N‑ndadavaʼa Jesús ɨɨn se xinokuechi nuu ɨɨn centurión
7
Nu n‑yaʼa xa n‑jaʼan Jesús ntdaa xaʼa,
te juan nuʼu‑ia Capernaum.
2 Ijan tuu ɨɨn centurión.
Yo kaʼu kuʼu se kidatniu nuu‑s,
diko nga xa kuú‑s.
Yo mani n‑juini‑s‑sɨ.
3 N‑teku‑s xa ka ndatnuʼu ñayiu xa kida Jesús,
te n‑tundaʼa‑s sexaʼnu taxnuni nuu ñayiu Israel xa na kajan taʼu koio‑s nuu‑ia xa na jɨʼɨn‑ia veʼe‑s xa na ndadavaʼa‑ia se kuʼu jan.
4 Nu n‑ka xee‑s nuu Jesús,
yo n‑ka xijan taʼu‑s nuu‑ia xa na jɨn ndadavaʼa‑ia se xinokuechi nuu se kuu centurión jan
5 xaxeʼe xa mani juini‑s ñayiu Israel xiʼin xaxeʼe xa tvini mee‑s n‑dakaa‑s veñuʼu ñuu‑i.
6 Ijan dada juaʼan Jesús xiʼin‑s veʼe centurión jan.
Nu n‑kuyatni Jesús veʼe‑s,
te n‑tundaʼa‑s se ka xinitnaʼa xiʼin‑s xa jɨn tnaʼa‑s Jesús.
N‑ka jaʼan‑s nuu‑ia:
—Dito,
maxku dakuita‑n tiempo‑n chi kachi centurión:
“Ñatu natau xa kixi‑ia veʼe‑r chi ndandɨʼɨ‑ia.”
7 Dɨuni kachi‑s:
“Ni ñatu natau xa jɨʼɨn‑r nuu‑ia.
Diko ni na jaʼan‑ia xa na ndvaʼa se xinokuechi nuu‑r,
te ndvaʼa‑s ne.”
8 Te n‑jaʼan ka‑s xa io ɨnka se taxnuni nuu‑s,
te dɨuni taxnuni‑s tuku.
Taxnuni‑s nuu se ka kuu soldado.
Nux na jaʼan‑s nuu ɨɨn‑s xa na jɨʼɨn‑s ɨɨn nuu jɨʼɨn‑s te xeʼen‑s.
Nux na jaʼan‑s nuu ɨnka‑s xa xee‑s veʼe‑s te xee‑s.
Nux taʼu tniu‑s nuu se xinokuechi nuu‑s xa na kada‑s davaʼa nga xa juini‑s,
te kida‑s —ka kuu‑s,
n‑ka xiaʼan‑s nuu Jesús.
9 Nu n‑teku Jesús tnuʼu se ijan n‑yuʼu anu‑ia.
N‑ngokoo‑ia xa kundeʼa‑ia ñayiu xndijun ñaʼa.
Te n‑jaʼan‑ia nuu‑i:
—Ta uun ka jini‑r ɨɨn ñayiu Israel kukanu ini ñaʼa ná kukanu ini ñaʼa se yaʼa.
10 N‑ka naxee se n‑tundaʼa centurión jan veʼe‑s,
te n‑ka xini‑s xa n‑ndvaʼa se xinokuechi jan.
N‑nadandoto Jesús daʼya yɨɨ ɨɨn ña n‑xiʼí yɨɨ
11 Kɨu kuu uu juaʼan Jesús xiʼin ñayiu dakuaʼa‑ia Naín.
Dɨuni xndijun ñaʼa kueʼe ka ñayiu juaʼan.
12 Nu n‑kuyatni Jesús xiʼin ñayiu jan yeʼe ñuu jan,
n‑xe juntnaʼa‑ia xiʼin ñayiu juan kuxi koio ndɨyɨ.
N‑ndoo mee n‑ndoo ɨɨn dɨʼɨ ndɨyɨ jan chi dɨuni n‑xiʼí yɨɨ‑ña.
Idii ni daʼya‑ña daa n‑xio,
te n‑xiʼí‑s.
Yo kueʼe ñayiu xndeka tnaʼa xiʼin‑ña juaʼan koio.
