3 Taachi ngaⁿꞌanguaꞌá ꞌnū, ꞌúú ndúúcū Timoteo cueⁿꞌe daāⁿmaⁿ caꞌá ꞌnū gracias Ndyuūs Chiidá Señor Jesucristo yeⁿꞌe yú caavā ndísꞌtiī. 4 ꞌTíícā diíⁿ ꞌnū ti caati náⁿꞌā hermanos yeⁿꞌe yú ndaá yā nanááⁿ núsꞌuu ꞌāā yaaꞌví yā yeⁿꞌē ndísꞌtiī tanꞌdúúcā chi iꞌtéénu nī Cristo Jesús ní tanꞌdúúcā chi dineⁿꞌe nī nducyáácá ꞌiiⁿꞌyāⁿ chi yeⁿꞌe Ndyuūs. 5 Chuū ní cucáávā chí snéé ngiinú nī chiiⁿ chi cuuvi yeⁿꞌé nī chi Ndyuūs nguáínꞌdai yā na vaꞌai chɛɛti nguuvi cáávā ndísꞌtiī. Ní ꞌāā chꞌiindiveéⁿ nī nduudu cuaacu chi yeⁿꞌé Cristo. Ní nduudu cuaacu miiⁿ ní cuuvi nanguaⁿꞌai ꞌiiⁿꞌyāⁿ ní vɛ́ɛ́ chi cuuvi yeⁿꞌé nī. 6 Ní nduudu miiⁿ ní ꞌiiⁿꞌyāⁿ ngaⁿꞌá yā nanááⁿ ndísꞌtiī, ní maaⁿ ní ꞌiiⁿꞌyāⁿ ngaⁿꞌá yā nanááⁿ ꞌiiⁿꞌyāⁿ chi snee núúⁿmáⁿ iⁿꞌyeēⁿdī. Ní tanꞌdúúcā ꞌáámá cosecha chi vɛ́ɛ́ nꞌguiꞌi yeⁿꞌē, ꞌtíícā nduudu miiⁿ caati nꞌgiita nduudu miiⁿ. ꞌTiicá ntúūⁿ nduudu miiⁿ ꞌcuiita na staava yeⁿꞌe ndísꞌtiī ndii nguuvi chí chꞌiindiveéⁿ nī yeⁿꞌē. Ní tuumicadíínuuⁿ cá nī chɛɛ̄ chi cuaacu yeⁿꞌe vaadī nꞌdai yeⁿꞌe Ndyuūs yeⁿꞌē yú chi Ndyuūs tee yā sꞌuuúⁿ ní taacā Ndyuūs dineⁿꞌé yā sꞌuuúⁿ. 7 Chuū ní chꞌeéⁿ nī yeⁿꞌe saⁿꞌā Epafras chi saⁿꞌā chi neené neⁿꞌe yú. Ní dáámá nginnee sa sꞌuuúⁿ. Ní ꞌáámá canee sa na ntiiⁿnyuⁿ yeⁿꞌé Cristo. Ní diiⁿ sa ntiiⁿnyuⁿ yeⁿꞌe Cristo nguaaⁿ ndísꞌtiī. 8 Saⁿꞌā miiⁿ ní ndaa sa nanááⁿ núsꞌuu ní ngaⁿꞌa cuaacu sa yeⁿꞌe ndísꞌtiī. Ní ngaⁿꞌa sa chi ndísꞌtiī dineⁿꞌé nī ꞌiiⁿꞌyāⁿ caati Espíritu Nꞌdai yeⁿꞌé Ndyuūs caneé yā ndúúcū ndísꞌtiī.

