NDUUDU NꞌDÁÍ CHÍ DÍNGUŪⁿ APÓSTOL MATEO
Yeⁿꞌé ꞌiiⁿꞌyāⁿ chi ndaata yeⁿꞌē Jesucristo chí vmnááⁿ vmnaaⁿ
1
Chuū chí lista yeⁿꞌe ndaata yeⁿꞌe Jesucristo, ndíí na ndaata Abraham ndíí na ndaata David ndíí tiempo chi chꞌiindiyáāⁿ Jesucristo.2 Abraham miiⁿ chꞌiīndī daiya sa chi nguuvi Isaac. Isaac miiⁿ ní chꞌiīndī daiya sa chi nguuvi Jacob. Jacob miiⁿ ní chꞌiīndī daiya sa Judá ndúúcū tanáⁿꞌā ꞌdíínu yā. 3 Judá miiⁿ ní ndúúcū Tamar chi nꞌdaataá yeⁿꞌē sa chꞌiīndī daiyá yā chi cuates chi nguuvi Fares ndúúcū Zara. Fares miiⁿ ní chꞌiīndī daiya sa Esrom. Esrom miiⁿ ní chꞌiīndī daiya sa Aram. 4 Aram miiⁿ ní chꞌiīndī daiya sa Aminadab. Aminadab miiⁿ ní chꞌiīndī daiya sa Naasón. Naasón miiⁿ ní chꞌiīndī daiya sa Salmón. 5 Salmón ndúúcū Rahab chi nꞌdaataá yeⁿꞌē sa ní chꞌiīndī daiyá yā Booz. Booz miiⁿ ndúúcū Rut chi nꞌdaataá yeⁿꞌē sa ní chꞌiīndī daiyá yā Obed. Obed miiⁿ ní chꞌiīndī daiya sa Isaí. 6 Isaí miiⁿ ní chꞌiīndī daiya sa rey David. Rey David miiⁿ ní chꞌiīndī daiyá yā Salomón taachi caneé yā ndúúcū nꞌdaataá chi vmnááⁿ vmnaaⁿ ní nꞌdaataá yeⁿꞌe saⁿꞌā Urías.
7 Salomón miiⁿ ní chꞌiīndī daiya sa Roboam. Roboam miiⁿ ní chꞌiīndī daiya sa Abías. Abías miiⁿ ní chꞌiīndī daiya sa Asa. 8 Asa miiⁿ ní chꞌiīndī daiya sa Josafat. Josafat miiⁿ ní chꞌiīndī daiya sa Joram. Joram miiⁿ ní chꞌiīndī daiya sa Uzías. 9 Uzías miiⁿ ní chꞌiīndī daiya sa Jotam. Jotam miiⁿ ní chꞌiīndī daiya sa Acaz. Acaz miiⁿ ní chꞌiīndī daiya sa Ezequías. 10 Ezequías miiⁿ ní chꞌiīndī daiya sa Manasés. Manasés miiⁿ ní chꞌiīndī daiya sa Amón. Amón miiⁿ ní chꞌiīndī daiya sa Josías. 11 Josías miiⁿ ní chꞌiīndī daiya sa Jeconías. Jeconías miiⁿ ndúúcū tanáⁿꞌā viꞌi yā chꞌiindiyáaⁿ yā taachi chiidá yā ndúúcū chɛɛcú yā ní preso yā ndúúcū tanáⁿꞌā ꞌiiⁿꞌyāⁿ yeⁿꞌe ndaata Israel ní taachi cueⁿꞌé yā na cyúúní na yáⁿꞌāa Babilonia.
12 Cuayiivi chi choꞌó yā na yáⁿꞌāa Babilonia, Jeconías miiⁿ ní chꞌiīndī daiya sa Salatiel. Salatiel miiⁿ ní chꞌiīndī daiya sa Zorobabel. 13 Zorobabel miiⁿ ní chꞌiīndī daiya sa Abiud. Abiud miiⁿ ní chꞌiīndī daiya sa Eliaquim. Eliaquim miiⁿ ní chꞌiīndī daiya sa Azor. 14 Azor miiⁿ ní chꞌiīndī daiya sa Sadoc. Sadoc miiⁿ ní chꞌiīndī daiya sa Aquim. Aquim miiⁿ ní chꞌiīndī daiya sa Eliud. 15 Eliud miiⁿ ní chꞌiīndī daiya sa Eleazar. Eleazar miiⁿ ní chꞌiīndī daiya sa Matán. Matán miiⁿ ní chꞌiīndī daiya sa Jacob. 16 Jacob miiⁿ ní chꞌiīndī daiya sa José, ꞌiiⁿꞌyāⁿ chi isáⁿꞌā yeⁿꞌe María. Ní daiya ta ní Jesús chi nguuvi Cristo.
