6
Nducyaaca ꞌiiⁿꞌyāⁿ chi iꞌtéénu yā Jesucristo chi diiⁿ ntiiⁿnyuⁿ yeⁿꞌe criado o criada ni ꞌáámá caneé yā na ntiiⁿnyuⁿ yeⁿꞌē ꞌiiví yā chi esclavo yā, caneé yā tanꞌdúúcā chi vɛ́ɛ́ ꞌáámá yugo na daandú yā. Ní ꞌiiⁿꞌyāⁿ esclavos canee chi diiⁿ ca yā respetar ꞌiivi yā. Níícú ꞌiivi yā nguɛ́ɛ́ cuuvi cunncáa caaⁿꞌmaⁿ yā yeⁿꞌe Señor Jesucristo yeⁿꞌe yú ndíí nguɛ́ɛ́ ndúú yeⁿꞌē chi caꞌcueeⁿ yú. 2 Ní saⁿꞌā esclavos chi iꞌtéénu sa ní vɛ́ɛ́ ꞌiivi sa chi ꞌtiicá ntúūⁿ iꞌtéénu yā, canéé chi diiⁿ ca sa respetar ꞌiivi sa tanꞌdúúcā chi ꞌaama ꞌiivi sa chi nguɛ́ɛ́ iꞌtéénu yā. Naati canee chi diiⁿ sa servir más cā ꞌiivi sa chi iꞌtéénu yā caati ꞌiivi sa ní hermano ndúúcū sa caati yeⁿꞌé Ndyuūs nduu ꞌuuví yā. Ní hermanos neⁿꞌe sa ꞌiivi sa. Tanducuéⁿꞌē denduꞌū dii, Timoteo, ngiꞌcueeⁿ di ní ngaⁿꞌa di.ꞌIiⁿꞌyāⁿ chi iꞌtéénu yā Jesucristo ní vɛ́ɛ́ vaadī yeenú yeⁿꞌé yā
3 Níícú nduuti chi ꞌáámá ꞌiiⁿꞌyāⁿ ngíꞌcueeⁿ yā táámá nduudu chī n̄ꞌdááⁿ ní nguɛ́ɛ́ tanꞌdúúcā nduudu nꞌdai yeⁿꞌē Señor Jesucristo, ndíí nguɛ́ɛ́ ndúú tanꞌdúúcā nduudu yeⁿꞌé Ndyuūs chi ngiꞌcueeⁿ yú yeⁿꞌē chi ꞌcuɛɛtinee yú nꞌdaacā tanꞌdúúcā chi Ndyuūs neⁿꞌe yā chi diiⁿ yú, 4 tuuꞌmi ní ꞌiiⁿꞌyāⁿ miiⁿ ní nadacadíínuuⁿ yā chi maaⁿ yā chꞌɛɛtɛ́ yā, ní nguɛ́ɛ́ dɛꞌɛ̄ vɛɛ deenu yā. ꞌIiⁿꞌyāⁿ miiⁿ ní chꞌɛɛcu cheendí yā. Ní diíⁿ yā chi náⁿꞌā ꞌiiⁿꞌyāⁿ nguⁿꞌu yā ní ngueꞌéí yā ní ꞌcaaꞌvá yā ní ngaⁿꞌa taáⁿ yā yeⁿꞌe ꞌiiⁿꞌyāⁿ. Ní ꞌiiⁿꞌyāⁿ miiⁿ diíⁿ yā chi náⁿꞌā ꞌiiⁿꞌyāⁿ nguɛ́ɛ́ vɛ́ɛ́ ꞌviichꞌɛɛtíínūuⁿ ndúúcū tanáⁿꞌā ꞌiiⁿꞌyāⁿ. 5 Ní ꞌiiⁿꞌyāⁿ miiⁿ diíⁿ yā chi nducyaaca ꞌiiⁿꞌyāⁿ dámaāⁿ nꞌgɛɛcu cheendí yā, ní nguɛ́ɛ́ nꞌdaacā nadacadíínuuⁿ yā. Ní nguɛ́ɛ́ deenú yā nduudu yeⁿꞌe Cristo. ꞌIiⁿꞌyāⁿ miiⁿ nadacadíínuuⁿ yā chi diíⁿ yā ganar tuumī caati chiꞌtéénu yā ní ngaⁿꞌa yā nduudu yeⁿꞌe Cristo. Divíi di yeⁿꞌe tanducuéⁿꞌē ꞌiiⁿꞌyāⁿ chi ꞌtíícā. 