2 ꞌÚú ngaⁿꞌá nꞌdaacā yeⁿꞌe ndísꞌtiī hermanos yeⁿꞌé ti nꞌgaacú nī yeⁿꞌe ꞌúú, ndúúcū tanducueⁿꞌē denduꞌū. Ní diíⁿ nī tanꞌdúúcā chi ꞌúú ngiꞌcueéⁿ ndísꞌtiī. 3 ꞌÚú neⁿꞌé chi cadíínūūⁿ ndísꞌtiī chi Cristo miiⁿ ní ngaⁿꞌa ntiiⁿnyúⁿ yā yeⁿꞌē nducyaaca saⁿꞌā. ꞌÍícú saⁿꞌā ní ngaⁿꞌā ntiiⁿnyuⁿ sa yeⁿꞌe nꞌdaataá yéⁿꞌe sa. ꞌÍícú Ndyuūs Chiida yú ngaⁿꞌā ntiiⁿnyúⁿ yā yeⁿꞌe Cristo miiⁿ. 4 Nducyáácá saⁿꞌā chí ngaⁿꞌánguaꞌa sa o ngaⁿꞌa sa nduudu yeⁿꞌé Ndyuūs ndúúcū sndiīiⁿ yeⁿꞌē sa chi canúúⁿ tiīⁿ sa, ngíí ꞌcuináaⁿ sa. 5 Nducyáácá nꞌdaataá chi ngaⁿꞌanguaꞌa tá o ngaⁿꞌa tá nduudu yeⁿꞌé Ndyuūs ní nguɛ́ɛ́ ndɛɛcu paño yeⁿꞌe tá tiīⁿ tá, ngíí ꞌcuináaⁿ tá ti idiiⁿ tá tanꞌdúúcā chi ndíí tiīⁿ ta. 6 Ndúúti chi nguɛ́ɛ́ ndɛɛcu paño yeⁿꞌe tá tiīⁿ tá tuuꞌmi ní cuū tá yuudū tiīⁿ tá. Nduuti chi ꞌaama nꞌdáátaá ngíí ꞌcuináaⁿ tá chi ndíí tiiⁿ tá, tuuꞌmi ní canéé chi chɛɛcu paño yeⁿꞌe tá tíiⁿ tá. 7 Saⁿꞌā ní nguɛ́ɛ́ cánéé chi caaⁿꞌmaⁿ sa nduudu yeⁿꞌé Ndyuūs ndúúcū sndiiⁿ yeⁿꞌē sa chi canuuⁿ tiīⁿ sa, ti Ndyuūs dinꞌdái yā saⁿꞌā tanꞌdúúcā maáⁿ yā chi caaⁿꞌmaⁿ ntiiⁿnyuⁿ sa, ꞌtíícā. Saⁿꞌā sꞌuūuⁿ, saⁿꞌā ní diiⁿ sa ntiiⁿnyuⁿ yeⁿꞌe Ndyuūs. Nꞌdaataá nguɛ́ɛ́ ꞌtíícā. Idiiⁿ tá chííⁿ chí ngaⁿꞌa isaⁿꞌā yeⁿꞌe tá, ti saⁿꞌā miiⁿ caaⁿꞌmaⁿ ntiiⁿnyuⁿ sa yeⁿꞌē nꞌdaata miiⁿ. 8 Ti Ndyuūs nguɛ́ɛ́ dinꞌdái yā saⁿꞌā yeⁿꞌe nꞌdaataá naati dinꞌdái yā nꞌdaataá yeⁿꞌe sáⁿꞌā. 9 Ti Ndyuūs nguɛ́ɛ́ dinꞌdái yā saⁿꞌā chí dichííꞌvɛ̄ sa nꞌdaataá, naati dinꞌdái yā nꞌdaataá chi dichííꞌvɛ̄ tá saⁿꞌā. 10 Nꞌdaataá ní canéé chi ndɛ́ɛcu paño yeⁿꞌē tá tíiⁿ tá ti chꞌiⁿꞌi tá chi nguɛ́ɛ́ caaⁿꞌmaⁿ ntiiⁿnyuⁿ tá. ꞌTiicá ntúūⁿ ángel sꞌeeⁿ ní chí canuúⁿ tiīnuú náaⁿ yā taachí caneé yā nanááⁿ ꞌiivú Ndyuūs. 11 Ndyuūs diíⁿ yā chi sáⁿꞌā nguɛ́ɛ́ canēe sa dámāaⁿ sa, ndíí nguɛ́ɛ́ nꞌdaataá canēe tá dámaāⁿ tá. Ndyuūs diiⁿ cuenta chi saⁿꞌā ní nꞌdaataá daama daamá yā nanaáⁿ yā ti Jesucristo chꞌīi yā cucáávā nduu ꞌuuví ꞌiiⁿꞌyāⁿ sꞌuuⁿ. 12 Vmnááⁿ vmnaaⁿ nꞌdaata miiⁿ ní yeⁿꞌe saⁿꞌā. Maaⁿ ní saⁿꞌā chꞌiindiyáaⁿ sa yeⁿꞌē nꞌdaataá naati tanducuéⁿꞌē denduꞌū ní yeⁿꞌé ꞌiivú Ndyuūs.

