Yááⁿnꞌguiinūuⁿ neⁿꞌē sá tuuꞌvineeⁿ sa Jesús
4
Jesús ní ndiituú yeⁿꞌe Espíritu Nꞌdai yeⁿꞌé Ndyuūs ꞌiiⁿꞌyāⁿ ní nꞌdaa yā na yíícú Jordán. Espíritu Nꞌdai yeⁿꞌe Ndyuūs candɛ́ɛ yā Jesús na yáⁿꞌāa cuūⁿmáⁿ naachi nguɛ́ɛ́ chꞌɛɛtinéé ꞌiiⁿꞌyāⁿ. 2 ꞌUūvī ngɛɛcu nguuvi caneé yááⁿnꞌguiinūuⁿ nanááⁿ Jesús miiⁿ chí nꞌdiichineeⁿ sa ꞌiiⁿꞌyāⁿ. Nguɛ́ɛ́ dɛꞌɛ̄ vɛɛ cheꞌé Jesús nguuvi sꞌeeⁿ. Cuayiivi mííⁿ chiī cuiicú yā. 3 Tuuꞌmi ní yááⁿnꞌguiinūuⁿ caⁿꞌa sa chii sa Jesús: Dii Jesús, ndúútí chi dii chi Daiya Dendyuūs dii caaⁿꞌmaⁿ dí cuuvi dí tuūu ꞌcúū chi nduuví pan. Ní nduuví pan ní cuuvi cheꞌe di.4 Jesús nanꞌguɛɛcútáⁿꞌa yā: ꞌTúúcā cánéé nguūⁿ ná libro yeⁿꞌé Dendyuūs: Nguɛ́ɛ́ dámaāⁿ pan chɛꞌɛ́ ꞌiiⁿꞌyāⁿ ní cunduūchí yā caati ndúúcū tanducuéⁿꞌē nduudu chi ngaⁿꞌá Ndyuūs cunduuchí yā nduuti chi cuꞌtéénu yā.
5 Yááⁿnꞌguiinūuⁿ candɛ́ɛ sa Jesús na ꞌáámá yiīcū yáácú. Maaⁿ nchꞌɛɛtɛ́ nūuⁿ chꞌiⁿꞌi sa Jesús tanducuéⁿꞌē naciones yeⁿꞌē íⁿꞌyeeⁿdí ꞌcūū. 6 Tuuꞌmi ní yááⁿnꞌguiinūuⁿ caⁿꞌa sa chii sa Jesús. ꞌÚú ní teé dii nuuⁿmaⁿ iⁿꞌyeeⁿdí ꞌcuū chi cuuví yeⁿꞌē di chi caaⁿꞌmaⁿ ntííⁿnyuⁿ dí yeⁿꞌē ndúúcū nuuⁿmáⁿ chꞌɛɛtɛ naciones ꞌcūū ndúúcū chi ngaⁿꞌa ntiiⁿnyuⁿ yeⁿꞌē caati poder ꞌcūū yeⁿꞌé. ꞌĀā duꞌú nūuⁿ chi neⁿꞌé chííⁿ chí caꞌá. 7 Ndúútī chi caantiiꞌya di nanaáⁿ níícú cuꞌtéénu di ꞌúú cuuví yeⁿꞌē di tanducuéⁿꞌē chuū.
8 Jesús caⁿꞌa yā chii yā saⁿꞌā miiⁿ: Dii yááⁿnꞌguiinūuⁿ cuvíi di nanaáⁿ caati ꞌtúúcā canéé nguūⁿ na libro yeⁿꞌe Dendyuūs: Cuꞌtéénu di Señor Ndyuūs yeⁿꞌē di, ní dámaāⁿ ꞌcaandiveeⁿ di yeⁿꞌé ꞌiiⁿꞌyāⁿ mííⁿ nūuⁿ.
9 Cuayiivi candɛ́ɛ yááⁿnꞌguiinūuⁿ Jesús miiⁿ na yáāⁿ Jerusalén ní cuchɛɛ sá ndúúcu yā na yáácú yeⁿꞌē yáacū templo. Ní caⁿꞌa sa: Nduuti chi dii chi Daiya Dendyuūs dii, cáávā di ndii ꞌmúúⁿ ndii na yáⁿꞌāa. 10 Caati ꞌtúúcā canéé nguūⁿ cuááⁿ vmnaaⁿ na libro yeⁿꞌé Ndyuūs:
Ndyuūs dichóꞌo yā ángeles yeⁿꞌe yā chi diíⁿ yā cuidado yeⁿꞌē di.
