3 Maaⁿ ní chi ndísꞌtiī ní yeⁿꞌé Ndyuūs ndísꞌtiī nguɛ́ɛ́ canee chí caaⁿꞌmáⁿ nī mar ꞌáámá yeⁿꞌe nuuⁿndi chi saⁿꞌā nꞌdiichi sa nꞌdaataá. Ní nguɛ́ɛ́ canee chi caaⁿꞌmáⁿ nī yeⁿꞌe táámá denduꞌū chi nguɛɛ nꞌdaacā ní nguɛ́ɛ́ dɛɛvɛ, ndíí nguɛɛ dínngueé nī yeⁿꞌē chi vɛ́ɛ́ chi yeⁿꞌe taamá yā. 4 Ndíí nguɛ́ɛ́ canee chi caaⁿꞌmáⁿ nī denduꞌū chí cuuvi ꞌcuinaáⁿ nī, ndíí nguɛ́ɛ́ caaⁿꞌmáⁿ nī nduudu tonto o nduudu chi nguɛ́ɛ́ nꞌdaacā, caati nducuéⁿꞌē chuū ní nguɛ́ɛ́ nꞌdaacā yeⁿꞌé nī. Naati ndísꞌtiī ní canee chi caaⁿꞌmáⁿ nī Ndyuūs ꞌtíícā: Gracias nꞌdiī Ndyuūs. 5 Ní ndísꞌtiī ꞌāā deenú nī chi saⁿꞌā chi caⁿꞌa sá ndúúcū nꞌdaataá chi nguɛ́ɛ́ yeⁿꞌe sa o nꞌdaataá chi caⁿꞌa tá ndúúcū saⁿꞌā chi nguɛ́ɛ́ yeⁿꞌe ta, o ꞌiiⁿꞌyāⁿ chi diiⁿ denduꞌū chi nguɛ́ɛ́ nꞌdaacā o ꞌiiⁿꞌyāⁿ chí dínngueé yā yeⁿꞌē chi vɛ́ɛ́ yeⁿꞌē taama yā ti tanducuéⁿꞌē chuū ní tanꞌdúúcā chi iꞌtéénu yā santos ídolos. Nducyáácá ꞌiiⁿꞌyāⁿ sꞌeeⁿ ní nguɛ́ɛ́ vɛ́ɛ́ parte yeⁿꞌé yā naachi Cristo ndúúcū Ndyuūs ngaⁿꞌa ntiiⁿnyúⁿ yā. 6 Nguɛ́ɛ́ caꞌá nī lugar chi caaⁿꞌmaⁿ ꞌiiⁿꞌyāⁿ chi canncheꞌéí yā ndísꞌtiī ndúúcū nduudu chi tonta ti ngaⁿꞌá yā chi cuuvi diíⁿ nī nducuéⁿꞌē chi nguɛɛ nꞌdaacā. Caati cáávā nducuéⁿꞌē chuū ní Ndyuūs diíⁿ yā diituu cá castigar ꞌiiⁿꞌyāⁿ sꞌeeⁿ chi nguɛ́ɛ́ nꞌgiindiveéⁿ yā nduudu yeⁿꞌe Ndyuūs. 7 Ní ndísꞌtiī nguɛ́ɛ́ nduuvidaamá nī ndúúcū ꞌiiⁿꞌyāⁿ sꞌeeⁿ ní nguɛ́ɛ́ diíⁿ nī mar ꞌáámá chi diíⁿ yā.

