3 Jesús canee yā na yáāⁿ Betania na vaacu Simón chi canéé sá ndúúcū caꞌai chi nguuvi lepra chi inꞌduuti cuerpo yeⁿꞌē sa. Taachí Jesús miiⁿ vɛɛ́ yā na mesa, ndaā ꞌáámá nꞌdaataá nanáaⁿ yā. Táⁿꞌā miiⁿ ní ndɛɛ̄ tá ꞌáámá frasco yeⁿꞌe alabastro ndiituú ndúúcū aceite perfume yeⁿꞌe nardo chí ndɛɛvɛ ngeeⁿ ní neené yaꞌai chííꞌvɛ̄. Ní ꞌcuūⁿ tá frasco miiⁿ ní chꞌeendáa tá aceite miiⁿ na tiīⁿ Señor Jesús miiⁿ. 4 Nꞌduuvi discípulos chi snée yā miiⁿ nduuvi táaⁿ yā ní caⁿꞌa yā nguaaⁿ maaⁿ yā: ¿Dɛꞌɛ̄ cuuví chí chingéeⁿ ta aceite ꞌcūū? 5 Ti cuuvi nꞌdiicui yú ní ngoꞌo ꞌiinū ciento caadi ní cuuvi caꞌa yú ꞌiiⁿꞌyāⁿ chi nguɛ́ɛ́ yeⁿꞌe yā. Ní nduuvi taáⁿ yā ndúúcu tá.

6 Naati Jesús miiⁿ ní caⁿꞌa yā: ꞌĀā canee ra tá. Nguɛ́ɛ́ yaaꞌvi nī táⁿꞌā. ¿Dɛꞌɛ̄ cúúví chi yaaꞌví nī táⁿꞌā? Tá ꞌtiī ní nꞌdaācā idiiⁿ tá nduucú. 7 ꞌIiⁿꞌyāⁿ chi nguɛ́ɛ́ yeⁿꞌe yā ní ꞌaama ca cánée yā ndúúcu nī. Ní ndísꞌtiī ní cuuvi dinꞌdaacá nī nduucú yā taachi neⁿꞌe nī; naati ꞌúú nguɛ́ɛ́ ꞌaama cuneé ndúúcu nī. 8 Tá ꞌcūū ní diīⁿ tá tanꞌdúúcā chi chꞌiī tá perfume cuerpo yeⁿꞌé maaⁿ chi ꞌāā cuɛ́ɛ́ ꞌcuūví, ꞌtíícā diiⁿ tá. Ní ꞌāā nnee ꞌcuiī ta chuū ꞌúú taachí ꞌāā cuɛ́ɛ́ ꞌcuɛɛchí. 9 Cuaacu nííⁿnyúⁿ ngaⁿꞌá ngií ndísꞌtiī: ꞌĀā tií nūuⁿ chí ꞌiiⁿꞌyāⁿ caaⁿꞌmáⁿ yā nduudu ngai yeⁿꞌé yeⁿꞌē chi nanguaⁿꞌai ꞌiiⁿꞌyāⁿ na núúⁿmáⁿ íⁿꞌyeeⁿdī caaⁿꞌmaⁿ ntuúⁿ yā chi diīⁿ nꞌdaataá ꞌcūū ní nꞌgaacú yā yeⁿꞌē tá.

10 Tuuꞌmi ní Judas Iscariote, ꞌáámá chɛ́ɛ́ ꞌiiⁿꞌyāⁿ naachi ndiichuuvi discípulos, cheⁿꞌe sá nanááⁿ chiiduú nꞌgɛɛtɛ. Ní ngaⁿꞌa sa táácā chi cuuvi ncaꞌā sa Jesús miiⁿ ná taꞌa ꞌiiⁿꞌyāⁿ sꞌeeⁿ. 11 Taachí ꞌiiⁿꞌyāⁿ sꞌeeⁿ chꞌiindiveéⁿ yā chuū, neené yeenú yā, ní caⁿꞌa yā chi caꞌa yā tuumī Judas miiⁿ cáávā chuū. Judas ní inꞌnuuⁿ sa dɛꞌɛ̄ hora chi ncaꞌa sa ꞌiiⁿꞌyāⁿ sꞌeeⁿ Jesús miiⁿ.

