3 Dii, Timoteo, ꞌúú neⁿꞌé chi cūnee di yáāⁿ Efesio tanꞌdúúcā chi ꞌāā yaaꞌví dii taachi cueⁿꞌé yáⁿꞌāa Macedonia ti vɛ́ɛ́ ꞌiiⁿꞌyāⁿ chi chiꞌcueeⁿ doctrina chi n̄ꞌdááⁿ. Yaaꞌvi di ꞌiiⁿꞌyāⁿ sꞌeeⁿ chi nguɛ́ɛ́ ngiꞌcueeⁿ doctrina chi n̄ꞌdááⁿ. 4 Ní yaaꞌvi di ꞌiiⁿꞌyāⁿ yeⁿꞌe yáāⁿ miiⁿ chi nguɛ́ɛ́ ꞌcaandiveéⁿ yā yeⁿꞌe cuentos yeⁿꞌé yā chi falsos. Ndíí nguɛ́ɛ́ ndúú ꞌcaandiveéⁿ yā nduudu chi chiꞌcueeⁿ ꞌiiⁿꞌyāⁿ ndiicúū. Nduudu miiⁿ ní nguɛ́ɛ́ dichííꞌvɛ̄. Dámaāⁿ diiiⁿ chi ꞌiiⁿyāⁿ chꞌɛɛcu cheendí yā ní nguɛ́ɛ́ nginnee ꞌiiⁿꞌyāⁿ tanꞌdúúcā chi Ndyuūs neⁿꞌé yā. Caati Ndyuūs dichóꞌo yā orden chi ꞌiiⁿꞌyāⁿ ngiꞌcueéⁿ yā cáávā chi tanáⁿꞌā ꞌiiⁿꞌyāⁿ cuuvi cuꞌtéénu cá yā Ndyuūs.

5 Ní ngaⁿꞌa yú tanꞌdúúcā Ndyuūs neⁿꞌé yā taachi ngiꞌcueeⁿ yú ndúúcū vaadī neⁿꞌe chí ngíícá ná staava yeⁿꞌē yú chi Ndyuūs ꞌāā didɛɛvɛ́ yā. Tanducuéⁿꞌē ní diiⁿ yú ndúúcū vaanicadíínuuⁿ yeⁿꞌe yú chi ndɛɛvɛ. Ní iꞌteenu yú Ndyuūs ndúúcū núúⁿmáⁿ staava yeⁿꞌē yú. 6 Naⁿꞌa ꞌiiⁿꞌyāⁿ ndaacadaamí yā yeⁿꞌē nduudu yeⁿꞌé Ndyuūs ní nꞌgiindiveéⁿ yā nduudu chi nguɛ́ɛ́ dichííꞌvɛ̄. Ní nꞌgɛɛcu cheendí yā. Ní cuuvi ndái yā. 7 ꞌIiⁿꞌyāⁿ sꞌeeⁿ ní neⁿꞌé yā caꞌcueéⁿ yā ley yeⁿꞌé Ndyuūs naati nguɛ́ɛ́ tuumicadíínuuⁿ yā nduudu chi ngaⁿꞌa yā, ndíí nguɛ́ɛ́ ndúú nduudu chi caꞌcueéⁿ yā ꞌáárá chí diíⁿ yā tanꞌdúúcā chi déénu yā tanducueⁿꞌē.

