3 Dichꞌɛɛtɛ yú Ndyuūs ti nééné nꞌdai Ndyuūs Chiida yú chi Chiida Señor Jesucristo yeⁿꞌē yú. Ndyuūs Chiida yú yaꞌai ꞌiinú yā sꞌuuúⁿ ní tee yā ꞌviichꞌɛɛtínūuⁿ sꞌuuúⁿ. 4 Ndyuūs yeⁿꞌe yú itee yā ꞌviichꞌɛɛtínūuⁿ núsꞌuu yeⁿꞌe tanducuéⁿꞌē chi nꞌgeenú ꞌnū ngii ti núsꞌuu ní cuuvi caꞌá ꞌnū dáámá ꞌviichꞌɛɛtínūuⁿ ꞌiiⁿꞌyāⁿ chi nꞌgeenú yā ngii ndúúcū dáámá ꞌviichꞌɛ́ɛ́tiīnūuⁿ chi Ndyuūs tee yā núsꞌuu. 5 Núsꞌuu ní nꞌgeenú ꞌnū ngii nꞌdeee ca cáavā chi idiíⁿ ꞌnū ntiiⁿnyuⁿ yeⁿꞌe Señor Jesucristo. Ní Señor Jesucristo tee ca yā ꞌviichꞌɛɛtínūuⁿ núsꞌuu. 6 Maaⁿ ní, nduuti chi nꞌgeenú ꞌnū ngii, chuu ní cáávā ndísꞌtiī cuuvi cutaꞌá nī ꞌviichꞌɛɛtínūuⁿ yeⁿꞌé Ndyuūs ní cuuvi nnguaⁿꞌai nī. Ní nduuti chi Ndyuūs tee yā núsꞌuu ꞌviichꞌɛɛtínūuⁿ, chuū ní cáávā ndísꞌtiī cuuvi cutaꞌá nī ꞌviichꞌɛɛtínūuⁿ yeⁿꞌé Ndyuūs, ní cuuvi nnguaiⁿꞌai nī. ꞌTiicá ntúūⁿ ndísꞌtiī cuuvi cuchɛ́ɛ nī nducuéⁿꞌē chi nꞌgeenu nī ngii tanꞌdúúcā chi núsꞌuū nꞌgeenú ꞌnū ngii. 7 Ní canee ngiinú ꞌnū yeⁿꞌe ndísꞌtiī chi cunee nꞌdaaca nī. Ti deenú ꞌnū ti taachi ndísꞌtiī nꞌgeenu nī ngii tanꞌdúúcā núsꞌuu ꞌtiicá ntúūⁿ Ndyuūs tee yā, ꞌviichꞌɛɛtínūuⁿ ndísꞌtiī tanꞌdúúca chí tee yā núsꞌuu.

8 Ní ndísꞌtiī hermanos yeⁿꞌé ꞌnū. Neⁿꞌé ꞌnū chi cadiinuuⁿ nī yeⁿꞌe tanduvɛ́ɛ́ vaadī caaꞌva chi choꞌō nuúⁿ ꞌnū na yáⁿꞌāa yeⁿꞌe Asia. Chííⁿ chí chꞌeenu taaví ꞌnū chiī ní nééné nꞌdeee ca, ní nadicadiinúúⁿ ꞌnū chi nguɛ́ɛ́ fuerzas yeⁿꞌé ꞌnū chi cuchɛɛ́ ꞌnū yeⁿꞌe nducuéⁿꞌē ti cuuví ꞌcuūvi ꞌnū. 9 Nacadiinúúⁿ ꞌnū chí caꞌá yā orden chi ꞌcuūvi ꞌnū naati chuū ní chiī chí chꞌiⁿꞌi núsꞌuu chi cuꞌtéenu cá ꞌnū Ndyuūs chi nadacuéeⁿ yā ꞌiiⁿꞌyāⁿ yeⁿꞌē nguaaⁿ tináⁿꞌā. Ní nguɛɛ iꞌtéénu ꞌnū yeⁿꞌe maáⁿ ꞌnū. 10 ꞌTíícā Ndyuūs nadanguáⁿꞌai yā núsꞌuu yeⁿꞌe peligro chi ꞌāā chɛ́ɛ́ ꞌcuūví ꞌnū. ꞌTiicá ntúūⁿ cunee ngiinu ꞌnū Ndyuūs chi nadanguáⁿꞌai yā núsꞌuu yeⁿꞌe nducuéⁿꞌē chi nꞌgeenú ꞌnū ngii ní yeⁿꞌē chí chꞌɛɛtɛ nꞌdai. 11 Ní ndísꞌtiī ní nginnee ntúuⁿ nī núsꞌuu ti ngaⁿꞌanguāꞌá nī caavā núsꞌuu. Caati ndúútí chí ꞌyááⁿ ca hermanos ngaⁿꞌanguaꞌá yā yeⁿꞌé ꞌnū, tuuꞌmi ní caꞌá yā gracias Ndyuūs, ti Ndyuūs diíⁿ yā nꞌdai ca cáávā núsꞌuu.

12 Ní yeenú ꞌnū ti deenú ꞌnū na staava yeⁿꞌé ꞌnū chi chiiⁿ chi idiíⁿ ꞌnū ní cáávā ꞌiiⁿꞌyāⁿ yeⁿꞌe iⁿꞌyeeⁿdí ꞌcūū. Ní nꞌdaacā diíⁿ ꞌnū. Ní nꞌdaacā diíⁿ ꞌnū cáávā ndísꞌtiī. Ndyuūs chi nꞌdai taavi chínneé yā núsꞌuu chi ꞌtúúcā dinꞌdaacá ꞌnū. Chuū nguɛ́ɛ́ cuuvi diíⁿ ꞌnū cáávā vaadī deenu yeⁿꞌe maáⁿ ꞌnū. 13 Chííⁿ chí dinguúⁿ ꞌnū yeⁿꞌe ndísꞌtiī ní ndísꞌtiī ní cuuvi ꞌcueéⁿ nī ní intiinaáⁿ nī. Cunee ngíínú ꞌnū chi túúmícádiinúúⁿ nī nducuéⁿꞌē. 14 Tanꞌdúúcā chi ndísꞌtiī túúmícadiinúuⁿ nī ꞌtɛ́ɛ́ maaⁿ naati taachi ndaa Señor Jesucristo taama vmnéⁿꞌēe tuuꞌmí ndísꞌtiī cuuvi yeenú nī cáávā núsꞌuu tanꞌdúúcā chi cuuvi yeenú ꞌnū cáávā ndísꞌtiī.

15 Caati vɛ́ɛ́ confianza yeⁿꞌé ꞌnū ndúúcū ndísꞌtiī, vmnááⁿ vmnaaⁿ nadacádiinúúⁿ chí chīi ní ndaá ní caneé nduucú nī ꞌáámá tiempo ní cuayiivi ndaá taama vmnéⁿꞌēe ní cuneé nduucú nī chi cuuvi yeenu cá nī. 16 Nadacádiinúúⁿ chí choꞌó yaāꞌví ndísꞌtiī taachi caⁿꞌá na yáⁿꞌāa Macedonia. Ní cuayiivi mííⁿ taachi nꞌdaá yáⁿꞌāa Macedonia miiⁿ tuuꞌmi ní nandaa ntuúⁿ yaaꞌví ndísꞌtiī ní cuneé ndúúcu nī. Ní taachi canꞌdaá yeⁿꞌe nī, ndísꞌtiī cuuvi cunnee nī ꞌúú ndúúcū necesidades yeⁿꞌé caati caⁿꞌá yáⁿꞌāa Judea. 17 ꞌTíícā nadacádiinúúⁿ chi diíⁿ. ꞌÚú nguɛ́ɛ́ diíⁿ tanꞌdúúcā ꞌiiⁿꞌyāⁿ chi diíⁿ yā tanꞌdúúcā chi maáⁿ yā neⁿꞌe yā. Ní ngaⁿꞌa yā: Júūⁿ, júūⁿ chuū chi diíⁿ, ní cuayiivi ngaⁿꞌá yā chi nguɛ́ɛ́ diíⁿ yā ti diíⁿ yā tanꞌdúúcā chi neⁿꞌé yā. 18 Naatí Ndyuūs deenú yā nduudu chi ngaⁿꞌá ꞌnū chi nguɛ́ɛ́ ngaⁿꞌá ꞌnū ꞌtíícā idiíⁿ ꞌnū ní cuayiivi nguɛ́ɛ́ idiíⁿ ꞌnū ꞌtíícā. 19 Ti taachi ꞌúú ndúúcū saⁿꞌā Silvano ndúúcū Timoteo candɛɛ́ ꞌnū nduudu cuaacu yeⁿꞌe Señor Jesucristo chi Daiya Dendyuūs nguɛ́ɛ́ ngaⁿꞌá ꞌnū chi Jesucristo miiⁿ ngaⁿꞌá yā chi júūⁿ ꞌtíícā, ní cuayiivi nguɛ́ɛ́ ꞌtíícā diíⁿ yā. Cristo ní ngaⁿꞌá yā ní diíⁿ yā tanducuéⁿꞌē denduꞌū chí cuaacu. 20 Ti Cristo miiⁿ ngaⁿꞌá yā chi ꞌtíícā, yeⁿꞌe nducuéⁿꞌē chi Ndyuūs Chiida yú caⁿꞌá yā chi tée yā ꞌiiⁿꞌyāⁿ ndúúcū sꞌuuúⁿ chi iꞌtéénu yú Ndyuūs. Cáávā chuū idichꞌɛɛtɛ yú Ndyuūs ti cucáávā Cristo caⁿꞌa yú chi ꞌtiicā. 21 Ní Chiida yú diíⁿ yā chi ndísꞌtiī ndúúcū núsꞌuu cunee diitu ca yú ndúúcū chi iꞌteenu yú yeⁿꞌe Cristo. Ní Ndyuūs nadidɛɛvɛ́ yā sꞌuuúⁿ chi diiⁿ yú ntiiⁿnyuⁿ yeⁿꞌé yā. 22 Ndyuūs tee yā sꞌuuúⁿ ꞌáámá sello yeⁿꞌé yā na cuerpo yeⁿꞌe yú ti yeⁿꞌé yā sꞌuuúⁿ. Tee yā Espíritu Nꞌdai yeⁿꞌé yā na staava yeⁿꞌē yú. Ní cáávā Espíritu Nꞌdai yeⁿꞌé yā deenu yú chi cuuvi yeⁿꞌe yú chiiⁿ chi Ndyuūs caⁿꞌa yā chi téé yā sꞌuuúⁿ.

23 Nguɛ́ɛ́ cueⁿꞌé yáāⁿ Corinto ti neⁿꞌé yaaꞌvi neéⁿ ndísꞌtiī ní nguɛ́ɛ́ neⁿꞌé ꞌcaaꞌvá cucáávā chi ꞌcuɛɛtinéé yaꞌai nī. Maaⁿ ní Ndyuūs deenú yā staava yeⁿꞌé ní testigo yeⁿꞌé. 24 Nguɛ́ɛ́ neⁿꞌé ꞌnū caaⁿꞌmáⁿ ꞌnū ntiiⁿnyuⁿ yeⁿꞌé nī yeⁿꞌē chiiⁿ chi canee chi iꞌtéénu nī ti ꞌāā canee diitú nī ndúúcū chi iꞌtéénu nī. Naati neⁿꞌé ꞌnū cunneé ꞌnū ndísꞌtiī. Núsꞌuu diiⁿ ꞌnū ntiiⁿnyuⁿ ndúúcū ndísꞌtiī ní cuuvi yeenú nī. Ní ndísꞌtiī snéé nꞌdaaca nī caavā chi iꞌteenú nī Jesucristo.