8 Ndísꞌtiī ní tiempo chi ꞌāā chóꞌōo chꞌɛɛtinée nī ndúúcū yááⁿnꞌguiinūuⁿ na maāiⁿ, naati maaⁿ ní chi ndísꞌtiī ní yeⁿꞌē Señor Jesucristo, ndísꞌtiī canée nī na chidɛɛvɛ yeⁿꞌe Señor miiⁿ. Ní maaⁿ ní cuɛɛti chiicá nī na chidɛɛvɛ miiⁿ tanꞌdúúcā chi ndísꞌtiī ní daiyá Ndyuūs ndísꞌtiī. 9 Ní chuū ꞌiiⁿꞌyāⁿ diíⁿ yā taachi snée yā chidɛɛvɛ yeⁿꞌé Ndyuūs. Tanducuéⁿꞌē chi nꞌdaacā ndúúcū tanducuéⁿꞌē chí cuaacu diíⁿ yā. Ní chꞌiⁿꞌí yā na vida yeⁿꞌe maáⁿ yā chi nꞌdaacá yā. Chuū ní tanꞌdúúcā nꞌguiꞌi yeⁿꞌe yáⁿꞌá ti nꞌguiꞌi yeⁿꞌē chídɛɛvɛ miiⁿ ní ꞌtíícā. 10 Ní caanú nī diíⁿ nī caꞌcueéⁿ nī nducuéⁿꞌē chi Ndyuūs neⁿꞌé yā chi diíⁿ nī. 11 Ní ndísꞌtiī nguɛ́ɛ́ diíⁿ nī mar ꞌáámá chi nguɛ́ɛ́ dichííꞌvɛ̄ ndúúcū ꞌiiⁿꞌyāⁿ chi chiicá yā na maāiⁿ naati caaⁿꞌmáⁿ nī ꞌiiⁿꞌyāⁿ chi chiicá yā na maāiⁿ chɛ́ɛ́ chi nguɛ́ɛ́ nꞌdaacā chi diíⁿ yā nanááⁿ Dendyuūs. 12 Sꞌuuúⁿ cuuvi ꞌcuinaaⁿ yú nduuti chi caaⁿꞌmaⁿ yú yeⁿꞌe denduꞌū nuuⁿndi chꞌɛɛtɛ chi ꞌiiⁿꞌyāⁿ diíⁿ yā taachi dinꞌdéꞌei yā. 13 Ní taachi ngaⁿꞌá nī ꞌiiⁿꞌyāⁿ sꞌeeⁿ yeⁿꞌe tanducuéⁿꞌē chi nguɛ́ɛ́ nꞌdaacā chí diíⁿ yā tuuꞌmi ní canéé na chidɛɛvɛ. Ní Ndyuūs chꞌiⁿꞌí yā ꞌiiⁿꞌyāⁿ nducuéⁿꞌē tanꞌdúúcā chi diíⁿ yā, ti ꞌāā ntɛ́ɛ́ canúúⁿ nꞌdeꞌei. 14 Canéé nguūⁿ na libro yeⁿꞌé Ndyuūs. Cáávā chuū ní Ndyuūs ngaⁿꞌa yā ꞌtíícā :

15 Cáávā chuū ndísꞌtiī ní nadacadíínuuⁿ nꞌdaacá nī yeⁿꞌe chi diíⁿ nī. Nguɛ́ɛ́ diíⁿ nī tanꞌduucā chi ndísꞌtiī ꞌiiⁿꞌyāⁿ zonzo ndísꞌtiī naati diíⁿ nī tanꞌduucā chi ndísꞌtiī ꞌiiⁿꞌyāⁿ deenu ndísꞌtiī. 16 Ní diíⁿ nī aprovechar tiempo chi vɛ́ɛ́ yeⁿꞌé nī chi dinꞌdaacá nī caati tiempo ꞌcūū ꞌiiⁿꞌyāⁿ diíⁿ yā denduꞌū chi nguɛ́ɛ́ nꞌdaacā. 17 Nguɛ́ɛ́ diíⁿ nī tanꞌdúúcā ꞌiiⁿꞌyāⁿ chi nguɛ́ɛ́ tuumicadíínuuⁿ yā ti zonzo yā naati diiⁿnúú yiiⁿnuⁿ nī maaⁿ níícú tuumicádíínuuⁿ nī chɛɛ chi Ndyuūs neⁿꞌé yā chi diíⁿ nī. 18 Nguɛ́ɛ́ cuuvi cuuꞌví nī ti diiiⁿ chí cuuvi ndái nī, naati itée nī lugar chi Espíritu Nꞌdai yeⁿꞌé Ndyuūs cuuví cūnee nduucú nī. 19 Ní ndeé nī ꞌáámá nī ndúúcū taama nī ndúúcū salmos, ndúúcū himnos, ndúúcū canciones chi ngaⁿꞌa yeⁿꞌé Ndyuūs. Ní ngiitá nī ní dinéⁿꞌe nī Señor Jesucristo yeⁿꞌē yú ndúúcū núúⁿmáⁿ staava yeⁿꞌé nī. 20 Ní cueⁿꞌe daāⁿmaⁿ ncaꞌá nī gracias Ndyuūs Chiida yú ndúúcū chi dúúchí Señor Jesucristo yeⁿꞌē yú caava nducuéⁿꞌē chi vɛ́ɛ́.

