua:
—Nux duʼa yaʼa,
¿nax io xa kada koio‑da?
11 Te n‑xo xiaʼan Sua nuu‑i:
—Nux xnevaʼa‑n uu duʼnu,
juñaʼa koio ɨɨn ñayiu ñatu duʼnu io.
Dani nux xnevaʼa kueʼe‑n xa kaxi‑n,
juñaʼa koio ñayiu ña tuu nax kaxi io.
12 Se ka xijan tvini nandajan gobierno,
n‑ka xee‑s xa dajuendute ñaʼa Sua,
te n‑ka jaʼan‑s nuu‑s:
—Maestru,
¿nax io xa kada koio‑da?
13 Te xiaʼan Sua nuu‑s:
—Maxku kajan‑n kueʼe tvini nuu ñayiu;
kajan koio‑n nani taʼu tniu se ka taxnuni.
14 Dɨuni n‑ka xee soldado nuu‑s.
N‑ka jaʼan‑s:
—¿Nax io xa kada koio‑da?
Te xiaʼan‑s:
—Maxku tnɨɨ koio‑n ñayiu xa taxjuexa‑i tvini.
Maxku tekuechi‑n ñayiu kuechi neñuu xa niʼi koio‑n tvini.
Kajan koio tvini ñayiu nani taʼu tniu gobierno,
te ndoo koio‑n xiʼin tvini kuu yaʼu‑n;
maxku kukajan ini koio ka‑n tvini.
15 N‑xo ñu ini ñayiu jan xa kixi se n‑xiaʼan Ianyuux tnuʼu‑ia xa kixi‑s,
te ñayo‑i n‑xini nuu ndaa xa Sua kuu Cristu a ñaʼa.
16 Xijan kuu xa duʼa xiaʼan Sua nuu‑i:
—Ruʼu,
dajuendute ñaʼa,
te Ia kixi kada xa keé ñaʼa Espíritu Ianyuux,
te ndadandaa‑ia kuechi‑n.
Taxnuni ka‑ia dada ruʼu.
Ñatu natau xa junukuechi‑r nuu‑ia,
ni xa nandaxi‑r correa ndixa‑ia chi se dakuu nga kuu‑r.
17 Kuenda kɨu ɨɨn se neʼe pala‑s xa dandechi‑s trɨu‑s kuu‑ia.
Kuenda kɨu trɨu jan kuu ñayiu.
Se ijan nataxtnaʼa‑s trɨu‑s,
te chiʼi‑s ɨɨn veʼe,
te teñuʼu‑s paja nuu nuʼu koko nɨkava nɨkuita —kuu Sua,
xiaʼan‑s.
18 Yo kueʼe ka xa n‑dakuaʼa Sua ñayiu na n‑jaʼan‑s tnuʼu Ianyuux nuu ñayiu.
Ɨɨn xandaa kuu xa n‑xo jaʼan‑s.
19 Dɨuni n‑jaʼan doʼo‑s se taxnuni nani Herodes chi n‑xeka‑s ñadɨʼɨ ñani‑s.
Herodías nani‑ña.
Dɨuni n‑kanandee‑s‑sɨ chi kueʼe ka kuechi n‑kida‑s.
20 N‑xe xee ka kuechi Herodes jan chi n‑chindiʼu‑s Sua vekaa.
N‑xendute Jesús
21 Na ta chindiʼu ka Herodes Sua,
n‑dajuendute Sua ñayiu.
Dɨuni n‑dajuendute‑s Jesús.
Nɨni xijan taʼu‑ia nuu Ianyuux n‑najaan andɨu,
22 te n‑juun Espíritu Ianyuux dɨkɨ‑ia.
Data n‑nduu‑ia.
Nde andɨu n‑jaʼan Ianyuux nuu Jesús:
—Daʼya Yɨɨ Mani‑r kuu ñaʼa.
Vichi tna ini‑r xa kida‑n —kuu‑ia,
xiaʼan‑ia.
