5
Ndísꞌtiī hermanos yeⁿꞌé ꞌnū, nguɛ́ɛ́ canee chi dinguúⁿ ꞌnū yeⁿꞌe ndísꞌtiī yeⁿꞌe chɛɛ̄ fecha o dɛꞌɛ̄ tiempo nduuti chi tiempo ꞌiichɛ o ꞌííꞌnūuⁿ taachi ndaā Señor Jesucristo taama vmnéⁿꞌēe. 2 ꞌĀā deenu nꞌdaacá nī chi nguuvi chi ndaā Señor Jesucristo ní nguuvi chi nguɛ́ɛ́ duꞌū vɛɛ deenu. Hora miiⁿ tanꞌdúúca hora yeⁿꞌe nꞌgaaⁿ chi ndaa ꞌáámá duucu chi ꞌiiⁿꞌyāⁿ nguɛ́ɛ́ déénu yā. 3 Níícú taachi ꞌtíícā ngaⁿꞌa ꞌiiⁿꞌyāⁿ: Maaⁿ ní vɛ́ɛ́ vaadī ꞌdiiíⁿ ndúúcū yú ni seguro chi nꞌdaacā canee yú tuuꞌmi dácanaaⁿ ní ndaa nanááⁿ yeⁿꞌé ꞌiiⁿꞌyāⁿ sꞌeeⁿ tiempo chi díꞌcuiinú yā ꞌiiⁿꞌyāⁿ. Ní tiempo miiⁿ ndaā tanꞌdúúcā chi ndaā vaadi yaꞌāī ngii yeⁿꞌe ꞌáámá nꞌdaataá taachi ꞌcuundiyaāⁿ daiya tá. Ní yeⁿꞌe tiempo miiⁿ ꞌiiⁿꞌyāⁿ sꞌeeⁿ ní nguɛ́ɛ́ cuuvi nánguaⁿꞌai yā yeⁿꞌē. 4 Naati ndísꞌtiī hermanos yeⁿꞌé nguɛ́ɛ́ canee nī tanꞌduucā chi nguɛ́ɛ́ deenú nī yeⁿꞌe chuū, ní ndaā tiempo miiⁿ tanꞌdúúcā tiempo chi ndaa ꞌáámá chi duucu. 5 Ní nducyaaca sꞌuuúⁿ ní yeⁿꞌe dɛɛvɛ sꞌuuúⁿ ní sꞌuuúⁿ yeⁿꞌe nguuvi sꞌuuúⁿ. Nguɛ́ɛ́ yeⁿꞌe nꞌgaaⁿ sꞌuuúⁿ ndíí nguɛ́ɛ́ yeⁿꞌe na maāiⁿ sꞌuuúⁿ. 6 Ní cáávā chuū nguɛ́ɛ́ chꞌɛɛtinee yú tanꞌdúúcā chi ꞌcuɛɛtī yaadu yú tanꞌdúúcā tanáⁿꞌā ꞌiiⁿꞌyāⁿ chi nguɛɛ cūnee ngiinú yā Señor Jesucristo yeⁿꞌe yú naati ꞌcuɛɛtī nduuchi yú, níícú cadiinuuⁿ yú. 7 ꞌIiⁿꞌyāⁿ chi cyaadu ní cyaadú yā nꞌgaaⁿ. Ní ꞌiiⁿꞌyāⁿ chi ngii cúúꞌví, ní cuuvi cúúꞌví yā nꞌgaaⁿ. 8 Naati sꞌuuúⁿ chí yeⁿꞌē nguuvi sꞌuuúⁿ ní ꞌcuɛɛtinéé yaaⁿ yú nguuvi chí ndaa Señor yeⁿꞌe yú. Ní diiⁿ yú cuidado sꞌuuúⁿ chi ꞌaama canee yú lado yeⁿꞌé Ndyuūs cucáávā chi iꞌteenu yú. Ní canee chi neⁿꞌe yú nducyaaca ꞌiiⁿꞌyāⁿ. Ní diiⁿ yú tanꞌdúúcā ꞌáámá soldado diíⁿ yā defender maáⁿ yā ndúúcū armadura yeⁿꞌé yā. Ní canee yú cūnee ngiinu yú nguuvi chi Ndyuūs nadanguáⁿꞌai yā sꞌuuúⁿ yeⁿꞌe castigo. Ní chuū ní tanꞌdúúcā ꞌaama soldado staꞌá yā cachucha yeⁿꞌe cūū yeⁿꞌé yā ní diíⁿ yā defender tiíⁿ yā nduūcū. 