4 Ní ndísꞌtiī saⁿꞌā chi vɛ́ɛ́ daiyá nī, nguɛ́ɛ́ diíⁿ nī chi nduuvi taaⁿ daiyá nī naati diꞌcuiitá nī daiya nī ní yaaꞌví nī daiya nī taachi nguɛ́ɛ́ dinꞌdaacáā ní caꞌcuéeⁿ nī daiyá nī yeⁿꞌe Señor Jesucristo caati cuuvi cuꞌtéénu yā yeⁿꞌé yā.

5 Ní ndísꞌtiī ꞌiiⁿꞌyāⁿ chi diiⁿ ntiiⁿnyuⁿ ndúúcū ꞌiiví nī, ꞌcaandiveéⁿ nī yeⁿꞌe ꞌiiví nī chi vɛ́ɛ́ na iⁿꞌyeeⁿdí ꞌcūū. Ní diíⁿ nī respetar ꞌiiví nī ní ꞌvaꞌá nī yeⁿꞌe yā. Ní diíⁿ nī ntiiⁿnyuⁿ yeⁿꞌe yā ndúúcū núúⁿmáⁿ staava yeⁿꞌe nī. Ní diíⁿ nī nducuéⁿꞌē ntiiⁿnyuⁿ yeⁿꞌé yā tanꞌduucā chí diíⁿ nī caavā Cristo. 6 Ní diíⁿ nī nꞌdai ntiiⁿnyuⁿ yeⁿꞌé yā nguɛ́ɛ́ dámáāaⁿ taachi ꞌiiví nī inaáⁿ yā ndísꞌtiī caati nꞌdaacā caneé nī ndúúcu yā. Naati diíⁿ nī ntiiⁿnyuⁿ yeⁿꞌé yā tanꞌdúúcā chi ntiiⁿnyuⁿ yeⁿꞌe Cristo chi diíⁿ nī ní ndúúcū núúⁿmáⁿ staava yeⁿꞌé nī. Chuū ní chiiⁿ chi Ndyuūs neⁿꞌé yā chi diíⁿ nī. 7 Ní dinéⁿꞌe nī dinꞌdaacá nī ntiiⁿnyuⁿ yeⁿꞌe yā tanꞌdúúcā chi ntiiⁿnyuⁿ yeⁿꞌe Señor Jesucristo chi diíⁿ nī, nguɛ́ɛ́ tanꞌdúúcā chi ntiiⁿnyuⁿ yeⁿꞌe ꞌiiⁿꞌyāⁿ yeⁿꞌē iⁿꞌyeeⁿdí ꞌcūū. 8 Ní nducyáácá nī ní déénu nī nduuti chi ꞌiiⁿꞌyāⁿ chi diíⁿ ntiiⁿnyuⁿ caadi ꞌiiyu o nduuti chi ꞌiiⁿꞌyāⁿ libre yā nducyáácá yā cutaꞌá yā yeⁿꞌe Señor Jesucristo chi ꞌiivi yú chííⁿ chí tée yā ꞌiiⁿꞌyāⁿ caavā ntiiⁿnyuⁿ nꞌdaacā chi diíⁿ yā.

9 Ní ndísꞌtiī chi ꞌiiví yeⁿꞌe ꞌiiⁿꞌyāⁿ, ꞌtiicá ntúūⁿ dinꞌdaacá nī ndúúcū ꞌiiⁿꞌyāⁿ chi dichííꞌvɛ̄ ndísꞌtiī. Nguɛ́ɛ́ caaⁿꞌmáⁿ nī chi caⁿꞌá nī ꞌcueⁿꞌé nī ꞌiiⁿꞌyāⁿ chi dichííꞌvɛ̄ ndísꞌtiī. Nꞌgaacu nī chi ndísꞌtiī ndúúcū ꞌiiⁿꞌyāⁿ chi dichííꞌvɛ̄ ndísꞌtiī ní snée nī na poder yeⁿꞌe ꞌiivú Señor Jesucristo chi canéé na vaꞌai chɛɛti nguuvi. Ní ꞌāā daamá nūuⁿ nducyáácá ꞌiiⁿꞌyāⁿ nanááⁿ Señor Jesucristo yeⁿꞌē yú.

