3 Maaⁿ ní caꞌá Ndyuūs gracias caavā chi ꞌúú dichiiꞌvɛ́ Ndyuūs ndúúcū vaanicadíínūuⁿ yeⁿꞌé chi nꞌdaacā tanꞌdúúcā chi diiⁿ ꞌiiⁿꞌyāⁿ yeⁿꞌe yú tiempo chi ꞌāā chóꞌōo. Ní ndii nguuvi ndii nꞌgaaⁿ taachi ngaⁿꞌanguāꞌa, ꞌúú caꞌá Ndyuūs gracias, ní cueⁿꞌe daāⁿmaⁿ ꞌúú ngaⁿꞌanguāꞌa caavā dii, Timoteo. 4 Nééné neⁿꞌé snaáⁿ dii, Timoteo, taachi nꞌgaacú yeⁿꞌē nuūⁿnīⁿ nduutinááⁿ di taachi caneé ꞌáámá lado yeⁿꞌē di. Ní taachi cuuvi nꞌdiichí dii tuuꞌmi ní yeenú taaví. 5 Ní nꞌgaacú chi iꞌtéénu di Ndyuūs ndúúcū núúⁿmáⁿ staava yeⁿꞌē di. Vmnaaⁿ chi iꞌteenu di Jesucristo táⁿꞌā Loida chi chicuⁿꞌu di ní táⁿꞌā Eunice chɛɛcu di iꞌtéénu yā Jesucristo. Maaⁿ ní seguro caneé chi cuaacu chi dii ntúūⁿ iꞌtéénu di.

6 Cáávā chi iꞌtéénu di Ndyuūs neⁿꞌé chi nꞌgaacu di chi cuéⁿꞌé daāⁿmaⁿ diiⁿ di ntiiⁿnyuⁿ chi Ndyuūs ꞌāā teé yā dii ndíí tiempo chi ꞌúú snꞌduū taꞌá vmnaaⁿ tiiⁿ di. 7 Ndyuūs nguɛ́ɛ́ ꞌāā teé yā sꞌuuúⁿ ꞌáámá staava yeⁿꞌē yú chi ꞌvaꞌā yú naati ꞌāā teé yā sꞌuuúⁿ ꞌáámá staava yeⁿꞌe yú chi vɛ́ɛ́ poder yeⁿꞌē yú. Ní ꞌíícú cuuví dinéⁿꞌe yú nducyaaca ꞌiiⁿꞌyāⁿ. Ní cuuvi nadicadíínuuⁿ yú nꞌdaacā. 8 Maaⁿ ní nguɛ́ɛ́ ꞌcuináaⁿ di chi caaⁿꞌmaⁿ di nduudu cuaacu yeⁿꞌe Señor Jesucristo yeⁿꞌe yú nanááⁿ ꞌiiⁿꞌyāⁿ. Ndíí nguɛ́ɛ́ ndúú ꞌcuináaⁿ di yeⁿꞌe ꞌúú caati canuúⁿ vácūū cáávā chi ngaⁿꞌá nduudu cuaacu yeⁿꞌe Cristo. Naati nꞌdaacā ca diiⁿ di chi cuchɛɛ di yeⁿꞌe nducuéⁿꞌē chi ꞌcueenu di cuuvi ntúūⁿ cáávā chí ngaⁿꞌa di nduudu yeⁿꞌe Cristo chí nadanguáⁿꞌāī ꞌiiⁿꞌyāⁿ chi nꞌgiindiveéⁿ yā yeⁿꞌe di. Diiⁿ di tanducuéⁿꞌē ndúúcū fuerzas chi Ndyuūs itée yā dii. 9 Ndyuūs nadinguáⁿꞌai yā sꞌuuúⁿ ní yaaꞌví yā sꞌuuúⁿ chi diiⁿ yú ntiiⁿnyuⁿ yeⁿꞌe yā chí nꞌdaacā. Nguɛ́ɛ́ nadinguáⁿꞌai yā sꞌuuúⁿ cáávā ntiiⁿnyuⁿ chi diiⁿ yú chí nꞌdaacā. Naati Ndyuūs diíⁿ yā ꞌtúúcā ndúúcū sꞌuuúⁿ ti ꞌtíícā neⁿꞌé yā diiⁿ yā. Níícú neené neⁿꞌe yā sꞌuuúⁿ. Ní maaⁿ ní sꞌuuúⁿ ꞌāā nduuvi daama yú ndúúcū Cristo Jesus. Níícú Ndyuūs neⁿꞌe yā sꞌuuúⁿ cuááⁿ vmnaaⁿ chi ꞌāā cuɛ́ɛ́ iⁿꞌyeēⁿdī. 10 Maaⁿ ní Ndyuūs chꞌiⁿꞌí yā chí neⁿꞌe taaví yā nducyaaca ꞌiiⁿꞌyāⁿ taachi dichóꞌo yā Jesucristo yeⁿꞌē yú iⁿꞌyeeⁿdí ꞌcūū. Jesucristo ní ꞌiiⁿꞌyāⁿ miiⁿ chi nadanguáⁿꞌai yā sꞌuuúⁿ. Ní nduudu cuaacu yeⁿꞌē evangelio chi yeⁿꞌe vida yeⁿꞌe Cristo chꞌiⁿꞌi sꞌuuúⁿ chi nguɛ́ɛ́ ꞌaama ꞌcuūvi yú. Níícú cáávā chi nadanguáⁿꞌai yā sꞌuuúⁿ cuuvi cunduuchi yú cueⁿꞌe daāⁿmaⁿ.