9 Ní cáávā chuū ntúūⁿ núsꞌuu ndii tiempo chi chꞌiindiveéⁿ ꞌnū yeⁿꞌe ndísꞌtiī nguɛ́ɛ́ sꞌneeⁿ naaⁿ ꞌnū caⁿꞌanguaꞌá ꞌnū caavā ndisꞌtiī. Ngiicá ꞌnū chi maaⁿ Ndyuūs chꞌiⁿꞌí yā ndísꞌtiī nducuéⁿꞌē chi neⁿꞌé yā chi diíⁿ nī. Ní ngiicá ꞌnū Ndyuūs chi Espíritu Nꞌdai yeⁿꞌé Ndyuūs tée yā ndísꞌtiī nducuéⁿꞌe vaadī deenu ndúúcū vaanīcadíínūuⁿ chi yeⁿꞌé Ndyuūs. 10 Ngaⁿꞌanguaꞌá ꞌnū chi ndísꞌtiī cuuvi ꞌcuɛɛtinéé nꞌdaacá nī nanááⁿ Jesucristo ti yeⁿꞌé yā sꞌuuúⁿ. Ní cueⁿꞌe daāⁿmaⁿ diíⁿ nī tanꞌdúúcā chi neⁿꞌe Señor yeⁿꞌe yú. Ní ꞌíícú vɛ́ɛ́ nꞌguiꞌi yeⁿꞌé nī yeⁿꞌe tanducuéⁿꞌē chi nꞌdaacā chi idiíⁿ nī. Ní cuuvi ꞌcueēⁿ ca nī yeⁿꞌe vaadī deenu chí yeⁿꞌe Dendyuūs. 11 Ngiicá ꞌnū Ndyuūs chi tée yā ndísꞌtiī poder yeⁿꞌé yā chí chꞌɛɛtɛ ca chí cuuvi diíⁿ nī ntiiⁿnyuⁿ yeⁿꞌé nī ndúúcū poder chi yeⁿꞌé Ndyuūs. Ní ꞌíícú ndúúcū paciencia cuuvi cuchɛɛ́ nī yeⁿꞌe tanducuéⁿꞌē chi ꞌiiⁿꞌyāⁿ diíⁿ yā ndúúcu nī. Ní yeenú nī. 12 Ní ndísꞌtiī canéé chi caꞌá nī gracias Ndyuūs Chiida yú caati Ndyuūs diíⁿ yā ndúúcu yú chí vɛ́ɛ́ parte yeⁿꞌe yú naachi cuuvi yeⁿꞌe yú ndúúcū ꞌiiⁿꞌyāⁿ sꞌeeⁿ chi iꞌtéénu yā Cristo. Ní caⁿꞌa yā chi tée yā sꞌuuúⁿ chi cuuvi yeⁿꞌe yú ndúúcū ꞌiiⁿꞌyāⁿ sꞌeeⁿ chi yeⁿꞌé yā taachi ndaa yú na lugar chí dɛɛvɛ ca naachi Ndyuūs ngaⁿꞌa ntiiⁿnyúⁿ yā yeⁿꞌē. 13 Canéé chi caꞌá nī gracias Ndyuūs caati nadanguáⁿꞌai yā sꞌuuúⁿ yeⁿꞌe saⁿꞌā chi ngaⁿꞌā ntiiⁿnyuⁿ yeⁿꞌe maaíⁿ. Ní Ndyuūs dichoꞌó yā sꞌuuúⁿ naachi canéé Jesucristo chí ngaⁿꞌā ntiiⁿnyúⁿ yā. Jesucristo ní Daiyá Ndyuūs chi Ndyuūs neⁿꞌe taaví yā. 14 Níícú Jesucristo cuaí yā sꞌuuúⁿ ndúúcū precio chi yuūúⁿ yeⁿꞌé yā taachi chꞌīi yā na cruz cucáávā sꞌuuúⁿ. Ní cáávā chuū Ndyuūs nadachꞌɛɛcú yā sꞌuuúⁿ yeⁿꞌe nuūⁿndī yeⁿꞌe yú.

15 Jesucristo ní tanꞌdúúca Ndyuūs chiida yú chi nguɛ́ɛ́ inaaⁿ yú, ꞌtiicá yā. Ní Cristo miiⁿ ꞌāā canéé yā vmnááⁿ vmnaaⁿ chi dinꞌdái yā núúⁿmáⁿ íⁿꞌyeeⁿdī. 16 Ní Ndyuūs yeⁿꞌe yú ndúúcū Cristo miiⁿ dinꞌdái yā tanducuéⁿꞌē denduꞌū chi vɛ́ɛ́. Dinꞌdái yā tanducuéⁿꞌē denduꞌū chi vɛ́ɛ́ nanguuvi. ꞌTiicá ntúūⁿ na yáⁿꞌāa yeⁿꞌē chi inaaⁿ yú ndúúcū yeⁿꞌē chi nguɛ́ɛ́ inaaⁿ yú. Nꞌdáá rá chi vɛ́ɛ́ ángeles chi yeⁿꞌe Ndyuūs ndúúcū ángeles chi yeⁿꞌe yááⁿnꞌguiinūuⁿ chi ngaⁿꞌā ntiiⁿnyuⁿ na ꞌyúúné ndúúcū ꞌiiⁿntyéⁿꞌē chi ngaⁿꞌá yā ntiiⁿnyuⁿ yeⁿꞌē naciones na iⁿꞌyeeⁿdí ꞌcūū ndúúcū ꞌiiⁿntyéⁿꞌē ndúúcū poder yeⁿꞌe yā, tanducuéⁿꞌē ní Cristo miiⁿ dinꞌdái yā ní ꞌiivi yeⁿꞌe tanducuéⁿꞌē. 