Taʼu tniu Jesús nuu ñayiu nuu nax kada‑i kɨu sabado
6
N‑xee ntuku kɨu sabado,
te n‑yaʼa Jesús xiʼin se dakuaʼa‑ia ɨɨn nuu ñuʼu kaa trɨu.
Nɨni n‑ka yaʼa‑s n‑ka tnundodo‑s yoko trɨu jan.
N‑ka kɨɨn‑s,
te n‑ka xaxi‑s.
2 N‑ka xini dava se fariseu,
te n‑ka jaʼan‑s:
—¿Nakuenda ka kida‑n xa ña xejoon Ianyuux xa kada‑ro kɨu kuu sabado?
3 N‑jaʼan Jesús nuu‑s:
—¿Nax kuu xa ña ka kaʼu‑n xa n‑kida David xiʼin se xndeka tnaʼa xiʼin‑s ɨɨn vuelta na ka kojon‑s?
4 N‑kɨu‑s veñuʼu,
te n‑tnɨɨ‑s tila n‑doko dutu nuu Ianyuux.
N‑xiaʼan David se xndeka tnaʼa xiʼin‑s,
te n‑ka xaxi‑s ntdaa‑s.
Ñatu xejoon Ianyuux xa kaxi koio ɨnka ñayiu tila ijan chi diko ni dutu xejoon‑ia xa kaxi‑s.
5 Ruʼu,
Ia kuu ñayiu,
taxnuni‑r nuu ñayiu kɨu kuu sabado,
te taʼu tniu‑r nuu‑i —kuu‑ia,
xiaʼan‑ia.
N‑ndadavaʼa Jesús ndaʼa ɨɨn seyɨɨ kɨu sabado
6 Ɨnka ntuku kɨu kuu sabado,
n‑kɨu‑ia veñuʼu,
te n‑dakuaʼa‑ia ñayiu.
Ijan tuu ɨɨn se n‑natɨyɨ ndaʼa kuaʼa.
7 Te n‑ka xitoyuʼu ñaʼa se fariseu xiʼin se ka tuʼa vaʼa tnuʼu n‑chidotnuni Moisés nu na ndadavaʼa‑ia ñayiu kɨu kuu sabado chi n‑ka kuu‑s xa tekuechi neñuu‑s‑ia.
8 N‑kutnuni ini‑ia xa n‑ka xani ini se ijan.
Xijan kuu xa n‑jaʼan‑ia nuu se n‑natɨyɨ ndaʼa:
—Ndojuiin‑n,
te kunujuiin‑n meʼñu‑s ntdaa‑s.
—Na kajan tnuʼu ñaʼa‑r ɨɨn xa kajan tnuʼu ñaʼa‑r.
¿Kada‑ro ɨɨn xa vaʼa a kada‑ro ɨɨn xa ña io vaʼa kɨu kuu sabado jaʼan ley n‑chidotnuni Moisés a?
¿Xejoon ley‑s xa kada‑ro xa kundito naʼi ɨɨn ñayiu a xa kaʼni‑ro‑i a?
10 N‑nukondeʼa Jesús se n‑ka naduku nduu ñaʼa,
te xiaʼan‑ia nuu se n‑natɨyɨ ndaʼa:
—Nadakaa ndaʼa‑n.
N‑dakaa‑s ndaʼa‑s,
te n‑ndvaʼa.
11 Yo n‑ka kiti ini se xyuku ijan,
te n‑ka ndatnuʼu‑s nuu naxa kada koio‑s Jesús.
N‑kaxí Jesús uxi uu se n‑dakuaʼa‑ia
12 Nu n‑xika kɨu,
te n‑xe kaa‑ia yuku xa kajan taʼu‑ia nuu Ianyuux.
Niniu n‑xijan taʼu‑ia.
13 Nu n‑tuu,
te n‑kana‑ia ñayiu xndijun ñaʼa.
N‑kaxí niʼno‑ia uxi uu seyɨɨ nuu ntdaa ñayiu xyuku ijan.
N‑kaxí‑ia‑s,
te n‑tundaʼa‑ia‑s xa kada koio‑s tniu‑ia.
14 N‑kaxí‑ia Simón,
se n‑danani‑ia Spedru.