11 Ní ángeles cundɛ́ɛ yā dii ndúúcū taꞌá yā, ní nguɛ́ɛ́ cuuvi yaꞌai caꞌa di na tuūu.
12 Jesús miiⁿ nánꞌguɛɛcútaⁿꞌa yā: ꞌTuucá ntúūⁿ canéé nguūⁿ na libro yeⁿꞌé Ndyuūs: Nguɛ́ɛ́ diiⁿ di mar ꞌáámá cosa chí nꞌdiichineeⁿ di Señor Ndyuūs yeⁿꞌē di.
13 Taachí chꞌiinu chi diiⁿ yááⁿnꞌguiinūuⁿ chi nꞌdiichineeⁿ sa Jesús divíi sa yeⁿꞌé yā ꞌáámá tiempo.
El Diablo Tienta a Jesús
Jesús tucáꞌa yā ntiiⁿnyuⁿ yeⁿꞌé yā na yáⁿꞌāa Galilea
14 Jesús miiⁿ nnguɛɛcúnée yā na yáⁿꞌāa Galilea ní canéé poder yeⁿꞌe Espíritu Nꞌdai yeⁿꞌe Ndyuūs ndúúcu yā. Nducyáácá ꞌiiⁿꞌyāⁿ chicadíínuuⁿ yā na nuuⁿmáⁿ na yáⁿꞌāa cuaaⁿ ꞌdiituú yeⁿꞌe chi nꞌdaācā nꞌdai idiíⁿ Jesús. 15 Ní Jesús ngiꞌcueeⁿ yā na yaācū sinagogas yeⁿꞌe ꞌiiⁿꞌyāⁿ Israel yeⁿꞌe nducuéⁿꞌē yáāⁿ ní nducyaaca ꞌiiⁿꞌyāⁿ idichꞌɛɛtɛ́ yā Jesús.
Jesús canee yā na yáāⁿ Nazaret
16 Ndaá Jesús na yáāⁿ Nazaret naachí chꞌiita yā. Ní tanꞌdúúcā chi costumbre yeⁿꞌé yā, nguuvi sábado chí ntaaviꞌtuunúúⁿ ꞌiiⁿꞌyāⁿ yeⁿꞌe ndaata Israel ndáa yā na yaācū sinagoga miiⁿ ní Jesús chééndii yā ní chꞌeeⁿ yā yeⁿꞌe libro yeⁿꞌe Ndyuūs. 17 Ní nanꞌguáaⁿ yā libro miiⁿ naachi ngaⁿꞌa yeⁿꞌē profeta Isaías. Taachí nanꞌguaaⁿ yā libro miiⁿ, ndaacá yā naachi canéé nguūⁿ chúū:
18 Espíritu yeⁿꞌé Ndyuūs canée yā nduucú, tí Espíritu Nꞌdai yeⁿꞌé Ndyuūs ndɛɛvɛ́ yā ꞌúú chi ꞌúú ní caaⁿꞌmáⁿ nduudu chí ngai yeⁿꞌé Ndyuūs nanááⁿ ꞌiiⁿꞌyāⁿ chí ndaachíī sneeⁿ ndúúcū nuuⁿndi yeⁿꞌe yā. Dichoꞌó yā ꞌúú chi diíⁿ chi nduūvā yenⁿꞌe ꞌiiⁿꞌyāⁿ chi yaⁿꞌai staava yeⁿꞌe yā, ní caaⁿꞌmáⁿ chi nánguaⁿꞌai ꞌiiⁿꞌyāⁿ yeⁿꞌe nuuⁿndi yeⁿꞌé yā chi tanꞌduucā chi caꞌá libertad ꞌiiⁿꞌyāⁿ chi snúūⁿ vácūū, ní diíⁿ chi inaaⁿ ꞌiiⁿꞌyāⁿ cosa chi nꞌdaacā chi nguɛ́ɛ́ déénu yā yeⁿꞌē caati maaⁿ canee yā tanꞌdúúcā ꞌiiⁿꞌyāⁿ chi ngueenááⁿ, ꞌtiicá yā. Ní nadanꞌguaí ꞌiiⁿꞌyāⁿ chi nguɛ́ɛ́ nꞌdaacā idiiⁿ ndúúcu yā caati cuuvi nꞌdaacā idiiⁿ ndúúcu yā.
