Ɨɨn se ñuu Gadara
5
Te n‑ka xee‑s nde ɨnka lado yundute kaʼnu,
nuu katuu ñuu ñayiu Gadara.
San Marcos 5:1-20
2 Na n‑kane Jesús barcu,
n‑nanitnaʼa‑ia xiʼin ɨɨn se ñuʼu tachi uʼu anu‑s.
3 Se yaʼa n‑kee‑s kava nuu xyɨnduxi ndɨyɨ,
chi ijan tuu‑s.
Ni cadena ña kuaʼa ka xa tetnɨɨ ñaʼa ni ɨɨn ñayiu.
4 Kueʼe vuelta n‑ka tetnɨɨ‑s‑sɨ yoʼo,
ko xaʼnde‑s yoʼo,
te kueʼe vuelta n‑ka tetnɨɨ‑s‑sɨ cadena,
ko xaʼnde‑s cadena.
Ni ɨɨn‑s ñayo ka ndaku nuu‑s.
5 Kɨu xiʼin kɨu,
nduu,
xakuaa,
n‑xikonuu‑s nua yuku.
N‑xo kana xiin‑s,
te xiʼin yuú n‑xo datnukueʼe‑s mee‑s.
6 Nde ijan n‑xini xika‑s Jesús,
te n‑kendava‑s juaʼan‑s nuu tuu‑ia,
te n‑xe juiin xiti‑s nuu‑ia.
7 Ndeʼe n‑kana xee‑s:
—Jesús,
Daʼya Yɨɨ Ianyuux taxnuni,
maxku ñaʼa kada ñaʼa‑n.
Na kada Ianyuux xa maxku kada uʼu ñaʼa‑n.
—¿Nax nani‑n?
N‑xiaʼan‑i:
—Nani‑da Ejército,
chi kueʼe‑da io.
10 Kueʼe n‑xijan taʼu tachi uʼu xa maxku tundaʼa‑ia‑i jɨʼɨn‑i.
11 Te yatni yuku ijan ka xaxi kueʼe xa kueʼe kuchi.
12 N‑ka xijan taʼu tachi uʼu:
—Tundaʼa ñaʼa‑n nuu yuku kuchi de,
xa na kɨu koio‑da anu‑tɨ.
13 N‑xejoon Jesús.
N‑ka kee tachi uʼu anu se ijan,
te n‑ka kɨu‑i anu kuchi.
N‑ka kendava‑tɨ.
N‑ka nuu‑tɨ nuu ndichi.
N‑ka keé‑tɨ nuu ndute kaʼnu.
Ijan n‑ka nduxi‑tɨ.
Vaa naxa uu mil kuchi n‑ka xiʼí nuu ndute.
14 Se xñunuu kuchi,
n‑ka kendava‑s juan nuʼu‑s ñuu‑s,
ranchu‑s,
xa juña tnuʼu‑s ntdaa xa n‑kuu,
te n‑ka kee kueʼe ñayiu ka xe koto‑i.
15 N‑ka xee‑i nuu tuu Jesús.
N‑ka xini‑i se n‑ñuʼu tachi uʼu anu‑s.
Nukoo‑s,
niʼno‑s daʼma‑s,
te vaʼa xani ini‑s.
Se n‑ñuʼu tachi uʼu anu‑s,
se nani Ejército,
mee‑s kuu‑s.
Te loko n‑ka yuʼu ñayiu jan.
16 Se n‑ka xini nax n‑kuu se n‑ñuʼu tachi uʼu anu‑s,
n‑ka najani‑s nuu ñayiu jan ntdaa xa n‑ka xini‑s.
Te dɨuni n‑ka najani‑s xa n‑ka yaʼa kuchi.
17 N‑kixeʼe ñayiu ijan xa kajan koio‑i nuu Jesús xa na kee‑ia ñuu‑i.
18 Na n‑ndeé Jesús barcu,
te n‑xijan se n‑ñuʼu tachi uʼu anu‑s xa jɨʼɨn‑s xiʼin‑ia.
19 Ko ña n‑xejoon‑ia.
N‑xiaʼan‑ia:
—Juan nuʼu veʼe‑n nuu xtuu ñayiu kutnaʼa xiʼin‑n.
Juña tnuʼu nax n‑kida Xtoʼo‑n xaxeʼe‑n.
Juña tnuʼu xa n‑kundau ini ñaʼa‑ia.
20 Juan nuʼu‑s,
te n‑xian tnuʼu‑s ntdaa xa n‑kida Jesús xaxeʼe‑s.
N‑daxandodo tnuʼu‑s nituʼu distrito Decápolis,
te n‑ka yuʼu ntdaa ñayiu ijan.
Daʼya dɨʼɨ se nani Jairo
21 N‑naxee Jesús xiti barcu ɨnka lado yundute kaʼnu nuu n‑kee‑ia.
Ijan n‑ka taka kueʼe xa kueʼe ñayiu nde nuu tuu‑ia.
Nujuiin‑ia yundute jan.
San Marcos 5:21-43
22 Ijan n‑xee ɨɨn se yɨndaʼa veñuʼu luchi,
se nani Jairo.
