Ndyuūs nadanguáⁿꞌai yā sꞌuuúⁿ ti neⁿꞌé yā nducyaaca ꞌiiⁿꞌyāⁿ
2
Nguuvi chi chóꞌōo ndísꞌtiī dinuuⁿndí nī ní sneé nī tanꞌdúúcā ꞌiiⁿꞌyāⁿ chi nꞌdíí caavā nducuéⁿꞌē denduꞌū chi diíⁿ nī chi nguɛɛ nꞌdaacā. Naati maaⁿ ní Ndyuūs tee yā ndísꞌtiī vida cueⁿꞌe daāⁿmaⁿ dáámá ndúúcū Cristo caati nadacuéeⁿ yā Cristo yeⁿꞌe nguaaⁿ tináⁿꞌā. 2 Ní nguuvi chi chóꞌōo ndísꞌtiī diíⁿ nī nuuⁿndi ní dinuuⁿndí nī ndúúcū tanáⁿꞌā ꞌiiⁿꞌyāⁿ yeⁿꞌe iⁿꞌyeeⁿdí ꞌcūū. Ní diíⁿ nī tanꞌdúúcā chi neⁿꞌe espíritu chi nguɛ́ɛ́ nꞌdai. Espíritu miiⁿ ni yááⁿnꞌguiinūuⁿ ní espíritu chi canéé na ꞌyúúné ni ngaⁿꞌā ntííⁿnyúⁿ yeⁿꞌe iⁿꞌyeeⁿdī ní ngaⁿꞌā ntííⁿnyúⁿ yeⁿꞌe nducyaaca ꞌiiⁿꞌyāⁿ chi nguɛ́ɛ́ nꞌgiindiveéⁿ yā nduudu yeⁿꞌé Ndyuūs. 3 Ní nducyaaca sꞌuuúⁿ ꞌtíícā diiⁿ yú nguuvi chi chóꞌōo ní diiⁿ yú tanꞌdúúcā chi neⁿꞌe yú ní diiⁿ yú tanꞌdúúcā chi neⁿꞌe cuerpo yeⁿꞌe yú ní tanꞌdúúcā chi nadicadiinuuⁿ yú. Ní cáávā chuū nducyaaca yú canéé chí cutaꞌa yú ndúúcū tanáⁿꞌā ꞌiiⁿꞌyāⁿ castigo chi diitu nꞌdáí chi caꞌa Ndyuūs ꞌiiⁿꞌyāⁿ chi dinuuⁿndí yā. 4 Naati Ndyuūs ní nééné yaꞌāī ꞌiinu cá yā nducyaaca ꞌiiⁿꞌyāⁿ ní neⁿꞌe taavi cá yā sꞌuuúⁿ. 5 Ní ꞌáárá chí nꞌdiī yú cucáávā chi dinuūⁿndi yú Ndyuūs itée yā vida cueⁿꞌe daāⁿmaⁿ yeⁿꞌē yú dáámá dáámá ndúúcū Jesucristo caati nadacuéeⁿ yā Cristo yeⁿꞌe nguaaⁿ tináⁿꞌā. Maaⁿ ní ninnguaⁿꞌai yú caavā chi Ndyuūs ní nꞌdai taavi cá yā ní neⁿꞌe cá yā sꞌuuúⁿ. 6 Ndyuūs diíⁿ yā chi nanduuchí yā sꞌuuúⁿ dáámá dáámá ndúúcū Cristo ti sꞌuuúⁿ ní yeⁿꞌé Cristo sꞌuuúⁿ. Ní ꞌtiicá ntúūⁿ diíⁿ yā chi sꞌuuúⁿ tanꞌdúúcā chí snee yú ná vaꞌai chɛɛti nguuvi ndúúcū Jesucristo ꞌtíícā sꞌuuúⁿ. 