12 Ndaā nguuvi vmnááⁿ vmnaaⁿ yeⁿꞌe ꞌviicu chi cheꞌé yā pan chi nguɛ́ɛ́ levadura yeⁿꞌē, ꞌviicu taachi nꞌgiiⁿꞌnúⁿ yā ꞌiiti cuūchī yeⁿꞌe pascua miiⁿ. Ní discípulos yeⁿꞌe Jesús miiⁿ ntiinguuneéⁿ yā Jesús: ¿Tií neⁿꞌe di chi caⁿꞌá ꞌnū inꞌnuúⁿ ꞌnū chi cheꞌe nguiīnū yú yeⁿꞌe ꞌviicu pascua?

13 Tuuꞌmi ní Jesús dichoꞌó yā na ꞌuūvī discípulos yeⁿꞌe yā, ní caⁿꞌa yā chii yā ꞌiiⁿꞌyāⁿ: Ndísꞌtiī cueⁿꞌé nī yáāⁿ Jerusalén. Miiⁿ ní nndaacá nī ꞌáámá sáⁿꞌā chí ndɛ́ɛ́ sa ꞌáámá ꞌcuuti cuéeé nuūⁿnīⁿ. Canꞌdáa nī saⁿꞌā. 14 Naachí ndaa sa vaꞌai miiⁿ, ní cuuví nī sáⁿꞌā chi yeⁿꞌē vaꞌai miiⁿ: Maestro yeⁿꞌe yú ngaⁿꞌa yā ꞌtíícā: ¿Tiī canéé cuarto naachi cheꞌe nguiinuú yeⁿꞌe pascua ndúúcū discípulos yeⁿꞌé? 15 Tuuꞌmi ní chꞌiⁿꞌi yā ꞌáámá cuarto chꞌɛɛtɛ ná ndiichi ndii ꞌúúví piso miiⁿ chi ꞌáá vɛ́ɛ́ yaāaⁿ. Miiⁿ ní inꞌnuúⁿ nī chi cheꞌe yú.

16 Discípulos cueⁿꞌe yā ní ndaa yā ná yáāⁿ Jerusalén miiⁿ ní ndaāca yā tanducuéⁿꞌē tanꞌduucā chi Jesús ngaⁿꞌa yā. Ní ꞌiiⁿꞌyāⁿ sꞌeeⁿ inꞌnuúⁿ yā chí cheꞌe nguiīnú yā yeⁿꞌe ꞌviicu yeⁿꞌe pascua miiⁿ.

17 Taachí ꞌāā chiī chiīnū mííⁿ ndaā Jesús ndúúcū ndiichuuvi discípulos yeⁿꞌe yā. 18 Taachí vɛɛtɛ́ yā na mesa miiⁿ chi cheꞌe yā Jesús caⁿꞌa yā chii yā ꞌiiⁿꞌyāⁿ sꞌeeⁿ: Cuaacu nííⁿnyúⁿ ngaⁿꞌá ngií ndísꞌtiī, chi ꞌáámá chɛ́ɛ́ ndísꞌtiī chi ngeꞌé nī nduucú diíⁿ nī entregar ꞌúú.

19 Tuuꞌmi ní discípulos ní sꞌnee ndaachi núúⁿ yā ní tucaꞌa yā tiinguunéeⁿ yā Jesús caꞌáámá caꞌáámá yā: ¿ꞌÁá ꞌúú? Ní táámá yā ngaⁿꞌa ntúuⁿ yā: ¿ꞌÁá ꞌúú rá?

20 Jesús nanꞌguɛɛcútaⁿꞌa yā: ꞌÁámá chɛɛ naachi ndiichúúví chí diꞌcaāndá yā pan yeⁿꞌé yā na cúꞌú ꞌcūū nduucú caⁿꞌá yā diiⁿ yā ꞌtíícā. 21 Cuaacu, chi Saⁿꞌā chí Daiya Dendyuūs caⁿꞌa sa ꞌcueenú sa cuuvi tanꞌdúúcā chi ngaⁿꞌa yeⁿꞌé yā naachi canéé nguūⁿ na libro yeⁿꞌé Ndyuūs. Dɛꞌɛ chúúcā yaꞌai yeⁿꞌe saⁿꞌā chi ncaꞌa sa ꞌúú chi Saⁿꞌā chi Daiya Ndyuūs. Nꞌdáácā ca yeⁿꞌē sa ndúúti chi nguɛɛ chꞌiindiyaāⁿ sa.