13 ¿Dɛꞌɛ̄ nadacadiinúuⁿ nī yeⁿꞌe chuū? ¿ꞌÁá nꞌdaacā chi nꞌdaata caaⁿꞌmaⁿnguaꞌa tá ndúúcū Ndyuūs ꞌaara chi nguɛ́ɛ́ ndɛɛcuú paño yeⁿꞌē tá tiīⁿ tá? 14 Nducyáácá ꞌiiⁿꞌyāⁿ deenú yā chi saⁿꞌā chi nꞌgéénūu yuūdū tíiⁿ sa ti ꞌcuináaⁿ sa. 15 Nduuti chi nꞌdaata nꞌgéénūu tiīⁿ tá nꞌdaacā yeⁿꞌē tá. Ní yuūdū tiīⁿ tá nꞌdaacā chi inꞌdíī tiiⁿ tá chi tanꞌdúúcā ꞌáámá paño. 16 Nduuti chi ꞌiiⁿꞌyāⁿ neⁿꞌe caaⁿꞌmaⁿ taáⁿ yā yeⁿꞌe chuū, ꞌúú nguɛ́ɛ́ cuuvi caāⁿꞌmaⁿ cá yeⁿꞌē ti ꞌtíícā costumbre yeⁿꞌē yú. ꞌTiicá ntuūⁿ costumbre yeⁿꞌe nducyaaca ꞌiiⁿꞌyāⁿ chi iꞌtéénu yā Jesucristo.

17 Maaⁿ ní ꞌúú idinguúⁿ yeⁿꞌé ndísꞌtiī ti nguɛ́ɛ́ nꞌdaacā diíⁿ nī. Taachi nduuvidaamá nī nguɛ́ɛ́ nꞌdaacā ca idiíⁿ nī ti cunncáā ca idiíⁿ nī. 18 ꞌÚú nꞌgiindiveéⁿ chi ndísꞌtiī nguɛ́ɛ́ daama vaadī cadiinuuⁿ yeⁿꞌe nī taachi nduuvidaamá nī ná yaācū. Vɛ́ɛ́ ꞌtɛ́ɛ́ chi iꞌteenú chi cuaacu chi chꞌiindiveéⁿ. 19 Canéé chi vɛ́ɛ́ chi nduuvidaamá ꞌāā viꞌí caā ndísꞌtiī chi iꞌtéénu nī Jesucristo, ti cuuvi deenú nī chɛɛ́ hermanos nguaaⁿ ndísꞌtiī chi ꞌáámá canee yā chí iꞌtéénu cá yā. 20 Taachi ꞌāā viꞌí caā nduuvidaamá nī ní cheꞌé nī Santa Cena yeⁿꞌe Señor Jesucristo nguɛ́ɛ́ cheꞌé nī Cena miiⁿ tanꞌdúúcā chi Jesucristo caⁿꞌa ntiiⁿnyúⁿ yā. 21 Ndísꞌtiī nguɛ́ɛ́ canee ngíínú nī taachí ndaa nducyaaca hermanos naati caꞌáámá caꞌaamá nī diiⁿ núúⁿ yiinu nī ní caⁿꞌá nī na yáacū ní cheꞌé nī Cena yeⁿꞌe nī. Ní taachi ndaa tiempo chi cheꞌé nī Santa Cena náⁿꞌa nī ní cuiicu nī. Tanáⁿꞌa nī ní cuuꞌvi nī. 22 ¿Dɛ́ꞌɛ̄ chuū? ¿ꞌÁá nguɛ́ɛ́ vɛ́ɛ́ vaꞌai yeⁿꞌe nī naachi cuuvi cheꞌe nī ní cuꞌu nī? Nduuti chi nguɛ́ɛ́ neⁿꞌé nī repartir Cena yeⁿꞌé nī, ¿dɛ́ꞌɛ̄ cuuví chí candɛɛ́ nī Cena yeⁿꞌé nī chɛɛti yaācū? Nguɛ́ɛ́ nꞌdaacā idiíⁿ nī taachi nduuvidaamá nī na yaācū yeⁿꞌe ꞌiivú Ndyuūs. Diíⁿ nī cosa chi cuuvi ꞌcuinááⁿ ꞌiiⁿꞌyāⁿ chi nguɛ́ɛ́ vɛ́ɛ́ chi cheꞌe yā. ¿Dɛ́ꞌɛ̄ neⁿꞌé nī chi ꞌúú caaⁿꞌmáⁿ ndúúcū ndísꞌtiī yeⁿꞌe chuū? ¿ꞌÁá neⁿꞌé nī chi ꞌúú caaⁿꞌmáⁿ ndúúcū ndísꞌtiī chi nꞌdaacā idiíⁿ nī? Nguɛ́ɛ́ cuuvi caaⁿꞌmáⁿ ꞌtiicā.