7 Ní Ndyuūs diíⁿ yā ꞌtuucā chi cuuvi ꞌcuuⁿꞌmiⁿ cá yā sꞌuuúⁿ nguuvi chi cuchiī tanꞌdúúcā chi dineⁿꞌe taavi cá yā sꞌuuúⁿ ndúúcū nꞌdeee nꞌdáí denduꞌū chi nꞌdai taavi chi itée yā sꞌuuúⁿ, ti yeⁿꞌe Cristo Jesús sꞌuuúⁿ. 8 Ní cucáávā chi Ndyuūs ní neⁿꞌe taavi cá yā sꞌuuúⁿ, ndísꞌtiī ní ninnguaⁿꞌai nī tí iꞌtéénu nī Cristo. Ndísꞌtiī nguɛ́ɛ́ diíⁿ nī mar ꞌáámá chi nanguaⁿꞌai nī naati Ndyuūs chi datée yā vida cueⁿꞌe daāⁿmaⁿ yeⁿꞌé nī. 9 Ní nguɛ́ɛ́ nanguaⁿꞌai nī cucáávā ntiiⁿnyuⁿ chi diíⁿ nī caati nguɛ́ɛ́ cuuvi caaⁿꞌmáⁿ nī chi chꞌɛɛtɛ nꞌdaí nī maáⁿ nī cucáávā chi diíⁿ nī. 10 Taachi Ndyuūs nadinguáⁿꞌai yā sꞌuuúⁿ diíⁿ yā chi sꞌuuúⁿ ní yeⁿꞌe Jesucristo sꞌuuúⁿ ní cuuvi diiⁿ yú ntiiⁿnyuⁿ chi nꞌdaacā. Ndyuūs ꞌāā chꞌiindiyaáⁿ yā ntiiⁿnyuⁿ chi canéé chí diiⁿ yú ndii cuááⁿ vmnaaⁿ.Vɛ́ɛ́ vaadī ꞌdiīíⁿ yeⁿꞌē yú cucáávā Cristo
11 Maaⁿ ní nꞌgaacú nī tanꞌdúúcā chi sneé nī nguuvi chi ꞌāā chóꞌōo. Ndísꞌtiī ní nguɛ́ɛ́ ꞌiiⁿꞌyāⁿ yeⁿꞌe ndaata Israel naati ꞌiiⁿꞌyāⁿ gentiles ndísꞌtiī. Ní ꞌiiⁿꞌyāⁿ yeⁿꞌe ndaata Israel diíⁿ yā circuncidar caꞌáámá caꞌáámá saⁿꞌā ní ꞌcaacá yā ꞌáámá seña na cuerpo yeⁿꞌe saⁿꞌā sꞌeeⁿ. Ní canéé na cuerpo yeⁿꞌe saⁿꞌā sꞌeeⁿ seña ꞌcūū chi saⁿꞌā sꞌeeⁿ ní yeⁿꞌe ndaata yeⁿꞌé Ndyuūs. Cáávā chuū ꞌiiⁿꞌyāⁿ yeⁿꞌe ndaata Israel nguuví yā maáⁿ yā ꞌiiⁿꞌyāⁿ circuncidado yā, ní caⁿꞌa yā yeⁿꞌē ndísꞌtiī chi nguuví nī ꞌiiⁿꞌyāⁿ chi nguɛ́ɛ́ ndíi nī circuncidado, ní caⁿꞌa yā yeⁿꞌe nī chi nguɛ́ɛ́ ꞌiiⁿꞌyāⁿ yeⁿꞌe Ndyuūs ndísꞌtiī. 