Juan chi ngɛɛdínuūⁿnīⁿ sa ngaⁿꞌa sa chi ndaacadaamí ꞌiiⁿꞌyāⁿ yeⁿꞌe nuuⁿndi yeⁿꞌe yā
3
Saⁿꞌa chi nguuvi Tiberio César, ꞌāā ndíítiiⁿꞌyuⁿ nduūyū chi ngaⁿꞌa ntiiⁿnyúⁿ yā chi emperador yā. Ní saⁿꞌā chi nguuvi Poncio Pilato, ní gobernador yā yeⁿꞌe yáⁿꞌāa Judea. Saⁿꞌā chi nguuvi Herodes ní rey yā yeⁿꞌe yáⁿꞌāa Galilea. ꞌÍícú ꞌdiīnū Herodes miiⁿ chi nguuvi Felipe ní rey yā yeⁿꞌē yáⁿꞌāa Iturea ndúúcū yáⁿꞌāa Trachonite Ní saⁿꞌā chi nguuvi Lisanias ní rey yā yeⁿꞌe yáⁿꞌāa Abilinia. 2 Ní saⁿꞌa Anás ndúúcū Caifás, saⁿꞌā sꞌuuⁿ ní chiiduú nꞌgɛɛtɛ ca yeⁿꞌe yaācū yeⁿꞌe ꞌiiⁿꞌyāⁿ Israel. Tiempo miiⁿ ní Ndyuūs ní caꞌá yā ꞌáámá nduudu nꞌdai Juan, chí daiya Zacarías. Juan miiⁿ canee sa na yáⁿꞌāa cuūⁿmáⁿ naachi nguɛ́ɛ́ chꞌɛɛtinéé ꞌiiⁿꞌyāⁿ. 3 Juan miiⁿ ní cachiī ca sa nducuéⁿꞌē yáⁿꞌāa chi snéé niiⁿnuúⁿ ná yíícú Jordán. Ní Juan miiⁿ chii sá ꞌiiⁿꞌyāⁿ chi canéé chi cuɛɛdínuūⁿniⁿ yā níícú ndaacadaamí yā yeⁿꞌē nuuⁿndi yeⁿꞌé yā, níícú Ndyuūs nadichꞌɛɛ̄cú yā nuuⁿndi yeⁿꞌé yā. 4 Chuū ní chiī tanꞌdúúcā chi profeta Isaías dingúuⁿ yā ndii cuaaⁿ vmnaaⁿ na libro yeⁿꞌe Ndyuūs yeⁿꞌē:ꞌCaandiveeⁿ yú nduudu yeⁿꞌē ꞌáámá ꞌiiⁿꞌyāⁿ chi caaⁿꞌmáⁿ yā yuudū na yáⁿꞌāa cuūⁿmáⁿ naachi nguɛ́ɛ́ chꞌɛɛtinéé ꞌiiⁿꞌyāⁿ ní caⁿꞌa yā ꞌtuuca: Cuundiyaáⁿ nī yúúní yeⁿꞌe Señor Ndyuūs caati cuchii yā; nanꞌguáaⁿ nī ꞌaama yúúní cuaacu caavá yā. Didɛɛvɛ́ nī staava yeⁿꞌé nī ní cuuvi ꞌcuaáⁿ nī ꞌiiⁿꞌyāⁿ miiⁿ taachi ndaa yā.
5 Naachi yaanúū ní nduūtī, núúⁿmáⁿ icyaⁿꞌā ndúúcū nducyaaca yiīcū nduuví neⁿꞌe, yúúní ꞌcuéē nduuvī cuaacu, yúúní chi nguɛ́ɛ́ neⁿꞌe ní nduuví neⁿꞌe.