22 Taachí vɛɛtɛ́ yā ngeꞌe yā, tuuꞌmi ní Jesús staꞌá yā pan, ní ncaꞌa yā gracias Ndyuūs cáávā pan miiⁿ. Ní nꞌdeé yā pan ní caꞌa yā discípulos. Ní caⁿꞌa yā: Cheꞌé nī pan caati tanꞌdúúcā cuerpo yeⁿꞌé ꞌtíícā.

23 Ní Jesús staꞌá yā taza ndúúcū nuūⁿnīⁿ yeⁿꞌe uvas. Ní taachi ncaꞌa yā gracias Ndyuūs, caꞌa yā discípulos yeⁿꞌé yā. Ní caⁿꞌa yā. Nducyaaca ndísꞌtiī cuꞌú nī nuūⁿnīⁿ uvas yeⁿꞌe taza ꞌcūū. 24 Ní caⁿꞌa yā chii yā ꞌiiⁿꞌyāⁿ sꞌeeⁿ: Nuūⁿnīⁿ uvas miiⁿ tanꞌdúúcā yuūuⁿ yeⁿꞌé, ní yeⁿꞌe ꞌáámá compromiso chi ngai yeⁿꞌé. Yuūuⁿ yeⁿꞌé chí cungeeⁿ ní cáávā ꞌyaaⁿ nꞌdáí ꞌiiⁿꞌyāⁿ. 25 Cuaacu nííⁿnyúⁿ ngaⁿꞌá ngií ndísꞌtiī, chí ꞌāā ntɛ́ɛ́ cuꞌú nuūⁿnīⁿ yeⁿꞌe uvas na iⁿꞌyeeⁿdí ꞌcūū ndíí nguuvi chi cuꞌú naachí Ndyuūs ngaⁿꞌa ntiiⁿnyúⁿ yā.

26 Taachí chꞌiinu chiita yā himno, chi canción yeⁿꞌe Ndyuūs nanꞌdáa yā vaꞌāī ní cueⁿꞌé yā na yiīcū chi nguuvi Olivos. 27 Tuuꞌmi ní Jesús caⁿꞌa yā chii yā discípulos: Nducyaaca ndísꞌtiī cuuví ꞌcuinaáⁿ nī yeⁿꞌē ꞌúú maaⁿnguíinū caati ngaⁿꞌa naachi canéé nguūⁿ na libro yeⁿꞌé Ndyuūs ꞌtúúcā: ꞌNuūcáꞌai yā ꞌcaaⁿꞌnúⁿ yā saⁿꞌā chi idiiⁿ sa cuidado ꞌiiti cuūchī ní ꞌiiti cuūchī sꞌeeⁿ ní caⁿꞌá ꞌmuuⁿ caⁿꞌá miiⁿ tī. 28 Taachi ꞌúú nduuchí yeⁿꞌe nguaaⁿ tináⁿꞌā, caⁿꞌá vmnaaⁿ yeⁿꞌé ndísꞌtiī na yáⁿꞌāa Galilea.

29 Tuuꞌmi ní Pedro miiⁿ ní caⁿꞌa sa chii sa ꞌiiⁿꞌyāⁿ: ꞌÁárá chí nducyaaca yā cuuví ꞌcuinaáⁿ yā, ꞌúú ní nguɛ́ɛ́ cuuví ꞌcuinaáⁿ.

30 Tuuꞌmi ní Jesús ní caⁿꞌa yā chiiya Pedro: Cuaacu nííⁿnyúⁿ ngaⁿꞌá ngií dii chi maaⁿnguiinu taachi ꞌāā cuɛ́ɛ́ ꞌcuaī tusáⁿꞌā ꞌuūvī cuuvi, ꞌiinū cuuvi cueeⁿdíítu di ngaⁿꞌa di yeⁿꞌē ꞌúú chi nguɛ́ɛ́ inꞌdiichi di ꞌúú.

31 Naati Pedro miiⁿ ní cheeⁿdiītū caⁿꞌa sa: ꞌÁárá chí ꞌcuūví ndúúcu nī, Maestro, nguɛ́ɛ́ ngaⁿꞌá chi nguɛ́ɛ́ inꞌdiichí Nꞌdiī. Ní nducyaaca discípulos ní ꞌtiicá ntúūⁿ caⁿꞌa yā.

