N‑dakuaʼa Jesús se dakuaʼa‑ia janda kajan taʼu koio‑s nuu Ianyuux
11
Ɨɨn vuelta n‑xijan taʼu Jesús nuu Ianyuux ɨɨn nuu n‑xeʼen‑ia.
Nu n‑yaʼa xa n‑xijan taʼu‑ia,
te n‑jaʼan ɨɨn se dakuaʼa‑ia nuu‑ia:
—Dito,
¿Janda jaʼan koio‑da hora na kajan taʼu koio‑da nuu Ianyuux?
Dakuaʼa ñaʼa‑n ná n‑dakuaʼa Sua se n‑dakuaʼa‑s.
2 N‑jaʼan Jesús nuu‑s xiʼin nuu ntdaa ñayiu xyuku ijan:
—Hora na kajan taʼu koio‑n,
duʼa jaʼan koio‑n:
Taa‑ro Ianyuux,
na jaʼan‑da xa ii‑n.
Na koo‑da xañuʼu nuu‑n.
Na jaʼan koio‑da xa taxnuni‑n nuu‑da ntdaa‑da xa ka kuu‑da ñayiu ñuñayiu.
3 Taxi‑n xa kaxi xa koʼo koio‑da vitna nani kida‑n ndɨkɨu ndɨñuu.
4 Xijan taʼu‑da xa taxkanu ini‑n kuechi n‑ka kida‑da ná ka taxkanu ini‑da ñayiu kuiʼa ka kida ñaʼa daña.
Kada‑n xa maxku dajaʼan ñaʼa Kuiʼna xa kada koio‑da kuechi.
Duʼa kajan taʼu koio‑n nuu Ianyuux.
El Padre Nuestro
5 ʼÑayiu na jɨʼɨn veʼe ɨɨn se kumani xiʼin‑i niu dava te juñaʼa‑i nuu‑s:
“Taxnuu uni tila
6 chi n‑kixee se kumani xiʼin‑r,
te ña tuu naxa juñaʼa‑r‑sɨ.
Xika vaxi‑s.”
7 Nux duʼa na jaʼan‑i,
ma jaʼan se ijan:
“Maxku datnaʼa ñaʼa‑n.
Xá n‑nakadɨ‑r yeʼe‑r.
Xá n‑nukava‑r xiʼin daʼya‑r.
Ma kuu xa ndokoo‑r xa taxi‑r.”
Ma duʼa jaʼan‑s
8 chi juñaʼa‑s ntdaa xa ndoñuʼu‑i,
ko ñadu xaxeʼe xa kumani‑i xiʼin‑s juñaʼa‑s chi xaxeʼe xa maxku kujanuu‑s nuu‑i.
9 Ku kajan koio‑n te niʼi‑n.
Nduku koio‑n te niʼi‑n.
Nani dakande‑n yeʼe ñayiu xa najaan‑i xa kɨu‑n,
dani kajan koio‑n nuu Ianyuux xa ka ndoñuʼu‑n,
te taxi‑ia
10 chi ñayiu xko xijan ka niʼi‑i.
Dani ka niʼi ñayiu xko nduku.
Ñayiu xko dakande yeʼe,
najaan yeʼe xa kɨu‑i.
11 ʼNdoʼo,
se ka kuu taa,
nux xijan daʼya‑n chaka ma juñaʼa‑n koo chi juñaʼa‑n chaka.
12 Nux xijan daʼya‑n ndɨu,
ma juñaʼa‑n tduʼan chi juñaʼa‑n ndɨu.
13 Juini ka kuu‑n ñayiu ka kida kueʼe kuechi,
xndeʼa‑n xa ka xiaʼan‑n daʼya‑n.
Naka Taa‑ro Ianyuux,
Ia tuu andɨu,
ma ku taxi‑ia Espíritu‑ia nux ndeda‑n na kajan‑ia.
Kueʼe ka taxi Taa‑ro Ianyuux dada xa ka xiaʼan mee‑n daʼya‑n —kuu Jesús,
xiaʼan‑ia.
N‑ka jaʼan ñayiu xa Kuiʼna kida xa kineʼe Jesús xaloko
14 N‑xee ɨɨn se ñuʼu ñaʼa xaloko ña kuu jaʼan nuu‑ia.
Te n‑kineʼe Jesús xaloko jan anu‑s.
Nu n‑yaʼa xa n‑kineʼe‑ia xaloko jan,
te n‑kixeʼe‑s xa jaʼan‑s,
te n‑ka yuʼu ñayiu xyuku ijan.