17 ꞌTíícā nducuéⁿꞌē ndaata yeⁿꞌe Abraham ndíí rey David ní ndiichicúūuⁿ ndaata yeⁿꞌé yā o generaciones. Ní ndíí rey David miiⁿ ndíí taachi cueⁿꞌe nducyáácá ꞌiiⁿꞌyāⁿ ndaata yeⁿꞌe yā na país Babilonia ní ndiichicúūuⁿ ndaata yeⁿꞌé yā. Ní ndíí taachi cheⁿꞌe yā na yáⁿꞌāa Babilonia ndíí taachi ndaā Cristo iⁿꞌyéeⁿdi ꞌcūū ní ndiichicúūuⁿ ndaata yeⁿꞌé yā.
ꞌTúúcā chꞌiindiyáāⁿ Jesucristo
18 ꞌTúúcā chꞌiindiyáāⁿ Jesucristo. Taachí María miiⁿ chi chɛɛcu Jesús miiⁿ caⁿꞌa yā chi ꞌcaandavaacú yā ndúúcū José níícú taachi ꞌāā cuɛ́ɛ́ ꞌcaandavaacú yā ndúúcū viꞌī, vɛ́ɛ́ ꞌáámá daiya yā chɛɛtí yā cucáávā Espíritu Nꞌdai yeⁿꞌé Ndyuūs. 19 José miiⁿ ní neⁿꞌé yā ꞌcaandavaacu yā ndúúcū María miiⁿ. Ní José miiⁿ ní nééné nꞌdai yā. Ní cuayiivi nguɛ́ɛ́ neⁿꞌé yā ꞌcaandavaacú yā ndúúcū táⁿꞌā cucáávā chi vɛ́ɛ́ dacuaꞌa chɛɛtí yā. Ní nguɛ́ɛ́ neⁿꞌé yā yaaꞌvi yā ꞌiiⁿꞌyāⁿ yeⁿꞌe yáāⁿ miiⁿya yeⁿꞌe María chi nguɛ́ɛ́ nꞌdaācā ti nguɛ́ɛ́ neⁿꞌé yā chi María cuuví ꞌcuinaaⁿ yā. 20 Ní taachí José miiⁿ nacadíínuuⁿ yā chi cuꞌneeⁿ yā María miiⁿ, cuayiivi ní taachí cyaadu yā, ꞌáámá ángel yeⁿꞌe Señor Ndyuūs cheꞌenaáⁿ yā yeⁿꞌé yā ní caⁿꞌa yā chiī yā José miiⁿ: Díí, José, saⁿꞌā yeⁿꞌe ndaata rey David, nguɛ́ɛ́ ꞌvaꞌa di cuuví nꞌdaataá yeⁿꞌe di María, ti dacuáꞌā yeⁿꞌē tá chi vɛ́ɛ́ chɛɛti tá nguɛ́ɛ́ yeⁿꞌe ꞌiiⁿꞌyāⁿ ti yeⁿꞌē Espíritu Nꞌdai yeⁿꞌe Ndyuūs. 21 Ní táⁿꞌā miiⁿ ní ꞌcuundiyáāⁿ daiya tá ꞌáámá saⁿꞌā ꞌlííⁿ. Díí ní cuꞌneeⁿ di chí ngúúví sá JESÚS caati cucáávā Jesús miiⁿ ní nadanguáⁿꞌai ꞌiiⁿꞌyāⁿ yeⁿꞌē íⁿꞌyeeⁿdí ꞌcūū ní nadichꞌɛɛcú yā nuuⁿndi yeⁿꞌe nducyaaca ꞌiiⁿꞌyāⁿ.
22 Tanducuéⁿꞌē chuū ní ꞌtíícā chiī ndúúcū María ní ꞌíícú cuuvi cuaacu chí caⁿꞌā profeta yeⁿꞌe nduudu yeⁿꞌé Ndyuūs ndíí cuaaⁿ vmnaaⁿ, nduudu chi canéé nguūⁿ na libro yeⁿꞌé Ndyuūs ꞌtíícā:
23 Níícú nꞌdiichí nī. Tá ꞌcūū ꞌáámá chí cuiinuu tá ꞌcuūndī daiya tá. Taachí ꞌcuundiyáāⁿ ꞌáámá daiya tá ní cuꞌneeⁿ chi duuchi Emanuel chí neⁿꞌe caaⁿꞌmaⁿ Ndyuūs ndúúcū sꞌuūúⁿ.