3 Nducyaaca yú canee chi dichꞌɛɛtɛ́ yú Ndyuūs chi Chiidá Señor Jesucristo. Maaⁿ ní caavā chi sꞌuuúⁿ ní yeⁿꞌe Cristo sꞌuuúⁿ, Ndyuūs tée yā sꞌuuúⁿ dendúꞌū yeⁿꞌé yā chi nꞌdai taavi ca yeⁿꞌe nducuéⁿꞌē chi nꞌdai tanꞌdúúcā chi sꞌuuúⁿ snee yú na vaꞌai chɛɛti nguuvi. 4 Ní ꞌtíícā Ndyuūs nadidɛɛvɛ́ yā sꞌuuúⁿ chi cuuvi yeⁿꞌé yā sꞌuuúⁿ ní cuuvi yeⁿꞌe Cristo sꞌuuúⁿ ndíí taachi ꞌāā ꞌcuɛ́ɛ́ dinꞌdái yā iⁿꞌyeēⁿdī. Ní nduuví nꞌdai yú ní iꞌteenu nꞌdaāca yú Cristo ní nguɛ́ɛ́ vɛ́ɛ́ nuuⁿndi yeⁿꞌe yú nanáaⁿ yā. 5 Ní Ndyuūs ꞌāā deenú yā chiiⁿ chi neⁿꞌé yā diíⁿ yā cáávā chi neⁿꞌé yā sꞌuuúⁿ. Cáávā chi neⁿꞌé yā chi cuuvi yeⁿꞌé yā sꞌuuúⁿ, staꞌá yā sꞌuuúⁿ chi cuuvi daiyá yā sꞌuuúⁿ cucáávā Cristo Jesús. 6 Cucáávā chuū cueⁿꞌe daāⁿmaⁿ dichꞌɛɛtɛ́ taavi yú Ndyuūs chi itée yā sꞌuuúⁿ denduꞌū chi chꞌɛɛtɛ nꞌdai yeⁿꞌé yā caati maaⁿ ní sꞌuuúⁿ ní yeⁿꞌe Cristo sꞌuuúⁿ. Ndyuūs diíⁿ yā recibir sꞌuuúⁿ caati neⁿꞌe taavi cá yā Cristo. 7 Ní cáávā Ndyuūs neⁿꞌe taavi cá yā nducyaaca yú dichóꞌo yā Daiya yā chi chꞌīi yā cáávā sꞌuuúⁿ. Ní Ndyuūs nadichꞌɛɛcú yā nuuⁿndi yeⁿꞌe yú cáávā yuūuⁿ yeⁿꞌé Cristo. Ní cáávā chi Ndyuūs ꞌtíícā neⁿꞌé yā sꞌuuúⁿ itée yā denduꞌu chi nꞌdaacā yeⁿꞌé yā. 8 Níícú Ndyuūs chꞌiⁿꞌí yā sꞌuuúⁿ chi neⁿꞌe taavi cá yā sꞌuuúⁿ. Ní diíⁿ yā chi deenu yú taanduvɛ́ɛ́ vaadī nꞌdai yeⁿꞌé yā ní tuumicadíínuuⁿ yú nducuéⁿꞌē. 9 Ní Ndyuūs ꞌāā diíⁿ yā chiiⁿ chi neⁿꞌé yā diíⁿ yā. Ní diíⁿ yā chí nꞌdiīchi yú chiiⁿ chi canúúⁿ nꞌdeꞌei yeⁿꞌé yā ndii cuááⁿ vmnaaⁿ cucááva Cristo. 10 Ní chuū chi canuuⁿ nꞌdeꞌei yeⁿꞌé Ndyuūs chi Ndyuūs caⁿꞌa yā chi diiⁿ yā chi cuuvi taachi ndaa tiempo yeⁿꞌē, Ndyuūs caⁿꞌa yā chi diíⁿ yā chi Cristo ngaⁿꞌa ntiiⁿnyúⁿ yā yeⁿꞌe nducuéⁿꞌē chi snéé nanguuvi ndúúcū chi snéé ná yáⁿꞌāa. Ní Ndyuūs caⁿꞌá yā chi nduuvidaamá tanducuéⁿꞌē denduꞌū nanááⁿ Cristo.