15 N‑jaʼan dava‑i:
—Mee Kuiʼna taxnuni nuu dava ka xaloko kida xa kuaʼa se yaʼa xa kineʼe‑s xaloko anu ñayiu.
Beelzebú nani‑i.
16 Te n‑ka jaʼan tɨtnɨ ñayiu xyuku ijan nuu Jesús xa kada‑ia milagru xa kototnuni‑i‑ia.
17 N‑kutnuni ini‑ia xa n‑xani ini ñayiu ijan.
Xijan kuu xa xiaʼan‑ia nuu‑i:
—Nux ka jantnaʼa se ka taxnuni ɨɨn ñuu xiʼin ntnaʼa ka taxnuni‑s,
danaa tnaʼa‑s.
Dani ñayiu xtuu kaʼnu ɨɨn veʼe,
nux ka jantnaʼa‑i ma kutuu kaʼnu ka‑i.
18 Nux jantnaʼa Kuiʼna ntnaʼa mee‑i,
ma taxnuni ka Kuiʼna nani Satanás.
Xaʼa jaʼan‑r xaxeʼe xa n‑ka jaʼan‑n xa Beelzebú kida xa kineʼe‑r xaloko.
19 Nux Beelzebú kida xa kineʼe‑r xaloko,
dɨuni Beelzebú kida xa kineʼe se dakuaʼa‑n xaloko xñuʼu anu ñayiu nuda.
Mee se dakuaʼa mee‑n ka datuu ñaʼa.
20 Xaxeʼe xa kida Ianyuux xa kineʼe‑r xaloko,
xijan kuu xa n‑kixeʼe ka jandixa dava‑n xa taxnuni‑ia nuu‑n.
21 Ɨɨn se ndaku te ndeʼe‑s,
nux ndee‑s veʼe‑s,
ña tuu nax yaʼa veʼe‑s chi xa io tuʼa‑s xiʼin arma‑s.
22 Xaxeʼe xa nevaʼa‑s arma xani ini‑s xa ñayo ndeʼe ka dada mee‑s,
ko nux xee ɨɨn se ndeʼe ka dada mee‑s janñaʼa‑s,
te kaneʼe‑s ntdaa xaxii‑s jɨʼɨn,
te dakexio‑s.
23 Ñayiu ña ka kunduu xiʼin‑r,
ñatu ka xe ini ñaʼa‑i.
Ñayiu ña dataka ñayiu xa kunini‑i xa jaʼan‑r,
kuenda kɨu xate niʼno‑i‑yɨ xa maxku teku‑i xa jaʼan‑r.
N‑nangondita xaloko; ndeé‑i anu n‑ñuʼu‑i
24 ʼHora kee ɨɨn xaloko anu ɨɨn ñayiu,
te xikonuu‑i nuu ñayo io xa nduku‑i ɨɨn nuu ndetatu‑i,
ko xaxeʼe xa ñatu niʼi‑i,
jaʼan mee jaʼan ɨɨn‑i:
“Vaʼa ka nu na ndeé‑ro anu ñayiu n‑kane‑ro.”
25 Te hora naxee‑i,
chinuu‑i xa n‑natɨʼu nuu n‑kee‑i,
te vaʼa n‑xe kotnaʼa ndatniu.
26 Ijan te nkueka‑i uxa tnaʼa xaloko ka dada mee‑i,
te n‑ndeé‑i xiʼin xaloko ijan nuu n‑kane‑i,
te juʼun koio‑i anu ñayiu ijan.
Te ndaʼu ka yaʼa ñayiu jan hora ijan dada xa kiʼna —kuu Jesús,
xiaʼan‑ia.
Jundu kuu ñayiu xandaa xakuiti taʼu kuu
27 Nɨni jaʼan‑ia xijan,
te xee n‑jaʼan ɨɨn ñadɨʼɨ yɨtnaʼa nuu ñayiu xyuku nuu Jesús.
Xiaʼan‑ña nuu‑ia:
—Naka taʼu ñadɨʼɨ n‑xajan ñaʼa,
te n‑dakadi ñaʼa —kuu‑ña,
xiaʼan‑ña.
28 Te xiaʼan‑ia nuu‑ña:
—Taʼu ka kuu ñayiu ka teku tnuʼu Ianyuux,
te jandixa‑i‑ia dada ñayiu kuu dɨʼɨ‑r.
Bendecidos Son Aquellos que Escuchan y Obedecen
Ná n‑yaʼa Jonás yaʼa Jesús
29 Nu n‑kukueʼe ka ñayiu ka taka nuu‑ia,
te xiaʼan‑ia:
—Unu loko ñayiu io vitna.