17 Cristo miiⁿ ní ngaⁿꞌa ntiiⁿnyúⁿ yā yeⁿꞌe tanducuéⁿꞌē denduꞌū. Ní Cristo miiⁿ diíⁿ yā chi tanducuéⁿꞌē denduꞌū chi vɛ́ɛ́ canéé lugar yeⁿꞌē ndúúcū orden. 18 Ní Cristo miiⁿ ní tiíⁿ yā yeⁿꞌe cuerpo chi yaācū yeⁿꞌe yā chi nducyaaca ꞌiiⁿꞌyāⁿ chi iꞌtéénu yā Cristo. Ní caꞌá yā vida ꞌiiⁿꞌyāⁿ chi yeⁿꞌe cuerpo yeⁿꞌé yā. Ní Cristo miiⁿ vmnááⁿ vmnaaⁿ ꞌiiⁿꞌyāⁿ chi nduuchí yā yeⁿꞌē nguaaⁿ tináⁿꞌā, caati lugar chi vmnááⁿ vmnaaⁿ cuuvi yeⁿꞌé yā yeⁿꞌe nducuéⁿꞌē denduꞌū chi vɛ́ɛ́. 19 Ní Ndyuūs Chiida yú neⁿꞌé yā chi Cristo miiⁿ caneé yā ndúúcū nducuéⁿꞌē poder chi yeⁿꞌé Ndyuūs. 20 Ní cucáávā Cristo miiⁿ Ndyuūs Chiida yú neⁿꞌé yā diíⁿ yā chi cuuvi yeⁿꞌé Cristo tanducuéⁿꞌē denduꞌū taama vmnéⁿꞌēe tanꞌdúúcā tanducuéⁿꞌē chi vɛ́ɛ́ vmnááⁿ vmnaaⁿ na vaꞌai chɛɛti nguuvi. ꞌTiicá ntúūⁿ cuuvi yeⁿꞌé yā tanducuéⁿꞌē chi vɛ́ɛ́ na iⁿꞌyeeⁿdí ꞌcūū. Ní diíⁿ yā chi vɛ́ɛ́ vaadī ꞌdiiíⁿ cáávā yuuúⁿ yeⁿꞌē Jesucristo chi canꞌdaā taachi chꞌīi yā na cruz.

21 Ní tiempo chi ꞌāā chóꞌōo ndísꞌtiī ní tanꞌdúúcā ꞌiiⁿꞌyāⁿ chi snúuⁿ yā yúúní ꞌtíícā ndísꞌtiī. Ní nguɛɛ deenú nī Ndyuūs caati diíⁿ nī cosas chi nguɛ́ɛ́ nꞌdaāca. Ní ndísꞌtiī ní contra yeⁿꞌe Ndyuūs ndísꞌtiī. Ní nguɛ́ɛ́ nꞌdaacā staava yeⁿꞌé nī. Naati maaⁿ ní Ndyuūs nchꞌɛɛcú yā nuuⁿndi yeⁿꞌe ndísꞌtiī. Maaⁿ ní amigos yeⁿꞌé Ndyuūs ndísꞌtiī. 22 Ní diíⁿ yā chi nduuvidaamá nī ndúúcū Ndyuūs cáávā chi cuerpo yeⁿꞌe Jesucristo chꞌiī na cruz. Ní Jesucristo chꞌīi yā caavā sꞌuuúⁿ chi ndaa yā ndúúcū sꞌuuúⁿ nanááⁿ Ndyuūs Chiida yú. Ní Cristo chꞌiⁿꞌí yā chi sꞌuuúⁿ ní yeⁿꞌé Ndyuūs sꞌuuúⁿ ní dɛɛvɛ vida yeⁿꞌē yú. Níícu ꞌāā ntɛ́ɛ́ caaⁿꞌmaⁿ Ndyuūs chi vɛ́ɛ́ nuuⁿndi yeⁿꞌe yú. 23 Maaⁿ ní canee chi iꞌtéénu nꞌdaacá nī nduudu cuaacu ní cunee diitú nī ndúúcū chi iꞌtéénu nī chi yeⁿꞌe Cristo. Ní cuꞌtéénu cá nī nduudu cuaacu yeⁿꞌe Jesucristo chi chꞌiⁿꞌi chɛ́ɛ́ chi cuuvi yeⁿꞌe yú ní yeⁿꞌē chi cunee ngiinu yú. Ní nguɛ́ɛ́ divíi nī yeⁿꞌe nduudu cuaacu yeⁿꞌe Jesucristo ti nꞌdaacā canee nī nanáaⁿ yā ní cunee ngiinu cá nī. Nduudu cuaacú ꞌcūū yeⁿꞌe Jesucristo miiⁿ maaⁿ ní ꞌiiⁿꞌyāⁿ sꞌeeⁿ cheⁿꞌe yā candɛɛ yā chí cuuvi yeⁿꞌē nducyáácá ꞌiiⁿꞌyāⁿ chi snéé na iⁿꞌyeeⁿdí ꞌcūū. Ní nduudu cuaacu miiⁿ chiiⁿ chi ꞌúú Pablo ngaⁿꞌa caati ꞌtíícā ntiiⁿnyuⁿ yeⁿꞌé.