11 Níícú Ndyuūs nidɛɛvɛ́ yā ꞌúú chí caaⁿꞌmáⁿ nduudu cuaacu yeⁿꞌé yā ní dichóꞌo yā ꞌúú lado yeⁿꞌe apóstol yeⁿꞌé yā chi ꞌúú caaⁿꞌmáⁿ nduudu cuaacu yeⁿꞌé yā nanááⁿ ꞌiiⁿꞌyāⁿ chi nguɛ́ɛ́ yeⁿꞌe ndaata Israel. 12 Níícú cáávā chi ꞌúú apóstol yeⁿꞌé yā tanducuéⁿꞌē nꞌgeenú ngii chi canuúⁿ vácūū. Ní nguɛ́ɛ́ ngii ꞌcuinaáⁿ caati deenú duꞌū chi Cristo chi iꞌteenú. Ní deenú chi cuaacu chi Cristo miiⁿ ní vɛ́ɛ́ poder yeⁿꞌé yā chi diiⁿ cuenta yā yeⁿꞌe nducuéⁿꞌē ntiiⁿnyuⁿ chi tee yā ꞌúú ndíí nguuvi chi diíⁿ yā juzgar nducyaaca ꞌiiⁿꞌyāⁿ.

13 Dii, Timoteo, diiⁿ di ndúúcū nduudu chi serio nducuéⁿꞌē tanꞌdúúcā chi ꞌúú chiꞌcueéⁿ dii. Ní cunée di nꞌdaacā ndúúcū chi iꞌteenu di Dinéⁿꞌe di nducyaaca ꞌiiⁿꞌyāⁿ caati mááⁿ ní sꞌuuúⁿ ní yeⁿꞌe Jesucristo sꞌuuúⁿ. 14 Ní cundɛɛ di cuidado chi diiⁿ di ntiiⁿnyuⁿ chi Ndyuūs teé yā dii. Ní tee di lugar chí Espíritu Nꞌdai yeⁿꞌé Ndyuūs chi canee ndúúcu yú cunneé yā dii.

15 Dii ní deenu di chi nducyaaca ꞌiiⁿꞌyāⁿ chi iꞌtéénu yā Jesucristo chi yeⁿꞌe yáⁿꞌāa Asia, ꞌiiⁿꞌyāⁿ sꞌeeⁿ chi canee yā nduucú nguuvi chi chóꞌōo, maaⁿ ní ndaacadaamí yā yeⁿꞌē ꞌúú. Ní nguaaⁿ ꞌiiⁿꞌyāⁿ sꞌeeⁿ canéé saⁿꞌā Figelo ndúúcū saⁿꞌa Hermógenes. 16 Naati ꞌiiⁿꞌyāⁿ yeⁿꞌe familia yeⁿꞌe saⁿꞌā Onesíforo nguɛ́ɛ́ ꞌcuináaⁿ yā ꞌúú yeⁿꞌē chi canuúⁿ vácūū. Saⁿꞌā miiⁿ ndaa sa nꞌdiichi sa ꞌúú chi nnee sa ꞌúú. Neⁿꞌé chi Señor Jesucristo caꞌá yā vaadī yaꞌai yeⁿꞌé yā saⁿꞌā miiⁿ ndúúcū ꞌiiⁿꞌyāⁿ yeⁿꞌe familia yeⁿꞌe sa. 17 Nguɛ́ɛ́ diiⁿ saⁿꞌā Onesíforo tanꞌdúúcā chi diiⁿ tanáⁿꞌa yā caati taachi canéé sa na yáāⁿ Roma neené naꞌnuūⁿ sa ꞌúú ndíí taachi nndaācā sa ꞌúú. 18 Neⁿꞌé chi Ndyuūs yaꞌai ꞌiinú yā saⁿꞌā miiⁿ nguuvi chi Señor Jesucristo yeⁿꞌē yú diíⁿ yā juzgar ꞌiiⁿꞌyāⁿ yeⁿꞌe iⁿꞌyeeⁿdí ꞌcūū. Ní dii ní neené nꞌdai deenū di tanꞌdúúcā chi chinnee sa sꞌuuúⁿ taachi snée yú na yáāⁿ Efeso.