Ka jaʼan‑i xa kada‑r milagru,
ko ma kuu xa jini‑i xijan.
Diko ni jini koio‑i xa yaʼa‑r ná n‑yaʼa Jonás.
30 Nani n‑yaʼa xa n‑xini ñayiu Nínive xa Jonás n‑kuu ɨɨn seña,
dani jini koio ndoʼo,
ñayiu io vitna,
xa kuu ruʼu,
Ia kuu ñayiu,
ɨɨn seña.
31 Kɨu na ndadandaa Ianyuux kuechi ñayiu,
nandoto ñá n‑kunxaʼnu n‑xio do sur xiʼin ñayiu io vitna,
te taka koio‑i xiʼin‑ña,
te datuu‑ña kuechi ñayiu io vitna chi ña xnini‑i tnuʼu‑r.
Xika n‑kixi mee‑ña xa n‑xo nini‑ña tnuʼu ndichi n‑jaʼan Salomón.
Kunaʼa koio xa n‑kixee mee‑r,
te ndandɨʼɨ ka‑r dada Salomón,
te ñatu ka jandixa‑n xa jaʼan‑r.
32 Kɨu na ndadandaa Ianyuux kuechi ñayiu,
nandoto ñayiu Nínive xiʼin ñayiu io vitna,
te kajan koio ñayiu Nínive jan kuechi‑i chi ña n‑ka natu ini‑i xa n‑ka kida‑i,
ko ñayiu Nínive n‑natu ini xa n‑ka kida‑i kuechi na n‑jaʼan Jonás tnuʼu Ianyuux nuu‑i.
Kunaʼa koio xa n‑kixee‑r,
te ndandɨʼɨ ka‑r dada Jonás,
te ñatu ka jandixa‑n xa jaʼan‑r.
Kuenda kɨu ɨɨn candil dakutnuni kuu nduchi nuu‑ro
33 ʼÑayo ñayiu natnuu candil te jantuu‑i ɨɨn nuu yɨdaʼu.
Ñayo chindeyu candil kaʼa maquila.
Ñayo ñayiu daa kida chi jandodo‑i candil ɨɨn nuu dujun xa na kutnuni nuu ñayiu ka kɨu veʼe‑i.
34 Kuenda kɨu ɨɨn xa dakutnuni kuu nduchi nuu‑ro.
Nux io vaʼa nduchi nuu‑n,
kaxi xndeʼa‑n ɨɨn xa xndeʼa‑n te xini‑n nax yaʼa,
ko nux ña io vaʼa nduchi nuu‑n,
ña xndeʼa‑n xa io,
ni ña xini‑n nax yaʼa.
35 Maxku jandixa‑n ntdaa xa ka jaʼan ñayiu ñuu‑n vaxi chi ñadu ntdaa xa ka jaʼan‑i ndaa.
36 Nux kanda nituʼu nuu tuu‑n,
ma jaʼan‑ro xa ña kanda ɨɨn lado ñɨɨ‑n —kuu Jesús,
xiaʼan‑ia.
N‑kakuneʼe Jesús kuechi se ka kuu fariseu xiʼin se ka tuʼa vaʼa ley
37 Nu n‑yaʼa n‑jaʼan Jesús xaʼa,
te n‑jaʼan ñaʼa ɨɨn se fariseu xa kaxi‑ia xiʼin‑s veʼe‑s.
N‑kɨu‑ia veʼe‑s,
te n‑nukoo‑ia yuʼu mexa‑s.
38 N‑yuʼu anu se fariseu xa ña n‑nandaʼa‑ia ná ka kida ñayiu ñuu‑s,
te n‑nukuita‑ia xaxi‑ia.
39 Te xiaʼan Jesús nuu se ijan:
—Mee‑n se fariseu,
najini‑n yata yaxi xiʼin yata koʼo te ñatu ka najini‑n xiti‑i nuu ñuʼu xa kuiʼa kaa ná kuiʼa kaa xa ka kida‑n.
40 Lilu‑n.
Nani n‑kidavaʼa Ianyuux ñɨɨ‑ro,
dani n‑kidavaʼa‑ia xaxtnuni‑ro xiʼin anu‑ro.
41 Nux na juñaʼa nga‑n ñayiu ka kundaʼu ɨɨn xa juñaʼa nga‑n,
kada Ianyuux xa ndunini‑n.
42 Mee‑n,
se fariseu,
ntnaʼa uxi nuʼne kuechi mino kaxtila xiʼin yuku ruda xiʼin ntdantuʼu nuu yua ka xaxi‑ro ka niʼi‑n ka najuñaʼa‑n ɨɨn Ianyuux.