32 Tuuꞌmi ní ndaá yā na ꞌáámá jardín chi nguuvi Getsemaní, ní Jesús caⁿꞌa yā chii yā discípulos yeⁿꞌe yā: ꞌCuɛɛtɛ́ nī ꞌmuuⁿ, neⁿꞌe chi ꞌúú caⁿꞌá caaⁿꞌmāⁿnguaꞌá.

33 Ní Jesús candɛ́ɛ yā Pedro, ndúúcū Jacobo, ndúúcū Juan. Ní neené nadicádiinuuⁿ Jesús ní nééné sꞌneeⁿ ndaachí yiinú yā. 34 Ní caⁿꞌa yā chii yā ꞌiiⁿꞌyāⁿ sꞌeeⁿ: Alma yeⁿꞌé neené ndaachi yiinú chi yaꞌāī chi ꞌcuūví. ꞌĀā snéé núúⁿ nī ꞌmuuⁿ, ní nguɛ́ɛ́ ꞌcuɛɛti yaadú nī.

35 Tuuꞌmi ní Jesús cueⁿꞌe yā ta ꞌlííⁿ cuááⁿ vmnaaⁿ, ní candiitínꞌdii yā na yáⁿꞌāa ní caⁿꞌanguaꞌá yā ní caⁿꞌa yā: Nꞌdiī Chiidá, ndúúti chi cuuví ní nguɛ́ɛ́ diíⁿ nī yeⁿꞌe chi ꞌcueenú cuuvi yeⁿꞌe prueba ꞌcūū chi canéé chi cuuvī hora chí cuchiī. 36 Tuuꞌmi ní naachí caⁿꞌanguaꞌá yā ní caⁿꞌa yā: Nꞌdiī Chiidá, nꞌdiī cuuvi diíⁿ nī tanducuéⁿꞌē. Nadinguáⁿꞌai nī ꞌúú yeⁿꞌe chi ꞌcueenú cuuvi prueba ꞌcūū. Naati nguɛ́ɛ́ cuuví tanꞌdúúcā chi ꞌúú neⁿꞌé, naati tanꞌdúúcā chí nꞌdiī neⁿꞌe nī.

37 Tuuꞌmi ní ndaa ntúuⁿ yā naachi snee discípulos yeⁿꞌé yā, ní ndaāca yā discípulos chí stiyaadú yā. Ni Jesús caⁿꞌa yā chiī yā Pedro miiⁿ: Díí Simón, ¿Áá cyaadu di? ¿ꞌÁá nguɛ́ɛ́ ichɛɛ̄ di cánduuchi di mar ꞌáámá hora? 38 Ndísꞌtiī ꞌcuɛɛti nduuchí nī ní caaⁿꞌmaⁿnguaꞌá nī ní nguɛ́ɛ́ diíⁿ nī nuuⁿndi. Cuaacu nííⁿnyúⁿ espíritu yeⁿꞌe nī neⁿꞌe diīiⁿ nꞌdaacáā, naati cuerpo yeⁿꞌé nī ní ꞌāā duūvā.

39 Tuuꞌmi ní Jesús cueⁿꞌe ntúuⁿ yā ní ngaⁿꞌanguaꞌa yā, ní caⁿꞌa ntúuⁿ yā tanꞌdúúcā chí caⁿꞌa yā vmnaaⁿ. 40 Ní nguɛɛcunée yā ndaa ntúuⁿ yā naachi snéé discípulos, ní ndaaca ntúuⁿ yā ꞌiiⁿꞌyāⁿ sꞌeeⁿ stiyaadú yā. Ní ꞌāā ntɛ́ɛ́ ngii ichɛɛ yā ndúúcū yaaⁿ ti nduutináaⁿ yā chi yaaⁿ náaⁿ yā. Ní ꞌiiⁿꞌyāⁿ sꞌeeⁿ ní nguɛ́ɛ́ déénu yā chí nꞌguɛɛcútaⁿꞌa yā. 41 Cueⁿꞌé yā ndii chiiⁿ ndii ꞌíínú cuuvi, ní ngaⁿꞌanguaꞌá yā. Ní taachi ndaa yā naachi snee discípulos, caⁿꞌa yā: Ndísꞌtiī ꞌcuɛɛtiyaadú nī ní ntaaviꞌtuunúúⁿ nī. ꞌĀā tiiní cā. ꞌĀā ndaā hora chi ꞌiiⁿꞌyāⁿ ncaꞌa yā ꞌúú Saⁿꞌā chi Daiya Dendyuūs na táꞌā saⁿꞌā sꞌeeⁿ chi dinuuⁿndi. 42 Nducueeⁿ ndísꞌtiī ní cuⁿꞌū yú. ꞌĀā cuchiī niiⁿnuúⁿ saⁿꞌā chí ncaꞌa ꞌúú.

