Yeⁿꞌé ꞌiiⁿꞌyāⁿ magos chi cheⁿꞌe sa nꞌdiichi sa Jesús
2
Taachi Jesús chꞌiindiyáaⁿ yā na yáāⁿ Belén yeⁿꞌe yáⁿꞌāa Judea, tiempo miiⁿ ní saⁿꞌa Herodes miiⁿ ní rey yeⁿꞌe yáⁿꞌāa Judea. Ní nꞌduuví magos, ꞌiiⁿꞌyāⁿ chi déénu ca yā yeⁿꞌe ꞌííⁿnyúⁿ ndiicá yaⁿꞌáí yā ndíí cuaaⁿ ná ícanꞌdaā ꞌyáⁿꞌā. Ní magos ndaa yā na yáāⁿ Jerusalén. 2 Magos ní ndaa yā nanááⁿ rey Herodes miiⁿ ní ntiinguuneeⁿ yā rey: ¿Tíí cánéé ꞌiiⁿꞌyāⁿ chi rey yeⁿꞌe ꞌiiⁿꞌyāⁿ Israel chi ꞌniindiyáaⁿ yā? Núsꞌuū ní nꞌdiichí ꞌnū ꞌáámá ꞌííⁿnyúⁿ chꞌɛɛtɛ cuááⁿ ná icanꞌdáá ꞌyáⁿꞌā ꞌíícú chííⁿ chí cuchií ꞌnū. Níícú ndaá ꞌnū chí cuꞌtéénú ꞌnū saⁿꞌā ꞌlííⁿ rey miiⁿ.3 Taachí rey Herodes miiⁿ chꞌiindiveéⁿ yā chuū, chistaⁿꞌā vaanicadíínūuⁿ yeⁿꞌe yā. ꞌTiicá ntúūⁿ nducyaaca ꞌiiⁿꞌyāⁿ yeⁿꞌe yáāⁿ Jerusalén taachi chꞌiindiveéⁿ yā. 4 Ní rey Herodes miiⁿ ní nádaamá yā nducyaaca chiīdūu nꞌgɛɛtɛ́ chí ngaⁿꞌa ntiiⁿnyúⁿ yā yeⁿꞌe yaācū Israel ndúúcū ꞌiiⁿꞌyāⁿ chi ngiꞌcuééⁿ ley ꞌiiⁿꞌyāⁿ yeⁿꞌe Israel. Ní itiinguunéeⁿ yā ꞌiiⁿꞌyāⁿ sꞌeeⁿ: ¿Tií ꞌniindiyáāⁿ Cristo? 5 ꞌIiⁿꞌyāⁿ sꞌeeⁿ ní caⁿꞌa yā chii yā rey miiⁿ: ꞌCuundiyáaⁿ yā na yáāⁿ Belén yeⁿꞌe yáⁿꞌāa Judea caati ꞌtíícā canéé nguūⁿ na libro yeⁿꞌe Ndyuūs cucáávā saⁿꞌa profeta:
6 Ndísꞌtiī ꞌiiⁿꞌyāⁿ yeⁿꞌe yáāⁿ Belén yeⁿꞌe yáⁿꞌāa Judá, ¿ꞌáá nguɛ́ɛ́ yáāⁿ yeⁿꞌe nī chi ꞌlííⁿ cá nguaaⁿ nducuéⁿꞌē yáāⁿ yeⁿꞌe yáⁿꞌāa Judá naachi ꞌiiⁿꞌyāⁿ ndíí tiīiⁿ ngaⁿꞌa ntiiⁿnyúⁿ yā? Nguɛ́ɛ́ chi ꞌtíícā, caati nguaaⁿ ndísꞌtiī chi yeⁿꞌē yáāⁿ Belén canꞌdáā ꞌáámá sáⁿꞌā chi ngaⁿꞌā ntiiⁿnyuⁿ sá yeⁿꞌe nducyáácá ꞌiiⁿꞌyāⁿ Israel chi judíos chi ꞌiiⁿꞌyāⁿ sꞌeeⁿ chi Ndyuūs nndɛɛvɛ yā.
7 Tuuꞌmi ní rey Herodes yaaꞌvi nꞌdéꞌéí yā saⁿꞌā magos ní ntiinguuneeⁿ cá yā saⁿꞌa sꞌeeⁿ: ¿Dɛꞌɛ̄ tiempo nꞌdiichi nī ꞌííⁿnyúⁿ miiⁿ? 8 Ní rey miiⁿ ní caⁿꞌa yā chii yā saⁿꞌa sꞌeeⁿ: Ndísꞌtiī magos, cueⁿꞌe nī na yáāⁿ Belén ní inꞌnuūⁿ nꞌdaāca nī dacuaꞌa ꞌlííⁿ miiⁿ. Ní taachí ndaaca nī dacuaꞌa mííⁿ, nanguɛɛcunéeⁿ nī ní caaⁿꞌmaⁿ nī yeⁿꞌé. Maaⁿ níícú ꞌúú ntúūⁿ ní cuuvi caⁿꞌá cuꞌteenú dacuaꞌa ꞌlííⁿ miiⁿ.