8 Sꞌuuúⁿ ní deenu yú chi ley yeⁿꞌe Moisés ní nꞌdai ndúúti chi cuꞌtéénu nꞌdaāca yú yeⁿꞌē. 9 Deenu yú chi ley miiⁿ nguɛ́ɛ́ dámaāⁿ caavā ꞌiiⁿꞌyāⁿ chi dinꞌdaacá yā naati caavā ꞌiiⁿꞌyāⁿ chi nguɛ́ɛ́ diiⁿ yā tanꞌdúúcā chí ngaⁿꞌā ley, caavā ꞌiiⁿꞌyāⁿ chi nguɛ́ɛ́ nꞌgiindiveéⁿ yā chiiⁿ chi ngaⁿꞌā ley, níícú caavā ꞌiiⁿꞌyāⁿ chi nguɛ́ɛ́ nꞌdaacā, caavā ꞌiiⁿꞌyāⁿ chi idinuuⁿndi, caavā ꞌiiⁿꞌyāⁿ chi nguɛ́ɛ́ diíⁿ yā respetar Ndyuūs ndíí nguɛ́ɛ diíⁿ yā respetar religión, ní caavā ꞌiiⁿꞌyāⁿ chi nꞌgiiⁿꞌnúⁿ yā chɛɛcú yā o chiidá yā, ní cáávā ꞌiiⁿꞌyāⁿ chi nꞌgiiⁿꞌnúⁿ yā ꞌiiⁿꞌyāⁿ. 10 Ley miiⁿ ní caavā saⁿꞌā chi caⁿꞌa sa ndúúcū nꞌdaataá o nꞌdaataá chi caⁿꞌa tá ndúúcū saⁿꞌā ní nguɛ́ɛ́ yeⁿꞌe yā viꞌī ní cáávā saⁿꞌā chi caⁿꞌa sa ndúúcū saⁿꞌa chi duuchineeⁿ sa ndúúcū sa chi viꞌī, ní cáávā ꞌiiⁿꞌyāⁿ chi duucú yā ꞌiiⁿꞌyāⁿ caati cuuvi dichííꞌvɛ yā táámá ꞌiiⁿꞌyāⁿ ní cáávā ꞌiiⁿꞌyāⁿ chi indeē ndúúdú yaadi, ní caavā ꞌiiⁿꞌyāⁿ chi ngaⁿꞌa yā chi cuaacu chiiⁿ chi ngaⁿꞌa yā ní nꞌgai yā: “Por Dios”, chi ꞌtíícā, ní nguɛ́ɛ́ ꞌtíícā. Ní ley miiⁿ ní caavā ꞌiiⁿꞌyāⁿ chi ngiꞌcueéⁿ yā nducuéⁿꞌē chi nguɛ́ɛ́ nꞌdaācā ní nguɛ́ɛ́ tanꞌdúúcā Ndyuūs chiꞌcueeⁿ yā ꞌiiⁿꞌyāⁿ. 11 Naati chuū chi ngiꞌcueéⁿ chi nduudu nꞌdai yeⁿꞌe evangelio ní nꞌdɛ̄ɛ̄vɛ nꞌdai chi nanguaⁿꞌāī ꞌiiⁿꞌyāⁿ, ní yeⁿꞌé Ndyuūs chi nꞌdai taavi. Ní Ndyuūs dichóꞌo yā ꞌúú chi caaⁿꞌmáⁿ nduudu miiⁿ.

12 ꞌÚú ní caꞌá gracias Señor Jesucristo yeⁿꞌē yú chi itée yā fuerzas ꞌúú chi diíⁿ ntiiⁿnyuⁿ yeⁿꞌé yā. Ní sꞌneéⁿ yā ꞌúú tanꞌdúúcā ꞌáámá ꞌiiⁿꞌyāⁿ chi vɛ́ɛ́ valor yeⁿꞌé yā. Ní sꞌneéⁿ yā ꞌúú na ntiiⁿnyuⁿ yeⁿꞌé yā. 13 Ní vmnááⁿ vmnaaⁿ chi Jesucristo yaaꞌví yā ꞌúú chi cuuvi yeⁿꞌé yā, ꞌúú ní neené caaⁿꞌmaⁿ taáⁿ yeⁿꞌe Jesucristo ní cachiicá canꞌdaá ꞌiiⁿꞌyāⁿ chi iꞌtéénu yā Jesucristo ti neⁿꞌé iꞌnuuⁿ cáꞌai ꞌiiⁿꞌyāⁿ. Ní caneé taaⁿ contra Jesucristo. Naati Ndyuūs yaꞌai ꞌiinú yā ꞌúú ꞌáárá chi diíⁿ ꞌtúúcā taachi ꞌāā cuɛ́ɛ́ cuꞌteenú ꞌiiⁿꞌyāⁿ, ní nguɛ́ɛ́ deenú dɛꞌɛ̄ cáávā chi diíⁿ ꞌtíícā. 14 Ní Señor diiⁿ nꞌdai cá yā nduucú, ní ꞌúú iꞌteenú Jesucristo, ní neⁿꞌé Jesucristo caati maaⁿ ní ꞌúú ní yeⁿꞌé Jesucristo ꞌúú.

