N‑jaʼan Jesús nuu uni seyɨɨ xa na nkuitandijun ñaʼa‑s
5
N‑xika kɨu,
te juaʼan‑ia yuʼu laguna kaʼnu nani Genesaret.
Ka dataʼi ñaʼa ñayiu xyuku nuu nujuiin‑ia xaxeʼe xa ka kuu‑i xa kunini koio‑i tnuʼu Ianyuux jaʼan‑ia.
2 Te n‑xini‑ia uu barcu kuechi xtuu yatni yuʼu ndute xiʼin se ka tava chaka ka najini ñunu chaka‑s.
3 N‑keé Jesús ɨɨn barcu jan.
Barcu kuu barcu Simón.
N‑jaʼan Jesús nuu Simón xa na dakaka‑s barcu nuu kaa kunu ka ndute itaʼu.
Nu n‑dakaka‑s barcu,
n‑nukoo Jesús xiti barcu,
te n‑dakuaʼa‑ia ntdaa ñayiu xyuku yuʼu ndute.
4 Nu n‑yaʼa xa n‑dakuaʼa Jesús ñayiu,
te xiaʼan‑ia nuu Simón:
—Kandeka barcu‑n juaʼan nuu kunu ka kaa ndute,
te dakeé‑n ñunu chaka xa tava‑n‑tɨ.
5 Te n‑jaʼan Simón:
—Maestru,
niniu n‑ka dakeé‑da ñunu‑tɨ,
ko ni ɨɨn‑t ña n‑ka tava‑da.
Juini ñayo‑da n‑ka tava‑tɨ,
ko nux daa juini‑n,
na dakeé ntuku‑da.
6 N‑ka kida‑s ná n‑jaʼan‑ia te n‑ka keé kueʼe chaka ñunu jan.
Te n‑kixeʼe ndata ñunu juaʼan.
7 Te n‑ka xaxa ndaʼa‑s nuu dava ka se xnetnaʼa xiʼin‑s xñutuu ɨnka barcu xa na xee koio‑s xa na chindee tnaʼa‑s.
Te n‑ka xee‑s ijan.
N‑ka dachitu‑s ntdaa‑s nduu barcu jan chaka.
Xaku nga nduxi barcu jan nuu ndute.
8 N‑xini Simón Pedru xijan,
te n‑xe juiin xiti‑s nuu Jesús.
Xiaʼan‑s:
—Juaʼan‑n,
Dito,
chi se kida kuechi kuu‑da.
9 N‑ka yuʼu Simón xiʼin se xndeka tnaʼa xiʼin‑s xaxeʼe xa vichi kueʼe chaka n‑ka tava‑s.
10 Se xndeka tnaʼa xiʼin Simón xa ka tava‑s chaka kuu Jacobo xiʼin Sua,
se ka kuu daʼya yɨɨ Zebedeo.
Te xiaʼan Jesús nuu Simón:
—Maxku ku yuʼu‑n.
Vitna kixeʼe‑n xa dataka‑n ñayiu.
Nani dataka‑n chaka xiʼin ñunu‑n,
dani dataka‑n ñayiu.
11 N‑ka dakaka‑s barcu‑s,
te n‑ka ndinexio‑s yuʼu ndute.
N‑ka dandoo‑s ndatniu‑s,
te n‑ka xe kuitandijun‑s Jesús.
Captura Milagrosa de Peces
N‑ndadavaʼa Jesús ɨɨn se teʼyu ñɨɨ
12 Nu n‑xika kɨu,
te juaʼan Jesús ɨnka ñuu distrito Galilea.
Ijan tuu ɨɨn se tnaʼa kueʼe teʼyu ñɨɨ.
N‑xini‑s‑ia,
te n‑xe juiin xiti‑s nuu‑ia,
te n‑xijan taʼu‑s.
Te xiaʼan‑s:
—¿Vatuka ndadavaʼa ñaʼa‑n a?
Dito.
Ndadavaʼa ñaʼa‑n chi n‑kida Ianyuux xa ndadavaʼa‑n ñayiu.
13 N‑dakaa‑ia ndaʼa‑ia,
te n‑tenee‑ia ndaʼa‑ia‑s,
te n‑jaʼan‑ia nuu‑s:
—Vatuka,
te na ndvaʼa‑n.
—Juan dandeʼa dutu ñɨɨ‑n xa na jini‑s xa n‑ndvaʼa‑n.