N‑kaxí‑ia Ndrixi Simón.
N‑kaxí‑ia Jacobo,
Sua,
Slipe,
Stolo,
15 Steu,
Tomaxi,
Jacobo,
daʼya yɨɨ Alfeo du.
N‑kaxí‑ia Simón,
se n‑dandee ñaʼa ñayiu Zelote.
16 N‑kaxí‑ia Judas,
daʼya yɨɨ Jacobo xiʼin Judas Iscariote.
Judas Iscariote ya kuu se n‑kida xa n‑tnɨɨ juxtixia Jesús.
Discípulos Elegidos
N‑dakuaʼa Jesús kueʼe ñayiu, te n‑ndadavaʼa‑ia‑i
17 Te n‑nuu Jesús xiʼin‑s,
te n‑xee‑ia xiʼin‑s nuu ndaa,
ɨɨn nuu io yodo.
Kueʼe xa kueʼe ñayiu xndijun ñaʼa.
Dani kueʼe ñayiu dijan n‑ka xee xyuku ijan tuku.
Xyuku ñayiu Jerusalén.
Xyuku ñayiu xndaxio dava ka ñuu distrito xndatuu Judea.
Xyuku ñayiu Tiro xiʼin ñayiu Sidón.
Nduu ñuu yaʼa xndatuu yuʼu mar.
18 N‑ka xee‑i xa kunini koio‑i tnuʼu‑ia xiʼin xa ndadavaʼa‑ia‑i kueʼe ka tnaʼa‑i,
te n‑ka ndvaʼa‑i.
Dani n‑ka ndvaʼa ñayiu n‑ñuʼu ñaʼa xaloko.
19 N‑juini ntdantuʼu ñayiu xyuku ijan xa kajuʼun‑i Jesús xa ndvaʼa‑i chi n‑kida Ianyuux xa kuaʼa‑ia xa ndadavaʼa‑ia‑i.
Ñayiu ndaʼu yaʼa xiʼin ñayiu xtuu vaʼa
20 N‑nukondeʼa Jesús ñayiu dakuaʼa‑ia,
te n‑jaʼan‑ia nuu‑i:
—Mee‑n ñayiu ka xani ini xa ma dananitaʼu ñaʼa Ianyuux,
naka taʼu‑n chi kɨu tnaʼa‑n nuu ñayiu taxnuni‑ia nuu‑i.
21 ʼNdoʼo ñayiu io anu xa kada koio‑n xa juini Ianyuux,
naka taʼu‑n chi kada ndɨʼɨ‑n xijan,
te kudɨ ini‑n.
ʼMee‑n xa ka kuu‑n ñayiu ka ndaʼi vitna,
naka taʼu‑n chi kueku koio‑n.
22 ʼNaka taʼu kuu koio‑n hora na jini uʼu ñaʼa ñayiu.
Ma juejoon ka‑i xa kandeka tnaʼa ka‑n xiʼin‑i,
te kuiʼa jaʼan ñaʼa koio‑i.
Jaʼan koio‑i xa unu loko‑n.
Ntdaa xijan kada ñaʼa‑i xaxeʼe ruʼu,
Ia kuu ñayiu.
23 Nux daa na yaʼa koio‑n,
taʼu kuu koio‑n chi yo kueʼe xa io andɨu taxi Ianyuux.
Kudɨ ini koio‑n,
daa.
Duʼa kada ñaʼa koio‑i chi daa n‑ka kida xixitna ñayiu ijan se n‑ka jaʼan tnuʼu Ianyuux nuu ñayiu.
24 ʼKo ndoʼo,
ñayiu unu kuika,
ndaʼu yaʼa koio‑n chi xa n‑ka niʼi‑n xa ka kukajan ini‑n.
25 ʼNdoʼo,
ñayiu io xa kaxi xa koʼo vitna,
ndaʼu yaʼa koio‑n chi kojon koio‑n.
ʼNdoʼo,
ñayiu ka xaku vitna,
ndaʼu yaʼa koio‑n na xee kɨu chi ndaʼi koio‑n xaxeʼe xa kukoʼyo ini‑n.