10 Maaⁿ ní ndísꞌtiī hermanos yeⁿꞌé diíⁿ nī chi ditiinú ꞌcuɛɛtinée nī nanááⁿ Señor Jesucristo yeⁿꞌe yú ndúúcū nducuéⁿꞌē poder chi vɛ́ɛ́ yeⁿꞌé Cristo. 11 Ní cuuví diíⁿ nī defender maáⁿ nī ndúúcū nducuéⁿꞌē armadura chi tanꞌdúúcā armadura catecai soldados chi Ndyuūs dátee yā sꞌuuúⁿ chi yeⁿꞌe Cristo. Ní ꞌíícú cuuvi cuchɛɛ́ nī yeⁿꞌe nducuéⁿꞌē denduꞌū chi diiⁿ yááⁿnꞌguiinūuⁿ taachi ngínncheꞌei sa ndísꞌtiī. 12 Nguɛ́ɛ́ ꞌcuuⁿꞌmaⁿ yú contra ꞌiiⁿꞌyāⁿ chi nguɛ́ɛ́ nꞌdaacā naati ꞌcuuⁿꞌmaⁿ yú ní contra fuerzas yeⁿꞌe espíritus chi nguɛ́ɛ́ nꞌdaacā chi canéé na ꞌyúúné ndúúcū espíritus chi ꞌiiⁿntyéⁿꞌē yeⁿꞌé tanáⁿꞌā espíritus chi caꞌa orden yeⁿꞌe espíritus chi nguɛ́ɛ́ nꞌdai ndúúcū nducuéⁿꞌē yeⁿꞌe íⁿꞌyeeⁿdī chi canéé na maaíⁿ chi yeⁿꞌe yááⁿnꞌguiinūuⁿ. 13 Cáávā chuū tanꞌdúúcā ꞌáámá soldado cutaꞌa sa catecai yeⁿꞌe soldado ní maaⁿ ní cutaꞌá nī nducuéⁿꞌē armadura chi tanꞌdúúcā catecai nī chi Ndyuūs dátee yā ndísꞌtiī. Ní ꞌíícú cuuvi cuchɛɛ́ nī contra enemigo nguuvi taachi ndaa nanáaⁿ nī nducuéⁿꞌe denduꞌū chi nguɛɛ nꞌdaacā. Ní taachi chichɛɛ nī yeⁿꞌe nducuéⁿꞌē chi nguɛ́ɛ́ nꞌdaacā ndíí chí ꞌcuiīnū, tuuꞌmi ní cuuvi ꞌcuɛɛtinéé diitú nī ndúúcū chi iꞌtéénu nī. 14 Ní canéé diitú nī ndúúcū armadura yeⁿꞌé Ndyuūs. Cáávā caandaá ꞌtiicá ntúūⁿ ndísꞌtiī cutaꞌá nī cinturón ní chiichi cunéé cinturón yeⁿꞌé nī chi armadura yeⁿꞌe Ndyuūs chi vaadī cuaacu. Ní vɛ́ɛ́ fuerzas yeⁿꞌé nī. Ní diiⁿ nꞌdaacá nī caati canéé diitú nī. ꞌTiicá ntúūⁿ ndísꞌtiī cutaꞌá nī chaleco cūū yeⁿꞌe Ndyuūs chí vaadī cuaacu. Ní canéé chi diíⁿ nī nducuéⁿꞌē chi nꞌdaacā caati cuuvi diíⁿ nī proteger pecho maáⁿ nī yeⁿꞌe nducuéⁿꞌē chi nguɛɛ nꞌdaacā chí dardos yeⁿꞌe enemigo. 15 ꞌTiicá ntúūⁿ ndísꞌtiī snúúⁿ caꞌa nī zapatos chi yeⁿꞌé Ndyuūs chí yeⁿꞌē vaadī ꞌdiiíⁿ. Ní ꞌcuɛɛtinéé listo nī chi caaⁿꞌmaⁿ nī ꞌiiⁿꞌyāⁿ nduudu cuaacu yeⁿꞌe Jesucristo ní ꞌíícú cuuvi cunéé vaadī ꞌdiīiⁿ yeⁿꞌé yā. 16 ꞌTiicá ntúūⁿ ndísꞌtiī staꞌá nī escudo yeⁿꞌé Ndyuūs chi vaadī iꞌteenu. Ní ꞌíícú díítú caneé nī ndúúcū chi iꞌtéénu nī. Ní diíⁿ nī protejer maáⁿ nī yeⁿꞌe dardos chí ngiichi yeⁿꞌe yááⁿnꞌguiinūuⁿ. Ní yááⁿnꞌguiinūuⁿ nguɛ́ɛ́ cuuvi cuchɛ́ɛ́ sá yeⁿꞌe ndísꞌtiī ndúúcū cosas yeⁿꞌe sa chi nguɛ́ɛ́ nꞌdaacā. 17 ꞌTiicá ntúūⁿ ndísꞌtiī staꞌá nī cachucha cūū yeⁿꞌe Ndyuūs chí vaadī nguaⁿꞌai yeⁿꞌé nī chi diiⁿ proteger tiíⁿ nī. Ní nꞌgáácú nī chi Jesucristo nadanguáⁿꞌai yā ndísꞌtiī ní itée yā fuerzas ndísꞌtiī chi nguɛ́ɛ́ ꞌvaꞌá nī ní nguɛ́ɛ́ vɛ́ɛ́ ꞌuuvī vaanicádiinuuⁿ yeⁿꞌé nī. ꞌTiicá ntúūⁿ ndísꞌtiī staꞌá nī espada yeⁿꞌe Ndyuūs chi Espíritu Nꞌdai yeⁿꞌé Ndyuūs. Ní Espíritu Nꞌdai yeⁿꞌe Ndyuūs ndúúcū Nduudu Cuaacu yeⁿꞌé Ndyuūs inneé yā ndísꞌtiī chi nguɛ́ɛ́ nꞌgiindiveéⁿ nī nduudu yeⁿꞌe yááⁿnꞌguiinūuⁿ naati yááⁿnꞌguiinūuⁿ caⁿꞌa sa caanu sa yeⁿꞌé nī. 18 Ní cueⁿꞌe daāⁿmaⁿ caaⁿꞌmaⁿnguaꞌá nī yeⁿꞌē tanducuéⁿꞌē chuū. Ní cueⁿꞌe daāⁿmaⁿ diꞌcuiitú nī Ndyuūs cucáávā Espíritu Nꞌdai yeⁿꞌé yā, ní ngiicá nī caati cuuvi cutaꞌá nī yeⁿꞌē poder yeⁿꞌe Ndyuūs. Ní ꞌíícú cuuvi diíⁿ nī nducuéⁿꞌē chuū. Ní canee listo nī. Ní nguɛ́ɛ́ cuuvi cúúnu nī. Ní caaⁿꞌmaⁿnguaꞌá nī caavā nducyaaca ꞌiiⁿꞌyāⁿ chi iꞌtéénu yā Ndyuūs. 19 Ní caⁿꞌanguaꞌá nī caavā ꞌúú denduꞌū ti Ndyuūs tée yā nduudu yeⁿꞌé yā ꞌúú taachi ngaⁿꞌá nduudu cuaacu yeⁿꞌé yā. Ní ꞌíícú ꞌúú cuuvi caaⁿꞌmáⁿ nduudu miiⁿ ndúúcū valor caati ꞌiiⁿꞌyāⁿ cuuvi déénu yā nduudu chí ngaⁿꞌá táácā chi cuuvi nanguáⁿꞌai ꞌiiⁿꞌyāⁿ, nduudu chi canéé nꞌdeꞌei cuááⁿ vmnaaⁿ. 20 Ndyuūs yeⁿꞌe yú ní dichóꞌo yā ꞌúú tanꞌdúúcā chi ꞌúú embajador yeⁿꞌé yā ꞌúú chi ꞌúú caaⁿꞌmáⁿ nduudu cuaacu yeⁿꞌé yā. Ní cááva chuū ní ꞌúú ní preso ꞌúú ní maaⁿ canuúⁿ vácūū. Ní ndísꞌtiī ní caⁿꞌanguaꞌá nī caavā ꞌúú chi ꞌúú cuuvi caaⁿꞌmáⁿ nduudu cuaacu miiⁿ ndúúcū valor tanꞌdúúcā chi ꞌúú canéé chí caaⁿꞌmáⁿ.

