N‑tundaʼa Jesús uni diko uxi se jaʼan tnuʼu‑ia nuu ñayiu
10
Nu n‑yaʼa ntdaa xijan,
te n‑kaxí Jesús uni diko uxi ntuku seyɨɨ.
N‑tundaʼa‑ia‑s xa ku jɨʼɨn ndɨ uu ndɨ uu‑s ñuu naʼnu,
ñuu kuechi nuu ñu ini‑ia xa jɨʼɨn‑ia.
2 Te xiaʼan‑ia nuu‑s:
—Yo kueʼe ñayiu ta kukanu ini ka Ianyuux.
Kuenda kɨu trɨu n‑yichi kuu‑i,
te xaku ni ñayiu io xa nakueka‑i trɨu jan.
Xijan kuu xa kajan taʼu koio‑n nuu Ianyuux xa na tundaʼa ka‑ia ñayiu nakueka trɨu jan.
3 Jɨʼɨn koio‑n,
te kunaʼa koio‑n xa kuenda kɨu tkolelu xee meʼñu kɨt kuu lobo ka kuu‑n.
4 Maxku kaneʼe koio‑n tvini.
Maxku kaneʼe koio‑n jayate.
Maxku kaneʼe koio‑n ɨnka tayu ndixa‑n.
Maxku naʼa ku ndatnuʼu koio‑n xiʼin ñayiu nanitnaʼa xiʼin‑n ichi juaʼan koio‑n.
5 Hora na kɨu koio‑n ɨɨn veʼe,
juñaʼa‑n nuu ñayiu io veʼe jan:
“Na kutuu vii kutuu vaʼa koio‑n.”
6 Nux ijan io ñayiu juini xa kutuu vii kutuu vaʼa‑i ná juini Ianyuux,
te kutuu vii kutuu vaʼa‑i ná n‑jaʼan‑n.
Nux ñaʼa,
ma kutuu vii kutuu vaʼa‑i.
7 Veʼe ndoo koio‑n kax koʼo koio‑n xa taxi ñayiu ijan chi io yaʼu ɨɨn se kidatniu.
Maxku dama‑n veʼe ndoo koio‑n.
8 Davaʼa nga ñuu kɨu koio‑n,
nux na kunini ñayiu ñuu ijan xa jaʼan‑n,
kaxi koio‑n xa na taxi‑i.
9 Ndadavaʼa koio‑n ñayiu ka kuʼu,
te juñaʼa koio‑n nuu‑i:
“Vax kuyatni kɨu taxnuni Ianyuux nuu‑n.”
10 Nux ma xe ini ñayiu ɨɨn ñuu xa jaʼan koio‑n,
jɨʼɨn koio‑n ichi kaʼnu yuʼu ñuu jan,
te kɨdɨ koio‑n xeʼe‑n,
te xee jaʼan koio‑n:
11 “Kɨdɨ‑da xeʼe‑da xa maxku kɨʼɨ ñuyaka ñuu‑n chi ñatu ka xe ini‑n xa n‑ka jaʼan‑da.
Juini ña n‑ka xe ini‑n xa n‑jaʼan‑da,
ko kidayɨka‑i xa kunaʼa‑n xa vax kuyatni kɨu taxnuni Ianyuux nuu‑n.”
Xaʼa juñaʼa koio‑n nuu ñayiu jan.
12 Kɨu na ndixi juexi,
ndaʼu ka yaʼa ñuu ijan dada ñayiu n‑xio Sodoma —kuu‑ia,
xiaʼan‑ia.
Te xiaʼan‑ia nuu ñayiu ñuu Corazín xiʼin nuu ñayiu ñuu Betsaida:
13 —Ndaʼu yaʼa mee‑n,
ñayiu Corazín.
Ndaʼu yaʼa ndoʼo,
ñayiu Betsaida.
Nuu n‑kida‑r kueʼe milagru Tiro xiʼin Sidón ná n‑kida‑r ñuu mee‑n,
xa n‑kunaʼa n‑ka natu ini ñayiu jan xa n‑ka kida‑i kuechi,
te kuiʼno‑i daʼma ndayu te kunukoo koio‑i nuu yaa n‑kuu xa n‑ka natu ini‑i xa n‑ka kida‑i kuechi.
14 Ndaʼu ka yaʼa mee‑n,
ñayiu Corazín xiʼin ñayiu Betsaida,
dada ñayiu Tiro xiʼin Sidón hora na ndadandaa Ianyuux kuechi ñayiu ñuñayiu.
