3 ꞌÚú ncaꞌá gracias Ndyuūs yeⁿꞌē yú caꞌáámá caꞌáámá vuelta taachi nꞌgaacú yeⁿꞌe ndísꞌtiī. 4 Ní taachi caⁿꞌanguāꞌá, nducuéⁿꞌē tiempo caⁿꞌanguāꞌá yeⁿꞌe nducyaaca ndísꞌtiī ndúúcū vaadī yeenú. 5 Caati ndísꞌtiī ní nduucú ní dáámá diiⁿ yú ntiiⁿnyuⁿ ti inneé nī ꞌúú chi ꞌúú candɛɛ́ nduudu yeⁿꞌe evangelio chí nduudu ngai yeⁿꞌe Cristo, ndii nguuvi chi iꞌtéénu nī Jesucristo ndíí maaⁿ. 6 Ní deenú chi seguro canee chiiⁿ chi yeⁿꞌe Ndyuūs ti Ndyuūs chi tucaꞌá yā diiⁿ yā ntiiⁿnyuⁿ nꞌdaacā nꞌdai na vida yeⁿꞌe ndísꞌtiī ní idiíⁿ yā chi ndísꞌtiī ꞌcuɛɛtinée nī diíⁿ nī ntiiⁿnyuⁿ chi nꞌdaacā nguuvi nguuvi ndíí nguuvi chí ndaa Jesucristo taama vmnéⁿꞌēe. 7 Ní ꞌtíícā chi nꞌdai chi ꞌúú nacádiinúúⁿ chuū yeⁿꞌē nducyaaca ndísꞌtiī caati neⁿꞌé taavi ndísꞌtiī. Ní nducyaaca ndísꞌtiī ní vɛ́ɛ́ parte yeⁿꞌé nī nduucú yeⁿꞌe nducuéⁿꞌē chi nꞌdai taavi chi Ndyuūs itée yā sꞌuuúⁿ. Ní ndísꞌtiī nginneé nī ꞌúú ꞌáárá chí canuúⁿ vácūū o ꞌáárá chi caneé nanááⁿ ꞌiiⁿꞌyāⁿ ꞌiiⁿntyéⁿꞌē ꞌúú ní ngaⁿꞌá nduudu cuaacu yeⁿꞌē nduudu ngai yeⁿꞌé Cristo chi cuaacu chi ꞌtíícā. 8 Ní Ndyuūs yeⁿꞌe yú ní deenú yā chí ꞌúú neⁿꞌé ndísꞌtiī tanꞌdúúcā chi Cristo neⁿꞌé yā sꞌuuúⁿ. 9 Ní ꞌúú ngiicá Ndyuūs chi ndísꞌtiī cuuvi dinéⁿꞌe ca nī nducyaaca ꞌiiⁿꞌyāⁿ. Ní cuuvi deenu cá nī yeⁿꞌē nduudu cuaacu ní cuuvi nadacadíínuuⁿ nꞌdaāca nī yeⁿꞌē nducuéⁿꞌē chi cuaacu. 10 Caati cuuví ndɛɛvɛ nī nducuéⁿꞌē tiempo chɛ́ɛ́ chí nꞌdaacā taavi ca. Ní ꞌtíícā cuuvi ꞌcuɛɛtinée nī nꞌdaacā nꞌdai. Ní taachi ndaa Jesucristo taama vmnéⁿꞌēe nguɛ́ɛ́ vɛ́ɛ́ mar ꞌáámá nuuⁿndi yeⁿꞌé nī. 11 Ní neⁿꞌé chi Jesucristo ndaacá yā ndísꞌtiī chi ꞌcuɛɛtinéé nꞌdaacá nī cucáávā poder yeⁿꞌe Cristo ní diíⁿ nī ntiiⁿnyuⁿ yeⁿꞌe evangelio chí nduudu ngai yeⁿꞌe Cristo. Ní ꞌíícú nducyaaca ꞌiiⁿꞌyāⁿ cuuvi caaⁿꞌmáⁿ yā chi chꞌɛɛtɛ taavi Ndyuūs. Ní diíⁿ yā honrar Ndyuūs.

12 Maaⁿ ní ndísꞌtiī hermanos yeⁿꞌé, neⁿꞌé chi cadíínuuⁿ nī chi tanducuéⁿꞌē chi chꞌeenú chiī ní diiíⁿ chi ꞌyaaⁿ ca ꞌiiⁿꞌyāⁿ ngíí nꞌgiindiveéⁿ yā nduudu cuaacu chí ngai yeⁿꞌe Cristo. 13 ꞌTíícā chiī chi taanduvɛ́ɛ́ soldados chi dííⁿ ntiiⁿnyuⁿ na palacio yeⁿꞌe César ndúúcū taanduvɛ́ɛ́ ꞌiiⁿꞌyāⁿ, nducyaaca yā deenu yā chi ꞌúú caneé preso na vácūū cucáávā chi diíⁿ ntiiⁿnyuⁿ yeⁿꞌe Cristo. 14 Ní nééné ꞌyaaⁿ hermanos chi iꞌtéénu yā Señor Jesucristo taachi cadíínuuⁿ yā chi caneé vácūū nguɛ́ɛ́ diꞌvaꞌá yā naati neⁿꞌé yā caaⁿꞌmaⁿ cá yā nduudu ngai chi nduudu cuaacu yeⁿꞌe Ndyuūs ndúúcū confianza nanááⁿ Cristo miiⁿ.