19 Ní caaⁿꞌmáⁿ yeⁿꞌe tiempo chi nꞌdai taavi chi Ndyuūs ndɛɛvɛ́ yā chi caaⁿꞌmáⁿ, yeⁿꞌē vaadī nꞌdai taavi yeⁿꞌé yā.
20 Tuuꞌmi ní Jesús nanꞌgaadí yā libro yeⁿꞌé Ndyuūs ní nancaꞌa yā ꞌiiⁿꞌyāⁿ chi diíⁿ yā ntiiⁿnyuⁿ yeⁿꞌe yaācū sinagoga miiⁿ. Ní cuayiivi Jesús chꞌiindí yā. Nducyaaca ꞌiiⁿꞌyāⁿ snee yā nꞌgíínu yā yeⁿꞌe Jesús. 21 Jesús tucáꞌa yā caⁿꞌa yā ꞌiiⁿꞌyāⁿ sꞌeeⁿ: Maaⁿ cunuuⁿ caꞌa chuū chi canee nguūⁿ cuááⁿ vmnaaⁿ chi yeⁿꞌe ndísꞌtiī, chuū chi chꞌiinu chꞌiindiveéⁿ nī.
22 Nducyáácá ꞌiiⁿꞌyāⁿ nꞌdáácā ngaⁿꞌa yā yeⁿꞌe Jesús. Ngeⁿꞌe yíínú yā yeⁿꞌē nduudu chí nꞌdai chí ngaⁿꞌa Jesús miiⁿ ní ngaⁿꞌa yā: ¿ꞌÁá nguɛ́ɛ́ sáⁿꞌa ꞌcūū daiya José?
23 Ní caⁿꞌa Jesús miiⁿ: Ndísꞌtiī ní cuuví nī nduudu ꞌcūū ꞌúú. Nꞌdiī ꞌiiⁿꞌyāⁿ chi déénu nī diiⁿ yiicú nī ꞌiiⁿꞌyāⁿ, diiⁿ yiicú maáⁿ nī nꞌdiī. Tanducuéⁿꞌē chi chꞌiindiveéⁿ ꞌnū chi diíⁿ nī na yáāⁿ Capernaum, ꞌtiicá ntúūⁿ diíⁿ nī ꞌmuuⁿ yáāⁿ vaacú nī.
24 Naati ꞌuu ní caⁿꞌá chií ndísꞌtiī: Cuaacu nííⁿnyúⁿ mar ꞌáámá profeta ní nguɛ́ɛ́ ngíí inee yā na yáāⁿ vaacú yā. 25 Cuaacu nííⁿnyúⁿ ngaⁿꞌá ngīi ndísꞌtiī: Tiempo chi chóꞌōo neené ꞌyaaⁿ nꞌdaataá nguáꞌāa vɛɛ tá nguaaⁿ ꞌiiⁿꞌyāⁿ Israel taachi profeta Elías cāneé yā iⁿꞌyeeⁿdí ꞌcūu ní ꞌāā ntɛ́ɛ́ cheeⁿ cuuvi ꞌiinu ndúuyū canéé maⁿꞌa tiempo miiⁿ. Ní chꞌiīdī cuiicu nuuⁿmáⁿ yáⁿꞌāa yeⁿꞌe ꞌiiⁿꞌyāⁿ Israel. 26 Ní Ndyuūs nguɛ́ɛ́ dichóꞌo yā Elías miiⁿ nanááⁿ nducyaaca nꞌdaataá nguáꞌāa, dámaāⁿ ꞌáámá nꞌdaataá nguáꞌāa yeⁿꞌe táámá nación. Ní canee tá na yáāⁿ Sarepta chi niiⁿnuúⁿ na yáⁿꞌāa Sidón. 27 Ní tiempo taachi canéé profeta Eliseo na iⁿꞌyeeⁿdí ꞌcūū, ꞌtiicá ntúūⁿ nééné ꞌyaaⁿ ꞌiiⁿꞌyāⁿ ndúúcū caꞌai chi lepra chí inꞌduuti yúutɛ̄ yeⁿꞌe yā naati nguɛ́ɛ́ nducyaaca ꞌiiⁿꞌyāⁿ sꞌeeⁿ nduuva yeⁿꞌe yā, dámaāⁿ saⁿꞌā Naamán yeⁿꞌe táámá nación chi yeⁿꞌe yáⁿꞌāa Siria.