15 Te ndoʼo,
ñayiu Capernaum,
ma jɨʼɨn koio‑n andɨu chi keé koio‑n andea.
Te xiaʼan‑ia nuu se dakuaʼa‑ia:
16 —Ñayiu kunini xa jaʼan koio‑n,
kuenda kɨu xa jaʼan mee‑r kunini koio‑i.
Ñayiu ma xe ini ñaʼa,
kuenda kɨu mee‑r ma xe ini ñaʼa koio‑i.
Ñayiu ñatu xe ini ñaʼa mee‑r,
ña xe ini‑i Ia n‑tundaʼa ñaʼa —kuu Jesús,
xiaʼan‑ia.
17 N‑ka kee se n‑tundaʼa‑ia;
ka xeʼen‑s.
Nu n‑ka nangondita‑s nuu Jesús,
te n‑ka kudɨ ini‑s.
N‑ka jaʼan‑s nuu‑ia:
—Dito,
ka jandixa ñaʼa ñayiu;
nde xaloko n‑ka jandixa ñaʼa chi n‑ka xetniu‑da dɨu‑n xa n‑taʼu tniu‑da nuu‑i xa kee‑i anu ñayiu,
te n‑ka kee‑i.
18 Te n‑jaʼan Jesús nuu‑s:
—N‑xini‑r xa jungava Satanás nde andɨu.
N‑kee‑i ná kee taxa.
19 Kunaʼa koio‑n xa kada‑r xa ndaku‑n nuu Kuiʼna,
te juini na jueñi niʼno‑n koo a tduʼan,
ña tuu nax yaʼa koio‑n.
20 Kudɨ ini koio‑n,
ko ñadu xaxeʼe xa ka jandixa ñaʼa xaloko kudɨ ini koio‑n,
chi kudɨ ini koio‑n xaxeʼe xa andɨu yodotnuni dɨu‑n —kuu‑ia,
xiaʼan‑ia.
21 Nu n‑teku Jesús tnuʼu n‑ka jaʼan‑s,
te n‑kidadɨ ini ñaʼa Espíritu Ianyuux.
Ijan dada n‑jaʼan Jesús nuu Ianyuux:
—Taa‑ro Ianyuux,
Ia taxnuni andɨu xiʼin ñuñayiu,
najuen tnuʼu ñaʼa‑da chi ña n‑datuu‑n xaʼa nuu ñayiu ka tuʼa vaʼa tutu,
ñayiu io xaxtnuni xa kutnuni ini‑i,
ko n‑datuu‑n ntdaa xaʼa nuu ñayiu ña ka tuʼa.
Kuu‑i ná kuu sekuechi.
Duʼa n‑kida‑n,
Taa‑ro,
chi duʼa n‑kuu anu‑n —kuu Jesús,
xiaʼan‑ia nuu Taa‑ro Ianyuux.
22 Ijan dada xiaʼan‑ia nuu se xyuku ijan:
—N‑taxi Ianyuux xaxtnuni xa ntdaa xa kuu xa xino xini‑r.
Ñayo ñayiu xini jundu kuu Daʼya Yɨɨ‑ia.
Mee ni Taa‑ro Ianyuux xini jundu kuu‑r,
te mee ni‑r xini jundu kuu‑ia.
Dɨuni jini ñayiu kuu anu‑r xa juña tnuʼu‑r jundu kuu‑ia.
Ña yo ka ñayiu xini —kuu Jesús,
xiaʼan‑ia.
23 Ijan dada n‑ndonenuu‑ia xa kundeʼa‑ia uxi uu se dakuaʼa‑ia jan,
te xiaʼan‑ia nuu‑s:
—Naka taʼu kuu ñayiu ndeʼa xa xndeʼa mee‑n.
24 Kueʼe se n‑ka jaʼan tnuʼu Ianyuux nuu ñayiu xiʼin se n‑kunxaʼnu n‑ka juini xa jini koio‑s xa kida‑r.
N‑ka juini‑s xa jini‑s xa xndeʼa‑n vitna,
ko ñayo‑s n‑xini.
N‑ka juini‑s xa kunini koio‑s tnuʼu xnini‑n,
ko ña n‑kuu xa teku‑s —kuu‑ia,
xiaʼan‑ia.
Xavaʼa n‑kida ɨɨn se Samaria
25 Ɨɨn vuelta nujuiin ɨɨn se tuʼa vaʼa tnuʼu n‑chidotnuni Moisés meʼñu ñayiu xyuku nuu dakuaʼa Jesús ñayiu xa kototnuni‑s‑ia.