26 ʼNdoʼo,
ñayiu ka najuen tnuʼu ñaʼa ntdantuʼu ñayiu,
ndaʼu yaʼa koio‑n chi duʼa n‑ka najuen tnuʼu xixitna‑n se n‑ka jaʼan vete xa kuu‑s se jaʼan tnuʼu Ianyuux nuu ñayiu.
Las Bienaventuranzas
Juemani koio‑n ñayiu ka xini uʼu ñaʼa
27 ʼMee‑n ñayiu ka teku tnuʼu jaʼan‑r nuu‑n,
maxku jini uʼu koio‑n ñayiu kuiʼa ka kida ñaʼa;
juemani koio‑n‑yɨ.
28 Kajan taʼu koio‑n nuu Ianyuux xa taʼu na kuu ñayiu ka jaʼan uʼu ñaʼa.
Kajan taʼu koio‑n nuu Ianyuux xaxeʼe ñayiu ka jan kuiʼa ñaʼa.
29 Nux na kani ñayiu ɨɨn lado kuñu nuu‑n ngoneʼe‑n ɨnka lado xa na kani ntuku‑i.
Nux na jendee ñayiu doo‑n,
maxku nadita‑n,
nux jendee‑i duʼnu‑n tuku,
juñaʼa naʼi‑n na kaneʼe‑i jɨʼɨn.
30 Davaʼa nga xa na kajan ñayiu,
juñaʼa koio‑n.
Nux na jendee ñayiu ndatniu‑n,
maxku nandajan koio‑n.
31 Nuxa juini‑n xa juemani ñaʼa ñayiu,
juemani‑n‑yɨ.
32 Nux mee ni ñayiu ka xemani ñaʼa,
ka xemani‑n,
ña tna ini Ianyuux xa ka kida‑n chi ntdaa ñayiu duʼa ka kida.
Nde ñayiu ka kida kueʼe kuechi kida xaʼa.
33 Nux mee ni ñayiu ka kida ñaʼa xavaʼa ka kida‑n xavaʼa,
ña tna ini Ianyuux xa ka kida‑n.
Ntdaa ñayiu duʼa ka kida,
nde ñayiu ka kida kueʼe kuechi kida xijan.
34 Nux diko ni ñayiu ka nataxi,
ka xiaʼan nuu‑n,
ña tna ini Ianyuux xa ka kida‑n.
Ntdaa ñayiu duʼa ka kida,
nde ñayiu ka kida kueʼe kuechi kida xijan.
Ka xiaʼan nuu ñayiu tvini xiʼin xaxii‑i xa na najuñaʼa nuu ñayiu n‑xiaʼan nuu‑i ɨnka kɨu.
35 Maxku duʼa kada koio‑n;
juemani koio‑n ñayiu ka xini uʼu ñaʼa.
Juñaʼa nuu koio‑n xa ka xijan nuu‑i,
te maxku jun ini‑n xa najeʼen koio‑n xa n‑xiaʼan nuu‑n ñayiu nux ña tuu nax naniʼi‑i xa nataxi‑i.
Nux duʼa na kada koio‑n kueʼe xa taxi Ianyuux.
Kada koio‑n ná kida Ianyuux,
Ia taxnuni ka,
chi vaʼa‑ia nuu ñayiu ña uun ka jaʼan xa n‑kutaʼu‑i nuu‑ia.
Vaʼa‑ia nuu ñayiu loko.
36 Kundaʼu ini‑n ñayiu ná kundaʼu ini Taa‑ro Ianyuux‑yɨ.
Sermón en el Monte
Maxku jan tnuʼu koio‑n ñayiu
37 ʼMaxku jan tnuʼu koio‑n ñayiu na kuaʼa maxku jan tnuʼu ñaʼa‑i.
Nux taxkanu ini koio‑n xa n‑kida ñaʼa ñayiu,
taxkanu ini ñaʼa‑i tuku.
38 Juñaʼa nga‑n ɨɨn xa juñaʼa nga‑n ñayiu.
Nux daa na kada koio‑n,
taxi ɨnka ñayiu ɨɨn xa taxi‑i.
Diko kuedi niʼno‑i xa taxi‑i,
diko kodo yɨɨ yuʼu maquila.