23 ꞌIivú Señor Jesucristo chii yā ꞌúú chiiⁿ chi ꞌúú caꞌcueéⁿ ndísꞌtiī. Nguiinū miiⁿ chi ꞌāā cuɛ́ɛ́ ncaꞌa Judas Iscariote miiⁿ Jesucristo chi ndíi yā preso na taꞌá ꞌiiⁿntyéⁿꞌē, Jesús miiⁿ ní staꞌa yā pan. 24 Chꞌiinu Jesús ncaꞌa gracias Ndyuūs cáávā pan miiⁿ, tuuꞌmi ní nꞌdeé yā pan. Ní Jesús ní caⁿꞌa yā chii yā discípulos yeⁿꞌe yā: Ndísꞌtiī cutaꞌá nī ní cheꞌe nī. Pan ꞌcūū chi ꞌúú nꞌdeé tanꞌdúúcā cuerpo yeⁿꞌé ꞌtíícā. Ní cuerpo yeⁿꞌé caꞌá chí nꞌdeē cucáávā ndísꞌtiī. Nadiíⁿ nī chuū, ní taachi nacheꞌé nī pan miiⁿ ní nanꞌgaacú nī yeⁿꞌē ꞌúú cueⁿꞌe daāⁿmaⁿ. 25 Cuayiivi chi cheꞌé nī pan ꞌcūū Jesús staꞌa ntúuⁿ yā taza chi sꞌnéeⁿ vino ní ngaⁿꞌa yā: Vino chɛɛti taza ꞌcūū ní tanꞌdúúcā yuuúⁿ yeⁿꞌé ꞌtíícā. Ndúúcū yuuúⁿ yeⁿꞌé idiíⁿ ꞌáámá compromiso chí ngai. Nadiíⁿ nī chuū ní taachi nangiꞌí nī vino miiⁿ nanꞌgáácú nī yeⁿꞌē ꞌúú cueⁿꞌe daāⁿmaⁿ. 26 Maaⁿ ní taachi cheꞌé nī pan ꞌtíícā, ní cuꞌú nī vino yeⁿꞌe taza ꞌtíícā, tuuꞌmi ní chꞌiⁿꞌí nī ꞌiiⁿꞌyāⁿ chi Jesucristo chꞌīi yā caavā ndísꞌtiī. Nadiíⁿ nī Cena ꞌcūū ndii tiempo chi ndaa Jesucristo taama vmnéⁿꞌēe.