9 Ní Ndyuūs nguɛ́ɛ́ yaaꞌví yā sꞌuuúⁿ chi cuuvi yeⁿꞌé yā sꞌuuúⁿ caati tée yā sꞌuuúⁿ castigo chi díítūu naati caati nadanguáⁿꞌai yā sꞌuuúⁿ yeⁿꞌē castigo cucáávā Señor Jesucristo yeⁿꞌē yú. 10 Níícú Jesucristo chꞌīi yā na cruz cucááva sꞌuuúⁿ caati maaⁿ ní cuuvi caⁿꞌa yú ꞌcuɛɛtinée yú nduucú yā taachi ndaa yā ꞌáárá chí nꞌgɛɛtinée yú na iⁿꞌyeeⁿdí ꞌcūū o ꞌáárā chi ꞌāā chꞌiī yú. 11 Ní cáávā chuū ndísꞌtiī ní ncaꞌá nī ꞌviichꞌɛɛtíínūuⁿ ndísꞌtiī ní diꞌcuíítu nī ꞌaamá nī ndúúcū taamá nī tanꞌdúúcā chi maaⁿ ꞌāā idiíⁿ nī ꞌaamá nī ndúúcū taamá nī.Pablo ncaꞌá yā consejo hermanos chi yeⁿꞌe yáāⁿ Tesalónica
12 Ní diꞌcuiitú ꞌnū ndísꞌtiī chi ꞌcaandiveéⁿ nī yeⁿꞌe ꞌiiⁿꞌyāⁿ chi diiⁿ ntiiⁿnyuⁿ yeⁿꞌé Ndyuūs nguaaⁿ ndísꞌtiī caati ꞌiiⁿꞌyāⁿ miiⁿ ngaⁿꞌa ntiiⁿnyúⁿ yā ní itée yā consejo ndísꞌtiī. ꞌIiⁿꞌyāⁿ sꞌeeⁿ ní ꞌiiⁿꞌyāⁿ chi Ndyuūs dichóꞌo yā nanááⁿ ndísꞌtiī. 13 Ní canee chi nꞌgiindiveéⁿ nī ní dineⁿꞌe cá nī ꞌiiⁿꞌyāⁿ sꞌeeⁿ cucáávā chi diíⁿ yā ntiiⁿnyuⁿ yeⁿꞌé Ndyuūs. Maaⁿ ní ꞌcuɛɛtinéé nꞌdaacá nī ꞌaamá nī ndúúcū taama nī ndúúcū vaadī ꞌdiiíⁿ.
14 Ní diꞌcuiitu cá ꞌnū ndísꞌtiī hermanos yeⁿꞌe yú chi diíⁿ nī chuū tanꞌdúúcā chi idinguúⁿ ꞌnū. Caaⁿꞌmáⁿ nī cuuví nī ꞌiiⁿꞌyāⁿ chi nguɛ́ɛ́ neⁿꞌe diiⁿ ntiiⁿnyuⁿ ní cunnee nī ꞌiiⁿꞌyāⁿ chi ꞌvaꞌa. Ní caꞌá nī ꞌviichꞌɛɛtíínūuⁿ yeⁿꞌe ꞌiiⁿꞌyāⁿ chi duūvá yā. Ní canéé chi vɛ́ɛ́ paciencia yeⁿꞌé nī ndúúcū nducyaaca ꞌiiⁿꞌyāⁿ.
15 Ní nꞌdiichí nī chi dinꞌdaacá nī ndúúcū ꞌiiⁿꞌyāⁿ chi nguɛ́ɛ́ dinꞌdaacá yā nduucú nī. Naati ꞌtíícā diiⁿ núⁿú yiiⁿnuⁿ nī chi dinꞌdaacá nī ꞌáámá nī ndúúcū taamá nī ndúúcū nducyaaca ꞌiiⁿꞌyāⁿ.
