Tanáⁿꞌā apóstoles diíⁿ yā aceptar Pablo chi ꞌáámá apóstol ndúúcu yā
2
Choꞌōo ndiichi cúūuⁿ nduuyúū chi ꞌúú cheⁿꞌe ntuúⁿ yáāⁿ Jerusalén. Cheⁿꞌé ndúúcū saⁿꞌā Bernabé chi compañero yeⁿꞌé ndúúcū saⁿꞌā Tito. 2 Ní ndaá ti Ndyuūs chꞌiⁿꞌi yā ꞌúú chi canéé chi caⁿꞌá. Vmnááⁿ vmnaaⁿ caⁿꞌá nanááⁿ apóstoles chi nꞌgɛɛtɛ yeⁿꞌe yaācū miiⁿ. Ní chií ꞌiiⁿꞌyāⁿ sꞌeeⁿ taacā chi ngaⁿꞌá nduudu ngai yeⁿꞌe Cristo nanááⁿ ꞌiiⁿꞌyāⁿ gentiles chi nguɛ́ɛ́ yeⁿꞌe ndaata Israel. Chuū diíⁿ chí ꞌiiⁿꞌyāⁿ sꞌeeⁿ cuꞌtéénu yā chi dichííꞌvɛ̄ ntiiⁿnyuⁿ yeⁿꞌē Ndyuūs chi diíⁿ nguaaⁿ ꞌiiⁿꞌyāⁿ gentiles. Ni apóstoles nꞌgɛɛtɛ nguɛ́ɛ́ caⁿꞌa yā chi nguɛ́ɛ́ ꞌcuúⁿ yā ꞌúú. 3 Ní apóstoles nꞌgɛɛtɛ ní canee yiinú yā ndúúcū nduudu chi ngaⁿꞌá. Ni saⁿꞌā Tito chi saⁿꞌā griego chi canéé sa nduucú, nguɛ́ɛ́ canee chi cuuví circuncidar Tito tanꞌdúúcā chi ngaⁿꞌa ley yeⁿꞌe ꞌiiⁿꞌyāⁿ Israel sꞌeeⁿ ti nguɛ́ɛ́ yeⁿꞌē ndaata Israel. 4 Chuū diíⁿ ti naachi nduuvidaama yú chí ndaā nꞌdéꞌéí ꞌiiⁿꞌyāⁿ chi diíⁿ yā tanꞌdúúcā chi hermanos yeⁿꞌē yú ꞌyā, naati nguɛ́ɛ́ ꞌtíícā. Ní ndaa yā chí nꞌdiichí yā sꞌuuúⁿ caati ꞌāā cuɛ́ɛ́ diiⁿ yú tanꞌdúúcā chi ngaⁿꞌā ley yeⁿꞌe circuncisión ti sꞌuūúⁿ ní yeⁿꞌe Cristo sꞌuuúⁿ ní diiⁿ yú chi ngaⁿꞌa Cristo. Neⁿꞌé yā chi diiⁿ yú tanꞌdúúcā chi ngaⁿꞌa ley yeⁿꞌe Moisés miiⁿ. 5 Núsꞌuu ní nguɛ́ɛ́ diíⁿ ꞌnū tanꞌdúúcā chi ꞌiiⁿꞌyāⁿ sꞌeeⁿ neⁿꞌé yā yeⁿꞌe ley yeⁿꞌe circuncisión caati neⁿꞌé ꞌnū chi nduudu cuaacu chi ꞌāā ngaⁿꞌá ꞌnū yeⁿꞌe evangelio yeⁿꞌe Señor Jesucristo, ní