Yeⁿꞌe chi Juan cuɛɛ̄dínuūⁿniⁿ yā ní ngaⁿꞌa yā nduudu cuaacu
3
Tiempo miiⁿ chiicá Juan chí cuɛɛ̄dínuūⁿniⁿ yā na lugar naachi nguɛ́ɛ́ chꞌɛɛtinéé ꞌiiⁿꞌyāⁿ. Lugar miiⁿ chi yeⁿꞌe yáⁿꞌāa Judea ní mííⁿ ngaⁿꞌa Juan nduudu cuaacu. 2 Juan miiⁿ ní ngaⁿꞌa yā chi ꞌtúúcā: Ndísꞌtiī, ndaacadaamí nī yeⁿꞌe chi diíⁿ nī chi nguɛ́ɛ́ nꞌdai caati ꞌāā ndaā niiⁿnuúⁿ nguuvi miiⁿ naachi Ndyuūs ngaⁿꞌa ntiiⁿnyúⁿ yā na vaꞌai chɛɛti nguuvi. 3 Níícú yeⁿꞌe Juan ꞌcūū ní saⁿꞌa profeta Isaías caⁿꞌa yā yeⁿꞌe yā vmnááⁿ vmnaaⁿ taachí caⁿꞌa yā ꞌtúúcā:ꞌCaandiveéⁿ nī. ꞌÁámá saⁿꞌā ngaⁿꞌā yuudu sa ꞌtúúcā na yáⁿꞌāa cuūⁿmáⁿ naachi nguɛ́ɛ́ chꞌɛɛtinéé ꞌiiⁿꞌyāⁿ: ꞌCuundiyaáⁿ nī yúúní yeⁿꞌē Señor Ndyuūs caati cúchii yā. Nanꞌguáaⁿ nī yúúní cuaacu caavá yā. Didɛɛvɛ́ nī staava yeⁿꞌé nī ní cuuvi cuaáⁿ nī ꞌiiⁿꞌyāⁿ miiⁿ taachi ndaa yā.
4 Catecai Juan miiⁿ ní ninꞌdai ndúúcū yuūdū yeⁿꞌē ꞌiiti camello. Ní cinturón yeⁿꞌē sa ní diiⁿmaⁿ ꞌiiti. Níícú chí cheꞌē sa ní ꞌiiti langostas ndúúcū n̄ꞌdiꞌi yeⁿꞌē ꞌiiti ꞌyáaiⁿ chi vɛɛ cuɛɛti. 5 Nꞌdeeé ꞌiiⁿꞌyāⁿ canꞌdaa yā chi ꞌcaandiveéⁿ yā nduudu yeⁿꞌé Juan miiⁿ. Ní canꞌdaa yā yeⁿꞌe yáāⁿ Jerusalén, yeⁿꞌe yáⁿꞌāa Judea, ní yeⁿꞌe yáⁿꞌāa chi cuaaⁿ ꞌdiituú yeⁿꞌē yíícú Jordán. 6 ꞌIiⁿꞌyāⁿ ní caⁿꞌa yā nuuⁿndi yeⁿꞌé yā nanááⁿ Ndyuūs níícú Juan miiⁿ ní chɛɛdínuūⁿnīⁿ sá ꞌiiⁿꞌyāⁿ miiⁿ na yíícú Jordán miiⁿ.