43 Naaⁿ chi Jesús indée yā ndaa Judas chi saⁿꞌā ꞌáámá yeⁿꞌē ndiichuuvi discípulos. Ní ndaa sa ndúúcū nꞌdeee nꞌdáí ꞌiiⁿꞌyāⁿ ndúúcū machete ꞌuūvī lados ꞌcaāiⁿ ndúúcū yáⁿꞌá. Chiiduú nꞌgɛɛtɛ ndúúcū maestros yeⁿꞌe ley, ndúúcū ꞌiiⁿꞌyāⁿ ndiicúū chi ngaⁿꞌa ntiiⁿnyuⁿ yeⁿꞌe yaācū dichóꞌo yā ꞌiiⁿꞌyāⁿ sꞌeeⁿ. 44 Judas miiⁿ chí ncaꞌa sa Jesús ꞌiiⁿꞌyāⁿ sꞌeeⁿ, ní caꞌa sa ꞌaama seña. Ní caⁿꞌa sa ꞌtúúcā: ꞌIiⁿꞌyāⁿ chi ꞌúú chiꞌneeⁿ cheendí, ꞌiiⁿꞌyāⁿ miiⁿ chíí. Cutaꞌá nī ꞌiiⁿꞌyāⁿ ní candɛɛ́ nī ꞌiiⁿꞌyāⁿ ní dinꞌdaacá nī seguro ꞌiiⁿꞌyāⁿ.

45 Taachí ndaā Judas nanááⁿ Jesús ní caⁿꞌa sa: Nꞌdií Maestro, Maestro. Ní ꞌneeⁿ cheendi sa ꞌiiⁿꞌyāⁿ. 46 Tuuꞌmi ní staꞌá yā Jesús ní candɛ́ɛ yā preso ꞌiiⁿꞌyāⁿ. 47 Naati ꞌáámá chɛ́ɛ́ ꞌiiⁿꞌyāⁿ chi snéé miiⁿ itunꞌdáa yā machete chi ꞌuuvi lados ꞌcaāiⁿ yeⁿꞌe yā ní ꞌnuucáꞌai yā mozo yeⁿꞌe chiiduú chꞌɛɛtɛ ca ní chꞌiica sa veēeⁿ mozo miiⁿ. 48 Tuuꞌmi ní Jesús caⁿꞌa yā chii yā nducyaaca ꞌiiⁿꞌyāⁿ sꞌeeⁿ: ¿ꞌÁá canꞌdaā ndísꞌtiī ndúúcū machete chi ꞌuūvī lados ꞌcaāiⁿ ndúúcū yáⁿꞌá chí cutaꞌá nī ꞌúú tanꞌdúúcā chi ꞌúú ꞌáámá duucu ꞌúú? 49 Nguuvi nguuvi caneé na yáacū templo miiⁿ nguaaⁿ ndísꞌtiī chi ngiꞌcueéⁿ ní ndísꞌtiī ní nguɛɛ staꞌá nī ꞌúú. Chúū canéé chí cuuvi ní cuuvi cunnuū caꞌā naachi canéé nguūⁿ na libro yeⁿꞌé Ndyuūs.

50 Tuuꞌmi ní nducyaaca discípulos sꞌnéeⁿ yā Jesús miiⁿ dámaáⁿ yā ní cheenu yā.

51 Naati ꞌáámá saⁿꞌā ꞌdííⁿ ndaā sa ní cueⁿꞌe sa ndúúcū ꞌiiⁿꞌyāⁿ sꞌeeⁿ. Ndɛɛcu sa ꞌáámá nꞌdyáⁿꞌā sábana. ꞌÁámá yā staꞌá yā saⁿꞌa ꞌdíí miiⁿ. 52 Naati saⁿꞌā ꞌdííⁿ miiⁿ ní sꞌneeⁿ sa sábana ní cueⁿꞌē sa dácaa yuūcú sa.