ꞌáámá cūnēe ndúúcū ndísꞌtiī. ꞌTíícā diíⁿ ꞌnū.6 Apóstoles nꞌgɛɛtɛ yeⁿꞌe yaācū miiⁿ nguɛ́ɛ́ dɛꞌɛ̄ vɛɛ más cā caꞌcueéⁿ yā ꞌúú yeⁿꞌē chi ꞌúú caaⁿꞌmáⁿ. ꞌÁárá chí nꞌgɛɛtɛ nꞌdai yā nguɛ́ɛ́ dɛꞌɛ̄ vɛɛ tuneeⁿ ꞌúú ti Ndyuūs neⁿꞌe yā nducyaaca ꞌiiⁿꞌyāⁿ ꞌāā daamá nūuⁿ. 7 Apóstoles nꞌgɛɛtɛ yeⁿꞌé yaācū ꞌāā deenú yā chi Ndyuūs dichoꞌó yā ꞌúú. ꞌÚú, Pablo, ngaⁿꞌá nduudu ngai yeⁿꞌe Cristo nanááⁿ ꞌiiⁿꞌyāⁿ chi nguɛ́ɛ́ yeⁿꞌe ndaata Israel. ꞌTiicá ntúūⁿ deenú yā chi Ndyuūs dichoꞌó yā Pedro chi ngaⁿꞌá yā nduudu ngai yeⁿꞌe Cristo nguaaⁿ ꞌiiⁿꞌyāⁿ yeⁿꞌe ndaata Israel. 8 Ti Ndyuūs yeⁿꞌē yú ní nginnee yā Pedro miiⁿ chi ngaⁿꞌa nduudu cuaacu yeⁿꞌé yā nguaaⁿ ꞌiiⁿꞌyāⁿ Israel sꞌeeⁿ chi diíⁿ yā tanꞌdúúcā chi ngaⁿꞌā ley yeⁿꞌē circuncisión. Maaⁿ Señor miiⁿ nginnee yā ꞌúú chi caaⁿꞌmáⁿ nduudu yeⁿꞌé yā nguaaⁿ ꞌiiⁿꞌyāⁿ chi nguɛ́ɛ́ yeⁿꞌē ndaata Israel. Ní nguɛ́ɛ́ vɛ́ɛ́ ley yeⁿꞌe circuncisión yeⁿꞌé yā.
9 Apóstoles nꞌgɛɛtɛ yeⁿꞌe yaācū chi Jacobo ndúúcū Pedro ndúúcū Juan ní deenu ntúuⁿ yā chi Ndyuūs dinꞌdaacá yā nduucú chi ꞌúú idiíⁿ ntiiⁿnyuⁿ yeⁿꞌe apóstol nguaaⁿ ꞌiiⁿꞌyāⁿ chi nguɛ́ɛ́ yeⁿꞌē ndaata Israel. Tuuꞌmi ní staꞌá yā táꞌā cuaacú ꞌnū ní nduuvidaamá nduudu yú nanááⁿ Ndyuūs ti ꞌúú ndúúcū Bernabé ní caaⁿꞌmáⁿ ꞌnū nduudu cuaacu yeⁿꞌé Jesucristo nanááⁿ ꞌiiⁿꞌyāⁿ gentiles ní ꞌiiⁿꞌyāⁿ sꞌeeⁿ nanááⁿ ꞌiiⁿꞌyāⁿ yeⁿꞌe ndaata Israel. 10 Ní ngaⁿꞌá yā ngii yā núsꞌuu chi nꞌgáácú ꞌnū yeⁿꞌé hermanos chi vɛ́ɛ́ necesidades yeⁿꞌé yā. ꞌÚú ntúūⁿ ní ngaⁿꞌá, ꞌtíícā.