7 Taachí Juan miiⁿ nꞌdiīchī sa chi neené ꞌyaaⁿ ꞌiiⁿꞌyāⁿ fariseos ndúúcū ꞌiiⁿꞌyāⁿ saduceos neⁿꞌé yā chi cuɛɛdínuūⁿnīⁿ sa ꞌiiⁿꞌyāⁿ, Juan miiⁿ caⁿꞌa sa chii sa ꞌiiⁿꞌyāⁿ miiⁿ: Ndísꞌtiī tanꞌdúúcā cúú, ꞌtíícā ndísꞌtiī. ¿Duꞌú chí ꞌcuééⁿ ndísꞌtiī chí cuuvi cáánu nī yeⁿꞌe castigo taaⁿ chi cuchiī? 8 Nꞌdaāca diíⁿ nī maaⁿ níícú ꞌcuuⁿꞌmíⁿ nī ꞌiiⁿꞌyāⁿ chi ꞌāā ndaacadaamí nī yeⁿꞌe nuuⁿndi yeⁿꞌe nī. 9 Ndísꞌtiī ní ꞌāā ntɛ́ɛ́ nadacádíínuuⁿ nī chi nꞌdai nī caati ndaata yeⁿꞌe Abraham ndísꞌtiī. Naati ꞌúú ní ngaⁿꞌá ngīi ndísꞌtiī chi Ndyuūs cuuvi diíⁿ yā chi tuūu sꞌtiī ní cuuvi daiya Abraham. 10 Cutíīiⁿ mííⁿ ꞌāā canéé na diiꞌyu yáⁿꞌá. Nducyaaca yáⁿꞌá chí nguɛ́ɛ́ nꞌdáacā ngii nꞌguiꞌi yeⁿꞌē canee chi ꞌcaata yáⁿꞌá mííⁿ ní cūnuuⁿ na yaⁿꞌā. 11 ꞌÚú ní cuaacu nííⁿnyúⁿ chí ngɛɛ̄dínuūⁿníⁿ ndísꞌtiī ndúúcū nuūⁿnīⁿ caati ꞌāā ndaacadaamí nī yeⁿꞌe nuuⁿndi yeⁿꞌe nī. Naati ndáá táámá ꞌiiⁿꞌyāⁿ cuayiivi yeⁿꞌe ꞌúú chi chꞌɛɛtɛ taavi cá poder yeⁿꞌe yā nguɛ́ɛ́ ti ꞌúú. ꞌÚú ní nguɛ́ɛ́ neené nꞌdai ꞌúú chi cuuvi candɛɛ́ ndaacuú yeⁿꞌe yā. ꞌIiⁿꞌyāⁿ miiⁿ ní nꞌdai taavi cá yā chi cuuvi ꞌúú. ꞌIiⁿꞌyāⁿ miiⁿ ní cuɛɛdínuūⁿniⁿ yā ndúúcū Espíritu Nꞌdai yeⁿꞌé Ndyuūs ndúúcū yaⁿꞌā. 12 Ní taachi ndaa ꞌiiⁿꞌyāⁿ miiⁿ chi nguuvi Jesús diíⁿ yā tanꞌdúúcā ꞌáámá ꞌiiⁿꞌyāⁿ chí didɛɛvɛ́ yā trigo ꞌtíícā diíⁿ yā ndúúcū ꞌiiⁿꞌyāⁿ. Ní staꞌá yā zaranda yeⁿꞌe yā ní nadidaamá yā trigo na chɛɛti díínūuⁿ. Ní dɛɛcú miiⁿ niꞌneeⁿ yaⁿꞌa yā ná nguuchí yaⁿꞌā chi ꞌāā ntɛ́ɛ́ nꞌtuūvi. Dɛɛcú miiⁿ ní tanꞌdúúcā ꞌiiⁿꞌyāⁿ chí nguɛ́ɛ́ iꞌtéénu yā Ndyuūs.
Juan chɛɛdínuuⁿnīⁿ sa Jesús
13 Tuuꞌmi ní Jesús chiicá yā na yáⁿꞌāa Galilea ní ndaá yā na yíícú Jordán naachi canee Juan chi Juan miiⁿ ní cuɛɛ̄dinúuⁿnīⁿ sa Jesús miiⁿ. 14 Juan miiⁿ ní nguɛ́ɛ́ ꞌcuuⁿ sa. Ní caⁿꞌa sa chii sa Jesús miiⁿ: ꞌÚú ní neⁿꞌé chi dii cuɛɛdínuūⁿnīⁿ di ꞌúú. ¿ꞌÁá dii cuchiī di nanáaⁿ ꞌúú?
15 Jesús nanꞌguɛɛcútaⁿꞌa yā: Diiⁿ dí maaⁿ ꞌtíícā; ní diiⁿ yú tanꞌdúúcā chi Dendyuūs neⁿꞌe yā chi diiⁿ yú. Tuuꞌmi ní Juan ꞌcuūⁿ sa.
16 Cuayiivi taachi ꞌāā chɛɛdínúuⁿnīⁿ Juan miiⁿ Jesús miiⁿ, tuuꞌmi ní Jesús ní nanꞌdáa yā na nuūⁿnīⁿ. Cuayiivi ní nanguaāⁿ nanguuvi. Ní Juan nꞌdiichí sa Espíritu Nꞌdai yeⁿꞌé Ndyuūs miiⁿ chi tanꞌdúúcā paloma ꞌtíícā. Chiica yeⁿꞌē na vaꞌai chɛɛti nguuvi ní ndaā vmnaaⁿ yeⁿꞌe Jesús miiⁿ. 17 Tuuꞌmi ní nꞌgiindiveéⁿ yā ꞌáámá nduudu yeⁿꞌē nanguuvi chí ngaⁿꞌa: Saⁿꞌa ꞌcūū Daiyá chí neⁿꞌe taaví. Ní yeenú taaví cáávā sáⁿꞌa ꞌcūū.