21 Hermano Tíquico, chi neⁿꞌe nducyaaca sꞌuuúⁿ, ní nꞌdaacā diiⁿ sa ntiiⁿnyuⁿ yeⁿꞌe Señor Jesucristo nduucú. Ní saⁿꞌā miiⁿ caaⁿꞌmaⁿ sa ndúúcū ndísꞌtiī yeⁿꞌe ꞌúú ní yeⁿꞌē chi ꞌúú idiíⁿ. 22 Cáávā chuū dichoꞌó hermano Tíquico nanááⁿ ndísꞌtiī ti caaⁿꞌmaⁿ sa táácā snéé ꞌnū ní ꞌiicu diiⁿ sa chi diituu ꞌcuɛɛtinéeⁿ nī na staava yeⁿꞌé nī.

23 Maaⁿ ní ꞌúú neⁿꞌé chi Ndyuūs Chiida yú ndúúcū Señor Jesucristo yeⁿꞌe yú caꞌá yā nducyaaca hermanos yeⁿꞌé vaadī ꞌdiiíⁿ na staava yeⁿꞌé yā. Ní neⁿꞌé chi Ndyuūs diíⁿ yā chi ndísꞌtiī cuꞌtéénu cá nī Ndyuūs, ní dineⁿꞌe cá nī nducyaaca ꞌiiⁿꞌyāⁿ. 24 Ní neⁿꞌé chi Ndyuūs caꞌá yā vaadī nꞌdai yeⁿꞌé yā nducyaaca ꞌiiⁿꞌyāⁿ chi cuaacu nííⁿnyúⁿ neⁿꞌé yā Señor Jesucristo yeⁿꞌe yú. Ní ꞌáámá neⁿꞌé yā, ní nguɛ́ɛ́ n̄ꞌdaáⁿ yā. ꞌTiicā cuuvi.