Bautizo de Jesús por Juan
Xixitna Jesús
23 N‑kixeʼe Jesús xa kada‑ia tniu Ianyuux.
Io‑ia naxa oko uxi kuia daa.
N‑xo xani ini ñayiu xa kuu‑ia daʼya yɨɨ José.
José n‑kuu daʼya Elí.
24 Elí n‑kuu daʼya Matat.
Matat n‑kuu daʼya Leví.
Leví n‑kuu daʼya Melqui.
Melqui n‑kuu daʼya Jana.
Jana n‑kuu daʼya José.
25 José n‑kuu daʼya Matatías.
Matatías n‑kuu daʼya Amós.
Amós n‑kuu daʼya Nahúm.
Nahúm n‑kuu daʼya Esli.
Esli n‑kuu daʼya Nagai.
26 Nagai n‑kuu daʼya Maat.
Maat n‑kuu daʼya Matatías.
Matatías n‑kuu daʼya Semei.
Semei n‑kuu daʼya José.
José n‑kuu daʼya Judá.
27 Judá n‑kuu daʼya Joana.
Joana n‑kuu daʼya Resa.
Resa n‑kuu daʼya Zorobabel.
Zorobabel n‑kuu daʼya Salatiel.
Salatiel n‑kuu daʼya Neri.
28 Neri n‑kuu daʼya Melqui.
Melqui n‑kuu daʼya Adi.
Adi n‑kuu daʼya Cosam.
Cosam n‑kuu daʼya Elmodam.
Elmodam n‑kuu daʼya Er.
29 Er n‑kuu daʼya Josué.
Josué n‑kuu daʼya Eliezer.
Eliezer n‑kuu daʼya Jorim.
Jorim n‑kuu daʼya Matat.
30 Matat n‑kuu daʼya Leví.
Leví n‑kuu daʼya Simeón.
Simeón n‑kuu daʼya Judá.
Judá n‑kuu daʼya José.
José n‑kuu daʼya Jonán.
Jonán n‑kuu daʼya Eliaquim.
31 Eliaquim n‑kuu daʼya Melea.
Melea n‑kuu daʼya Mainán.
Mainán n‑kuu daʼya Matata.
Matata n‑kuu daʼya Natán.
32 Natán n‑kuu daʼya David.
David n‑kuu daʼya Isaí.
Isaí n‑kuu daʼya Obed.
Obed n‑kuu daʼya Booz.
Booz n‑kuu daʼya Salmón.
Salmón n‑kuu daʼya Naasón.
33 Naasón n‑kuu daʼya Aminadab.
Aminadab n‑kuu daʼya Aram.
Aram n‑kuu daʼya Esrom.
Esrom n‑kuu daʼya Fares.
Fares n‑kuu daʼya Judá.
34 Judá n‑kuu daʼya Jacob.
Jacob n‑kuu daʼya Isaac.
Isaac n‑kuu daʼya Abraham.
Abraham n‑kuu daʼya Taré.
Taré n‑kuu daʼya Nacor.
35 Nacor n‑kuu daʼya Serug.
Serug n‑kuu daʼya Ragau.
Ragau n‑kuu daʼya Peleg.
Peleg n‑kuu daʼya Heber.
Heber n‑kuu daʼya Sala.
36 Sala n‑kuu daʼya Cainán.
Cainán n‑kuu daʼya Arfaxad.
Arfaxad n‑kuu daʼya Sem.
Sem n‑kuu daʼya Noé.
Noé n‑kuu daʼya Lamec.
37 Lamec n‑kuu daʼya Matusalén.
Matusalén n‑kuu daʼya Enoc.
Enoc n‑kuu daʼya Jared.
Jared n‑kuu daʼya Mahalaleel.
Mahalaleel n‑kuu daʼya Cainán.
38 Cainán n‑kuu daʼya Enós.
Enós n‑kuu daʼya Set.
Set n‑kuu daʼya Adán.
Adán n‑kuu daʼya Ianyuux chi n‑kidavaʼa‑ia‑s.