Juñaʼa‑n‑sɨ ɨɨn xa na doko‑s nuu altar ná io ley n‑chidotnuni Moisés na kuaʼa na jini‑s xa mee‑r n‑ndadavaʼa ñaʼa —kuu Jesús,
xiaʼan‑ia.
15 N‑xitendodo xa n‑kida Jesús juaʼan,
te kueʼe ñayiu n‑ka xo taka xa kunini koio‑i tnuʼu‑ia,
te n‑xo ndadavaʼa‑ia ñayiu ka kuʼu,
16 ko kueʼe vuelta ñayo‑ia n‑xo tuu chi n‑xo xeʼen‑ia xa kajan taʼu‑ia nuu Ianyuux nuu ñatu nga juun dau te ñayo io.
N‑ndadavaʼa Jesús ɨɨn se n‑xiʼí xeʼe
17 Nu n‑xika kɨu,
n‑ka xee se fariseu xiʼin se ka dakuaʼa ñayiu xa n‑chidotnuni Moisés nuu dakuaʼa Jesús ñayiu.
Se distrito Galilea xiʼin distrito Judea ka kuu‑s.
Dava‑s ka kuu se Jerusalén.
Kɨu ijan n‑kida Ianyuux xa n‑kuaʼa Jesús xa ndadavaʼa‑ia ñayiu ka kuʼu,
te n‑ka xeʼen‑i nuu‑ia.
18 Daa xndeka‑s ɨɨn se kaa nuu xito n‑xiʼí nduu xeʼe n‑ka xee nuu tuu‑ia.
N‑ka nduku ini‑s xa kɨu koio‑s xiʼin se kuʼu jan veʼe nuu tuu‑ia xa kajan tuu‑s‑sɨ nuu‑ia,
19 ko ña n‑kuaʼa xa kɨu koio‑s do yeʼe jan chi yo chitu ñayiu xiti veʼe jan,
te n‑ka xe kaa‑s dɨkɨ veʼe jan.
N‑ka dita ndee‑s teja te n‑ka dajuun‑s se kuʼu jan nuu Jesús meʼñu ñayiu xyuku ijan.
20 N‑xini‑ia xa ka kukanu ini‑s Ianyuux,
te n‑jaʼan‑ia nuu se kuʼu jan:
—N‑taxkanu ini‑r kuechi n‑kida‑n.
21 Xaxeʼe xa duʼa n‑jaʼan‑ia n‑ka nukuita se ka tuʼa vaʼa tnuʼu n‑chidotnuni Moisés xiʼin se ka kuu se fariseu ka ndatnuʼu‑s.
N‑ka xani ini‑s:
“¿Ndee se kuu se yaʼa xa dadavatnaʼa‑s xiʼin Ianyuux?
Ñayo ñayiu taxkanu ini xa n‑ka kida‑ro kuechi;
mee dii Ianyuux.”
22 N‑kutnuni ini Jesús nax n‑ka ndatnuʼu‑s,
te xiaʼan‑ia nuu‑s:
—¿Nakuenda daa ka xani ini‑n?
¿Nax ka kachi‑n?
23 Ka xini‑n xa ndvaʼa se yaʼa nux na jaʼan‑r:
“Ndokoo.
Kaka”,
ko ñatu ka jandixa‑n xa taxkanu ini‑r kuechi n‑kida‑s.
24 Kunaʼa koio xa mee‑r,
Ia kuu ñayiu,
taxkanu ini kuechi n‑ka kida ñayiu.
Te xiaʼan‑ia nuu se n‑xiʼi xeʼe:
—Ndokoo.
Ndoneʼe xito‑n,
doo‑n,
te juan nuʼu‑n veʼe‑n.
25 Hora ijan ni n‑ndokoo‑s meʼñu ñayiu xyuku ijan.
N‑ndoneʼe‑s doo‑s,
xito‑s,
te juan nuʼu‑s veʼe‑s.
Nɨni xika‑s ichi juan nuʼu‑s,
n‑nakuetu‑s nuu Ianyuux.
26 N‑ka yuʼu ntdaa ñayiu xyuku ijan,
te dɨuni n‑ka nakuetu koio‑i nuu‑ia.
N‑ka yuʼu‑i te ka xiaʼan tnaʼa‑i:
—Ña uun ka xini‑ro xa n‑ka xini‑ro vitna.
Ña uun xini‑ro xa duʼa kada ɨɨn ñayiu.