6 Nducyaaca ꞌiiⁿꞌyāⁿ snaaⁿ yā ꞌiiⁿꞌyāⁿ yeⁿꞌe Ndyuūs, ꞌiiⁿꞌyāⁿ chí nadinguáⁿꞌai yā nducyaaca ꞌiiⁿꞌyāⁿ.
7 Juan miiⁿ ní ngaⁿꞌa sá ngii sa ꞌiiⁿꞌyāⁿ chí ndaá yā chí cuɛɛdínuūⁿnīⁿ sa ꞌiiⁿꞌyāⁿ: Ndísꞌtiī ní tanꞌdúúcā cúú ꞌtíícā ndísꞌtiī. ¿Duꞌú chi ꞌcueeⁿ ndísꞌtiī chi cuuvi cáánu nī yeⁿꞌe castigo taaⁿ chí cúchiī? 8 Diíⁿ nī denduꞌū chi nꞌdáacā maaⁿ níícú ꞌcuuⁿꞌmí nī ꞌiiⁿꞌyāⁿ chí ꞌāā ndaacadaamí nī yeⁿꞌe nuuⁿndi yeⁿꞌé nī. Nguɛɛ tucáꞌa nī caaⁿꞌmaⁿ nī nguaaⁿ maaⁿ nī chi Abraham miiⁿ ní chiidá nī caati ꞌúú ngaⁿꞌá ngīi ndísꞌtiī chi Ndyuūs ní cuuvi diíⁿ yā chi tuūu sꞌeeⁿ ní chi cuuvi daiya Abraham. 9 Ní cutiīiⁿ mííⁿ ní ꞌāā canéé na diiꞌyu yáⁿꞌá. Nducyaaca yáⁿꞌá chi nguɛ́ɛ́ ngii nꞌguiꞌi nꞌdaacā yeⁿꞌē canee chi ꞌcaaca yáⁿꞌá mííⁿ ní cūnuuⁿ na yaⁿꞌā. ꞌTiicá ntúūⁿ Ndyuūs diíⁿ yā juzgar nducyaaca ꞌiiⁿꞌyāⁿ.
10 ꞌIiⁿꞌyāⁿ sꞌuuⁿ ntiinguuneeⁿ yā Juan miiⁿ: ¿Dɛꞌɛ̄ cuuví diíⁿ ꞌnū?
11 Juan miiⁿ ní nanꞌguɛɛ̄cútaⁿꞌā sa: ꞌIiⁿꞌyāⁿ chi ꞌuuvī catecai yā, canéé chi caꞌa yā ꞌáámá catecai ꞌiiⁿꞌyāⁿ chi nguɛ́ɛ́ yeⁿꞌe yā. ꞌIiⁿꞌyāⁿ chi vɛ́ɛ́ chi ngeꞌe yā, canéé chi caꞌa yā ꞌiiⁿꞌyāⁿ chi nguɛ́ɛ́ yeⁿꞌé yā.
12 Ndaá ntúūⁿ ꞌiiⁿꞌyāⁿ chi innꞌguɛɛ yeⁿꞌe yáⁿꞌāa chi Juan miiⁿ cuɛɛdínuūⁿnīⁿ sa ꞌiiⁿꞌyāⁿ. Ní ꞌiiⁿꞌyāⁿ sꞌeeⁿ caⁿꞌa yā chii yā Juan: Nꞌdií, maestro, ¿dɛꞌɛ̄ cuuví diíⁿ ꞌnū?
13 Juan miiⁿ ní caⁿꞌa sa chii sa ꞌiiⁿꞌyāⁿ: Nguɛ́ɛ́ caaca nī chi mar ꞌaama ndoꞌo tanꞌdúúcā chí ngaⁿꞌa na ley.
14 Tuuꞌmi ní soldados tiinguunééⁿ sá Juan: Núsꞌuu, ¿dɛꞌɛ̄ cuuvi diíⁿ ꞌnū? Ní Juan caⁿꞌa sa chii sa ꞌiiⁿꞌyāⁿ: Nguɛ́ɛ́ diduucú nī yeⁿꞌē mar ꞌáámá ꞌiiⁿꞌyāⁿ. Nguɛ́ɛ́ cunncáā caaⁿꞌmaⁿ nī yeⁿꞌē tanáⁿꞌā ꞌiiⁿꞌyāⁿ. Níícú ꞌcuɛɛtinéé nī ndúúcū vaadi yeenú ndúúcū chi inadííꞌvɛ yā ndísꞌtiī.