21 Nguɛ́ɛ́ dichꞌɛɛtɛ́ nī maáⁿ nī. Dinéⁿꞌe nī viꞌī ꞌáámá nī ndúúcū taama nī caati ꞌāā diíⁿ nī respetar Ndyuūs.

22 Ní ndísꞌtiī táⁿꞌā chi chꞌiindivaacu canee chi ꞌcaandiveéⁿ nī yeⁿꞌe isaⁿꞌā yeⁿꞌé nī tanꞌdúúcā chí chꞌiindiveéⁿ nī nduudu yeⁿꞌé Ndyuūs ti isaⁿꞌā yeⁿꞌé nī tanꞌduucā ꞌiiví nī, ꞌtíícā sa. 23 Caati isaⁿꞌā yeⁿꞌé nī ní tanꞌdúúcā tiīiⁿ yeⁿꞌe familia, ꞌtíícā sa. ꞌTiicá ntúūⁿ tanꞌdúúcā Cristo ní tiīiⁿ ꞌiiⁿꞌyāⁿ chi iꞌtéénu yā ꞌyā, Cristo ntúūⁿ ꞌiiⁿꞌyāⁿ chi nadanguáⁿꞌai yā nducyaaca ꞌiiⁿꞌyāⁿ chi iꞌtéénu yā ꞌyā. Ní nducyáácá ꞌiiⁿꞌyāⁿ chi iꞌtéénu yā Cristo, ꞌiiⁿꞌyāⁿ sꞌeeⁿ tanꞌduucā cuerpo yeⁿꞌe Cristo, ꞌtiicá yā. 24 Ní tanꞌduucā ꞌiiⁿꞌyāⁿ chi iꞌtéénu yā Cristo canee yā maaⁿ poder yeⁿꞌe Cristo ꞌtiicá ntúūⁿ táⁿꞌā canee tá maaⁿ poder yeⁿꞌe isaⁿꞌā yeⁿꞌe tá ní canee chi ꞌcaandiveeⁿ tá yeⁿꞌē sa.

25 Ní ndísꞌtiī chi isaⁿꞌā chí chꞌiindivaacu canee chi neⁿꞌé nī nꞌdaataá yeⁿꞌé nī tanꞌduucā Cristo neⁿꞌé yā ꞌiiⁿꞌyāⁿ yeⁿꞌe yaacu yeⁿꞌé yā. Ní Cristo ncaꞌa maáⁿ yā vida yeⁿꞌe maáⁿ yā ní chꞌīi yā cáávā ꞌiiⁿꞌyāⁿ chi yeⁿꞌé yā. 26 Ní ꞌtíícā chꞌiī Cristo caati sꞌuuúⁿ cuuvi ꞌiiⁿꞌyāⁿ yeⁿꞌé yā sꞌuuúⁿ caavā ntiiⁿnyuⁿ chi diíⁿ yā. Ní Cristo didɛɛvɛ́ yā ꞌiiⁿꞌyāⁿ cucáávā nuūⁿnīⁿ ní cucáávā nduudu yeⁿꞌé yā. 27 Ní Cristo candɛ́ɛ yā ꞌiiⁿꞌyāⁿ chí yeⁿꞌé yā nanááⁿ Ndyuūs. Ní ꞌiiⁿꞌyāⁿ sꞌeeⁿ ní ngii nꞌgai ní dɛɛvɛ yā. Ní nguɛ́ɛ́ falta yeⁿꞌé yā, ndíí nguɛ́ɛ́ vɛ́ɛ́ mar ꞌáámá nuuⁿndi yeⁿꞌé yā, ndíí nguɛ́ɛ́ ꞌáámá denduꞌū chi nguɛ́ɛ́ cuaacu na vida yeⁿꞌé yā, ndíí nguɛ́ɛ́ vɛ́ɛ́ mar ꞌáámá denduꞌū chi ꞌtúúcā. Ní ꞌiiⁿꞌyāⁿ chi yeⁿꞌé yā ní núúⁿmáⁿ yā ní yeⁿꞌé Cristo. Ní nguɛ́ɛ́ vɛ́ɛ́ mar ꞌáámá chi nguɛ́ɛ́ nꞌdaacā yeⁿꞌé ꞌiiⁿꞌyāⁿ sꞌeeⁿ. 