Yááⁿnꞌguiinūuⁿ neⁿꞌe sa tuuꞌvi neeⁿ sa Jesús
4
Tuuꞌmi ní Espíritu Nꞌdai yeⁿꞌé Ndyuūs candɛ́ɛ̄ Jesús miiⁿ ná yáⁿꞌāa cuūⁿmáⁿ naachi nguɛ́ɛ́ chꞌɛɛtinéé ꞌiiⁿꞌyāⁿ chi yááⁿnꞌguiinūuⁿ neⁿꞌe sa chi Jesús diíⁿ yā nuuⁿndi.2 Jesús canée yā miiⁿ ꞌuūvū ngɛɛcu nguuvi ní ꞌuūvī ngɛɛcu nꞌgaaⁿ ní nguɛ́ɛ́ cheꞌé yā. Ní cuayiivi ní cuiicú yā. 3 Yááⁿnꞌguiinūuⁿ ní ndaā sa nanááⁿ Jesús chí nꞌdiichineeⁿ sa ꞌiiⁿꞌyāⁿ. Ní caⁿꞌā sa: Dii Jesús, nduuti chi dii chi Daiya Dendyuūs dii, caaⁿꞌmaⁿ dí cuuvi dí tuūu ꞌcúū chi nduuví pan. Ní nduuvi pan ní cuuvi cheꞌe di.
4 Jesús miiⁿ nanꞌguɛɛcútaⁿꞌa yā ní caⁿꞌa yā: ꞌTúúcā canee nguūⁿ na libro yeⁿꞌé Ndyuūs: Nguɛ́ɛ́ dámaāⁿ pan cheꞌé ꞌiiⁿꞌyāⁿ ní cunduūchi yā caati ndúúcū tanducuéⁿꞌē nduudu chi ngaⁿꞌa Ndyuūs ní ꞌiiⁿꞌyāⁿ cunduūchí yā nduuti chi cuꞌtéénu yā.
5 Tuuꞌmi ní yááⁿnꞌguiinūuⁿ miiⁿ candɛɛ sa Jesús na yáāⁿ Jerusalén chi yáāⁿ yeⁿꞌe Ndyuūs. Ní chinꞌduu sá ꞌiiⁿꞌyāⁿ na yáácú yeⁿꞌe yaācū. 6 Ní yááⁿnꞌguiinūuⁿ caⁿꞌa sa chii sa Jesús: Nduuti chi dii chi Daiya Dendyuūs dii, cáávā di ndii ꞌmúúⁿ ndii na yáⁿꞌāa; caati ꞌtúúcā canéé nguūⁿ na libro yeⁿꞌé Ndyuūs:
Ndyuūs dichóꞌo yā ángeles yeⁿꞌe yā chi diiⁿ yā cuidado yeⁿꞌē di. Ní ángeles cundɛ́ɛ yā dii ndúúcū taꞌá yā, ní nguɛ́ɛ́ cuuvi yaꞌai caꞌa di na tuūu.
7 Jesús nánꞌguɛɛcútáⁿꞌa yā: ꞌTuucá ntúūⁿ canéé nguūⁿ na libro yeⁿꞌé Ndyuūs: Nguɛ́ɛ́ diīⁿ di mar ꞌáámá cosa chi nꞌdiichineeⁿ di Señor Ndyuūs yeⁿꞌē di.
8 Tuuꞌmi candɛ́ɛ̄ yááⁿnꞌguiinūuⁿ miiⁿ Jesús miiⁿ na ꞌáámá yiīcū yáácú ní chꞌiⁿꞌi sa tanducuéⁿꞌē naciones yeⁿꞌē iⁿꞌyeeⁿdí ꞌcūū ndúúcū chí ngaⁿꞌá ntiiⁿnyuⁿ sa yeⁿꞌē ndúúcū dendúꞌū chí nꞌgɛɛtɛ chi vɛ́ɛ́ yeⁿꞌē. 9 Ní caⁿꞌa sa chii sa Jesús miiⁿ: Tanducuéⁿꞌē chuū teé dii nduuti chi caantííꞌya dí nanaáⁿ ní cuꞌtéénu di ꞌúú.