13 N‑kundaʼu ini Jesús,
Ia kuu Xtoʼo‑ro,
ña ijan,
te n‑jaʼan‑ia nuu‑ña:
—Maxku ku ndaʼi‑n.
14 N‑xe ndeʼe‑ia xatnu ndɨyɨ jan,
te n‑xajan ndodo‑ia ndaʼa‑ia xatnu jan.
N‑ka nujuiin se xndido ndɨyɨ jan.
Te n‑jaʼan‑ia nuu ndɨyɨ jan:
—Ndokoo,
Lungo.
15 N‑ndokoo se n‑kuu ndɨyɨ jan,
te n‑najaʼan‑s.
N‑xani Jesús‑sɨ nuu dɨʼɨ‑s,
te n‑nakueka ñaʼa‑ña.
16 Nu n‑xini ñayiu xyuku ijan xa duʼa n‑kida‑ia n‑ka yuʼu‑i,
te n‑ka nakuetu‑i nuu Ianyuux.
Ka xiaʼan tnaʼa‑i:
—N‑kixee se tuʼa vaʼa xa jaʼan‑s tnuʼu Ianyuux nuu‑ro.
N‑kixee Ianyuux xa chindee ñaʼa‑ia.
17 Te ntdandituʼu Judea xiʼin ñuu xndatuu nɨkanduu Judea jan n‑ka teku ñayiu xa n‑kida Jesús.
Juan el Bautista en Prisión
N‑tundaʼa Sua Bautista se dakuaʼa‑s nuu Jesús
18 Ntdaa xaʼa n‑ka najani se dakuaʼa ñaʼa Sua nuu‑s.
Xaxeʼe xijan n‑kana‑s uu‑s.
19 Te n‑tundaʼa‑s‑sɨ nuu Jesús,
Ia kuu Xtoʼo‑ro,
xa kajan tnuʼu koio‑s‑ia.
Duʼa xiaʼan Sua xa na juñaʼa koio‑s‑ia:
“¿Dɨu ndixi kuu se n‑jaʼan Ianyuux xa kixi‑n te kundetu koio‑da‑s a ɨnka‑s a?”
20 Nu n‑ka xee se ijan nuu Jesús,
te ka xiaʼan‑s nuu‑ia:
—Sua Bautista n‑tundaʼa ñaʼa xa vaxi‑da.
Ɨɨn xa juini‑s xa kajan tnuʼu ñaʼa‑da.
Jaʼan‑s:
“¿Dɨu ndixi kuu se n‑jaʼan Ianyuux xa kixi‑s te kundetu‑da‑s a ɨnka‑s a?”
21 Hora ijan ni n‑ndadavaʼa ka‑ia kueʼe ñayiu ka kuʼu.
Nudɨɨn kueʼe n‑ka tnaʼa‑i.
N‑ndadavaʼa‑ia ñayiu xñuʼu ñaʼa xaloko.
N‑ndadavaʼa‑ia kueʼe ñayiu kuaa.
22 Te n‑jaʼan‑ia nuu se n‑tundaʼa Sua:
—Juan nuʼu koio,
te najani‑n nuu Sua xa n‑ka xini‑n xiʼin xa n‑ka teku‑n.
Juñaʼa koio‑n xa xndeʼa ñayiu kuaa n‑ka kaku.
Ka ndvaʼa xeʼe ñayiu yakua.
N‑ka ndvaʼa ñayiu n‑teʼyu ñɨɨ.
Ka teku ñayiu doʼo n‑kaku.
N‑ka nandoto dava ñayiu n‑xiʼí.
Te jaʼan‑r nuu ñayiu ka kundaʼu nax io xa kada‑i xa nanitaʼu‑i.
Ɨɨn xavaʼa kuu.
23 Naka taʼu kuu ñayiu ña ka dangondita ñaʼa juini ñatu kida‑r xa xñu ini‑i xa kada‑r,
te xndijun ñaʼa naʼi‑i —kuu Jesús,
n‑xiaʼan‑ia nuu se n‑tundaʼa ñaʼa Sua.
24 Nu n‑ka ndee se n‑tundaʼa ñaʼa Sua,
te n‑kixeʼe Jesús xa kakuneʼe‑ia Sua.
Xiaʼan‑ia nuu ñayiu xyuku ijan:
—¿Nax n‑ka xe ndeʼa‑n nuu ñatu nga juun dau te ñayo io?