28 Ní isaⁿꞌā chí chꞌiindivaacú canéé chí dinéⁿꞌe sa nꞌdaataá yeⁿꞌē sa tanꞌdúúcā chi neⁿꞌe sa maaⁿ sa cuerpo yeⁿꞌe sa, ꞌtíícā nꞌdaataá yeⁿꞌē sa. Ní saⁿꞌa chi dinéⁿꞌe sa nꞌdaataá yéⁿꞌē sa neⁿꞌe maaⁿ sa saⁿꞌā. 29 Nguɛ́ɛ́ vɛ́ɛ́ mar ꞌáámá ꞌiiⁿꞌyāⁿ chi nguɛ́ɛ́ neⁿꞌé maáⁿ yā cuerpo yeⁿꞌé yā, naati ngaꞌa maáⁿ yā chiiⁿ chi nꞌdaacā chi cuuvi yeⁿꞌé yā. Ní maáⁿ yā diíⁿ yā cuidar cuerpo yeⁿꞌe maáⁿ yā. ꞌTiicá ntúūⁿ Cristo dinéⁿꞌe yā ní diíⁿ yā cuidar nducyaaca ꞌiiⁿꞌyāⁿ chi iꞌtéénu yā ꞌyā. 30 ꞌTíícā diíⁿ Cristo ti ꞌiiⁿꞌyāⁿ sꞌeeⁿ chi yeⁿꞌé yā ní tanꞌdúúcā cuerpo yeⁿꞌé yā ꞌtíícā ꞌiiⁿꞌyāⁿ sꞌeeⁿ. Ní sꞌuuúⁿ ní tanꞌdúúcā ꞌáámá parte yeⁿꞌe cuerpo yeⁿꞌe Cristo ꞌtíícā sꞌuuúⁿ. 31 Ní ꞌtiicá ntúūⁿ saⁿꞌā iꞌneeⁿ sa chɛɛcu sa ndúúcū chiida sa ní nduuvidaama sa ndúúcū nꞌdaataá yeⁿꞌē sa ní nduu ꞌuuví yā nduuvidaamá yā ní diíⁿ yā tanꞌdúúcā chi ꞌáámá cuerpo nūuⁿ. 32 Chuū ní ꞌáámá vaadī cuaacu na libro yeⁿꞌé Ndyuūs, ní ngaⁿꞌá ngií ndísꞌtiī yeⁿꞌe chuū. Nduudu miiⁿ ngaⁿꞌā yeⁿꞌe Cristo ndúúcū ꞌiiⁿꞌyāⁿ chi iꞌtéénu yā Cristo ní yeⁿꞌé yā ꞌiiⁿꞌyāⁿ sꞌeeⁿ. 33 Maaⁿ ní neⁿꞌé caaⁿꞌmáⁿ caꞌáámá cāꞌaama ndísꞌtiī chi saⁿꞌā chí ꞌníínívaacu, canee chi neⁿꞌe nī nꞌdaataá yeⁿꞌe nī tanꞌdúúcā chi neⁿꞌé nī maáⁿ nī. Ní ndísꞌtiī nꞌdaataá canéé chi dinéⁿꞌe nī isaⁿꞌā yeⁿꞌé nī ni ꞌcaandiveéⁿ nī yeⁿꞌe sa.