16 Nducuéⁿꞌe tiempo ní yeenú nī. 17 Cueⁿꞌe daāⁿmaⁿ ngaⁿꞌanguaꞌá nī. 18 Níícú caꞌá nī gracias Ndyuūs caava nducuéⁿꞌē chi choꞌō nuúⁿ nī caati ꞌtíícā neⁿꞌé Ndyuūs yeⁿꞌē yú chi diíⁿ nī ti maaⁿ ní iꞌtéénu nī Cristo Jesús.
19 Nguɛɛ diíⁿ nī chi nguɛ́ɛ́ nꞌgiindiveéⁿ nī nduudu yeⁿꞌe Espíritu Nꞌdai yeⁿꞌé Ndyuūs. 20 Ní nguɛ́ɛ́ diíⁿ nī despreciar nduudu yeⁿꞌé Ndyuūs chi ngaⁿꞌa ꞌiiⁿꞌyāⁿ, nduudu chi Espíritu Nꞌdai yeⁿꞌé Ndyuūs caꞌa yā ꞌiiⁿꞌyāⁿ. 21 Nꞌdiichínee nī nducuéⁿꞌē denduꞌū nduuti chi nꞌdaacā o nguɛ́ɛ́. Níícú cutaꞌá nī yeⁿꞌe nducuéⁿꞌē chi nꞌdaacā ní dinꞌdaacá nī. 22 Ní divíi nī yeⁿꞌe nducuéⁿꞌē chi nꞌdiichi nī chi nguɛ́ɛ́ nꞌdaacā.
23 Ní maaⁿ ní Ndyuūs yeⁿꞌe yú tee yā vaadī ꞌdiiíⁿ sꞌuuúⁿ ní didɛɛvɛ́ nꞌdaacá yā ndísꞌtiī. Ní candɛ́ɛ yā cuidado ndísꞌtiī ndúúcū espíritu yeⁿꞌé nī ndúúcū alma yeⁿꞌé nī ndúúcū cuerpo yeⁿꞌé nī ndúúcū nducuéⁿꞌē vida yeⁿꞌé nī. Ní ꞌíícú ꞌiiⁿꞌyāⁿ cuuvi caaⁿꞌmáⁿ yā chi nguɛɛ vɛ́ɛ́ mar ꞌáámá nuuⁿndi yeⁿꞌé nī taachi ndaa Señor Jesucristo yeⁿꞌē yú taama vmnéⁿꞌēe na iⁿꞌyééⁿdi ꞌcūū. 24 Níícú Ndyuūs chi yaaꞌví yā ndísꞌtiī chi cuuvi yeⁿꞌé yā ndísꞌtiī diíⁿ yā chi vɛ́ɛ́ confianza yeⁿꞌe yú ndúúcu yā. Ní Cristo miiⁿ ntúūⁿ diíⁿ yā cumplir nducuéⁿꞌē chi ngaⁿꞌa yā chi cuuvi diiⁿ yā.
Pablo caꞌa yā saludos ꞌiiⁿꞌyāⁿ ní neⁿꞌé yā chi Ndyuūs caꞌa yā cosas nꞌdai yeⁿꞌé yā
25 Ndísꞌtiī hermanos yeⁿꞌe yú ngaⁿꞌanguaꞌa ndísꞌtiī cáávā núsꞌuu.
26 Caaⁿꞌmáⁿ nī nducyaaca hermanos yeⁿꞌe yú: Nꞌdai ndísꞌtiī. Ní ituuꞌví nī cheendi yā taachi diíⁿ nī saludar hermanos yeⁿꞌe yú tanꞌdúúcā costumbre yeⁿꞌe yú ti yeⁿꞌe yú Ndyuūs.
27 ꞌÚú ndúúcū poder yeⁿꞌe Señor ngaⁿꞌá ngīi chi ꞌcueéⁿ nī carta ꞌcūū nanááⁿ nducyaaca hermanos yeⁿꞌe yú.
28 Neⁿꞌé chi Señor Jesucristo yeⁿꞌē yú tée yā ndísꞌtiī nducueⁿꞌe cosas chí nꞌdaacā taavi ca yeⁿꞌé yā. ꞌTíícā cuuvi.