53 Tuuꞌmi ní candɛ́ɛ yā Jesús miiⁿ nanááⁿ chiiduú chꞌɛɛtɛ ca. Ní miiⁿ nduuvidaamá yā nducyaaca chiiduú nꞌgɛɛtɛ́ ndúúcū ꞌiiⁿꞌyāⁿ ndiicúū chi ngaⁿꞌa ntiiⁿnyuⁿ yeⁿꞌe yaācū ndúúcū maestros yeⁿꞌe ley. 54 Pedro miiⁿ ní cueⁿꞌē yaⁿꞌai sa nꞌdáa sa Jesús miiⁿ. Ní ndaa sa ndii chuvaꞌāī yeⁿꞌe vaꞌai chiiduú chꞌɛɛtɛ ca ní chꞌiīndī sa ndúúcū policías ní inꞌtaavi cuutú sa dáámá ndúúcu yā ti miiⁿ ní ngiichi yaⁿꞌā yeⁿꞌé yā.

55 Chiiduú nꞌgɛɛtɛ ndúúcū nducyaaca yā chí nduuvidaama inꞌnuúⁿ yā ꞌáámá prueba contra yeⁿꞌe Jesús miiⁿ chí diíⁿ yā condenar Jesús chi ꞌcaaⁿꞌnúⁿ yā Jesús; naati nguɛ́ɛ́ ndaaca yā. 56 Neené ꞌyaaⁿ ꞌiiⁿꞌyāⁿ ngaⁿꞌa yā nduudu yaadi yeⁿꞌe Jesús miiⁿ naati mar ꞌáámá yā nguɛ́ɛ́ dáámá ngaⁿꞌa yā. 57 Nꞌduuví yā ní ncueeⁿ yā ní caⁿꞌa yā nduudu yaadi, ní caⁿꞌa yā: 58 Núsꞌuu ní chꞌiindiveéⁿ ꞌnū chí Jesús caⁿꞌa yā ꞌtúúcā: ꞌÚú ní nadituūví yáacu ꞌcūū chi saⁿꞌā yeⁿꞌe iⁿꞌyeeⁿdí ꞌcūū dinꞌdái sa. Ní chɛɛti ꞌiinū nguuvi nadinꞌdaí taama chi nguɛ́ɛ́ saⁿꞌā iⁿꞌyeeⁿdí ꞌcūū dinꞌdái sa.

59 Naati nguɛ́ɛ́ nduuvidáámá nduudu yā yeⁿꞌe chí ngaⁿꞌa yā.

60 Tuuꞌmi ní chiiduú chꞌɛɛtɛ ca chi ngaⁿꞌa ntiiⁿnyuⁿ yeⁿꞌe tanáⁿꞌā chiidūu, ndúcueeⁿ yā nguaaⁿ nducyáácá ꞌiiⁿꞌyāⁿ sꞌeeⁿ ní ntiinguuneeⁿ yā Jesús miiⁿ: ¿ꞌÁá nguɛ́ɛ́ dɛꞌɛ̄ vɛɛ nanꞌguɛɛcútaⁿꞌa nī? ¿Dɛꞌɛ̄ chí ngaⁿꞌá yā yeⁿꞌe nī? ¿Dɛꞌɛ́ ngaⁿꞌa nī maáⁿ nī yeⁿꞌe nī?

61 Jesús mííⁿ ꞌāā ntɛ́ɛ́ caⁿꞌa yā. Ní nguɛ́ɛ́ nꞌguɛ́ɛ́cútaⁿꞌa yā yeⁿꞌē mar ꞌáámá. Chiiduú chꞌɛɛtɛ ca miiⁿ ntiinguunééⁿ ntúuⁿ yā Jesús, ní caⁿꞌa yā: ¿ꞌÁá dii Cristo, Daiya Dendyuūs chí nꞌdai taavi?

62 Jesús caⁿꞌa yā chii yā ꞌiiⁿꞌyāⁿ sꞌeeⁿ: ꞌTíícā ꞌúú. Ndísꞌtiī ní caⁿꞌa nī snaaⁿ nī Saⁿꞌā chi Daiya Dendyuūs chí ꞌcuūndī sa lado yeⁿꞌe honor yeⁿꞌé Ndyuūs chí vɛ́ɛ́ tanducuéⁿꞌē poder yeⁿꞌe yā. Ní ndaa sa nguaaⁿ meēéⁿ yeⁿꞌē nanguuvi.