12 Ní tiempo miiⁿ ní ndísꞌtiī nguɛ́ɛ́ déénu nī yeⁿꞌe Cristo, ní caneé nī tanꞌdúúcā ꞌiiⁿꞌyāⁿ chi canúúⁿ yúúní. Ní nguɛ́ɛ́ ndisꞌtiī yeⁿꞌe ꞌiiⁿꞌyāⁿ Israel ndísꞌtiī. Ndyuūs nndɛɛvɛ yā ꞌiiⁿꞌyāⁿ chi cuuvi yeⁿꞌé yā ꞌiiⁿꞌyāⁿ. Nguɛ́ɛ́ vɛ́ɛ́ ꞌáámá parte yeⁿꞌé nī ndúúcū ꞌiiⁿꞌyāⁿ chi nndɛɛvɛ́ yā ní caꞌá yā compromisos ndúúcū promesas nduucú yā. Ndísꞌtiī chꞌɛɛtinée nī na iⁿꞌyeeⁿdí ꞌcūū nguɛ́ɛ́ ndúúcū dɛꞌɛ̄ vɛɛ chi canee ngiinú nī chi cuuvi yeⁿꞌé nī. Ní nguɛ́ɛ́ chꞌɛɛtinée nī ndúúcū Ndyuūs ndísꞌtiī. 13 Ndísꞌtiī chi yaⁿꞌai caneé nī yeⁿꞌe Ndyuūs cuááⁿ vmnaaⁿ naati maaⁿ ní ꞌāā nduuvidaamá nī nduucú yā caavā chi chꞌīi Cristo cucáávā nuuⁿndi yeⁿꞌe yú. Ní maaⁿ ní ndísꞌtiī ní yeⁿꞌé Cristo ndísꞌtiī. 14 Ní cáávā Cristo miiⁿ vɛ́ɛ́ vaadī ꞌdiiíⁿ yeⁿꞌe yú. Ní Cristo diíⁿ yā chi ꞌiiⁿꞌyāⁿ yeⁿꞌe ndaata Israel ndúúcū ꞌiiⁿꞌyāⁿ chi nguɛ́ɛ́ yeⁿꞌē ndaata Israel nduuvidaamá yā tanꞌdúúcā ꞌáámá raza nūuⁿ. Ní Cristo miiⁿ divíi yā vaadī ꞌcaaꞌva chi canéé nguaaⁿ ꞌiiⁿꞌyāⁿ Israel sꞌeeⁿ ndúúcū tanáⁿꞌā ꞌiiⁿꞌyāⁿ sꞌeeⁿ chi nguɛ́ɛ́ ꞌiiⁿꞌyāⁿ Israel yā. Vaadī ꞌcaaꞌva chꞌɛɛtɛ mííⁿ chi cuꞌnéeⁿ yā ní tanꞌdúúcā ꞌáámá chɛɛ̄tī náávtaⁿꞌa ꞌiiⁿꞌyāⁿ sꞌeeⁿ, ꞌtíícā. 15 Ní cucáávā chi Cristo maáⁿ yā chꞌīi yā tuuꞌmi ní divíi yā ley yeⁿꞌe ꞌiiⁿꞌyāⁿ Israel ndúúcū mandamientos yeⁿꞌē ndúúcū reglas yeⁿꞌē. Cristo mííⁿ diíⁿ yā chi naachi nduu ꞌuuvi clase yeⁿꞌe ꞌiiⁿꞌyāⁿ nadáámá yā ní vɛ́ɛ́ ꞌáámá clase nūuⁿ ꞌiiⁿꞌyāⁿ, ní ꞌiiⁿyāⁿ sꞌeeⁿ ní yeⁿꞌe Cristo. ꞌTíícā diīiⁿ Cristo chi vɛ́ɛ́ vaadī ꞌdiiíⁿ. 16 ꞌTíícā diīiⁿ Cristo taachi chꞌīi yā na cruz. Ní diíⁿ yā chi ꞌāā ntɛɛ vɛ́ɛ́ vaadī ꞌcaaꞌva nguaaⁿ ꞌiiⁿꞌyāⁿ sꞌeeⁿ. Ní diíⁿ yā chi vɛ́ɛ́ vaadī ꞌdiiíⁿ nguaaⁿ ꞌiiⁿꞌyāⁿ sꞌeeⁿ ndúúcū Ndyuūs. ꞌTíícā Cristo diíⁿ yā chi vɛ́ɛ́ ꞌáámá clase nūuⁿ ꞌiiⁿꞌyāⁿ.