28 Taachí ꞌiiⁿꞌyāⁿ chꞌiindiveéⁿ yā chuū nducyaaca yā na yaācū sinagoga miiⁿ neené nduuvi taaⁿ yā. 29 Ní chꞌɛɛti ndii yā tí neⁿꞌé yā tunꞌdaa yā Jesús cuaaⁿ chuvaꞌāī yáāⁿ miiⁿ ní candɛ́ɛ yā Jesús miiⁿ ndii na yaacu nꞌdai yeⁿꞌe yiīcū chi yaacú ca yeⁿꞌe yáāⁿ miiⁿ. Ní ꞌiicu cuuví cunꞌdáa yā Jesús miiⁿ. 30 Naati nguɛ́ɛ́ cuuví diíⁿ yā ti Jesús miiⁿ ní choꞌó yā náávtaⁿꞌā yeⁿꞌe ꞌiiⁿꞌyāⁿ sꞌeeⁿ ní cunaⁿꞌa yā na vaacu yā.
Jesús Proclama el Cumplimiento de las Escrituras
ꞌÁámá saⁿꞌā chi canéé sa ndúúcū espíritu chi nguɛɛ nꞌdaācā yeⁿꞌe yááⁿnꞌguiinūuⁿ
31 Cuayiivi Jesús nanguaꞌáí yā na yáāⁿ Capernaum yeⁿꞌe yáⁿꞌāa Galilea ní miiⁿ ngiꞌcueeⁿ yā ꞌiiⁿꞌyāⁿ nguuvi sábado chi nguuvi chí ntaaviꞌtuunúúⁿ yā. 32 Ní ꞌiiⁿꞌyāⁿ na yáāⁿ miiⁿ ngeⁿꞌe yiinú yā yeⁿꞌe chi ngiꞌcueeⁿ Jesús, ti ngiꞌcueéⁿ yā ndúúcū poder tanꞌdúúcā ꞌáámá ꞌiiⁿꞌyāⁿ chí ngaⁿꞌā ntiiⁿnyúⁿ yā.
33 Ní taachi snee Jesús na yaacu sinagoga mííⁿ canee ꞌáámá saⁿꞌā ndúúcū espíritu yeⁿꞌe yááⁿnꞌguiinūuⁿ. Espíritu miiⁿ diiⁿ chi saⁿꞌā miiⁿ neené yuudu ꞌcaī sa. 34 Ní espíritu miiⁿ ní caⁿꞌā: Nꞌdiī, Jesús, yeⁿꞌe yáāⁿ Nazaret, cuꞌnéeⁿ nī núsꞌuu. ¿Dɛ́ꞌɛ̄ canee yeⁿꞌé ꞌnū nduucú nī? ¿ꞌÁá ndāa nī chi diꞌcuiīnú nī núsꞌuu? ꞌÚú nꞌdiichí duꞌú nꞌdiī. Nꞌdiī ní ꞌIiⁿꞌyāⁿ chí Nꞌdai chi Daiya Dendyuūs nꞌdiī.
35 Jesús ní yaaꞌvineeⁿ yā ní caⁿꞌa yā: Dii espíritu nꞌgáádí dí cheendi di ní nanꞌdáa di yeⁿꞌe sá ꞌtīī. Tuuꞌmi ní espíritu yeⁿꞌe yááⁿnꞌguiinūuⁿ chíndɛɛ̄vɛ sa sáⁿꞌa ꞌcūū náávtaⁿꞌā yeⁿꞌe ꞌiiⁿꞌyāⁿ sꞌeeⁿ ní nanꞌdaā sa yeⁿꞌe sáⁿꞌa ꞌcūū. Nguɛ́ɛ́ dɛꞌɛ̄ vɛɛ diīⁿ sa ndúúcū sáⁿꞌa ꞌcūū. 36 Nducyaaca yā ní ngeⁿꞌe yiinú yā ní ngaⁿꞌa yā ngii yā viꞌī: ¿Dɛ́ꞌɛ̄ nduudu chi ꞌtúúca? ꞌIiⁿꞌyāⁿ ꞌcúū ngaⁿꞌa ntiiⁿnyúⁿ yā espíritu yeⁿꞌe yááⁿnꞌguiinūuⁿ ndúúcū poder tanꞌdúúcā ꞌáámá ꞌiiⁿntyéⁿꞌē. Ngaⁿꞌá yā chí nanꞌdaā espíritu yeⁿꞌe yááⁿnꞌguiinūuⁿ ní nacanꞌdaā.