15 Cuaacu chi náⁿꞌa yā ní ngaⁿꞌa yā nduudu ngai yeⁿꞌe Cristo cáávā chi dingueeé yā yeⁿꞌé ní cáávā chi neⁿꞌe yā ꞌcaaꞌva yā nduucú. Ní tanáⁿꞌa yā ní ngaⁿꞌá yā nduudu ngai miiⁿ ti cuaacu chi neⁿꞌé yā diíⁿ yā ní neⁿꞌé yā cunnee yā ꞌúú. 16 Naati ꞌiiⁿꞌyāⁿ sꞌeeⁿ vmnaaⁿ nguɛɛ ngaⁿꞌa yā nduudu ngai yeⁿꞌe Cristo ndúúcū nuuⁿmaⁿ staava yeⁿꞌé yā naati diíⁿ yā chi ꞌiiⁿꞌyāⁿ caⁿꞌa yā ndúúcu yā. Diíⁿ yā ti neⁿꞌé yā chi ꞌúú ní ngueeé yeⁿꞌé yā. Ní cadíínuuⁿ yā chi diíⁿ yā chi ꞌúú nꞌgeenú ngii ca taachi canuúⁿ vácūū. 17 Ní ꞌiiⁿꞌyāⁿ cuayiivi ní ngaⁿꞌá yā nduudu ngai miiⁿ ti neⁿꞌé yā ꞌúú. Ní deenú yā chi Ndyuūs tee yā ꞌúú ntiiⁿnyuⁿ yeⁿꞌé yā chi ngaⁿꞌá nanááⁿ ꞌiiⁿntyéⁿꞌē táácā chi diíⁿ ntiiⁿnyuⁿ yeⁿꞌé Ndyuūs ní ngaⁿꞌá nduudu cuaacu yeⁿꞌe evangelio chí nduudu ngai yeⁿꞌe Cristo. 18 Naati ¿dɛꞌɛ̄ ituneéⁿ? ꞌĀā ꞌtuucá nūuⁿ nduuti chi ꞌiiⁿꞌyāⁿ caaⁿꞌmáⁿ yā nduudu ngai miiⁿ ndúúcū nuuⁿmáⁿ staava yeⁿꞌé yā o cáávā chi nguɛ́ɛ́ neⁿꞌé yā ꞌúú, nducyaacá yā ngaⁿꞌa yā nduudu ngai yeⁿꞌe Cristo. Ní cáávā chuū ꞌúú ní yeenú, ní yeenú taavi cá.

19 Caati deenú chi yeⁿꞌe nducuéⁿꞌē chi chóꞌōo yeⁿꞌé, nꞌdaacā cuuvi yeⁿꞌé caati ndísꞌtiī ní ngaⁿꞌanguaꞌá nī cáávā ꞌúú. Ní Jesucristo nginneé yā ꞌúú cucáávā Espíritu yeⁿꞌé yā. 20 Ní maaⁿ chuū chi neⁿꞌé chi dicuaacu chi cuuvi diíⁿ. Nguɛ́ɛ́ ꞌcuinaáⁿ yeⁿꞌē mar ꞌáámá naaⁿ naati ngaⁿꞌá nduudu ngai yeⁿꞌe Cristo cueⁿꞌe daāⁿmaⁿ ndúúcū nducuéⁿꞌē confianza tanꞌdúúcā chi diíⁿ maaⁿ, ꞌtiicá ntúūⁿ cuuvi diíⁿ cueⁿꞌe daāⁿmaⁿ. Ní ꞌíícú ꞌiiⁿꞌyāⁿ cuuvi nꞌdiichi cá yā Cristo chi chꞌɛɛtɛ ca yā cucáávā ꞌúú, ꞌáárá chí ꞌúú cunduūchí o ꞌáárá chí ꞌúú ꞌāā nꞌdií. 21 Ní cucaavā ꞌúú, vida yeⁿꞌé ní Cristo níícú nduuti chí ꞌcuūví ꞌāā diíⁿ ganar caati ꞌúú caneé ndúúcū Cristo. 