Pablo caⁿꞌa chɛɛchi yā ndúúcū Pedro
11 Ndaá ꞌnū na yáāⁿ Antioquía ní taachí ndaa Pedro miiⁿ na yáāⁿ Antioquía ꞌúú ní caⁿꞌa chɛɛ̄chí ndúúcu sa yáávēnaaⁿ sa nanááⁿ ꞌiiⁿꞌyāⁿ sꞌeeⁿ ti Pedro miiⁿ nguɛ́ɛ́ idiiⁿ sa tanꞌdúúcā chi deenu sa chi canee chi diiⁿ sa. 12 Ti taachi ꞌāā cuɛ́ɛ́ ndaa saⁿꞌā sꞌeeⁿ chi dichóꞌó Jacobo yeⁿꞌē yáāⁿ Jerusalén, Pedro miiⁿ ní cheꞌé sa ndúúcū ꞌiiⁿꞌyāⁿ gentiles chi hermanos yeⁿꞌe yú. Ní taachi ndaa saⁿꞌā sꞌeeⁿ tuuꞌmi ꞌāā ntɛ́ɛ́ cheꞌe sa ndúúcū ꞌiiⁿꞌyāⁿ gentiles chi hermanos yeⁿꞌe yú ti ꞌvaꞌa sá yeⁿꞌē ꞌiiⁿꞌyāⁿ yeⁿꞌē sa chi yeⁿꞌē ndaata Israel chi diíⁿ yā tanꞌdúúcā chi ngaⁿꞌa ley yeⁿꞌe circuncisión. 13 Ni tanáⁿꞌā hermanos chi yeⁿꞌē ndaata Israel diíⁿ yā tanꞌdúúcā chi ídiiⁿ Pedro miiⁿ. ꞌTiicá ntúūⁿ Bernabé diíⁿ yā chi maaⁿ ní ꞌāā ntɛ́ɛ́ cheꞌé yā ndúúcū ꞌiiⁿꞌyāⁿ gentiles. ꞌTiicā nducyaacá yā diíⁿ yā ꞌáárá chi deenú yā chi nꞌdaacā chi cheꞌé yā ndúúcū ꞌiiⁿꞌyāⁿ gentiles. 14 Taachi nꞌdiichí chi ꞌiiⁿꞌyāⁿ sꞌeeⁿ nguɛ́ɛ́ dinꞌdaacá yā ti nguɛ́ɛ́ cheꞌé yā ndúúcū ꞌiiⁿꞌyāⁿ gentiles chi hermanos yeⁿꞌe yú tanꞌdúúcā chi ngaⁿꞌa nduudu cuaacu yeⁿꞌe Cristo, tuuꞌmi ní ꞌúú Pablo caⁿꞌá chīi Pedro miiⁿ nanááⁿ nducyaaca yā ꞌtúúcā: Díí chi saⁿꞌā Israel, díí chí maaⁿ ní nguɛ́ɛ́ diiⁿ di tanꞌdúúcā chi ngaⁿꞌa ley yeⁿꞌe Israel ti maaⁿ ní iꞌtéénu di Cristo, táácā cúúví chí nguɛ́ɛ́ cheꞌe di ndúúcū hermanos yeⁿꞌe yú chi ꞌiiⁿꞌyāⁿ gentiles ní diiⁿ di chi ꞌiiⁿꞌyāⁿ sꞌeeⁿ nadacadíínuuⁿ yā chi cánéé chí diíⁿ yā tanꞌdúúcā chi ngaⁿꞌa ley yeⁿꞌe ꞌiiⁿꞌyāⁿ Israel chi judíos.
ꞌIiⁿꞌyāⁿ Israel sꞌeeⁿ dáámá yā ndúúcū tanáⁿꞌā ꞌiiⁿꞌyāⁿ yeⁿꞌe iⁿꞌyeeⁿdí ꞌcūū nánguaⁿꞌai yā caavā chi iꞌtéénu yā Jesucristo
15 Ní sꞌuuúⁿ ní ꞌiiⁿꞌyāⁿ Israel sꞌuuúⁿ ti ꞌtíícā chꞌɛɛtiyáaⁿ yú ní nguɛ́ɛ́ diiⁿ nuuⁿndí yú daama tanꞌdúúcā chi diiⁿ tanáⁿꞌā ꞌiiⁿꞌyāⁿ gentiles chi nguɛɛ yeⁿꞌe ndaata yeⁿꞌe yú. 16 Ní sꞌuuúⁿ chi ꞌiiⁿꞌyāⁿ Israel deenu yú chi Ndyuūs nguɛ́ɛ́ nadachꞌɛɛcú yā nuuⁿndi yeⁿꞌe yú ti idiiⁿ yú dámaaⁿ chi ngaⁿꞌa ley yeⁿꞌe yú. ꞌTiicá ntúūⁿ Ndyuūs nguɛ́ɛ́ nadachꞌɛɛcú yā nuuⁿndi yeⁿꞌe nducyaaca ꞌiiⁿꞌyāⁿ yeⁿꞌe iⁿꞌyeeⁿdí ꞌcūū ti diíⁿ yā dámaāⁿ tanꞌdúúcā chi ngaⁿꞌa ley yeⁿꞌe Moisés. Ndyuūs nadachꞌɛɛcú yā nuuⁿndi yeⁿꞌe ꞌiiⁿꞌyāⁿ chi iꞌtéénu yā Jesucristo. Cáávā chuū sꞌuuúⁿ ní iꞌteenu yú Jesucristo ní Ndyuūs nadachꞌɛɛcú yā nuuⁿndi yeⁿꞌe yú. Ti cucáávā ley yeⁿꞌe yú mar ꞌáámá ꞌiiⁿꞌyāⁿ chi diíⁿ yā chi ngaⁿꞌa ley miiⁿ cuuví yā perdonado, ti nguɛ́ɛ́ nadachꞌɛɛcú ley miiⁿ nuuⁿndi yeⁿꞌé yā.