17 Cristo ndaá yā na iⁿꞌyeeⁿdí ꞌcūū ní maaⁿ ní cuuvi deenú nī yeⁿꞌē vaadī ꞌdiiíⁿ, ndísꞌtiī chi nguɛ́ɛ́ ꞌiiⁿꞌyaⁿ yeⁿꞌe ndaata Israel chi yaⁿꞌai chꞌɛɛtinée nī yeⁿꞌe Cristo. ꞌTiicá ntúūⁿ cuuvi deenú ꞌiiⁿꞌyāⁿ yeⁿꞌē ndaata Israel chi chꞌɛɛtinéé niiⁿnuⁿ yā. 18 Ní cucáávā Cristo miiⁿ nducyaaca yú nduuti chi ꞌiiⁿꞌyāⁿ Israel sꞌuuúⁿ o nguɛ́ɛ́ ꞌiiⁿꞌyāⁿ Israel sꞌuuúⁿ, nducyaaca yú, cucáávā Cristo miiⁿ cuuvi cundáa yú nanááⁿ Ndyuūs Chiida yú ndúúcū ꞌáámá Espíritu Nꞌdai yeⁿꞌé Ndyuūs. 19 Ní ndísꞌtiī chi nguɛ́ɛ́ yeⁿꞌē ndaata Israel chi ndaata yeⁿꞌe Ndyuūs, maaⁿ ní ꞌāā ntɛ́ɛ́ ꞌiiⁿꞌyāⁿ chi snúúⁿ yā yúúní ndísꞌtiī ní snée nī na yáⁿꞌāa chi nguɛ́ɛ́ yeⁿꞌé nī. Maaⁿ ní dáámá snée nī ndúúcū ꞌiiⁿꞌyāⁿ chi yeⁿꞌe Ndyuūs. Ní ndísꞌtiī ní yeⁿꞌe ndaata yeⁿꞌe nducyaaca ꞌiiⁿꞌyāⁿ chi yeⁿꞌé Dendyuūs. 20 Ní ndísꞌtiī ní tanꞌdúúcā ꞌáámá vaꞌai chꞌɛɛtɛ taavi ca chi ꞌiiⁿꞌyāⁿ dinꞌdái yā ꞌtíícā ndísꞌtiī. Ní yeⁿꞌē vaꞌai chꞌɛɛtɛ miiⁿ Cristo miiⁿ ní tanꞌdúúcā tuūu chꞌɛɛtɛ yeⁿꞌe esquina, ꞌtííca yā. Ní apóstoles chi candɛɛ́ yā nduudu yeⁿꞌé Ndyuūs ndúúcū profetas chi ngaⁿꞌa yā nduudu yeⁿꞌé Ndyuūs ꞌiiⁿꞌyāⁿ sꞌeeⁿ ní tanꞌdúúcā tuūu yeⁿꞌe cimiento yeⁿꞌe vaꞌāī miiⁿ, ꞌtiicá yā. Ní ndísꞌtiī ní tanꞌdúúcā tuūu vmnaaⁿ tuūu chꞌɛɛtɛ́ yeⁿꞌē esquina, ꞌtiicá nī. 21 Ní vmnaaⁿ tuūu chꞌɛɛtɛ yeⁿꞌe esquina chi Cristo miiⁿ nducuéⁿꞌē tuūu ní yeⁿꞌe vaꞌāī chꞌɛɛtɛ chi dinꞌdái Cristo. Ní Cristo diíⁿ yā chi nꞌdaacā canee nducuéⁿꞌē na lugar yeⁿꞌē cucáávā chi dichííꞌvɛ̄ Ndyuūs. Ní Cristo diíⁿ yā chi vaꞌāī chꞌɛɛtɛ taavi ca ní ꞌáámá templo yeⁿꞌe ꞌiivú Ndyuūs. 22 ꞌTiicá ntúūⁿ, ndísꞌtiī chi yeⁿꞌe Cristo nduuvidaamá nī ndúúcū tanáⁿꞌā ꞌiiⁿꞌyāⁿ chi yeⁿꞌe Cristo ní tanꞌdúúcā ꞌáámá vaꞌai naachi Ndyuūs canee yā cucáávā Espíritu Nꞌdai yeⁿꞌe yā, ꞌtíícā nducyaaca ꞌiiⁿꞌyāⁿ chi yeⁿꞌe Cristo.