3
Ní taachi ꞌāā ntɛ́ɛ́ cuchɛɛ́ ꞌnū chi nguɛ́ɛ́ ndaa ꞌnū nanááⁿ ndísꞌtiī, tuuꞌmi ní nadicadíínuuⁿ ꞌnū chi nꞌdaacā chi maáⁿ ꞌnū nꞌgɛɛtineé ꞌnū na yáāⁿ Atenas. 2 Ní dichoꞌó ꞌnū Timoteo chi hermano yeⁿꞌē yú chi cuuvi nꞌdiichi sa ndísꞌtiī taacā snée nī. Saⁿꞌā miiⁿ ꞌāā diiⁿ sa ntiiⁿnyuⁿ yeⁿꞌé Ndyuūs daama nduucú ꞌnū ní ngaⁿꞌa sa nduudu cuaacu yeⁿꞌé Cristo chi diiⁿ chi nadinguáⁿꞌai ꞌiiⁿꞌyāⁿ. Saⁿꞌā miiⁿ ní cuuví cūnnee sa ndísꞌtiī ní tée sa ꞌviichꞌɛɛtíínūuⁿ ndísꞌtiī. Ní cuuví cūnee diitu cá nī ndúúcū chi iꞌtéénu nī. Cáávā chuū dichóꞌo ꞌnū Timoteo. 3 Nguɛɛ neⁿꞌé ꞌnū chi ndísꞌtiī ndaacadaamí nī yeⁿꞌe Jesucristo chi nguɛɛ iꞌtéénu nī Jesucristo cucáávā chi nꞌgeenú nī ngii. ꞌĀā deenú nī chi canee chi ꞌcueenú nī cuuvi caati iꞌtéénu nī Jesucristo. 4 Ní cuaacú taachí chꞌɛɛtineé ꞌnū ndúúcū ndísꞌtiī chii ꞌnū ndísꞌtiī chi ndaa tiempo chi canéé chi ꞌcueenu yú cuuvi tanꞌdúúcā chi chóꞌōo yeⁿꞌé nī. Chuū ní ndísꞌtiī déénu nī. 5 Ní cáávā chuū taachi ꞌāā ntɛ́ɛ́ chɛɛ́ chi nguɛ́ɛ́ nꞌgiindiveéⁿ yeⁿꞌé ndísꞌtiī choꞌó hermano Timoteo chi ꞌúú cuuvi deenú táácā sneé nī ndúúcū chi iꞌtéénu nī. Caati ꞌúú ꞌvaꞌá chi yááⁿnꞌguiinūuⁿ diiⁿ chi nguɛ́ɛ́ iꞌtéénu nī ní maaⁿ ní nguɛ́ɛ́ dichííꞌvɛ̄ ntiiⁿnyuⁿ chi ꞌāā diiⁿ ꞌnū nguaaⁿ ndísꞌtiī.6 Naati maaⁿ ní Timoteo chi chiīca sá yeⁿꞌe ndísꞌtiī chi snee na yáāⁿ Tesalónica ndaā sa nanaáⁿ ꞌnū. Ní yaaꞌvi sa núsꞌuuⁿ chi nꞌdaacā nꞌdai snee nī ti iꞌtéénu nī Ndyuūs. Ní ngaⁿꞌa ntúūⁿ sā chi neⁿꞌe nī nducyaaca ꞌiiⁿꞌyāⁿ. Ní yaaꞌvi sa núsꞌuu chi cueⁿꞌe daāⁿmaⁿ nꞌgaacu nī yeⁿꞌé ꞌnū ní neⁿꞌé nī núsꞌuu. Ní nééné neⁿꞌé nī nꞌdiichí nī núsꞌuu. Ní núsꞌuu neⁿꞌe ntúuⁿ ꞌnū nꞌdiichi ꞌnū ndísꞌtiī. 7 Ní ndísꞌtiī hermanos yeⁿꞌé ꞌnū cucáávā chi nꞌgiindiveéⁿ ꞌnū yeⁿꞌē ndísꞌtiī chi díítū canee nī ndúúcū chi iꞌtéénu nī yeⁿꞌe Señor Jesucristo yeⁿꞌe yú maaⁿ ní vɛ́ɛ́ ꞌviichꞌɛɛtíínuuⁿ yeⁿꞌé ꞌnū yeⁿꞌē tanducuéⁿꞌē chi chꞌeenú ꞌnū chiī. 8 Ní snéé ꞌnū tanꞌdúúcā chi vɛ́ɛ́ vida ngai yeⁿꞌé ꞌnū ti nꞌgiindiveéⁿ ꞌnū chí nꞌdaacā nꞌdai caneé nī maaⁿ chi ndísꞌtiī ní yeⁿꞌe Señor Jesucristo ndísꞌtiī. 9 Maaⁿ ní gracias cuuvi ncaꞌá ꞌnū Ndyuūs Chiida yú cucáávā ndísꞌtiī ní cucáávā chi ndísꞌtiī diíⁿ nī chi yeenu taaví ꞌnū taachi ngaⁿꞌanguaꞌá ꞌnū caavā ndísꞌtiī ndúúcū Ndyuūs Chiida yú. 10 Ní ngaⁿꞌanguaꞌá ꞌnū ndíí nguuvi ndii nꞌgaaⁿ chi Ndyuūs diíⁿ yā chi ndaá ꞌnū naachi snée nī. Níícú cūnnee ꞌnū ndísꞌtiī níícú cuuvi cuꞌtéénu cá nī yeⁿꞌe Señor Jesucristo yeⁿꞌe yú.
11 Neⁿꞌé ꞌnū chi Ndyuūs Chiida yú ndúúcū Señor Jesucristo yeⁿꞌe yú cūnnee yā núsꞌuu caati cuuvi ndaa ꞌnū nanááⁿ ndísꞌtiī. 12 Ní Señor Jesucristo yeⁿꞌe yú cūnneé yā ndísꞌtiī caati cuuvi neⁿꞌe cá nī nducyáácá ꞌiiⁿꞌyāⁿ. Ní dineⁿꞌe taavi cá nī tanꞌdúúcā núsꞌuu neⁿꞌe taavi cá ꞌnū ndísꞌtiī. 13 Ní Ndyuūs cuuvi cūnnee yā ndísꞌtiī chi ꞌáámá canéé vaadī neⁿꞌe yeⁿꞌé yā na staava yeⁿꞌé nī. Ní nguɛ́ɛ́ vɛ́ɛ́ nuuⁿndi yeⁿꞌé nī. Ní canéé dɛɛvɛ staava yeⁿꞌé nī nanááⁿ Ndyuūs Chiida yú taachi ndaa Señor Jesucristo yeⁿꞌē yú ndúúcū nducyáácá ꞌiiⁿꞌyāⁿ chi iꞌtéénu yā ꞌyā.