63 Tuuꞌmi ní chiiduú chꞌɛɛtɛ ca chíínꞌcuūⁿ sa catecai sa, ní caⁿꞌā sa: ¿Dɛꞌɛ̄ ca diiⁿ yú testigos chí nꞌnuuⁿ yú? 64 ꞌĀā chꞌiindiveéⁿ nī denduꞌū chi ngaⁿꞌā sa contra Ndyuūs. ¿Táácā tuumicadíínuuⁿ nī? Nducyaaca ꞌiiⁿꞌyāⁿ ngaⁿꞌa yā chi condenado Jesús chi ꞌcuuví yā.

65 Tuuꞌmi ní nꞌduuví yā ní caꞌa nee daíⁿ yā Jesús ní nꞌgaadí yā nduutináaⁿ yā ndúúcū tíínūuⁿ. Ní policías ndúúcū taꞌá yā chꞌeⁿꞌe yā naaⁿ Jesús. Ní caⁿꞌa yā: Caaⁿꞌmaⁿ dí ¿duꞌū chꞌeⁿꞌe dii?

66 Pedro miiⁿ ní canee sa chuvaꞌai cuaaⁿ ndiiyā. Ní ndaā ꞌáámá nꞌdaataá chí diíⁿ mandado yeⁿꞌē chiiduú chꞌɛɛtɛ ca nanááⁿ Pedro miiⁿ. 67 Ní nꞌdiichi tá chí inꞌtaavi cúutū sa na yaⁿꞌā. Ní cānee táⁿꞌā miiⁿ ní chꞌiīnu tá Pedro. Tuuꞌmi ní caⁿꞌa tá: Diī ntúūⁿ di canee dí ndúúcū Jesús yeⁿꞌe yáāⁿ Nazaret.

68 Naati Pedro miiⁿ cheeⁿdiītū sa, ní caⁿꞌā sa: ꞌÚú ní nguɛ́ɛ́ inꞌdiichí ꞌiiⁿꞌyāⁿ, ndíí nguɛ́ɛ́ deenú chí ngaⁿꞌā di. Ní canꞌdáa sa cuaaⁿ chuvaꞌāī naachi indaa yā. Tuuꞌmi ní ꞌcaī tusáⁿꞌā. 69 Táⁿꞌā chi idiiⁿ mandado miiⁿ chꞌíínú ntuūⁿ ta sáⁿꞌā, ní caⁿꞌa tá chiī tá ꞌiiⁿꞌyāⁿ chi snée yā miiⁿ: Sáⁿꞌa ꞌcūū ꞌáámá chɛ́ɛ́ saⁿꞌā chi cachiica ndúúcū Jesús.

70 Naati Pedro miiⁿ ní nnguɛɛ̄cunée sa cheeⁿdíítu sa. Cuayiivi miiⁿ ní ꞌiiⁿꞌyāⁿ chi snée yā miiⁿ ní caⁿꞌa ntúuⁿ yā Pedro: Cuaacu chí dii ní dáámá chi cachiica di ndúúcū Jesús ti dii ní yeⁿꞌē yáⁿꞌāa Galilea, ní nduudu yeⁿꞌē di tanꞌdúúcā ꞌiiⁿꞌyāⁿ sꞌeeⁿ.

71 Tuuꞌmi ní Pedro miiⁿ ní ꞌcaaꞌva sa, ní cunncáā caⁿꞌā sa. Ní ꞌcái sa “por Ndyuūs”: Nguɛ́ɛ́ nꞌdiichí ꞌííⁿꞌyaⁿ ꞌcúū.

72 Tuuꞌmi ní túsaⁿꞌā miiⁿ ꞌcai ntúuⁿ tī ndii ꞌúúví cuuvi. Ní Pedro miiⁿ ní nꞌgaācu sa chi Jesús caⁿꞌa yā chii yā saⁿꞌā: ꞌNaaⁿ chi ꞌāā cuɛ́ɛ́ ꞌcuaī túsaⁿꞌā ꞌuūvī cuuvi, ꞌāā ꞌíínú cuuvi cheeⁿdiītu di chí ngaⁿꞌa di chi nguɛ́ɛ́ nꞌdiīchi di ꞌúú. Taachi nádicādíínuuⁿ sa chuū, ní chɛɛ̄cū sa.