11 Ndyuūs diíⁿ yā chi nducuéⁿꞌē chi chóꞌōo ní chóꞌōo tanꞌdúúcā chi neⁿꞌe yā. Ní Ndyuūs nndɛɛvɛ́ yā sꞌuuúⁿ ndii cuááⁿ vmnaaⁿ níícú chi cuuvi yeⁿꞌe yú cosas chi caⁿꞌa yā chi tée yā sꞌuuúⁿ, caati sꞌuuúⁿ ní yeⁿꞌe Cristo sꞌuuúⁿ. 12 Ní Ndyuūs ꞌtíícā diíⁿ yā ti neⁿꞌé yā chi núsꞌuu ní chꞌiⁿꞌí ꞌnū vaadī dɛɛvɛ ca yeⁿꞌé Ndyuūs nanááⁿ ꞌiiⁿꞌyāⁿ ti núsꞌuu ní yeⁿꞌe ꞌiiⁿꞌyāⁿ Israel núsꞌuu chi vmnááⁿ vmnaaⁿ iꞌtéénu ꞌnū Cristo. 13 Chuū dendúꞌū ní yeⁿꞌe ndísꞌtiī chi nguɛ́ɛ́ yeⁿꞌe ꞌiiⁿꞌyāⁿ Israel sꞌeeⁿ ti taachi chꞌiindiveéⁿ nī nduudu cuaacu yeⁿꞌe evangelio chi ndúúdú ngai yeⁿꞌe Cristo chi nadanguaⁿꞌaī ndísꞌtiī ní sꞌtéénu nī yeⁿꞌē. Tuuꞌmi ní canéé ꞌáámá sello yeⁿꞌé Ndyuūs ndúúcu nī. Ní sello miiⁿ ní Espíritu Nꞌdai yeⁿꞌe Ndyuūs chí ꞌáámá compromiso chi Ndyuūs caⁿꞌa yā chi tée yā sꞌuūuⁿ ndíí cuááⁿ vmnaaⁿ. 14 Ní Espíritu Nꞌdai yeⁿꞌé Ndyuūs ní ꞌáámá seña chi cutaꞌa yú chi cuuvi yeⁿꞌe yú chiiⁿ chi Ndyuūs caⁿꞌa yā chi tée yā chi cuuvi yeⁿꞌe yú. Ní Ndyuūs yaaꞌvi yā sꞌuuúⁿ chi cuuvi yeⁿꞌé yā sꞌuuúⁿ. Taachi ndaa nguuvi chi neⁿꞌe Ndyuūs, Ndyuūs caⁿꞌá yā diíⁿ yā chi sꞌuuúⁿ tanꞌdúúcā maáⁿ yā ꞌtíícā sꞌuuúⁿ. Ní Espíritu Nꞌdai yeⁿꞌé Ndyuūs ní ꞌáámá seña yeⁿꞌé chuū. Ní ꞌíícú nducyaaca yú ndúúcū ꞌiiⁿꞌyāⁿ chi cuuvi cuꞌtéénu yā Cristo cuuvi nadichꞌɛɛtɛ yú Ndyuūs cucáávā chi chꞌɛɛtɛ́ nꞌdaí yā.

15 Cucaavā chuū, taachi ꞌúú Pablo chꞌiindiveéⁿ chi ndísꞌtiī iꞌtéénu nī Señor Jesucristo ní dinéⁿꞌe nī nducyaaca ꞌiiⁿꞌyāⁿ chi iꞌtéénu yā Señor Jesucristo ꞌiivú Ndyuūs, 16 tuuꞌmi ní nguɛ́ɛ́ ngíí ꞌdaanꞌdí chi caꞌá gracias Ndyuūs cucáávā ndísꞌtiī. Ni taachi inꞌgaacú yeⁿꞌe ndísꞌtiī, tuuꞌmi ní ngaⁿꞌanguaꞌá cucáávā ndísꞌtiī. 17 Ní ngiicá Ndyuūs yeⁿꞌe Señor Jesucristo yeⁿꞌē yú chi Ndyuūs miiⁿ chi Chiida yú chi dɛɛvɛ taavi ca, ní ngiicá Ndyuūs chi tée yā ndísꞌtiī vaadī deenu yeⁿꞌe Espíritu Nꞌdai yeⁿꞌé Ndyuūs, ní ꞌíícú cuuvi déénu cá nī ní ꞌiintiinaáⁿ nī chííⁿ chí neⁿꞌe Ndyuūs. 