37 Ní nducyaaca ꞌiiⁿꞌyāⁿ ngaⁿꞌa yā yeⁿꞌe Jesús miiⁿ nducuéⁿꞌē cuaaⁿ nducuéⁿꞌē yáāⁿ cuááⁿ ꞌdiituú.
Jesús diíⁿ yā chi nduūvā yeⁿꞌe indáⁿꞌa Simon Pedro
38 Tuuꞌmi ní Jesús miiⁿ nanꞌdáa yā yaācū sinagoga miiⁿ ní ndaa yā vaꞌai yeⁿꞌē Simón Pedro. Ní indáⁿꞌā Simón Pedro miiⁿ ndɛ́ɛ̄ ꞌaama ꞌiiⁿꞌnūⁿ taaⁿ nꞌdaataá ní ꞌiiⁿꞌyāⁿ yeⁿꞌe vaacu tá diꞌcuíítu yā Jesús miiⁿ chi cunée yā ní nanduūvā yeⁿꞌē tá. 39 Jesús canꞌdii yā naachi canéé nꞌdaataa miiⁿ ní caⁿꞌa yā chi cuavii ꞌiiⁿꞌnūⁿ miiⁿ. Hora miiⁿ ꞌiiⁿꞌnūⁿ miiⁿ chivii yeⁿꞌē tá. Nꞌdaataa miiⁿ ní hora miiⁿ ncueeⁿ nuuⁿ tá ní diiⁿ tá mandados yeⁿꞌé ꞌiiⁿꞌyāⁿ sꞌeeⁿ ní caꞌa tá chi cheꞌe yā.
Jesús diíⁿ yā chi nduūvā yeⁿꞌe ꞌyaaⁿ nꞌdáí ꞌiiⁿꞌyāⁿ chi ngiītā
40 Taachí chiiya ꞌyáⁿꞌā, ꞌyááⁿ nꞌdáí ꞌiiⁿꞌyāⁿ ndɛ́ɛ yā ꞌiiⁿꞌyāⁿ chi ngiitā nanááⁿ Jesús. Nééné nꞌdeee naaⁿ caꞌai ndii yā. Jesús miiⁿ ní yiinꞌduu táꞌa yā vmnaaⁿ caꞌáámá caꞌáámá ꞌiiⁿꞌyāⁿ ní ꞌtíícā nduuvā yeⁿꞌe yā. 41 Ní yeⁿꞌē ꞌyaaⁿ ꞌiiⁿꞌyāⁿ chi ngííta yā yinanꞌdáā espíritus yeⁿꞌe yááⁿnꞌguiinūuⁿ chi ꞌcaí yā ní ngaⁿꞌa yā: Nꞌdiī ní Daiya Dendyuūs nꞌdiī. Tuuꞌmi ní Jesús miiⁿ ní yaaꞌvineeⁿ yā espíritus yeⁿꞌe yááⁿnꞌguiinūuⁿ ní nguɛ́ɛ́ ꞌcuúⁿ yā chí caaⁿꞌmaⁿ sa ti espíritus yeⁿꞌe yááⁿnꞌguiinūuⁿ ní deenu sá chí Jesús miiⁿ chi Cristo.
Jesús ní caⁿꞌa yā nduudu yeⁿꞌé Ndyuūs na yáⁿꞌāa Judea
42 Chidɛɛvɛ táámá nguuvi Jesús miiⁿ ní cueⁿꞌe yā chuvaꞌai yáāⁿ miiⁿ na ꞌáámá lugar naachi nguɛ́ɛ́ chꞌɛɛtinéé ꞌiiⁿꞌyāⁿ. Ní ꞌiiⁿꞌyāⁿ sꞌeeⁿ yeⁿꞌe yáāⁿ miiⁿya inꞌnuúⁿ yā Jesús ní ndaá yā naachi canéé Jesús miiⁿ. Ní diꞌcuiitú yā chi nguɛ́ɛ́ cuvii Jesús yeⁿꞌe yā. 43 Naati Jesús miiⁿ ní ngaⁿꞌa yā ngii yā ꞌiiⁿꞌyāⁿ sꞌeeⁿ: Canéé chííⁿ chi ꞌúú ní caaⁿꞌmáⁿ yeⁿꞌe nduudu ngai yeⁿꞌē naachi Ndyuūs ngaⁿꞌa ntiiⁿnyúⁿ yā, nanááⁿ ꞌiiⁿꞌyāⁿ yeⁿꞌe tanáⁿꞌā yáāⁿ ti yeⁿꞌē chúū chí Dendyuūs dichoꞌó yā ꞌúú.
44 Ní Jesús miiⁿ cueⁿꞌé yā yáāⁿ ndíí yáāⁿ yeⁿꞌe yáⁿꞌāa Galilea ní ngaⁿꞌá yā nduudu yeⁿꞌé Ndyuūs na yaācū sinagogas naachi cueⁿꞌé yā.