N‑jaʼan Jesús nuu Leví xa nkuitandijun ñaʼa‑s
27 Nu n‑yaʼa xijan,
juaʼan Jesús ɨnka lado.
N‑yaʼa‑ia nuu nukoo ɨɨn se xijan tvini nandajan gobierno nani Leví.
Te n‑jaʼan‑ia nuu‑s:
—Neʼe,
te nkuitandijun ñaʼa.
28 N‑dandoo Leví ntdaa xa yɨndaʼa‑s,
te n‑xe kuitandijun‑s‑ia.
29 Juaʼan‑s xiʼin‑ia veʼe‑s,
te n‑jaʼan‑s‑ia xiʼin se dakuaʼa‑ia xa kaxdeʼñu koio‑ia veʼe‑s,
te kueʼe ndeyu n‑kida tuʼa‑s.
Kueʼe se ka xijan tvini nandajan gobierno xiʼin dava ka ñayiu n‑ka xee xa kaxdeʼñu koio‑i tuku.
30 Dɨuni n‑ka xee se fariseu xiʼin se ka tuʼa vaʼa tnuʼu n‑chidotnuni Moisés te n‑ka jan kuechi‑s.
Ka xiaʼan‑s nuu se dakuaʼa Jesús:
—¿Nakuenda ka xaxi ka xiʼi‑n xiʼin se ka xijan tvini nandajan gobierno xiʼin dava ka ñayiu yo ka kida kuechi?
31 Te n‑jaʼan Jesús nuu‑s:
—Ñayiu io vaʼa,
ña ka ndoñuʼu‑i setatna,
ko ñayiu ka kuʼu,
ndoñuʼu‑i‑sɨ.
32 Ñadu n‑kixee‑r xa jaʼan‑r nuu ñayiu vaʼa xa nkuitandijun ñaʼa‑i chi n‑kixee‑r xa jaʼan‑r nuu ñayiu ka kida kuechi xa na nkuitandijun ñaʼa‑i,
te na natu ini koio‑i xa n‑ka kida‑i —kuu Jesús,
xiaʼan‑ia.
Jesús Pasa Tiempo con Pecadores
N‑ka kidandichi‑s Jesús
33 Ka xiaʼan ñayiu ka xaxdeʼñu ijan nuu Jesús:
—Se dakuaʼa ñaʼa Sua,
tɨtnɨ vuelta xneʼe ii‑s.
Nɨni xneʼe ii‑s,
ña ka xaxi‑s,
te tɨtnɨ vuelta ka xijan taʼu‑s nuu Ianyuux.
Dani ka kida se dakuaʼa ñaʼa se fariseu.
¿Nakuenda se dakuaʼa mee‑n,
ka xaxi‑s,
ka xiʼi‑s,
te ñayo‑s neʼe ii?
34 Te n‑jaʼan Jesús tnuʼu kandee.
Xiaʼan‑ia:
—Se dakuaʼa‑r ka kuu na ka kuu se xtuu viko tnundaʼa,
te mayo ku dadaʼan xa kaxi koio‑s dita hora xtuu‑s xiʼin noviu,
35 ko na xee kɨu tnɨɨ ñayiu noviu jan,
daa kondite koio‑s chi xaxeʼe xa kukoʼyo ini‑s.
36 Te n‑jaʼan‑ia ɨnka tnuʼu kandee yaʼa.
Xiaʼan‑ia:
—Ñayo ñayiu kachi daʼma xee xa dandee‑i daʼma n‑kutuʼu chi hora nakate‑i,
nandɨyɨ daʼma xee jan,
te nataka daʼma n‑kutuʼu.
Ñatu natau xa ndee daʼma xee daʼma n‑kutuʼu.
Kuenda kɨu tnuʼu jaʼan‑r kuu daʼma xee jan.
37 Dɨuni ñayo ñayiu dakeé vinu xee bolsa ñɨɨ n‑kutuʼu chi ndata vinu xee bolsa jan,
te katu ntdantuʼu vinu,
te ma jiniñuʼu ka bolsa ñɨɨ jan.
38 Ñayo daa kida chi dakeé‑ro vinu xee bolsa ñɨɨ xee.
39 Ñayiu xiʼi vinu naʼa n‑kuu io,
ñayo‑i xiʼi vinu xee,
chi jaʼan‑i:
“Adɨ ka vinu naʼa n‑kuu io.”
Kuenda kɨu tnuʼu‑r kuu vinu xee jan —kuu Jesús,
xiaʼan‑ia.