6 Deenu yú chi ꞌiiⁿꞌyāⁿ chi iꞌtéénu yā Jesucristo canee nꞌdaacá yā ndúúcū chi vɛɛ yeⁿꞌé yā ní yeenú yā. Chiiⁿ chi iꞌtéénu yā ní tanꞌdúúcā vaadī ꞌcuiica ca yeⁿꞌé yā. ꞌTííca rā vaa. 7 Deenu yú chi nguɛ́ɛ́ dɛꞌɛ̄ vɛɛ ndɛɛ̄ yú taachi chꞌiindiyaāⁿ yú iⁿꞌyeeⁿdí ꞌcūū. Ní nguɛ́ɛ́ dɛꞌɛ̄ vɛɛ ntúūⁿ candɛɛ yú yeⁿꞌē iⁿꞌyeeⁿdí ꞌcūū taachi ꞌcuūvī yú. 8 Neⁿꞌe chí snee yú iⁿꞌyeeⁿdí ꞌcūū nduuti chi vɛ́ɛ́ chi ngeꞌe yú ndúúcū catecai yú, ní ndúúcū chuū nūuⁿ cānee chi yeenu yú. 9 Caati ꞌiiⁿꞌyāⁿ chi neⁿꞌé yā ꞌcuiicá yā taachi yááⁿnꞌguiinūuⁿ nꞌdiichi neeⁿ sa ꞌyā cuuvi diíⁿ yā dendúꞌū chi nguɛɛ nꞌdaacā. Ní caneé yā ndúúcū vicio zonzo yeⁿꞌé yā chi nguɛɛ nꞌdaacā. Ní nguɛ́ɛ́ dichííꞌvɛ̄. Ní diiⁿ chi dinuuⁿndí yā níícú diiⁿ chi caⁿꞌá yā infierno. 10 Chííⁿ chí diiⁿ chi ꞌiiⁿꞌyāⁿ dinuuⁿndí yā ní chuū. ꞌIiⁿꞌyāⁿ neⁿꞌe cá yā tuūmī. Ní inꞌnuuⁿ cá yā tuūmī chi ꞌāā ntɛ́ɛ́ vɛ́ɛ́ tiempo chi cuꞌtéénu yā. Ní maáⁿ yā diíⁿ yā chi yaꞌāī nꞌgeenu taaví yā ngii.
Yeⁿꞌe chi cuuvi dinꞌdaaca yú maaⁿ chi iꞌteenu yú
11 Maaⁿ ní dii, Timoteo, saⁿꞌā chi yeⁿꞌé Ndyuūs dii, divíi di yeⁿꞌe nducuéⁿꞌē chuū chi nguɛɛ nꞌdaacā. Ní diiⁿ di nducuéⁿꞌē chi nꞌdaacā. Dichꞌɛɛtɛ di Ndyuūs ní cuꞌtéénu ca di. Dinéꞌe ca di nducyaaca ꞌiiⁿꞌyāⁿ ní diiⁿ di nducuéⁿꞌē ndúúcū paciencia. Ní canee di ndúúcū staava yeⁿꞌe di chi nꞌdai. 12 Ní taachi ꞌcueenu di cuuvi cáávā chi iꞌtéénu di Ndyuūs canee diitu di ndúúcū chi iꞌtéénu di yeⁿꞌé Ndyuūs yeⁿꞌē yú. Ní diitu diiⁿ di caati chi cuuvi yeⁿꞌē di vida cueⁿꞌe daāⁿmaⁿ chi cuuvi cutaꞌa di yeⁿꞌe Ndyuūs ti Ndyuūs yaaꞌví yā dii chi cuuvi yeⁿꞌé yā dii. Ní dii ꞌāā ngaⁿꞌa di chi iꞌtéénu di Ndyuūs nanááⁿ ꞌyaaⁿ nꞌdáí ꞌiiⁿꞌyāⁿ. 13 Maaⁿ ní ꞌúú yaaꞌví dii nanááⁿ Ndyuūs chi testigo yeⁿꞌe yú, Ndyuūs chi itée yā vida yeⁿꞌē nducuéⁿꞌē chi vɛ́ɛ́, ní nanááⁿ Jesucristo chi ꞌāā ngaⁿꞌa yā nduudu cuaacu yeⁿꞌé Ndyuūs chiidá yā nanááⁿ gobernador Poncio Pilato. 14 ꞌÚú yaaꞌví dii chi ꞌcaandiveeⁿ di ní diiⁿ di nducuéⁿꞌē chi caꞌá orden yeⁿꞌē di. Ni nguɛ́ɛ́ n̄ꞌdaaⁿ orden yeⁿꞌé caati nguɛ́ɛ́ neⁿꞌé chi ꞌiiⁿꞌyāⁿ caaⁿꞌmáⁿ yā contra yeⁿꞌē di caavā cosa chi diiⁿ di. Diiⁿ di ꞌtíícā ndii tiempo chi ndaa Señor Jesucristo yeⁿꞌe yú táámá vmnéⁿꞌēe. 