27 ꞌIiⁿꞌyāⁿ chi ngeꞌé yā pan yeⁿꞌe Cena ꞌcūū ní ngiꞌi ntúuⁿ yā vino yeⁿꞌe taza yeⁿꞌe Santa Cena yeⁿꞌē Jesucristo, canéé chi canéé ndúúcū staava yeⁿꞌé yā dɛɛvɛ nanááⁿ Dendyuūs. Nduuti chi nguɛ́ɛ́ dɛɛvɛ staava yeⁿꞌé yā nanááⁿ Dendyuūs taachi cheꞌé yā Cena miiⁿ, tuuꞌmi ní diiⁿ nuuⁿndí yā contra cuerpo yeⁿꞌe Señor Jesucristo ndúúcú yuuúⁿ yēⁿꞌe yā denduꞌū, ti nguɛ́ɛ́ diíⁿ yā respetar Jesucristo. 28 Caava chúū ꞌáámá ꞌáámá ꞌiiⁿꞌyāⁿ chi neⁿꞌé yā cheꞌé yā yeⁿꞌē Santa Cena yeⁿꞌē Señor Jesucristo, canéé chi nꞌdiichi maáⁿ yā ndúútī chí dɛɛvɛ staava yeⁿꞌé yā nanááⁿ Dendyuūs. Taachí dɛɛvɛ staava yeⁿꞌé yā nanááⁿ Dendyuūs tuuꞌmi ní cuuvi cheꞌe yā pan yeⁿꞌe Santa Cena yeⁿꞌē Señor Jesucristo, ní cuꞌú yā vino yeⁿꞌe taza yeⁿꞌē Cena ꞌcūū. 29 ꞌIiⁿꞌyāⁿ chi ngeꞌé yā ní ngiꞌi yā yeⁿꞌe Cena yeⁿꞌē Señor Jesucristo ní nguɛ́ɛ́ nacádiinúúⁿ yā yeⁿꞌe cuerpo yeⁿꞌe Jesús chí chꞌiī caava sꞌuūúⁿ, Dendyuūs diíⁿ yā castigar ꞌiiⁿꞌyāⁿ miiⁿ. Vɛ́ɛ́ nuuⁿndi yeⁿꞌé yā nanááⁿ ꞌiivú Ndyuūs. Maáⁿ yā dinuuⁿndí yā ní diiⁿ yā chi cuuví castigado yā. 30 Cáávā chi diíⁿ nī ꞌtúúcā, ꞌyaaⁿ nꞌdáí ndísꞌtiī ní duuva nī, ní náⁿꞌa nī ní ngííta nī, tanáⁿꞌā ní chꞌīi nī nguaaⁿ ndísꞌtiī. 31 Ndúúti chi sꞌuuúⁿ nꞌdiichi maaⁿ yú chi nꞌdaacā canee yú nanááⁿ Ndyuūs yeⁿꞌē yú, Ndyuūs nguɛ́ɛ́ diíⁿ yā castigar sꞌuuúⁿ. 32 Taachi ꞌiivú Ndyuūs nꞌdiichí yā nuuⁿndi yeⁿꞌē yú ní nguɛ́ɛ́ dɛɛvɛ staava yeⁿꞌē yú taachi cheꞌē yú Santa Cena yeⁿꞌē Jesucristo, tuuꞌmi ní teé yā ꞌaama castigo sꞌuuúⁿ. Níícú nadacadíínuuⁿ yú yeⁿꞌe nuuⁿndi yeⁿꞌe yú. Ní ꞌíícú nguɛ́ɛ́ canee yú condenado tanꞌdúúcā tanáⁿꞌā ꞌiiⁿꞌyāⁿ yeⁿꞌe iⁿꞌyeeⁿdí ꞌcūū chi nguɛ́ɛ́ iꞌtéénu yā ꞌiivú Ndyuūs.

33 Maaⁿ ní ndísꞌtiī hermanos yeⁿꞌé, taachi nduuvidaamá nī ní cheꞌé nī Santa Cena yeⁿꞌe Jesucristo ꞌcuɛɛtinee ngiinú nī ti ndaā tanáⁿꞌā hermanos yeⁿꞌé nī. 34 Nduuti chi ꞌáámá ꞌiiⁿꞌyāⁿ cuiicú yā, canéé chí chéꞌé yā na vaacú yā. Tuuꞌmi ní nducyaaca nī nduuvidaama nī na yaācū ní cheꞌé nī Santa Cena yeⁿꞌe Señor Jesucristo. ꞌTíícā cuuvi cheꞌé nī pan ní ngiꞌí nī vino ní diíⁿ nī respetar Señor Jesucristo. Ní nꞌdiichí Ndyuūs chi nguɛ́ɛ́ vɛ́ɛ́ nuuⁿndi yeⁿꞌé nī. Tanꞌdúúcā tanáⁿꞌā chi vɛ́ɛ́ ꞌúú caaⁿꞌmáⁿ yeⁿꞌē taachi ndaá ní cuneé ndúúcu nī.