10 Tuuꞌmi ní Jesús miiⁿ caⁿꞌa yā chii yā saⁿꞌā miiⁿ: Díí yááⁿnꞌguiinūuⁿ, cuvíi di nanaáⁿ caati ꞌtúúcā canéé nguūⁿ na libro yeⁿꞌe Dendyuūs: Cuꞌtéénu di Señor Ndyuūs yeⁿꞌē di ni ꞌcaandiveeⁿ di yeⁿꞌe ꞌiiⁿꞌyāⁿ mííⁿ nūuⁿ.
11 Tuuꞌmi ní yááⁿnꞌguiinūuⁿ miiⁿ divíi sa yeⁿꞌe Jesús, ní níndaā ángeles ní dichííꞌvɛ yā Jesús miiⁿ.
Jesús tucáꞌa yā ntiiⁿnyuⁿ yeⁿꞌe yā na yáⁿꞌāa Galilea
12 Taachi chꞌiindiveéⁿ Jesús miiⁿ chi Juan chi ngɛɛdinuūⁿnīⁿ ꞌiiⁿꞌyāⁿ canúúⁿ sá vácūū, nanguɛɛcunée yā cunaⁿꞌa yā na yáⁿꞌāa Galilea. 13 Chiicá yā na yáāⁿ Nazaret ní ndaa yā canee yā na yáāⁿ Capernaum. Yáāⁿ miiⁿ ní niiⁿnuúⁿ na nuūⁿnīⁿꞌyáⁿꞌā canee, ní canee na yáⁿꞌāa yeⁿꞌe Zabulón ndúúcū yáⁿꞌāa yeⁿꞌe Neftalí. 14 Ní cuuvi cuaacu nduudu yeⁿꞌe saⁿꞌā profeta Isaías chí caⁿꞌa sa cuááⁿ vmnaaⁿ ꞌtíícā:
15 Ná yáⁿꞌāa yeⁿꞌē Zabulón ndúúcū na yáⁿꞌāa yeⁿꞌe Neftalí chi canéé na yúúní chi ngeⁿꞌe ná nuūⁿnīⁿꞌyáⁿꞌā ndúúcū na yáⁿꞌāa chi canee taama lado yeⁿꞌe yíícú chi nguuvi Jordán. Mííⁿ canéé yáⁿꞌāa Galilea yeⁿꞌe ꞌiiⁿꞌyāⁿ chi nguɛ́ɛ́ yeⁿꞌē ndaata ꞌiiⁿꞌyāⁿ Israel.
16 ꞌIiⁿꞌyāⁿ chi snéé na maāiⁿ ti nguɛ́ɛ́ yeⁿꞌe Ndyuūs, ꞌiiⁿꞌyāⁿ sꞌeeⁿ nꞌdiichí yā ꞌáámá dɛɛvɛ chꞌɛɛtɛ. Ní chiī dɛɛvɛ́ miiⁿ naachi sneé ꞌiiⁿꞌyāⁿ sꞌeeⁿ.
17 Ndíí tuuꞌmi tucáꞌā Jesús caⁿꞌa yā nduudu cuaacu ní caⁿꞌa yā: Ndaacadaamí nī yeⁿꞌe nuuⁿndi yeⁿꞌé nī caati tiempo chi Ndyuūs ngaⁿꞌa ntiiⁿnyúⁿ yā na vaꞌai chɛɛti nguuvi ꞌāā ndaa niiⁿnuúⁿ.
Jesús yaaꞌvi yā cuūuⁿ saⁿꞌa chí itungááⁿ ꞌyaācā
18 Cuayiivi ní Jesús miiⁿ cachiicá yā cuaaⁿ ꞌdiituú nuūⁿnīⁿꞌyáⁿꞌā chí nguuvi Galilea, ní nꞌdiichí yā na ꞌuuvī saⁿꞌā ꞌdíínu sa viꞌī. ꞌÁámá saⁿꞌa ní Simón Pedro nguuvi sa. Táámá saⁿꞌā ní ꞌdiinu sa ní Andrés nguuvi sa. Saⁿꞌā sꞌuuⁿ ní nꞌgaa nuuⁿ sa yáanā yeⁿꞌé ꞌyaācā miiⁿ na nuūⁿnīⁿꞌyáⁿꞌā ti saⁿꞌā sꞌeeⁿ itungááⁿ sa ꞌyaācā na nuūⁿnīⁿꞌyáⁿꞌā ti ntiiⁿnyuⁿ yeⁿꞌē sa. 19 Jesús caⁿꞌa yā chii yā saⁿꞌā sꞌeeⁿ: Cuchíi nī nduucú, ni ꞌúú ní diíⁿ chi inꞌnuúⁿ nī ꞌiiⁿꞌyāⁿ chi cuuvi caⁿꞌá yā nduucú. Ní tanꞌdúúcā chi tungaáⁿ nī ꞌyaācā yeⁿꞌe nuūⁿnīⁿꞌyáⁿꞌā, ꞌtíícā inꞌnuúⁿ nī ꞌiiⁿꞌyāⁿ chi caⁿꞌá yā nduucú.
