2 Ndísꞌtiī ní deenú nī tanꞌdúúcā chí chiꞌcueeⁿ ꞌnū nanááⁿ ndísꞌtiī caati Ndyuūs dichoꞌó yā núsꞌuu. 3 Ní Ndyuūs neⁿꞌé yā chi ndísꞌtiī nꞌgɛɛtinéé nꞌdaacá nī. Ní nducuéⁿꞌē chi diíⁿ nī, diíⁿ nī ti yeⁿꞌé Ndyuūs ndísꞌtiī. Ní nguɛ́ɛ́ caⁿꞌá nī ndúúcū ꞌiiⁿꞌyāⁿ chi nguɛ́ɛ́ isaⁿꞌa o nꞌdaataá yeⁿꞌé nī. 4 Ní caꞌáámá caꞌaama ndísꞌtiī chi saⁿꞌā canee chi déénu nī tanꞌdúúca chi cuuvi cutaꞌá nī nꞌdaataá yeⁿꞌé nī ní ꞌcaandavaacú nī. Ní canee nꞌdaacá nī ndúúcū nꞌdaataá yeⁿꞌé nī. Ní dinéⁿꞌe nī nꞌdaataá yeⁿꞌé nī. 5 Nguɛ́ɛ́ diiⁿ nī cosa chi nguɛ́ɛ́ nꞌdaacā ndúúcū cuerpo yeⁿꞌē tá tanꞌdúúcā chi diiⁿ tanáⁿꞌā ꞌiiⁿꞌyāⁿ chi nguɛ́ɛ́ yeⁿꞌē ndaata ꞌiiⁿꞌyāⁿ Israel, ꞌiiⁿꞌyāⁿ chi nguɛ́ɛ́ déénu yā Ndyuūs. 6 Ní mar ꞌáámá yú chi sáⁿꞌā nguɛ́ɛ́ caⁿꞌa sa ndúúcū nꞌdaataá chi nguɛ́ɛ́ yeⁿꞌe sa o nꞌdaataá nguɛ́ɛ́ caⁿꞌa tá ndúúcū ꞌáámá isáⁿꞌā chi nguɛ́ɛ́ yeⁿꞌe tá caati Señor Jesucristo yeⁿꞌē yú caꞌá yā ꞌiiⁿꞌyāⁿ miiⁿ ꞌáámá castigo chí chꞌɛɛtɛ caavā nuuⁿndi chi ꞌtíícā yeⁿꞌé yā. Ní yeⁿꞌé chuū ꞌāā nꞌdiichi yú na vida yeⁿꞌe hermanos yeⁿꞌe yú chi diíⁿ yā ꞌtúúcā chi nginncheꞌéí yā hermano yeⁿꞌé yā. Ní nguɛ́ɛ́ nꞌdaacā chuū. 7 ꞌTíícā Ndyuūs yaaꞌví yā sꞌuuúⁿ chi cuuvi yeⁿꞌé yā sꞌuuúⁿ cáávā chi diiⁿ yú nducuéⁿꞌē chi nꞌdaacā nguɛ́ɛ́ caavā chi diiⁿ yú cosas chi nguɛ́ɛ́ nꞌdaacā. 8 ꞌTíícā ꞌiiⁿꞌyāⁿ chi nguɛ́ɛ́ diíⁿ yā tanꞌdúúcā chi ngiꞌcueéⁿ ꞌnū. Ndísꞌtiī nguɛ́ɛ́ idiꞌvaachí yā mar ꞌáámá ꞌiiⁿꞌyāⁿ. Dámaāⁿ diꞌvaachí yā Ndyuūs caati Ndyuūs tée yā Espíritu Nꞌdai yeⁿꞌé yā sꞌuuúⁿ. 9 ꞌÚú nguɛ́ɛ́ caneé chi dinguúⁿ yeⁿꞌé ndísꞌtiī tanꞌdúúcā chi canee chi neⁿꞌé nī nducyaaca ꞌiiⁿꞌyāⁿ chi yeⁿꞌe Cristo chi hermanos yeⁿꞌē yú. Deenú chi Ndyuūs maáⁿ yā ngiꞌcueéⁿ yā ndísꞌtiī tanꞌduucā chi canee chi dineⁿꞌé nī ꞌáámá nī ndúúcū taama nī. 10 Cuáácú chi neⁿꞌé nī nducyaaca hermanos yeⁿꞌē yú chi snéé na yáⁿꞌāa Macedonia naati maaⁿ ní diꞌcuíítu caⁿꞌa ꞌnū chi dinéⁿꞌe ca nī hermanos yeⁿꞌe nī. 11 Ngiicá ꞌnū chi chꞌɛɛtinéé nꞌdaacá nī nguaaⁿ nducyaaca nī ndúúcū vaadī ꞌdiiíⁿ. Ní diíⁿ nī ntiiⁿnyuⁿ yeⁿꞌē maáⁿ nī ndúúcū taꞌá nī tanꞌdúúcā chi nꞌgiⁿꞌi ꞌnū ndísꞌtiī. 12 Ní diíⁿ nī ꞌtuucā caati ꞌiiⁿꞌyāⁿ chi nguɛɛ iꞌtéénu yā Jesucristo yeⁿꞌe yú cuuvi diíⁿ yā respetar ndísꞌtiī ní vɛ́ɛ́ necesidades yeⁿꞌé nī.