N‑xijan tnuʼu‑s‑ia:
—Maestru,
¿nax kada‑da xa kundito‑da nɨkava nɨkuita?
26 Te n‑xijan tnuʼu ñaʼa Jesús:
—¿Nax kaʼu‑n?
¿Nax xyodotnuni nuu libru Moisés xa kada‑n?
27 Te xiaʼan‑s:
—Duʼa yodotnuni:
“Io xa juemani koio‑n Ianyuux,
Ia kuu Xtoʼo‑n,
xiʼin nde yɨkɨ nde tuchi‑n.
Ná mani juini‑n mee‑n,
daa juemani ñanitnaʼa‑n.”
28 Te xiaʼan‑ia nuu‑s:
—Vaʼa n‑jaʼan‑n.
Kada xijan te kundito‑n nɨkava nɨkuita.
29 N‑juini‑s xa kani ini Jesús xa ña tuu na kuechi kida‑s,
xijan kuu xa xiaʼan‑s:
—¿Ko jundu kuu ñanitnaʼa‑da?
30 Xiaʼan Jesús:
—N‑kee ɨɨn seyɨɨ Jerusalén xa juaʼan‑s Jericó.
N‑ka xadɨ ñaʼa ñaduʼu ichi juaʼan‑s,
te n‑ka duʼu ñaʼa‑s.
N‑ka tava‑s daʼma‑s.
N‑ka janñaʼa‑s,
te n‑ka dandoo ñaʼa‑s.
Katuu‑s ichi te junee‑s.
31 Ijan dada n‑kendita ɨɨn dutu nuu katuu‑s.
N‑xini‑s xa katuu se ijan,
te n‑xiko nduu‑s ɨnka xio yuʼu ichi.
32 N‑kuyatni ɨɨn se kuu levita nuu katuu se n‑tnukueʼe jan.
N‑xini ñaʼa‑s,
te n‑xiko nduu‑s ɨnka xio yuʼu ichi.
33 Dɨuni n‑kendita ɨɨn se Samaria.
N‑xini‑s se n‑tnukueʼe jan,
te n‑kundaʼu ini ñaʼa‑s.
34 N‑xetuʼa‑s‑sɨ,
te n‑xodo‑s aciti xiʼin vinu nuu n‑tnukueʼe‑s.
N‑duku‑s nuu n‑tnukueʼe‑s,
te n‑dakaa ñaʼa‑s yata kɨtɨ‑s.
Ndeka ñaʼa‑s juaʼan mesón.
Ijan n‑ñunuu ñaʼa‑s.
35 Kɨu kuu uu n‑tava‑s uu denario,
te n‑chiyaʼu‑s se ndee mesón jan,
te xiaʼan‑s nuu‑sɨ:
“Junuu‑n‑sɨ te nux nadaa ka na njuʼun‑n,
te kɨu na kuiko‑da nataxi‑da tvini‑n”,
kuu‑s,
xiaʼan‑s.
36 ¿Nax kachi‑n?
¿Ndeda ndruni‑s n‑kida na io xa kada‑ro ñanitnaʼa‑ro?
—kuu Jesús,
xiaʼan‑ia.
37 Te xiaʼan‑s nuu‑ia:
—Se n‑kundaʼu ini se ijan.
Te xiaʼan ntuku Jesús:
—Nani n‑kida se ijan,
dani juan kada‑n.
Parábola del Buen Samaritano
Na n‑xo tuu Jesús veʼe María xiʼin Tmarta
38 Dani,
dani juaʼan Jesús xiʼin uxi uu se dakuaʼa‑ia jan ichi juaʼan Jerusalén.
N‑kɨu‑ia ɨɨn ñuu luchi,
te n‑jaʼan ñaʼa ɨɨn dichi nani Tmarta veʼe‑i.
39 Kuʼu Tmarta kuu María.
Nukoo María nuu nukoo Jesús,
Ia kuu Xtoʼo‑ro,
te n‑xo nini‑i xa n‑jaʼan‑ia.
40 Nɨni nini María xa jaʼan‑ia,
kida Tmarta tniu veʼe‑i,
te yo ndu ini‑i.
Xijan kuu xa n‑xetuʼa‑i Jesús,
te n‑jaʼan‑i nuu‑ia:
—Dito,
nakuenda ña chinuu‑n xa ña chindee ñaʼa María.
Mee nga‑da kidatniu.
Juñaʼa‑n‑yɨ xa na chindee ñaʼa‑i —kuu Tmarta,
xiaʼan‑i nuu‑ia.
41 Xiaʼan Jesús,
Ia kuu Xtoʼo‑ro: