CARTA YEⁿꞌE ꞌIIⁿꞌYĀⁿ YEⁿꞌE YÁⁿꞌĀA GALACIA
Pablo idinguúⁿ yā carta ꞌcūū yeⁿꞌe ꞌiiⁿꞌyāⁿ chi caⁿꞌá yā yaācū sꞌeeⁿ na yáⁿꞌāa Galacia
1
ꞌÚú Pablo ꞌúú ni ꞌúú ꞌáámá apóstol chi dichóꞌó Ndyuūs. Mar ꞌáámá saⁿꞌā nguɛ́ɛ́ dichóꞌo sa ꞌúú chi ꞌúú ngaⁿꞌá nduudu yeⁿꞌé Ndyuūs, ndíí nguɛ́ɛ́ ndúú ndɛɛvɛ sá ꞌúú, ti Ndyuūs Chiida yú ndúúcū Señor Jesucristo dichóꞌo yā ꞌúú. Ní Chiida yú nadacuéeⁿ yā Jesucristo yeⁿꞌē nguaaⁿ tináⁿꞌā. 2 Nducyaaca viꞌi yú sꞌtiī chi ꞌcuɛɛtinée yā yáāⁿ miiⁿ ndúúcū ꞌúú, idinguúⁿ carta ꞌcūū yeⁿꞌe ndísꞌtiī chi iꞌtéénu nī Jesucristo ní caⁿꞌá nī yaācū sꞌeeⁿ na yaⁿꞌāa Galacia. 3 Neⁿꞌé chi Chiida yú ndúúcū Señor Jesucristo yeⁿꞌē yú tée yā sꞌuuúⁿ dendúꞌū chi nꞌdai. Ní ndísꞌtiī canee nī ndúúcū vaadī ꞌdiīiⁿ chi Ndyuūs itée yā sꞌuuúⁿ. 4 Jesucristo miiⁿ caꞌa yā vida yeⁿꞌe maáⁿ yā cucáávā nuuⁿndi yeⁿꞌe yú. Maaⁿ ní nadanguáⁿꞌai yā sꞌuuúⁿ yeⁿꞌe denduꞌū chi nguɛ́ɛ́ nꞌdaacā chi vɛ́ɛ́ iⁿꞌyeeⁿdí ꞌcūū. ꞌTíícā neⁿꞌe Ndyuūs Chiida yú. 5 Cueⁿꞌe daāⁿmaⁿ canee Ndyuūs ndúúcū dɛɛvɛ yeⁿꞌé yā. Nducyáácá ꞌiiⁿꞌyāⁿ canee chi dichꞌɛɛtɛ cá yā Ndyuūs chi dɛɛvɛ cueⁿꞌe daāⁿmaⁿ. ꞌTíícā.Nguɛ́ɛ́ vɛ́ɛ́ táámá nduudu yeⁿꞌe chi Cristo nanguáⁿꞌai yā sꞌuuúⁿ
6 Neené ngeꞌe yiinú chi ndísꞌtiī neené niiⁿnuúⁿ nūuⁿ idivíi nī yeⁿꞌe Ndyuūs chi nꞌgaí yā ndísꞌtiī, ní yeⁿꞌe cosas chi nꞌdai ca chi Cristo tee yā ndísꞌtiī. Ní nꞌgiindiveéⁿ nī nduudu chi nguɛ́ɛ́ cuaacu yeⁿꞌē táámá ꞌiiⁿꞌyāⁿ chi ngaⁿꞌa nduudu miiⁿ tanꞌdúúcā chi táámá evangelio. 7 Cuaacu chí nguɛ́ɛ́ vɛ́ɛ́ táámá evangelio chí nduudu yeⁿꞌe Dendyuūs naati vɛ́ɛ́ nꞌdúúví yā chi idiꞌvaachí yā ndísꞌtiī. Ní neⁿꞌe yā n̄ꞌdaaⁿ yā evangelio chí nduudu ngai yeⁿꞌe Cristo. 8 ꞌAara chi sꞌuuúⁿ o ꞌáámá ángel chi ndaa yeⁿꞌe vaꞌai chɛ̄ɛ̄ti nguuvi ngaⁿꞌa yā táámá evangelio chi n̄ꞌdaaⁿ nguɛ́ɛ́ tanꞌdúúcā chi caⁿꞌa ꞌnū chii ꞌnū ndísꞌtiī, tuuꞌmi ꞌiiⁿꞌyāⁿ sꞌeeⁿ cuuví yā condenado. 9 ꞌĀā caⁿꞌá chuū maaⁿ ní neⁿꞌé caaⁿꞌmaⁿ ntuúⁿ táámá vmnéⁿꞌēe: Nduuti chi ꞌáámá ꞌiiⁿꞌyāⁿ caaⁿꞌmaⁿ yā táámá evangelio chi n̄ꞌdaaⁿ nguɛ́ɛ́ tanꞌdúúcā chi caⁿꞌa ꞌnū chii ꞌnū ndísꞌtiī, tuuꞌmi ní ꞌiiⁿꞌyāⁿ sꞌeeⁿ cuuvi yā condenado.
10 Taachi ngaⁿꞌá chuū, ¿dɛꞌɛ̄ inadacadíínuuⁿ nī nduucú? Nguɛ́ɛ́ neⁿꞌé chi cunee yiinú nī yeⁿꞌé caati neⁿꞌé chi Ndyuūs cunee yiinú yā yeⁿꞌé. O ¿ꞌáá canee chi ꞌúú idiíⁿ chi cunee yíínūu saⁿꞌā iⁿꞌyeeⁿdí ꞌcūū? Nduuti chi ꞌúú idiíⁿ chiiⁿ ti inee yíínūu saⁿꞌā iⁿꞌyeeⁿdí ꞌcūū, tuuꞌmi ní nguɛ́ɛ́ idiíⁿ ntiiⁿnyuⁿ yeⁿꞌé Cristo.
Taacā chí chiī Pablo apóstol
11 ꞌÚú ngaⁿꞌá cuaacu ní ngīi ndísꞌtiī hermanos yeⁿꞌé. Nduudu ngai chi evangelio yeⁿꞌē Jesucristo chi ꞌúú ngaⁿꞌá, nguɛ́ɛ́ yeⁿꞌē mar ꞌáámá saⁿꞌā yeⁿꞌe iⁿꞌyeeⁿdí ꞌcūū. 12 Ti ꞌúú nguɛ́ɛ́ staꞌá nduudu miiⁿ yeⁿꞌe saⁿꞌā, ndíí nguɛ́ɛ́ ndúú chꞌeēéⁿ yeⁿꞌē mar ꞌáámá saⁿꞌā caati Jesucristo chꞌiⁿꞌi yā ꞌúú nduudu cuaacu yeⁿꞌé yā.
13 Ndísꞌtiī chꞌiindiveéⁿ nī tanꞌdúúcā chi ꞌúú iꞌteenú tiempo chi chóꞌōo ní caneé chɛɛchí na religión yeⁿꞌe ꞌiiⁿꞌyāⁿ judíos chi Israel. Ní deenú nī taacā chi diíⁿ. Ní diíⁿ chi dícaānú ꞌiiⁿꞌyāⁿ chi iꞌtéénu yā Jesucristo ti caⁿꞌá yā na yaācū yeⁿꞌé Ndyuūs. Ní diíⁿ chuū ti neⁿꞌé canꞌdaá ꞌiiⁿꞌyāⁿ sꞌeeⁿ yeⁿꞌe nducyáácá yaācū yeⁿꞌé Ndyuūs ti neⁿꞌé diꞌcuiīnú ꞌiiⁿꞌyāⁿ sꞌeeⁿ. 14 Ní chiꞌteenú más ca yeⁿꞌe religión yeⁿꞌe ꞌiiⁿꞌyāⁿ chi ndaata yeⁿꞌe Israel sꞌeeⁿ nguaaⁿ nducyaaca yā chi dáamá ndaata yeⁿꞌé ndúúcu yā ti neⁿꞌé diíⁿ nducuéⁿꞌē tanꞌdúúcā chi diiⁿ ꞌiiⁿꞌyāⁿ ndiicúū chi ꞌāā nꞌdíí. 15 Naatí Ndyuūs ndɛɛvɛ yā ꞌúú taachi ꞌāā cuɛ́ɛ́ ꞌcuundiyaáⁿ. Ní taachi ndaa tiempo chi Ndyuūs neⁿꞌe yā, Ndyuūs yaaꞌví yā ꞌúú cáávā chi neⁿꞌé yā ꞌúú chi ꞌúú nꞌgiindiveéⁿ nduudu yeⁿꞌé yā ní cuꞌteenú Ndyuūs. 16 Ní Ndyuūs yaaꞌví yā ꞌúú yeⁿꞌē Daiyá yā Jesucristo chi ꞌúú iꞌteenú ꞌyā, ti ꞌúú ní caaⁿꞌmáⁿ nduudu yeⁿꞌe Cristo nguaaⁿ ꞌiiⁿꞌyāⁿ gentiles, ꞌiiⁿꞌyāⁿ chi nguɛɛ yeⁿꞌe ndaata Israel. Ndíí tuuꞌmi nguɛ́ɛ́ tiinguuneéⁿ mar ꞌaama saⁿꞌā yeⁿꞌe nduudu yeⁿꞌē Cristo. 17 Ndíí nguɛ́ɛ́ ndúú ndaá na yáāⁿ Jerusalén chi intiinguuneéⁿ apóstoles chi dichóꞌó Ndyuūs vmnaaⁿ chi dichóꞌo yā ꞌúú, naati ꞌúú cheⁿꞌé na yáⁿꞌāa Arabia. Ní cuayiivi miiⁿ ní nguɛɛcuneé na yáāⁿ Damasco.
18 Cuayiivi chi choꞌó ꞌiīnū nduūyū ndii tiempo chi ꞌāā iꞌteenú Jesucristo tuuꞌmí ní cueⁿꞌé yáāⁿ Jerusalén tuuꞌmí nꞌdiichí Pedro tí ꞌāā cuɛ́ɛ́ nꞌdiichí saⁿꞌā. Ní caneé ndúúcū sa ndíítiiⁿꞌyuⁿ nguuvi. 19 Yáāⁿ miiⁿ nguɛ́ɛ́ nꞌdiichí táámá apóstol chi dichóꞌó Ndyuūs. Dámaāⁿ nꞌdiichí Jacobo saⁿꞌā ꞌdiinū Jesús miiⁿ. 20 Chuū idinguúⁿ yeⁿꞌe ndísꞌtiī. ꞌCuinꞌdííchí ndísꞌtiī. ꞌÚú nguɛ́ɛ́ ngaⁿꞌá nduudu yaadi ti Ndyuūs nꞌdiichí yā ꞌúú ní deenú yā chi cuaacu ngaⁿꞌá.
21 Cuayiivi ní ndaá na yáⁿꞌāa yeⁿꞌe Siria ndúúcū yáⁿꞌāa Cilicia. 22 ꞌIiⁿꞌyāⁿ yeⁿꞌe yáⁿꞌāa Judea chi cueⁿꞌé yā na yaācū naachi ngeⁿꞌé yā yeⁿꞌe Cristo nguɛ́ɛ́ iitiinaáⁿ yā ꞌúú ti nguɛ́ɛ́ inꞌdiichí yā ꞌúú. 23 ꞌIiⁿꞌyāⁿ sꞌeeⁿ dámaāⁿ nꞌgiindiveéⁿ yā yeⁿꞌē ꞌúú cuááⁿ vmnaaⁿ ꞌtíícā, ꞌiiⁿꞌyāⁿ chi canꞌdáa yā sꞌuuúⁿ ti neⁿꞌé yā diꞌcuiīnú yā sꞌuuúⁿ maaⁿ ní ngaⁿꞌa yā nduudu cuaacu yeⁿꞌe Jesucristo. Cuááⁿ vmnaaⁿ nguɛ́ɛ́ neⁿꞌé yā chi ꞌiiⁿꞌyāⁿ iꞌtéénu yā nduudu cuaacu yeⁿꞌe Jesucristo. 24 Ní yeⁿꞌē chúū ꞌiiⁿꞌyāⁿ sꞌeeⁿ dichꞌɛɛtɛ́ yā Ndyuūs caavā chi maaⁿ ní ꞌúú iꞌteenú Jesucristo.