Ñatu n‑ka xe ndeʼa‑n ɨɨn se kuu ná kuu tnu ite xa juaʼan vaxi‑tnu hora kane tachi xa kava uu kava uni anu‑s.
25 Ñadu se niʼno daʼma vaʼa te vita n‑ka xe ndeʼa‑n chi se ndixndaʼu ndixkee n‑ka xe ndeʼa‑n.
Se xniʼno daʼma vaʼa te yaʼu,
xndaxio‑s veʼe se taxnuni te xnevaʼa‑s ndatniu yo yaʼu.
26 Se jaʼan tnuʼu Ianyuux nuu ñayiu n‑ka xe ndeʼa‑n.
Xa ndaa xa ndandɨʼɨ ka Sua dada dava ka se n‑ka jaʼan tnuʼu Ianyuux nuu ñayiu.
27 Sua kuu se n‑kakuneʼe ñaʼa se n‑ka jaʼan tnuʼu Ianyuux yodotnuni.
N‑chidotnuni‑s xa n‑jaʼan Ianyuux nuu‑r:
Kiʼna nuu tundaʼa‑r ɨɨn se tundaʼa‑r jɨʼɨn.
Ijan dada tundaʼa ñaʼa‑r mee‑n.
Kada‑s xa koo tuʼa ntdaa ñayiu xa xe ini ñaʼa‑i na jɨʼɨn‑n ñuñayiu.
28 Ruʼu jaʼan xa ndandɨʼɨ ka Sua dada ɨnka ñayiu ñuñayiu,
ko ñayiu kutuu nuu taxnuni Ianyuux andɨu,
ndandɨʼɨ ka‑i dada Sua vitna.
29 N‑ka xiaʼan tnaʼa se ka xijan tvini nandajan gobierno xiʼin dava ka ñayiu n‑ka teku xa daa n‑jaʼan Jesús xa ɨɨn xavaʼa kuu xa taʼu tniu Ianyuux.
Ka kuu‑i ñayiu n‑dajuendute ñaʼa Sua.
30 Ko se fariseu xiʼin se ka tuʼa vaʼa tnuʼu n‑chidotnuni Moisés,
ña n‑ka kida‑s xa n‑ñu ini Ianyuux xa kada‑s,
ni ña n‑ka xeʼen‑s xa dajuendute ñaʼa Sua.
31 Te xiaʼan Jesús nuu ñayiu xyuku ijan:
—Mee‑n,
ñayiu io vitna,
32 ka kuu‑n ná ka kuu dichi kuechi xiʼin sekuechi xtuu nuu yaʼu.
Xee n‑ka jaʼan dava‑s nuu dava ka‑s:
“N‑ka tɨu‑r tnuyoo,
ko ñayo‑n n‑ka xataxeʼe.
N‑ka xita‑r yaa koʼyo ini,
ko ñayo‑n n‑ka ndaʼi.”
33 Xijan jaʼan‑r nuu‑n chi Sua Bautista,
ña xaxi‑s tila te ña xiʼi‑s vinu,
te ka jaʼan‑n:
“Xaloko ñuʼu anu‑s.”
34 Mee‑r,
Ia kuu ñayiu,
davaʼa nga xa xaxi‑r.
Dɨuni xiʼi‑r vinu,
te ka jaʼan‑n xa kuu‑r se ndeʼe xiʼi.
Dɨuni ka jaʼan‑n xa kuu‑r se ndeʼe xaxi.
Ka jaʼan‑n xa kumani‑r xiʼin se ka xijan tvini nandajan gobierno xiʼin dava ka ñayiu ka kida kueʼe kuechi.
35 Ka xini‑ro nuu xavaʼa a ɨɨn xa uʼu dakuaʼa ɨɨn maestru ñayiu hora xndeʼa‑ro xa ka kida ñayiu ijan —kuu Jesús,
xiaʼan‑ia.
N‑xajan ɨɨn ñadɨʼɨ perfume xeʼe Jesús
36 N‑jaʼan ɨɨn se kuu fariseu Jesús xa kaxdeʼñu‑s xiʼin‑ia,
te juaʼan‑ia.
N‑kɨu‑ia veʼe‑s,
te n‑nukoo‑ia xa kaxdeʼñu‑ia.
