CARTA VMNÁÁⁿ VMNAAⁿ YEⁿꞌE ꞌIIⁿꞌYĀⁿ YEⁿꞌE YÁĀⁿ TESALÓNICA
Pablo ndúúcū compañeros yeⁿꞌé yā idinguúⁿ yā carta ꞌcūū yeⁿꞌe ꞌiiⁿꞌyāⁿ yeⁿꞌe yaācū na yáāⁿ Tesalónica
1
ꞌÚú, Pablo, idinguúⁿ carta ꞌcūū ndúúcū saⁿꞌa Silvano ndúúcū saⁿꞌā Timoteo yeⁿꞌe hermanos yeⁿꞌe yú chi caⁿꞌá yā na yaācū yeⁿꞌe yáāⁿ Tesalónica, ꞌiiⁿꞌyāⁿ chi yeⁿꞌé Ndyuūs Chiida yú níícú yeⁿꞌé Señor Jesucristo. Neⁿꞌé ꞌnū chi Ndyuūs Chiida yú ndúúcū Señor Jesucristo tée yā ndísꞌtiī nducuéⁿꞌē vaadī nꞌdai yeⁿꞌé yā, ní vaadī ꞌdiīíⁿ yeⁿꞌé yā canee na staava yeⁿꞌé nī.ꞌIiⁿꞌyāⁿ yeⁿꞌe yáāⁿ Tesalónica dinꞌdaacá yā ní diitu iꞌtéénu yā Jesucristo
2 Caꞌá ꞌnū gracias nanááⁿ Ndyuūs cáávā nducyaaca ndísꞌtiī ní taachi caaⁿꞌmaⁿnguaꞌá ꞌnū ininꞌgáácú ꞌnū yeⁿꞌe ndísꞌtiī. 3 Ní taachi ngaⁿꞌanguaꞌá ꞌnū nanááⁿ Ndyuūs Chiida yú, ngaⁿꞌanguaꞌá ꞌnū yeⁿꞌe ntiiⁿnyuⁿ chi diíⁿ nī caati iꞌtéénu cá nī ní chí neⁿꞌe cá nī nducyaaca ꞌiiⁿꞌyāⁿ ní chí nginnee yā ꞌiiⁿꞌyāⁿ. Ní cuchɛ́ɛ nī yeⁿꞌe tanducuéⁿꞌē. Ní ꞌáámá caneé nī ndúúcū chi iꞌtéénu nī caati cūnee ngiinú nī chi Señor Jesucristo yeⁿꞌē yú caⁿꞌá yā tée yā chiiⁿ chi cuuvi yeⁿꞌé nī. 4 Ndísꞌtiī, hermanos yeⁿꞌé ꞌnū, Ndyuūs neⁿꞌé yā ndísꞌtiī. Ní deenú ꞌnū chi Ndyuūs ndɛɛvɛ yā ndísꞌtiī chi ndísꞌtiī cuuvi yeⁿꞌé yā ndísꞌtiī. 5 Taachi ngaⁿꞌa ꞌnū nduudu cuaacu yeⁿꞌé Ndyuūs nanááⁿ ndísꞌtiī nguɛɛ dámaāⁿ ngaⁿꞌá ꞌnū nduudu miiⁿ ndúúcū nduudu yeⁿꞌé ꞌnū ti ndúúcū poder yeⁿꞌē Espíritu Nꞌdai yeⁿꞌé Ndyuūs. Ní deenú ꞌnū chi nduudu cuaacu miiⁿ ní cuaacu. Ndísꞌtiī ní deenú nī duꞌu saⁿꞌā núsꞌuu taachi caneé ꞌnū ndúúcū ndísꞌtiī ni táácā diíⁿ ꞌnū caati maáⁿ nī cuuvi ꞌcuɛɛtinéé nꞌdaaca nī.
6 Ni ndísꞌtíī ní ꞌāā diiⁿ nī tanꞌdúúcā chi núsꞌuu diíⁿ ꞌnū ní tanꞌdúúcā chi diiⁿ Señor Jesucristo yeⁿꞌē yú. Ní iꞌtéénu nī nduudu cuaacu yeⁿꞌé Ndyuūs. Ní yeenú nī ndúúcū vaadī yeenú chi Espíritu Nꞌdai yeⁿꞌé Ndyuūs tee yā ndísꞌtiī ꞌáárá chí chꞌeenú nī chiī cucáávā chi iꞌtéénu nī. 7 Ní cucáávā chi diíⁿ nī ꞌtuucā nducyáácá ꞌiiⁿꞌyāⁿ chi iꞌtéénu yā Señor Jesucristo, ꞌiiⁿꞌyāⁿ yeⁿꞌe núúⁿmáⁿ yáⁿꞌāa Macedonia ndúúcū núúⁿmáⁿ yáⁿꞌāa Acaya cuuvi cutaꞌá ndísꞌtiī tanꞌdúúcā ꞌáámá ejemplo ní diíⁿ yā tanꞌdúúcā chi diíⁿ nī. 8 Ní ndísꞌtiī diiⁿ nī chi tanáⁿꞌā ꞌiiⁿꞌyāⁿ cuuvi déénu yā nduudu cuaacu yeⁿꞌe Señor. Nguɛɛ dámaaⁿ ꞌiiⁿꞌyāⁿ yeⁿꞌe yáⁿꞌāa Macedonia ndúúcū ꞌiiⁿꞌyāⁿ yeⁿꞌe yáⁿꞌāa Acaya naati ꞌiiⁿꞌyāⁿ yeⁿꞌe nducuéⁿꞌē cuaāⁿ ꞌāā deenú yā chi ndisꞌtiī iꞌtéénu nī Ndyuus. Ní nguɛɛ canéé chi caaⁿꞌmaⁿ cá ꞌnū dɛꞌɛ̄ vɛɛ yeⁿꞌe nī ti nꞌdaacā iꞌtéénu nī. 9 Ní nducyaaca ꞌiiⁿꞌyāⁿ ngaⁿꞌa yā núsꞌuu yeⁿꞌe visita yeⁿꞌé ꞌnu taachi caneé ꞌnū nguaaⁿ ndísꞌtii. Ni ngaⁿꞌa yā tanꞌdúúcā chi ndísꞌtiī sꞌnéeⁿ nī ídolos caavā chi cuꞌtéénu nī Ndyuūs chí canduuchi, Ndyuūs chí cuáácú chi Ndyuūs. Ní tucaꞌá nī diíⁿ nī ntiiⁿnyuⁿ yeⁿꞌé Ndyuūs. 10 ꞌTiicá ntúūⁿ ngaⁿꞌa yā chi ndísꞌtiī cūnee ngiinú nī chi Jesucristo chi Daiya Ndyuūs ní ndaa yā taama vmnéⁿꞌēe yeⁿꞌē vaꞌai chɛɛti nguuvi. Ndyuūs nadaꞌcueeⁿ yā Jesús miiⁿ yeⁿꞌē nguaaⁿ tináⁿꞌā. Níícú Jesucristo miiⁿ ní ꞌiiⁿꞌyāⁿ chi nadanguáⁿꞌai yā sꞌuuúⁿ yeⁿꞌē castigo chi neené díítūu yeⁿꞌe tiempo chi cuchiī.