Na n‑xini‑s Jesús,
n‑xe juiin xiti‑s nuu‑ia.
23 Kueʼe n‑xijan‑s:
—Daʼya‑da xá io‑i xa kuú‑i.
Na jɨʼɨn‑ro veʼe‑da xa kajan ndodo‑n ndaʼa‑n mee‑i,
xa ndvaʼa‑i te kutuu vaʼa‑i.
24 Juaʼan Jesús xiʼin‑s.
Kueʼe xa kueʼe ñayiu xndijun ñaʼa,
xa diko ka dataʼi‑i‑ia.
25 Nuu ñayiu ijan tnaʼa ɨɨn ñadɨʼɨ.
Xá n‑kuu uxi uu kuia xatu nɨñɨ‑ña.
26 N‑ka xito ñaʼa kueʼe doctor,
te kueʼe vida n‑yaʼa‑ña.
N‑chiyaʼu‑ña‑s ntdaa xaxii‑ña,
ko dani ña n‑ndvaʼa‑ña.
Duʼa n‑kukaʼu ka‑ña.
27 Xá n‑tekutnuʼu‑ña ntdaa xa n‑kida Jesús.
Ndijun‑ña‑ia,
naʼi ni n‑tnɨɨ‑ña daʼma‑ia.
28 Chi n‑jaʼan‑ña:
“Nux na xee‑ro xa tnɨɨ‑ro daʼma ni‑ia,
te ndvaʼa‑ro.”
29 Hora ijan ni n‑nujuiin xa xatu nɨñɨ‑ña,
te n‑kutnuni ini‑ña xa n‑ndvaʼa‑ña.
30 Te hora ijan ni n‑kutnuni ini Jesús xa xiʼin xa taxnuni‑ia n‑ndvaʼa ɨɨn ñayiu.
Meʼñu kueʼe ñayiu ijan n‑konenuu‑ia,
te n‑xijan tnuʼu‑ia:
—¿Jundu n‑tnɨɨ daʼma‑r?
31 N‑ka jaʼan se dakuaʼa‑ia:
—Xini‑n xa kueʼe xa kueʼe ñayiu dataʼi ñaʼa,
¿te xijan tnuʼu‑n jundu n‑tnɨɨ ñaʼa?
32 Ko dani n‑xo ndeʼa Jesús nituʼu lado xa jini‑ia jundu n‑tnɨɨ ñaʼa.
33 N‑yuʼu ñadɨʼɨ jan,
te n‑nɨʼɨ‑ña,
chi n‑kutnuni ini‑ña nax n‑kuu.
N‑xee‑ña n‑nduandee‑ña nuu‑ia,
te n‑naʼma‑ña ntdaa xa n‑yaʼa‑ña.
34 N‑xiaʼan Jesús:
—Daʼya,
xaxeʼe xa jandixa ñaʼa‑n,
te n‑ndvaʼa‑n.
Na kutuu vaʼa‑n.
Kueʼe yaʼa ma kuʼu ka‑n.
35 Nɨni jaʼan ka Jesús nuu ñadɨʼɨ jan,
te n‑ka xee se xinokuechi nuu se yɨndaʼa veñuʼu luchi.
N‑jaʼan‑s:
—Xá n‑xiʼí daʼya dɨʼɨ‑n.
Maxku datnaʼa ka‑n maestru.
36 N‑teku Jesús nax n‑jaʼan‑s,
te n‑jaʼan‑ia nuu se yɨndaʼa veñuʼu luchi:
—Maxku yuʼu‑n.
Diko ni jandixa ñaʼa‑n.
37 Ña n‑xejoon‑ia xa kandijun ñaʼa ntdaa ñayiu jan.
Diko ni Spedru xiʼin Jacobo xiʼin Sua ñani Jacobo.
38 N‑ka xee‑s veʼe se yɨndaʼa veñuʼu luchi,
te n‑teku Jesús xa kuvaa xa kuvaa ñayiu n‑ka taka ijan.
Ka ndaʼi‑i xa ka ndaʼi‑i,
te ka kana xee‑i.
39 N‑kɨu Jesús veʼe,
te n‑xiaʼan‑ia:
—¿Nax kuu xa da ka kuvaa‑n,
te ka ndaʼi‑n?
Ña n‑xiʼí dichi luchi,
chi diko ni kidi‑i.
40 Ñayiu xyuku ijan n‑ka xakundee‑i,
chi xnaʼa mee‑i xa n‑xiʼí dichi luchi.
N‑kineʼe Jesús ntdaa ñayiu xyuku xiti veʼe,
te ndeka‑ia tadɨʼɨ‑i xiʼin uni se dakuaʼa‑ia,
n‑kɨu‑ia nde nuu kaa dichi luchi.
41 N‑tnɨɨ‑ia ndaʼa‑i,
te n‑jaʼan‑ia nuu‑i:
—Talita,
cumi.
(Tnuʼu hebreu juini kachi:
Dichi luchi,
nuu mee‑n jaʼan‑r.
Ndokoo.)