37 Ñuu ijan io ɨɨn ñadɨʼɨ kueʼe kuechi n‑kida.
N‑teku‑ña xa tuu Jesús veʼe se fariseu,
te neʼe‑ña frascu alabastro ñuʼu perfume n‑xee veʼe ijan.
38 N‑xee‑ña nuu nukoo Jesús,
te n‑xe juiin xiti‑ña yatni xeʼe‑ia.
Ndaʼi‑ña,
te n‑todo ndute nuu‑ña xeʼe‑ia.
N‑nadayichi‑ña xeʼe‑ia xiʼin idi dɨkɨ‑ña.
Tɨtnɨ vuelta n‑teyuʼu‑ña xeʼe‑ia.
Dɨuni n‑xajan‑ña perfume xeʼe‑ia.
39 Nu n‑xini se n‑jaʼan Jesús xijan,
te n‑xani ini‑s:
“Nu se jaʼan tnuʼu Ianyuux nuu ñayiu kuu se yaʼa,
¿nakuenda ña xini‑s xa ñá kida kueʼe kuechi kuu ñá yaʼa?”
40 Xijan kuu xa n‑jaʼan Jesús nuu‑s:
—Simón,
ɨɨn xa juini‑r xa jaʼan‑r.
—Io vaʼa ni,
Maestru —kuu‑s,
xiaʼan‑s.
41 —N‑xio uu se n‑ka xo tau nuu ɨɨn se daxa nuu tvini.
Ɨɨn‑s n‑xo tau oʼon denario.
Ɨnka‑s n‑xo tau uu diko uxi denario.
42 Xaxeʼe xa ñayo‑s niʼi tvini xa nachiyaʼu‑s,
xijan kuu xa ña n‑nandajan juexa se daxa nuu tvini jan tvini‑s.
¿Ndeda ɨɨn‑s n‑xemani ka se daxa nuu tvini jan?
—kuu Jesús,
xiaʼan‑ia.
43 Te xiaʼan‑s nuu‑ia:
—Xani ini‑da xa se n‑xo tau kueʼe ka tvini‑s —kuu‑s,
xiaʼan‑s.
Te xiaʼan ntuku‑ia nuu‑s:
—Vaʼa n‑jaʼan‑n.
44 N‑ngokoo Jesús xa kundeʼa‑ia‑ña.
Ijan dada xiaʼan‑ia nuu Simón:
—Kundeʼa ñadɨʼɨ yaʼa.
Na n‑kɨkɨu‑r veʼe‑n,
ña n‑taxi‑n ndute xa n‑ndundoo xeʼe‑r,
ko mee‑ña,
n‑najini‑ña xeʼe‑r xiʼin ndute nuu‑ña,
te n‑xuʼa‑ña xeʼe‑r xiʼin idi dɨkɨ‑ña.
45 Ña n‑teyuʼu ñaʼa‑n,
ko mee‑ña,
nde na n‑kɨkɨu‑ña veʼe‑n teyuʼu‑ña xeʼe‑r.
46 Ña n‑xodo‑n aciti dɨkɨ‑r,
ko mee‑ña,
chi n‑xodo‑ña perfume xeʼe‑r.
47 Xaxeʼe xa duʼa n‑kida‑ña na jaʼan‑r nuu‑n xa n‑taxkanu ini Ianyuux ntdaa xa n‑kida‑ña,
juini kueʼe kuechi n‑kida‑ña chi yo xemani‑ña‑ia.
Ñayiu ñatu kaʼnu kuechi,
te n‑taxkanu ini Ianyuux kuechi‑i xaku ni xemani‑i‑ia —kuu‑ia,
xiaʼan‑ia nuu Simón.
48 Te xiaʼan‑ia nuu ñá ijan:
—N‑taxkanu ini‑r kuechi n‑kida‑n.
49 N‑ka nukuita dava ñayiu xyuku ijan ka xijan tnuʼu tnaʼa‑i:
—¿Jundu kuu se yaʼa xa jaʼan‑s xa taxkanu ini‑s kuechi n‑kida ñayiu?
50 Te xiaʼan Jesús nuu ñadɨʼɨ jan:
—Xaxeʼe xa kukanu ini ñaʼa‑n,
nanitaʼu‑n.
Juaʼan xandaa xavatu.
Mujer Pecaminosa Perdonada