20 Hora mííⁿ nūuⁿ ní saⁿꞌā sꞌeeⁿ sꞌneeⁿ sa yaānā yeⁿꞌē sa ni cueⁿꞌe sa ndúúcū Jesús miiⁿ.
21 Tuuꞌmi ní Jesús miiⁿ cueⁿꞌe ca yā ní nꞌdiichi yā taama ꞌuuvi saⁿꞌā chi ꞌdiinu sá viꞌī chí nguuvi sa Jacobo ndúúcū Juan. Ní saⁿꞌā sꞌuuⁿ ní daiya Zebedeo. Ní snee sa na barco miiⁿ ndúúcū chiida yā Zebedeo miiⁿ ní nꞌdiyaatá yā yáanā yeⁿꞌe yā. Jesús ꞌcai yā Juan ndúúcū Jacobo miiⁿ. 22 Tuuꞌmí nūuⁿ ní saⁿꞌā sꞌuuⁿ ní sꞌneeⁿ sa barco miiⁿ ndúúcū chiida sa, ní cueⁿꞌe saⁿꞌā sꞌuuⁿ ndúúcū Jesús miiⁿ.
Jesús ngiꞌcuéeⁿ yā ꞌyaaⁿ taavi ꞌiiⁿꞌyāⁿ
23 Jesús cachiīcá yā núúⁿmáⁿ ná yáⁿꞌāa yeⁿꞌe Galilea ní ngiꞌcueeⁿ yā na yaacū sinagogas na yáāⁿ yeⁿꞌē yáⁿꞌāa miiⁿ. Ní caⁿꞌá yā nduudu cuaacu yeⁿꞌé naachi Ndyuūs ngaⁿꞌa ntiiⁿnyúⁿ yā. Jesús miiⁿ ní diíⁿ yā chi nduūvā yeⁿꞌé ꞌiiⁿꞌyāⁿ yeⁿꞌe nducuéⁿꞌē naaⁿ caꞌáí ndúúcū ꞌiiⁿꞌyāⁿ yeⁿꞌe nducuéⁿꞌē chi yaꞌai yeⁿꞌe yā. 24 Ní nducyáácá ꞌiiⁿꞌyāⁿ yeⁿꞌe núúⁿmáⁿ yáāⁿ yeⁿꞌe yáⁿꞌāa Siria chꞌiindiveéⁿ yā yeⁿꞌe Jesús miiⁿ. Ní candɛ́ɛ yā ꞌiiⁿꞌyāⁿ chí yaꞌai yeⁿꞌē, ndúúcū ꞌiiⁿꞌyāⁿ chi nꞌdeee nááⁿ caꞌai ndii yā, ndúúcū ꞌiiⁿꞌyāⁿ chi canee yā ndúúcū espíritus yeⁿꞌe yááⁿnꞌguiinūuⁿ, ndúúcū ꞌiiⁿꞌyāⁿ chí ndistáⁿꞌā vaanicádiīnūuⁿ yeⁿꞌē, ndúúcū ꞌiiⁿꞌyāⁿ ndúúcū caꞌāī chi inꞌdúuví cuerpo yeⁿꞌe yā. Ní Jesús diíⁿ yā chi nducyaaca ꞌiiⁿꞌyāⁿ nduūvā yeⁿꞌé yā. 25 Neené ꞌyaaⁿ ꞌiiⁿꞌyāⁿ cueⁿꞌé yā ndúúcū Jesús miiⁿ. ꞌIiⁿꞌyāⁿ sꞌeeⁿ ní yeⁿꞌe yáⁿꞌāa Galilea, ndúúcū distrito yeⁿꞌē Decápolis chi vɛ́ɛ́ ndííchi yáāⁿ yeⁿꞌē, ndúúcū yáāⁿ Jerusalén, ndúúcū yáⁿꞌāa yeⁿꞌe Judea, ndúúcū yáⁿꞌāa chi snéé táámá lado yeⁿꞌē yíícú Jordán.