Juini ka kida‑n xa vaʼa yaʼa,
ko ñatu dayaʼa‑n juxtixia ñayiu ka kida kuechi,
te ka kidandaa‑n kuechi ñayiu ña tuu nax kida,
ni ña ka xemani‑n dava ka ñayiu.
Xaxeʼe xijan ndaʼu yaʼa koio‑n.
Kada naʼi koio xa vaʼa yaʼa,
ko maxku daa ka kada‑n ñayiu.
Jandixa koio xa taʼu tniu Ianyuux.
43 Ndaʼu yaʼa koio mee‑n,
se fariseu,
chi ka tna ini‑n xa kunukoo koio‑n silla ka xko nukoo se ndandɨʼɨ xiti veñuʼu kuechi,
te ka tna ini‑n xa koo ñayiu xañuʼu nuu‑n nuu yaʼu.
44 Ndaʼu yaʼa koio mee‑n chi ka kuu‑n ná ka kuu yau kava nuu xndaa ndɨyɨ xa ña kanda ndeʼa‑ro xiti‑i,
te ñayiu ka xika ijan,
ñatu ka chinuu‑i xa nuu xndaa ndɨyɨ kuu —kuu Jesús,
xiaʼan‑ia.
45 Te n‑jaʼan ɨɨn se tuʼa vaʼa tnuʼu n‑chidotnuni Moisés:
—Maestru,
jan tnuʼu ñaʼa‑n daña xiʼin dava ka ñayiu xa duʼa n‑jaʼan‑n.
46 Te xiaʼan Jesús nuu‑s:
—Dani ndaʼu yaʼa koio mee‑n,
se ka tuʼa vaʼa tnuʼu n‑chidotnuni Moisés,
chi ka taʼu tniu‑n nuu ñayiu xa na jandixa koio‑i ley‑n.
Kuenda kɨu ɨɨn xa yo vee xndido ñayiu jan kuu xijan,
te mee‑n ñatu ka jandixa‑n xijan.
Ni xa kajuʼun ɨɨn dɨkɨ ndaʼa‑n xijan ña kuu.
47 Ndaʼu yaʼa koio‑n ntdaa‑n chi ka kaan‑n nuu xndaa se n‑ka jaʼan tnuʼu Ianyuux nuu ñayiu.
Ka kuu‑s se n‑ka xaʼni ñaʼa xixitna‑n.
48 Xnaʼa‑n xa n‑ka kida xixitna‑n jan.
Ka xani ini‑n ná n‑ka xani ini xixitna‑n chi ka xani ini‑n xa ɨɨn xavaʼa kuu xa n‑ka kida‑s xa n‑ka xaʼni‑s se n‑ka jaʼan tnuʼu Ianyuux nuu ñayiu,
te ka kaan mee‑n nuu xndaa‑s.
49 Xaxeʼe xijan,
n‑jaʼan Ianyuux,
Ia xini ntdandituʼu xa kuu xa xino:
“Tundaʼa‑r se jaʼan tnuʼu‑r nuu ñayiu xiʼin se dakuaʼa ñaʼa.
Kada uʼu koio‑n dava‑s,
te kaʼni koio‑n dava‑s.”
50 Xijan kuu xa mee‑n,
ñayiu io vitna,
kundido kutau‑n xiʼin xixitna‑n se n‑ka jaʼan tnuʼu Ianyuux nuu ñayiu.
Nde na n‑xe kavatuu ñuñayiu n‑ka nukuita‑s ka xaʼni‑s se n‑ka xo jaʼan tnuʼu Ianyuux nuu ñayiu xiʼin nde vitna.
51 Nde tiempo n‑xo tuu Abel xiʼin nde tiempo n‑xo tuu Zacarías n‑ka nukuita‑s ka xaʼni‑s se n‑ka jaʼan tnuʼu Ianyuux nuu ñayiu.
Zacarías n‑ka xaʼni‑s meʼñu altar xiʼin veñuʼu.
Ruʼu jaʼan xa kundido kutau mee‑n,
ñayiu io vitna‑sɨ.
52 Ndaʼu yaʼa koio mee‑n,
se ka tuʼa vaʼa tnuʼu n‑chidotnuni Moisés chi ñatu n‑ka jaʼan ndaa‑n nuu ñayiu xa na kutnuni ini‑i tnuʼu Ianyuux.
Ña ka xe ini mee‑n tnuʼu‑ia,
te ñayiu xndaxio anu xa kunini‑i tnuʼu‑ia,
datu ini‑n‑yɨ —kuu Jesús,
n‑xiaʼan‑ia nuu‑s.