9 Magos ní chꞌiindiveéⁿ yā nduudu yeⁿꞌe rey miiⁿ ní cúnaⁿꞌa yā. Cuinꞌdiichí nī. ꞌÍíⁿnyúⁿ chi ꞌiiⁿꞌyāⁿ magos nꞌdiīchi yā cuaaⁿ na icanꞌdaa ꞌyáⁿꞌā, ꞌííⁿnyúⁿ mííⁿ cueⁿꞌé nanááⁿ yeⁿꞌe magos taanduvɛ́ɛ́ ndaā ní cānee lugar naachi canéé dacuaꞌa ꞌlííⁿ. 10 Ní taachi magos ꞌāā nꞌdiichí yā ꞌííⁿnyúⁿ miiⁿ, yéénú taaví yā. 11 Ní taachi sndaá yā vaꞌāī miiⁿ, nꞌdiichí yā saⁿꞌā ꞌlííⁿ dacuaꞌā miiⁿ ndúúcū chɛɛcu sá María. Ní chíintiiꞌyá yā nanááⁿ dacuaꞌā miiⁿ ní sꞌtéénu yā. Taachi nꞌguaaⁿ yā caja naachi snéé regalos yeⁿꞌe yā, tuuꞌmi ní caꞌá yā yeⁿꞌē dacuaꞌā miiⁿ. Regalos ní ꞌdííⁿnguaāⁿ ndúúcū yáⁿꞌā chi nꞌdɛɛvɛ ngééⁿ ndúúcū mirra chí diītū taavi nꞌdai ngééⁿ. 12 Cuayiivi miiⁿ ní Ndyuūs yaaꞌvi yā magos na ꞌyúúdúyaaⁿ yeⁿꞌe yā chí ꞌāā ntɛ́ɛ́ naⁿꞌa yā nanááⁿ rey Herodes miiⁿ. Níícú magos cunaⁿꞌa yā na vaacu yā na taama yúúní.
Cueⁿꞌe yā ngéénu yā na yáⁿꞌāa Egipto
13 Taachi magos cunaⁿꞌa yā, tuuꞌmi ní Ndyuūs dichoꞌó yā ꞌáámá ángel níícú ángel miiⁿ ní ndaá yā nanááⁿ José miiⁿ taachi cyaadú yā ní caⁿꞌa yā chii yā José: Díí José, nducueeⁿ di ní cutaꞌa di saⁿꞌā ꞌlííⁿ ní cueⁿꞌe di cáanū di ndúúcū chɛɛcu sa ndíí yáⁿꞌāa Egipto. Ní ꞌcuɛɛtinée nī miiⁿ ndíí taachi ꞌúú caaⁿꞌmáⁿ caati canéé chí rey Herodes miiⁿ ní nanꞌnuúⁿ yā saⁿꞌā ꞌlííⁿ chí ꞌcaaⁿꞌnúⁿ yā saⁿꞌā.
14 José miiⁿ ní nanduuchí yā. ꞌTiicá ntúūⁿ chɛɛcu sa. Ní staꞌa yā saⁿꞌā ꞌlííⁿ miiⁿ ní nguiinū mííⁿ nūuⁿ cueⁿꞌe yā ndúúcū chɛɛcu sa na yáⁿꞌāa Egipto. 15 Níícú miiⁿ chꞌɛɛtinée yā ndíí chi chꞌiī rey Herodes. Níícú cúúnú caꞌa chííⁿ chí Señor Ndyuūs caⁿꞌa yā na libro yeⁿꞌe yā ndii cuááⁿ vmnaaⁿ cucáávā saⁿꞌa profeta miiⁿ taachi caⁿꞌa yā ꞌtíícā: Ná yáⁿꞌāa Egipto ꞌcaí daīyá.