18 Ní ngiicá Ndyuūs chi diíⁿ yā chi cuuvi déénu nī ní cadíínuuⁿ nī chɛɛ chi cūnee ngiinu yú chi Ndyuūs tée yā sꞌuuúⁿ, ti ndɛɛvɛ yā sꞌuuúⁿ. Ní deenú nī dɛꞌɛ̄ chúúcā nꞌdai ca ní dɛɛvɛ ca chi cuuvi yeⁿꞌé nī chi Ndyuūs caꞌá yā ꞌiiⁿꞌyāⁿ chi yeⁿꞌe yā. 19 Ni ngiicá Ndyuūs chi cuuvi deenú nī chi poder chi chꞌɛɛtɛ taavi ca chi yeⁿꞌe Ndyuūs. Ní nguɛ́ɛ́ mar ꞌáámá denduꞌū chi Ndyuūs nguɛɛ cuuvi diíⁿ yā. Ní Ndyuūs diíⁿ yā ntiiⁿnyuⁿ caavā sꞌuūuⁿ chi iꞌteenu yú ꞌiiⁿꞌyāⁿ. Maaⁿ ní diíⁿ yā ntiiⁿnyuⁿ ndúúcū poder yeⁿꞌé yā cáávā sꞌuuúⁿ, ní chꞌiⁿꞌí yā poder yeⁿꞌé yā chí chꞌɛɛtɛ ní ndúúcū fuerzas yeⁿꞌé yā. 20 ꞌTíícā Ndyuūs chꞌiⁿꞌi yā maaⁿ poder yeⁿꞌé yā taachi nadicuéeⁿ yā Cristo yeⁿꞌe nguaaⁿ tináⁿꞌā. Ní sꞌnéeⁿ yā Cristo na vaꞌai chɛɛti nguuvi ní Cristo chꞌiindí yā lado tá cuaacu yeⁿꞌé Ndyuūs chiidá yā chi lado yeⁿꞌē honor. 21 Ní caꞌá yā Cristo nducuéⁿꞌē poder tanꞌdúúcā ꞌáámá ꞌiiⁿntyéⁿꞌē chi caaⁿꞌmaⁿ ntiiⁿnyúⁿ yā yeⁿꞌe tanáⁿꞌā ꞌiiⁿntyéⁿꞌē ndúúcū yeⁿꞌē nducyáácá ꞌiiⁿꞌyāⁿ chí ngaⁿꞌa ntiiⁿnyúⁿ yā ndúúcū yeⁿꞌē nducuéⁿꞌē poder chi vɛ́ɛ́ yeⁿꞌe nducyaaca patrón chi ngaⁿꞌa ntiiⁿnyúⁿ yā. Ní Cristo ní más ca chꞌɛɛtɛ ca yeⁿꞌe nducuéⁿꞌē chi vɛ́ɛ́ chi cuuvi caaⁿꞌmaⁿ yú yeⁿꞌē, nguɛ́ɛ́ dámaāⁿ yeⁿꞌē chi vɛ́ɛ́ mááⁿ, ꞌtiicá ntúūⁿ yeⁿꞌe nducuéⁿꞌē chi cuchiī. 22 Ní Ndyuūs sꞌnéeⁿ yā tanducuéⁿꞌē denduꞌū maaⁿ poder yeⁿꞌe Cristo. Ní Ndyuūs sꞌnéeⁿ yā Cristo lugar más cā chꞌɛɛtɛ. Ní Cristo miiⁿ tanꞌduucā chi tiíⁿ yā yeⁿꞌe nducyaaca ꞌiiⁿꞌyāⁿ chi iꞌtéénu yā ní cáⁿꞌa yā yaacū yeⁿꞌe Cristo, ꞌtíícā Cristo miiⁿ. 23 ꞌIiⁿꞌyāⁿ chi iꞌtéénu yā Cristo ní nducyaaca ꞌiiⁿꞌyāⁿ sꞌeeⁿ ní tanꞌduucā cuerpo yeⁿꞌé Cristo, ꞌtííca yā. Ní cuaacu nducyaaca ꞌiiⁿꞌyāⁿ sꞌeeⁿ ní yeⁿꞌe Cristo. Ní Cristo miiⁿ ní nꞌdaacā taaví yā ní canée yā yeⁿꞌe tanducuéⁿꞌē denduꞌū ndúúcū tanducuéⁿꞌē cuaaⁿ.