15 ꞌIiⁿꞌyāⁿ sꞌuuⁿ snee yiinu yā Juan ní nducyaaca yā ní nadicádíínuuⁿ yā na staava yeⁿꞌe yā chi ¿ꞌáá nguɛ́ɛ́ Juan chí Cristo? 16 Tuuꞌmi ní Juan miiⁿ ní caⁿꞌa sa chii sa nducyaacá yā: Cuaacu nííⁿnyúⁿ ꞌúú ní ngɛɛdínuūⁿníⁿ ndúúcū nuūⁿnīⁿ; naati cuayiivi cuchiī taamá yā chí nꞌdáácā nꞌdai ca ndúúcū poder yeⁿꞌé yā chí chꞌɛɛtɛ taavi nguɛ́ɛ́ ti ꞌúú. Ní ꞌúú ní nguɛ́ɛ́ nꞌdaācā ca chi cuuvi diíⁿ nꞌdaatií yííⁿmáⁿ yeⁿꞌe ndaacuú yeⁿꞌé yā. ꞌIiⁿꞌyāⁿ miiⁿ ní cuɛɛdínuūⁿniⁿ yā ndúúcū Espíritu Nꞌdai yeⁿꞌé Ndyuūs ndúúcū yaⁿꞌā. 17 ꞌIiⁿꞌyāⁿ miiⁿ ndɛ́ɛ yā ní diiⁿ yā tanꞌdúúcā ꞌiiⁿꞌyāⁿ chi didɛɛvɛ́ yā trigo. ꞌTíícā diíⁿ yā ndúúcū ꞌiiⁿꞌyāⁿ. Ndáa yā ndúúcū zaranda na taꞌa yā. Naachí nadɛɛvɛ́ yā trigo miiⁿ, divíi yā trigo miiⁿ ní nguainꞌdai yā chɛɛti díínūuⁿ. Ní ꞌneeⁿ yáⁿꞌa yā dɛɛcú miiⁿ na nguuchí yaⁿꞌā chí ꞌāā ntɛ́ɛ nꞌtuūvi. Dɛɛcú miiⁿ ní tanꞌdúúcā ꞌiiⁿꞌyāⁿ chí nguɛ́ɛ́ iꞌtéénu yā Ndyuūs.
18 ꞌTúúcā ní ndúúcū nꞌdeee nꞌdáí ca chi caⁿꞌā Juan miiⁿ, caⁿꞌa sá chi ꞌcueeⁿ sa nduudu nꞌdai chí ngai ꞌiiⁿꞌyāⁿ sꞌeeⁿ. 19 Tiempo miiⁿ Juan miiⁿ ní yaaꞌvi neeⁿ sa rey Herodes miiⁿ chi canéé sá ndúúcū nꞌdaataá yeⁿꞌē ꞌdíinū sa ní yeⁿꞌe tanducuéⁿꞌē chi nguɛɛ nꞌdaācā chi diíⁿ yā. Nꞌdaataá miiⁿ ní nguuvi tá Herodías. 20 Tuuꞌmi ní rey Herodes miiⁿ ní diíⁿ yā táámá nuuⁿndi chi chꞌɛɛtɛ ca ní sꞌnuūⁿ chiichí yā Juan vácūū.
Juan miiⁿ chɛɛdinúūⁿniⁿ yā Jesús
21 Cuayiivi taachí Juan ngɛɛdínuūⁿniⁿ yā nꞌdeee nꞌdáí ꞌiiⁿꞌyāⁿ, chɛɛ̄dinúūⁿniⁿ ntúūⁿ yā Jesús miiⁿ. Ní taachi Jesús miiⁿ ngaⁿꞌanguaꞌá yā nánguuvi ní nánguaāⁿ. 22 Ní ndaā Espíritu Nꞌdai yeⁿꞌé Ndyuūs vmnaaⁿ yeⁿꞌé yā tanꞌdúúcā ꞌáámá paloma. Ní ꞌiiⁿꞌyāⁿ sꞌeeⁿ chꞌiindivéeⁿ yā ꞌáámá nduudu yeⁿꞌē vaꞌai chꞌɛɛti nguuvi chí ngaⁿꞌā: Díí, daiyá chi neⁿꞌe taaví ní yeenú taavi cáávā dii.