22 Ní nduuti chi candií ca cuneé ca na iⁿꞌyeeⁿdí ꞌcūū ndúúcū cuerpo yeⁿꞌé, tuuꞌmi ní cuuvi diíⁿ ca ntiiⁿnyuⁿ yeⁿꞌe Señor Jesucristo yeⁿꞌē yú. Ní candɛɛ́ nduudu yeⁿꞌe yā nanááⁿ ꞌiiⁿꞌyāⁿ níícú ꞌiiⁿꞌyāⁿ cuuvi cuꞌtéénu yā Ndyuūs. Maaⁿ ní nguɛ́ɛ́ deenú dɛꞌɛ̄ chi nꞌdaacā ca chi ndɛɛvɛ́ cáávā ꞌúú 23 caati ꞌúú canuúⁿ nguaaⁿ nduu ꞌuuví vaanicadíínūuⁿ. Ní neⁿꞌé chí ꞌcuūví níícú caⁿꞌá cunēe ndúúcū Cristo caati deenú chi neené nꞌdaacā caavā ꞌúú. 24 Naati cáávā ndísꞌtiī ní nꞌdaacā ca chi ꞌúú cuneé ca na cuerpo yeⁿꞌé ꞌtɛɛ ꞌtɛ́ɛ́ ndúúcū ndísꞌtiī. 25 Seguro caneé maaⁿ yeⁿꞌe chuū. Ní deenú ti ꞌúú cuneé ca ꞌtɛɛ ꞌtɛ́ɛ́ ndúúcū ndísꞌtiī caati ndísꞌtiī cuuvi ꞌcuɛɛtinée nī nꞌdaacā ca ní yeenu taaví nī caati iꞌtéénu nī Ndyuūs. 26 ꞌTúúcā cuneé ꞌtɛɛ ꞌtɛ́ɛ́ ndúúcū ndísꞌtiī ní taachi ndaá nanááⁿ ndísꞌtiī tuuꞌmi ní ndísꞌtiī cuuvi yeenu cá nī nduucú ti sꞌuuúⁿ ní yeⁿꞌe Cristo sꞌuuúⁿ.

27 Diꞌcuiitú ndísꞌtiī chi dámaāⁿ diiⁿ núú yiiⁿnuⁿ nī chi ꞌcuɛɛtinéé nꞌdaacá nī taanduvɛ́ɛ́ chi nꞌdaacā tanꞌdúúcā chi ngaⁿꞌa nduudu nꞌdai yeⁿꞌe Cristo. Níícú ndúútī chi ndaá nꞌdiichí ndísꞌtiī o ndúútī chi caneé yaⁿꞌai yeⁿꞌé ndísꞌtiī neⁿꞌé ꞌcaandiveéⁿ yeⁿꞌé ndísꞌtiī. Neⁿꞌé chí ꞌiiⁿꞌyāⁿ cuuví yaaꞌví yā ꞌúú yeⁿꞌé ndísꞌtiī chi ndísꞌtiī ní nꞌdaacā sneé nī. Ní nduuvidaamá nī ndúúcū ꞌáámá espíritu nūuⁿ ndúúcū ꞌáámá vaanicadíínūuⁿ yeⁿꞌé nī. Ní ꞌáámá diíⁿ nī ntiiⁿnyuⁿ yeⁿꞌé Ndyuūs ní ngaⁿꞌá nī nduudu ngai yeⁿꞌe Cristo chi evangelio caati ꞌiiⁿꞌyāⁿ cuuvi cuꞌtéénu yā Cristo. 28 Neⁿꞌé ꞌcaandiveéⁿ yeⁿꞌé nī chi nguɛ́ɛ́ diꞌvaꞌá nī mar ꞌáámá yeⁿꞌé ꞌiiⁿꞌyāⁿ chi contra yeⁿꞌe nī. Caati chuū ní ꞌáámá seña yeⁿꞌé yā chi nguɛ́ɛ́ iꞌtéénu yā Cristo ní caⁿꞌá yā infierno. Naati chuū ní ꞌáámá seña yeⁿꞌé nī chi ndísꞌtiī ní cuuví ninguaⁿꞌáí nī yeⁿꞌe infierno caati chuū ní yeⁿꞌé Ndyuūs. 29 Ní Ndyuūs diíⁿ yā ꞌáámá favor ndúúcū ndísꞌtiī caati nguɛ́ɛ́ dámaāⁿ chi cuꞌtéénu nī Cristo naati canéé chi ꞌcueenú nī cuuvi caavā chi iꞌtéénu nī Cristo. 30 Ní ndísꞌtiī ndúúcū ꞌúú ꞌāā daamá nūuⁿ snée yú chí nꞌgeenu yú ngii cucáávā chi ngaⁿꞌa yú nduudu cuaacu yeⁿꞌé Cristo. Ndísꞌtiī ꞌāā nꞌdiichí nī cuááⁿ vmnaaⁿ tanꞌdúúcā chí diíⁿ ntiiⁿnyuⁿ ní chꞌeenú chii. Ní maaⁿ ní nꞌgiindivééⁿ ntúuⁿ nī tanꞌdúúcā chi diíⁿ ntiiⁿnyuⁿ ní tanꞌdúúca chi nꞌgeenú ngii.