13 Ndísꞌtiī hermanos yeⁿꞌé ꞌnū, nguɛ́ɛ́ neⁿꞌé ꞌnū chi nguɛ́ɛ́ cadíínuuⁿ nī yeⁿꞌe chi cuchiī yeⁿꞌe ꞌiiⁿꞌyāⁿ chi nꞌdíí caati nguɛ́ɛ́ cuuvi ndaachii nuuⁿ nī tanꞌdúúcā tanáⁿꞌā ꞌiiⁿꞌyāⁿ chi nguɛ́ɛ́ cunee ngiinú yā chí ndaa Jesucristo taama vmnéⁿꞌēe. 14 Ní ꞌtíícā tanꞌduucā chi iꞌteenu yú chí Jesucristo chꞌīi yā ní nduuchí yā yeⁿꞌē nguaaⁿ tináⁿꞌā, ꞌtiicá ntúūⁿ iꞌteenu yú chi taachi Ndyuūs dichoꞌó yā Jesucristo taama vmnéⁿꞌēe, Cristo miiⁿ ní ndɛɛ yā ndúúcu yā nducyaaca ꞌiiⁿꞌyāⁿ chi ꞌāā nꞌdíí ní ꞌāā iꞌtéénu yā Señor Jesucristo yeⁿꞌē yú. 15 Ní cáávā chuū yaaꞌví ꞌnū ndísꞌtiī chuū tanꞌdúúcā chi Señor chiꞌcueéⁿ yā núsꞌuu. Sꞌuuúⁿ chi canduuchi yú ní canee yú na iⁿꞌyeeⁿdí ꞌcūū ndíí ndaa Señor yeⁿꞌē yú nguɛ́ɛ́ canꞌdáánaaⁿ yú yeⁿꞌe ꞌiiⁿꞌyāⁿ chi ꞌāā nꞌdíí. 16 Caati maaⁿ Señor Jesucristo yeⁿꞌe yú nchꞌéeⁿ yā yeⁿꞌē vaꞌai chɛɛti nguuvi taachí Ndyuūs caꞌá yā orden. Ní ángel chí chꞌɛɛtɛ ca ní caaⁿꞌmáⁿ yā ní diꞌcuɛɛcú yā trompeta yeⁿꞌé Ndyuūs. Ní ꞌiiⁿꞌyāⁿ sꞌeeⁿ chi ꞌāā nꞌdíí chí chiꞌtéénu yā Jesucristo taachi ꞌiiⁿꞌyāⁿ sꞌeeⁿ snée yā iⁿꞌyeeⁿdí ꞌcūū ní snuuⁿ yā maaⁿ yáⁿꞌāa, ꞌiiⁿꞌyāⁿ sꞌeeⁿ vmnááⁿ vmnaaⁿ nduuchí yā yeⁿꞌē nguaaⁿ tináⁿꞌā. 17 Tuuꞌmi ní sꞌuuúⁿ chi snduuchi yú chi snee yú na iⁿꞌyeeⁿdí ꞌcūū, Cristo mííⁿ cutaꞌá yā sꞌuuúⁿ na ꞌyúúné. Ní ndaa yú na meēeⁿ ndúúcū tanáⁿꞌa yā chi ꞌāā nꞌdíí, ní nducyaaca yú ní dáámá ndaa yú nanááⁿ Jesucristo na ꞌyúúné. ꞌTíícā ní ꞌáámá cūnee yú ndúúcū Señor yeⁿꞌē yú. 18 Níícú cáávā chííⁿ chi ncaꞌa nī ꞌviichꞌɛɛtíínūuⁿ ꞌáámá nī taama nī ndúúcū nduudu ꞌcūū.