Bautizo de Jesús por Juan
ꞌIiⁿꞌyāⁿ vmnááⁿ vmnaaⁿ yeⁿꞌe ndaata yeⁿꞌē Jesús
23 Jesús miiⁿ ní chií yā ndíícú ndiichi ndúuyū taachí tucáꞌa yā ntííⁿnyúⁿ yeⁿꞌé yā. Ndaata yeⁿꞌe Jesús ní ꞌtíícā: ꞌIiⁿꞌyāⁿ nadicádíínuuⁿ yā chi Jesús miiⁿ ní daiya José. José miiⁿ ní daiya Elí. 24 Elí miiⁿ ní daiya Matat. Matat miiⁿ ní daiya Leví. Leví miiⁿ ní daiya Melqui. Melqui miiⁿ ní daiya Jana. Jana miiⁿ ní daiya José. 25 José miiⁿ ní daiya Matatías. Matatías miiⁿ ní daiya Amós. Amós miiⁿ ní daiya Nahum. Nahum miiⁿ ní daiya Esli. Esli miiⁿ ní daiya Nagai. 26 Nagai miiⁿ ní daiya Maat. Maat miiⁿ ní daiya Matatías. Matatías miiⁿ ní daiya Semei. Semei miiⁿ ní daiya José. José miiⁿ ní daiya Judá. 27 Judá miiⁿ ní daiya Joana. Joana miiⁿ ní daiya Resa. Resa miiⁿ ní daiya Zorobabel. Zorobabel miiⁿ ní daiya Salatiel. Salatiel miiⁿ ní daiya Neri. 28 Neri miiⁿ ní daiya Melqui. Melqui miiⁿ ní daiya Adi. Adi miiⁿ ní daiya Cosam. Cosam miiⁿ ní daiya Elmodam. Elmodam miiⁿ ní daiya Er. 29 Er miiⁿ ní daiya Josué. Josué miiⁿ ní daiya Eliezar. Eliezar miiⁿ ní daiya Jorim. Jorim miiⁿ ní daiya Matat. 30 Matat miiⁿ ní daiya Leví. Leví miiⁿ ní daiya Simeón. Simeón miiⁿ ní daiya Judá. Judá miiⁿ ní daiya José. José miiⁿ ní daiya Jonán. Jonán miiⁿ ní daiya Eliaquim. 31 Eliaquim miiⁿ ní daiya Melea. Melea miiⁿ ní daiya Mainán. Mainán miiⁿ ní daiya Matata. Matata miiⁿ ní daiya Natán. 32 Natán miiⁿ ní daiya David. David miiⁿ ní daiya Isaí. Isaí miiⁿ ní daiya Obed. Obed miiⁿ ní daiya Booz. Booz miiⁿ ní daiya Salmón. Salmón miiⁿ ní daiya Naasón. 33 Naasón miiⁿ ní daiya Aminadab. Aminadab miiⁿ ní daiya Aram. Aram miiⁿ ní daiya Esrom. Esrom miiⁿ ní daiya Fares. Fares miiⁿ ní daiya Fares. Fares miiⁿ ní daiya Judá. 34 Judá miiⁿ ní daiya Jacob. Jacob miiⁿ ní daiya Isaac. Isaac miiⁿ ní daiya Abraham. Abraham miiⁿ ní daiya Taré. Taré miiⁿ ní daiya Nacor. 35 Nacor miiⁿ ní daiya Serug. Serug miiⁿ ní daiya Ragau. Ragau miiⁿ ní daiya Peleg. Peleg miiⁿ ní daiya Heber. Heber miiⁿ ní daiya Sala. 36 Sala miiⁿ ní daiya Cainán. Cainán miiⁿ ní daiya Arfaxad. Arfaxad miiⁿ ní daiya Sem. Sem miiⁿ ní daiya Noé. Noé miiⁿ ní daiya Lamec. 37 Lamec miiⁿ ní daiya Matusalén. Matusalén miiⁿ ní daiya Enoc. Enoc miiⁿ ní daiya Jared. Jared miiⁿ ní daiya Mahalaleel. Mahalaleel miiⁿ ní daiya Cainán. 38 Cainán miiⁿ ní daiya Enós. Enós miiⁿ ní daiya Set. Set miiⁿ ní daiya Adán. Adán miiⁿ ní yeⁿꞌe Dendyuūs.