15 Ní nduudu ꞌcūū ní nduudu cuaacu chi Cristo Jesús ndaá yā iⁿꞌyééⁿdi ꞌcūū chi nadanguáⁿꞌai yā nducyaaca ꞌiiⁿꞌyāⁿ caati idinuuⁿndí yā, ní nꞌdáí taavi chi nducyaaca ꞌiiⁿꞌyāⁿ cuꞌtéénu yā nduudú ꞌcūū. Ní deenú chi ꞌúú ní chꞌɛɛtɛ cá nuuⁿndi yeⁿꞌé nguɛ́ɛ́ ti tanáⁿꞌa yā. 16 Naati cucáávā chi vɛ́ɛ́ nuuⁿndi yeⁿꞌe ꞌúú Ndyuūs yaꞌai ꞌiinú yā ꞌúú caati Señor Jesucristo chꞌiⁿꞌí yā ꞌúú tanducuéⁿꞌē vaadī nꞌdáí taavi yeⁿꞌé yā, ꞌúú chi chꞌɛɛtɛ cá nuuⁿndi yeⁿꞌé. ꞌTíícā ní Ndyuūs vɛ́ɛ́ paciencia yeⁿꞌé yā nduucú vmnááⁿ vmnaaⁿ ní sꞌneéⁿ yā ꞌúú chi ꞌúú tanꞌdúúcā ꞌáámá ejemplo yeⁿꞌe tanáⁿꞌā ꞌiiⁿꞌyāⁿ chi cuayiivi caⁿꞌá yā cuꞌtéénu yā Cristo ni vɛ́ɛ́ vida cueⁿꞌe daāⁿmaⁿ yeⁿꞌe yā. 17 Cáávā nducuéⁿꞌē chuū cueⁿꞌe daāⁿmaⁿ caꞌa yú Ndyuūs honra ní dichꞌɛɛtɛ ca yú Ndyuūs chi rey chi ꞌáámá canee cueⁿꞌe daāⁿmaⁿ ní nguɛ́ɛ́ nꞌgii yā. Ní maaⁿ ní nguɛ́ɛ́ cuuvi snaaⁿ yú Ndyuūs chi ꞌáámá nꞌdyáⁿꞌā Dendyuūs yeⁿꞌe yú. ꞌTííca rā vaa.

18 Maaⁿ ní, dii Timoteo chi tanꞌdúúcā daiyá, iꞌneéⁿ encargo ꞌcūū ndúúcū dii. Ní encargo ꞌcūū chííⁿ chi tiempo chi ꞌāā chóꞌōo ꞌiiⁿꞌyāⁿ profetas caⁿꞌa yā yeⁿꞌē di yeⁿꞌē chi caⁿꞌá di diiⁿ di. Maaⁿ ní cuchɛ́ɛ́ di yeⁿꞌē tanducuéⁿꞌē ní diiⁿ di tanꞌdúúcā chi diiⁿ ꞌáámá soldado chi nguⁿꞌu nꞌdaacā sa. ꞌTíícā diiⁿ di tanꞌdúúcā chi profetas caⁿꞌa yā yeⁿꞌē di tiempo chi ꞌāā chóꞌōo. 19 Dii ní cuꞌtéénu nꞌdaacā di ní diiⁿ nꞌdaacā di ndúúcū vaanicadíínūuⁿ yeⁿꞌē di chí nꞌdai. Náⁿꞌā ꞌiiⁿꞌyāⁿ ni nguɛ́ɛ́ diiⁿ nꞌdaacá yā caati vaanicadíínūuⁿ yeⁿꞌé yā ní nguɛ́ɛ́ nꞌdai. Ní cáávā chuū nguɛ́ɛ́ iꞌtéénu yā Señor Jesucristo maaⁿ ní canéé yā tanꞌdúúcā chi yaⁿꞌai yeⁿꞌe Ndyuūs. 20 ꞌTúúcā chóꞌōo yeⁿꞌe saⁿꞌā Himeneo ndúúcū saⁿꞌā Alejandro ní ꞌúú deenú chí caneé yā a cuenta yeⁿꞌe yááⁿnꞌguiinūuⁿ maaⁿ. Ní ꞌíícú cuuvi deenú yā chi ꞌāā ntɛ́ɛ́ cuuvi caaⁿꞌmáⁿ yā ní nguɛ́ɛ́ diíⁿ yā ofender Ndyuūs yeⁿꞌe yú.