Rey Herodes caⁿꞌa ntiiⁿnyúⁿ yā chi ꞌcaaⁿꞌnúⁿ yā dacuaꞌāa ngaiyáā
16 Taachí rey Herodes miiⁿ tuumicadíínuuⁿ yā chi ꞌiiⁿꞌyāⁿ magos chinncheꞌéí yā ꞌiiⁿꞌyāⁿ, tuuꞌmi ní nduuvi taáⁿ nꞌdai yā. Ní rey miiⁿ ní caⁿꞌa ntiiⁿnyuⁿ yā ní dichóꞌó yā soldados chí chꞌiiⁿꞌnuⁿ yā nducyáácá dacuaꞌāa chi saⁿꞌā ndíí cuaacu ꞌuūvī nduūyū chi vɛ́ɛ́ na yáāⁿ Belén ndúúcū tanáⁿꞌā yáāⁿ chí na niiⁿnuúⁿ. ꞌTíícā rey miiⁿ diiⁿ cuenta yā ti choꞌōo ꞌuuvi nduūyū chi magos nꞌdiichí yā ꞌííⁿnyúⁿ chꞌɛɛtɛ miiⁿ yeⁿꞌe nanguuvi. 17 Tuuꞌmi ní choꞌōo chuū chi cuuvi cuaacu tanꞌdúúcā chi canéé nguūⁿ na libro yeⁿꞌe Ndyuūs cucáávā chi caⁿꞌa saⁿꞌā profeta Jeremías cuááⁿ vmnaaⁿ ꞌtúúcā:
18 Na yáāⁿ Ramá chꞌiindiveéⁿ ꞌiiⁿꞌyāⁿ chi ngɛɛcu yā ní nꞌgái yā ndúúcu ꞌáámá vaadī yaꞌai chꞌɛɛtɛ́ cucáávā daiya yā chí chꞌiī. Nꞌdaataá yeⁿꞌē Israel sꞌeeⁿ ngɛɛcu yā cucáávā daiya yā chi chꞌiīⁿꞌnūⁿ rey tanꞌdúúcā chi táⁿꞌā Raquel ngɛɛcu yā cucáávā daiya yā chí chꞌiī. Ní nguɛ́ɛ́ chiī ndaacā nꞌdaataa sꞌeeⁿ ꞌviichꞌɛɛtíínūuⁿ miiⁿ.
19 Cuayiivi taachí chꞌiī rey Herodes miiⁿ, José miiⁿ ní ꞌāā canee yā na yáⁿꞌāa Egipto. Tuuꞌmi ní Señor Ndyuūs dichoꞌo yā ꞌáámá ángel ní ángel cheꞌenaáⁿ yā yeⁿꞌé José taachi cyaadú yā. 20 Ní ángel miiⁿ caⁿꞌa yā chii yā José: Díí José, nducueeⁿ di ní cutaꞌa di saⁿꞌā ꞌlííⁿ dacuáꞌāa ní cuinaⁿꞌa di ndúúcū chɛɛcu sa na yáⁿꞌāa Israel caati chꞌiī ꞌiiⁿꞌyāⁿ chí neⁿꞌe yā ꞌcaaⁿꞌnuⁿ yā saⁿꞌā ꞌlííⁿ.
21 Tuuꞌmi ní José ncueeⁿ yā. ꞌTiicá ntúūⁿ chɛɛcu sa. Ní staꞌa yā saⁿꞌā ꞌlííⁿ miiⁿ ní cueⁿꞌe yā ndúúcū chɛɛcu sa na yáⁿꞌāa yeⁿꞌe ꞌiiⁿꞌyāⁿ Israel. 22 Taachí José miiⁿ chꞌiindiveeⁿ yā chi saⁿꞌā Arquelao canéé lado yeⁿꞌe rey Herodes chi chiida sa, tuuꞌmi ní José miiⁿ ní ꞌvaꞌá yā chí caⁿꞌa yā na yáⁿꞌāa Judea chi yáⁿꞌāa yeⁿꞌe ꞌiiⁿꞌyāⁿ Israel. Naati tanꞌdúúcā chi ángel cheꞌenaáⁿ yeⁿꞌe yā na ꞌyuudiyaaⁿ yeⁿꞌe yā, cueⁿꞌe yā yáⁿꞌāa Galilea chi yáⁿꞌāa yeⁿꞌe ꞌiiⁿꞌyāⁿ Israel ntúūⁿ. 23 Ní ndaá yā na yáⁿꞌāa mííⁿ ní cueⁿꞌe yā chꞌɛɛtinee yā na yáāⁿ Nazaret yeⁿꞌe yáⁿꞌāa Galilea. Ní ꞌiicu cuuvi cuaacu chí caⁿꞌa profetas vmnááⁿ vmnaaⁿ yeⁿꞌe Jesús chi ꞌtúúcā: Canéé chí cuuvi ngúúví yā ꞌiiⁿꞌyāⁿ nazareno yā cucáávā chi cueⁿꞌe yā na yáāⁿ Nazaret.