15 Níícú tiempo taachi Ndyuūs neⁿꞌé yā, Ndyuūs caⁿꞌá yā dichoꞌó yā Jesucristo chí nꞌdai taavi nanááⁿ ꞌiiⁿꞌyāⁿ taama vmnéⁿꞌēe. Ní Cristo miiⁿ maáⁿ yā ní ꞌáámá nꞌdyáⁿꞌā ꞌiiⁿꞌyāⁿ nūuⁿ chi ngaⁿꞌa ntiiⁿnyuⁿ yā yeⁿꞌe nducueⁿꞌē chi vɛ́ɛ́, ní Rey chi chꞌɛɛtɛ taavi ca nguɛ́ɛ́ ti tanáⁿꞌā reyes. Ní ꞌiivi yú chi chꞌɛɛtɛ taavi ca nguɛ́ɛ́ ti tanáⁿꞌā saⁿꞌā chi ꞌiivi. 16 Dámaāⁿ Ndyuūs miiⁿ ní ꞌáámá canduuchí yā cueⁿꞌe daāⁿmaⁿ. Ní canduuchí yā ná chidɛɛvɛ chi nguɛ́ɛ́ cuuvi indaa mar ꞌáámá ꞌiiⁿꞌyāⁿ. Ní nguɛ́ɛ́ nꞌdiichi mar ꞌáámá ꞌiiⁿꞌyāⁿ Ndyuūs miiⁿ ndíí nguɛ́ɛ́ cuuvi snaaⁿ ra yā. Maaⁿ ní cuéⁿꞌe daāⁿmaⁿ canee cuuⁿmiⁿ yú dichꞌɛɛtɛ yú Ndyuūs ti tanducuéⁿꞌē poder chi vɛ́ɛ́ ní yeⁿꞌé yā. ꞌTííca rā vaa.
17 Maaⁿ ní dii, Timoteo, cuuvi di ꞌiiⁿꞌyāⁿ ꞌcuiica chi nguɛ́ɛ́ nadacádíínuuⁿ yā chi chꞌɛɛtɛ nꞌdáí yā. Ní nguɛ́ɛ́ cunee ngiinú yā yeⁿꞌe chi vɛ́ɛ́ yeⁿꞌe yā caati cosa chi nguɛ́ɛ́ seguro chi ꞌáámá cūnee ndúúcu yā. Nꞌdáácā ca nduuti chi ꞌiiⁿꞌyāⁿ sꞌeeⁿ cuꞌtéénu yā Ndyuūs chi canduuchi ní Ndyuūs caꞌá yā nꞌdeee nꞌdáí denduꞌū yeⁿꞌe nducuéⁿꞌē chi vɛɛ caati cuuvi cutaꞌa yú ní yeenu yú. 18 Níícú díí yaaꞌvi di ꞌiiⁿꞌyāⁿ ꞌcuiica chi dinꞌdaacá yā ní diíⁿ yā nꞌdeee tááví ntiiⁿnyuⁿ chi nꞌdaacā. ꞌÍícú canee listo yā chi cuuvi caꞌa yā tanáⁿꞌā ꞌiiⁿꞌyāⁿ chi nguɛ́ɛ́ vɛ́ɛ́ yeⁿꞌe yā ní innee yā ꞌiiⁿꞌyāⁿ sꞌeeⁿ. 19 ꞌTíícā cuuvi yeⁿꞌé ꞌiiⁿꞌyāⁿ sꞌeeⁿ vaadī ꞌcuiica yeⁿꞌé yā chi vida cueⁿꞌe daāⁿmaⁿ chi Ndyuūs caⁿꞌá yā chi caꞌa yā ꞌiiⁿꞌyāⁿ yeⁿꞌé yā.
Pablo caꞌá yā últimas órdenes Timoteo ti ꞌcuiīnū carta maaⁿ
20 Dííⁿ, Timoteo, cundɛ́ɛ di nꞌdaacā cuidado yeⁿꞌe encargo chi ꞌiiⁿꞌyāⁿ ꞌāā tee yā dii. Nguɛ́ɛ́ cuꞌneeⁿveeⁿ di nꞌdeee nꞌdáí nduudu chi ngaⁿꞌa ꞌiiⁿꞌyāⁿ yeⁿꞌe cosa yeⁿꞌē iⁿꞌyeeⁿdí ꞌcūū o yeⁿꞌē nduudu chi nguɛ́ɛ́ dichííꞌvɛ̄ o yeⁿꞌē chi ngaⁿꞌa ꞌiiⁿꞌyāⁿ chi nduudu deenu ní nguɛ́ɛ́ ꞌtíícā. 21 ꞌIiⁿꞌyāⁿ sꞌeeⁿ ndáácadaami yā yeⁿꞌē nduudu cuaacu yeⁿꞌé Ndyuūs ní maáⁿ yā ní nguɛ́ɛ́ iꞌtéénu yā nduudu cuaacu yeⁿꞌe Ndyuūs. Maaⁿ ní ꞌúú neⁿꞌé chi Ndyuūs tée yā dii tanducuéⁿꞌē chi nꞌdaāca. ꞌTíícā cuuvi.