Nani juñaʼa koio‑n ñayiu,
dani nataxi‑i —kuu Jesús,
xiaʼan‑ia.
39 Te n‑jaʼan‑ia ɨnka tnuʼu kandee:
—Ma ndaku ɨɨn se kuaa xa kandeka‑s ɨnka se kuaa jɨʼɨn ɨɨn nuu jɨʼɨn‑s chi nduu‑s kekava ɨɨn nua.
40 Ñayo ñayiu xyɨʼɨ xkuela tuʼa ka dada maestru‑i.
Na daxinokava se xyɨʼɨ xkuela xa kaʼu‑s,
dada xee‑s maestru‑s,
te ma yaʼa nduu ñaʼa‑s.
41 ʼKuenda kɨu yakua luchi lii kaa niʼno nduchi nuu ñayiu xka ndeka tnaʼa xiʼin‑n kuu kuechi luchi ka kida‑i.
¿Nax kuu xa ka chinuu‑n xijan,
te ña ka chinuu‑n kuechi naʼnu ka kida mee‑n kuenda kɨu tnduʼu kaa niʼno nduchi nuu mee‑n?
42 ¿Nakuenda ka xiaʼan‑n nuu ñayiu xnetnaʼa xiʼin‑n:
“Taxtuu nuu‑n na natava‑r yakua luchi lii kaa niʼno”,
te ña ka chinuu‑n tnduʼu kaa niʼno nduchi nuu mee‑n?
Kuenda kɨu kuechi kaʼnu ka kida‑n kuu xijan.
Ka kida nga‑n xa vaʼa‑n.
Kiʼna nuu natava koio‑n tnduʼu kaa niʼno nuu‑n na kuaʼa kaxi kundeʼa koio‑n xa natava‑n yakua luchi kaa niʼno nuu ñayiu.
Ka xini‑ro nuu na yutnu kuu‑tnu chi xini‑ro nax juun‑tnu
43 ʼYutnu juun xavidi,
ñatu juun‑tnu ɨɨn xa ña xiniñuʼu.
Daa ka kuu ñayiu vaʼa.
Tnundeʼa vax teʼyu,
ñatuka xiniñuʼu ndeʼa juun‑tnu.
Daa ka kuu ñayiu loko.
44 Ka xini‑n nuu na yutnu kuu‑tnu hora xndeʼa‑n xavidi juun‑tnu.
Ñatu juun tnutitnu higo.
Dani tnuyɨkɨ ñatu juun‑tnu uva.
45 Nux vaʼa‑n,
vaʼa ka jaʼan‑n.
Nux loko‑n,
kuiʼa ka jaʼan‑n.
Xa xñuʼu anu‑n,
xijan ka jaʼan‑n.
Ɨɨn se n‑tava cimientu veʼe‑s, xiʼin ɨɨn se ña n‑tava
46 ʼ¿Nakuenda ka jaʼan‑n xa xtoʼo‑n kuu ñaʼa,
te ñatu ka jandixa ñaʼa‑n?
47 Na kakuneʼe‑r ñayiu jandixa ñaʼa xiʼin ñayiu ña jandixa ñaʼa.
48 Ñayiu teku tnuʼu‑r te kida‑i xa jaʼan‑r jan kuu ná kuu ɨɨn se n‑kidavaʼa veʼe‑s.
Kunu n‑xate‑s,
te n‑xajan ndodo‑s cimientu veʼe‑s nuu toto ndɨka yɨʼɨ nuu ñuʼu.
N‑juun dau.
N‑naneñu ndute xika deʼva,
te n‑tuxindee‑te xeveʼe‑s,
ko ñatu n‑tundaʼa‑te veʼe jan chi vaʼa n‑kuaʼa veʼe‑s.
49 Ñayiu teku tnuʼu‑r te ña jandixa‑i,
kuu‑i ná kuu ɨɨn se n‑kidavaʼa veʼe nuu ñuʼu ni,
te ñatu n‑tava‑s cimientu.
N‑juun dau.
N‑naneñu ndute xika deʼva,
te n‑tuxindee‑té xeveʼe jan,
te danaa n‑ndua.
Ndondoo veʼe jan junkoio —kuu Jesús,
n‑jaʼan‑ia.