24 Maaⁿ ní yeenú taaví yeⁿꞌē chi nꞌgeenú ngii cucáávā ndísꞌtiī chi iꞌtéénu nī nduudú ꞌcūū. Ní ꞌtíícā maaⁿ ní yeenú taaví chi ꞌcueenú cuuvi na cuerpo yeⁿꞌé tanꞌdúúcā chi chꞌeenú chiī Cristo na cuerpo yeⁿꞌe yā cucáávā ꞌiiⁿꞌyāⁿ chi iꞌtéénu yā ꞌiiⁿꞌyāⁿ ní yeⁿꞌe cuerpo yeⁿꞌe yā. Ní ꞌtíícā diíⁿ cumplir vaadī yaꞌai yeⁿꞌe Cristo cucáávā ꞌiiⁿꞌyāⁿ yeⁿꞌe yā. 25 Ndyuūs tee yā ntiiⁿnyuⁿ ꞌcūū yeⁿꞌé chi diíⁿ ntiiⁿnyuⁿ yeⁿꞌe yaacū yeⁿꞌé yā. Ní diíⁿ ntiiⁿnyuⁿ yeⁿꞌe Ndyuūs nguaaⁿ ndísꞌtiī chi nguɛ́ɛ́ yeⁿꞌē ndaata Israel caati ꞌtííca cuuvi cuaacu nduudu yeⁿꞌe Ndyuūs chi ngaⁿꞌa ndii cuááⁿ vmnaaⁿ. 26 Ní nduudú ꞌcūū nguɛ́ɛ́ deenú ꞌiiⁿꞌyāⁿ caati canúúⁿ nꞌdeꞌei ndii tiempo chi ꞌāā ꞌcuɛ́ɛ́ ꞌiiⁿꞌyāⁿ iⁿꞌyeeⁿdí ꞌcūū, naati maaⁿ ní chuū chꞌiⁿꞌi Cristo nanááⁿ ꞌiiⁿꞌyāⁿ yeⁿꞌé yā. 27 Níícú Ndyuūs neⁿꞌé yā chi nducyáácá ꞌiiⁿꞌyāⁿ chi yeⁿꞌé yā, ꞌiiⁿꞌyāⁿ chi Israel sꞌeeⁿ yā ndúúcū ꞌiiⁿꞌyāⁿ chí nguɛ́ɛ́ Israel sꞌeeⁿ yā, nducyaaca yā cuuvi deenú yā vaadī ꞌcuiica yeⁿꞌē chi canúúⁿ nꞌdeꞌei. Chuū ní secreto miiⁿ. Cristo caneé yā ndúúcū ndísꞌtiī chi nguɛ́ɛ́ ꞌiiⁿꞌyāⁿ Israel yā. Ní ndúúcū Cristo miiⁿ snee ngiinú nī chi caⁿꞌá nī na vaꞌai chɛɛti nguuvi.

28 Núsꞌuu ní ngaⁿꞌá ꞌnū nduudu cuaacu yeⁿꞌé Cristo nanááⁿ nducyaaca ꞌiiⁿꞌyāⁿ. Ní nducuéⁿꞌē ngiꞌcueéⁿ ꞌnū ꞌiiⁿꞌyāⁿ ndúúcū vaadī deenu caati cuuvi deenú nꞌdaacá yā nduudu cuaacu yeⁿꞌé Ndyuūs. Ní cuuvi yeⁿꞌé Cristo ꞌiiⁿyāⁿ ní nꞌdaacā caneé yā nanááⁿ Jesucristo. 29 Ní cáávā chuū ꞌúú idiíⁿ ntiiⁿnyúⁿ ꞌcūū, ní diíⁿ diituú taavi nducuéⁿꞌē tiempo ndúúcū nducuéⁿꞌē poder chi Ndyuūs itée yā ꞌúú.