17 Sꞌuūuⁿ ní iꞌtéénu yú Jesucristo chi Jesucristo miiⁿ nadachꞌɛɛcú yā nuuⁿndi yeⁿꞌe yú. ꞌTíícā sꞌuūuⁿ ní chꞌiⁿꞌi yú chi dinuuⁿndi yú tanꞌdúúcā tanáⁿꞌā ꞌiiⁿꞌyāⁿ yeⁿꞌe iⁿꞌyeeⁿdí ꞌcūū. Maaⁿ ní, ¿ꞌáá cuaacu chi Cristo nginneé yā sꞌuūuⁿ ti idinuuⁿndi yú? Nguɛ́ɛ́ ꞌtíícā. 18 Nduuti chi sꞌuuúⁿ nadiꞌtuuvi yú ꞌáámá cosa chi ley yeⁿꞌe yú ní ꞌcuiinuu ní nadinꞌdái ntuūⁿ yú ley miiⁿ chi nꞌgiindiveeⁿ yú yeⁿꞌē, tuuꞌmi ní dinuuⁿndi yú. 19 Vmnááⁿ vmnaaⁿ idiiⁿ yú tanꞌdúúcā chi ngaⁿꞌa ley yeⁿꞌē yú naati nguɛ́ɛ́ ngii idiiⁿ yú nducuéⁿꞌē yeⁿꞌē. Ní ley miiⁿ diiⁿ condenar sꞌuuúⁿ. Ní canee yú tanꞌdúúcā ꞌiiⁿꞌyāⁿ chi ꞌāā viꞌí cā yeⁿꞌē ley yeⁿꞌe yú. Cáávā chuū ní maaⁿ ní chꞌɛɛtinée yú tanꞌdúúcā chi neⁿꞌe Ndyuūs. Ní Ndyuūs nadachꞌɛɛcú yā yeⁿꞌē yú yeⁿꞌe nuūⁿndī yeⁿꞌe yú. Ní cáávā chuū cunduuchi yú cueⁿꞌe daāⁿmaⁿ. 20 Taachi caꞌneeⁿngaꞌá yā Cristo, tuuꞌmi ní cánéé tanꞌdúúcā chi ꞌúú ntúūⁿ caꞌneeⁿngaꞌá nduucú yā. Maaⁿ ní nguɛ́ɛ́ idiíⁿ tanꞌdúúcā chi ꞌúú neⁿꞌé ti idiíⁿ chiiⁿ chi neⁿꞌé Jesucristo ti Jesucristo chi daiya Dendyuūs canée yā na staava yeⁿꞌé. Ní maaⁿ ní ꞌúú canduuchí ti iꞌteenú Daiyá Ndyuūs miiⁿ. Cristo miiⁿ dinéⁿꞌe yā ꞌúú ní caꞌa maáⁿ yā vida yeⁿꞌe maáⁿ yā ní chꞌīi yā caavā ꞌúú. 21 ꞌUú nguɛ́ɛ́ cutaꞌá vaadī nꞌdai yeⁿꞌe Ndyuūs tanꞌdúúcā ꞌáámá cosa chiduuchi. Nduuti chi ley miiⁿ cuuví nachꞌɛɛcú nuuⁿndi yeⁿꞌe yú tuuꞌmi ní nguɛ́ɛ́ chꞌiī Cristo cucáávā sꞌuuúⁿ.