3 Ndísꞌtiī hermanos yeⁿꞌe yú, cueⁿꞌe daāⁿmaⁿ canéé chi caꞌá ꞌnū gracias Ndyuūs cucáávā ndísꞌtiī caati nꞌdaacā chi diíⁿ ꞌnū ꞌtíícā. Caati deenú ꞌnū chi nguuvi nguuvi caꞌáámá caꞌáámá ndísꞌtiī ní iꞌtéénu ca nī ní neⁿꞌe cá nī nducyaaca nī ꞌaamá nī ndúúcū taama nī. 4 Níícú taachi ngaⁿꞌá ꞌnū ngii ꞌnū hermanos yeⁿꞌe yú yeⁿꞌe ndísꞌtiī, tuuꞌmi ngaⁿꞌá ꞌnū chi yeenú ꞌnū caati chꞌɛɛtinéé nꞌdaacá nī nducyaaca nī chi caⁿꞌá nī na yaācū yeⁿꞌé Ndyuūs yeⁿꞌē yú, ní cáávā chi ndísꞌtiī ní chꞌiⁿꞌí nī ndúúcū nducuéⁿꞌē chi nꞌgeenú nī ngii ní ndúúcū cosas chi díítūu chi chóꞌōo yeⁿꞌé nī chi vɛ́ɛ́ paciencia yeⁿꞌé nī. Ní nꞌdaacā iꞌteenú nī. 5 Ní chuū ní cuaacu chꞌiⁿꞌi chi Ndyuūs ní diíⁿ yā juzgar ꞌiiⁿꞌyāⁿ ndúúcū vaadī cuaacu caati Ndyuūs diíⁿ yā chi ndísꞌtiī chꞌiⁿꞌí nī chi nꞌdai taaví nī chi cuuvi ndaa nī naachi Ndyuūs ngaⁿꞌa ntiiⁿnyúⁿ yā. Ní cáávā chuū chííⁿ chi ndísꞌtiī ní nꞌgeenú nī ngii.

6 Caati nꞌdaacā nduucú Ndyuūs chi Ndyuūs nadííꞌvɛ̄ ꞌiiⁿꞌyāⁿ chi idiiⁿ chí ndísꞌtiī nꞌgeenú nī ngii ndúúcū chi ꞌcueenú yā cuuvi. 7 Tiempo taachi Señor Jesucristo miiⁿ ngiicá yā yeⁿꞌē vaꞌai chɛɛti nguuvi ndúúcū ángeles yeⁿꞌé yā ndúúcū poder yeⁿꞌe yā, tuuꞌmi ní ꞌiiⁿꞌyāⁿ sꞌeeⁿ ndaa yā ná nguuchi yaⁿꞌā. Ní tiempo miiⁿ Ndyuūs teé yā ndísꞌtiī chi ꞌāā ntɛ́ɛ́ ꞌcueenú nī cuuvi. ꞌTiicá ntúūⁿ ní teé ya núsꞌuu chi ꞌāā ntɛ́ɛ́ ꞌcueenú ꞌnū cuuvi. 8 Ní ndaa yā chí caꞌa yā castigo ꞌiiⁿꞌyāⁿ chi nguɛ́ɛ́ nꞌdiichí yā Ndyuūs ndúúcū ꞌiiⁿꞌyāⁿ chi nguɛ́ɛ́ nꞌgiindiveéⁿ yā nduudu cuaacu yeⁿꞌe evangelio yeⁿꞌe Señor Jesucristo yeⁿꞌe yú chi nadanguáⁿꞌai yā ꞌiiⁿꞌyāⁿ. 9 ꞌIiⁿꞌyāⁿ sꞌeeⁿ ní cuuví yā castigados ní cueⁿꞌe daāⁿmaⁿ Ndyuūs diꞌcuiinú yā ꞌiiⁿꞌyāⁿ sꞌeeⁿ ní Ndyuūs sꞌneeⁿ yā ꞌiiⁿꞌyāⁿ sꞌeeⁿ yaⁿꞌai yeⁿꞌé yā. Ní nguɛ́ɛ́ cuuvi nꞌdiichí yā naaⁿ Ndyuūs. Ndíí nguɛ́ɛ́ ndúú cuuvi nꞌdiichí yā dɛɛvɛ taavi ca yeⁿꞌé yā ndúúcū poder yeⁿꞌé yā. 10 Ní tiempo chi ndaa Jesucristo miiⁿ nducyaaca ꞌiiⁿꞌyāⁿ chi ꞌāā iꞌtéénu yā Jesucristo ní caⁿꞌa yā dichꞌɛɛtɛ́ yā Ndyuūs. Ní ꞌiiⁿꞌyāⁿ sꞌeeⁿ ntúūⁿ caⁿꞌa yā dichꞌɛɛtɛ́ yā Ndyuūs caati iꞌtéénu nī nduudu cuaacu yeⁿꞌé Ndyuūs chi ngaⁿꞌa ꞌnū nanááⁿ nī. Ní ꞌiiⁿꞌyāⁿ sꞌeeⁿ ngeⁿꞌe yiiⁿnuⁿ yā.

11 Ní cáávā chuū cueⁿꞌe daāⁿmaⁿ ngaⁿꞌanguaꞌá ꞌnū caavā ndísꞌtiī. Ní ngiicá ꞌnū Ndyuūs yeⁿꞌe yú chí diiⁿ cuenta yā chi ndísꞌtiī ní nꞌdaacā ti yaaꞌví yā ndísꞌtiī chi cuuvi yeⁿꞌé yā ndísꞌtiī. Ní ngiicá ꞌnū Ndyuūs chi diíⁿ yā ndúúcū ndísꞌtiī ndúúcū poder yeⁿꞌé yā chi ndísꞌtiī ní cuuvi diíⁿ nī nducuéⁿꞌē chi nꞌdaācā. Ní cuuvi diíⁿ nī cumplir ntiiⁿnyuⁿ nꞌdai chi diíⁿ nī cáávā chi iꞌtéénu nī Jesucristo. 12 Ní ꞌiicu ꞌiiⁿꞌyāⁿ cuuvi dichꞌɛɛtɛ́ yā Señor Jesucristo yeⁿꞌē yú cáávā chiiⁿ chi diiⁿ ndísꞌtiī. Ní ꞌiiⁿꞌyāⁿ sꞌeeⁿ dichꞌɛɛtɛ́ yā ndísꞌtiī caati Ndyuūs yeⁿꞌē yú ndúúcū Señor Jesucristo nginneé yā ndísꞌtiī.