3 Ní innee di nꞌdaataá nguáꞌāa chi cuaacu nííⁿnyúⁿ vɛ́ɛ́ necesidades yeⁿꞌe yā. 4 Naati nduuti chi nꞌdaataá nguáꞌāa vɛ́ɛ́ daiya tá o daiya yiinu tá daꞌcaiyāa sꞌééⁿ canéé chí dinꞌdaacá yā ní canéé chí diiⁿ cumplir obligaciones yeⁿꞌé yā ndúúcū ꞌiiⁿꞌyāⁿ yeⁿꞌe familia yeⁿꞌé yā. Ní daꞌcaiyāa sꞌééⁿ ní canéé chí diiⁿ yā cosas chi nꞌdaacā cáávā chɛɛcú yā ndúúcū chiidá yā ní cáávā chi neⁿꞌe ca yā chiidá yā ndúúcū chɛɛcú yā caati chuū ní cosa chi nꞌdaacā, ní cosa chi Ndyuūs neⁿꞌé yā chi daꞌcaiyāa sꞌééⁿ diíⁿ yā. 5 Ní nduuti chi cuaacu nííⁿnyuⁿ chi nꞌdaataá nguáꞌāa ní dámaāⁿ ta, canéé chí iꞌtéénu tá Ndyuūs ndúúcū confianza ní caaⁿꞌmaⁿnguaꞌa tá nanááⁿ Ndyuūs ndii nguuvi ndii nꞌgaaⁿ. 6 Ní nduuti chi nꞌdaataá nguáꞌāa diiⁿ tá tanꞌdúúcā chi maāⁿ tá neⁿꞌe tá, ꞌáárá chi canduūchi tá caneē tá tanꞌdúúcā chi nꞌdiī tá nanááⁿ Ndyuūs. 7 ꞌTiicá ntúūⁿ caꞌcueeⁿ di nducuéⁿꞌē chuū nanááⁿ ꞌiiⁿꞌyāⁿ yeⁿꞌe yaācū ni tanáⁿꞌā ꞌiiⁿꞌyāⁿ nguɛ́ɛ́ cuuvi caaⁿꞌmáⁿ yā chi vɛ́ɛ́ nuuⁿndi yeⁿꞌé yā. 8 Nduuti chi ꞌiiⁿꞌyāⁿ sꞌeeⁿ nguɛ́ɛ́ candɛɛ yā cuidado yeⁿꞌe ꞌiiⁿꞌyāⁿ yeⁿꞌe familia yeⁿꞌé yā ndúúcū chɛɛcú yā ndúúcū chiidá yā tuuꞌmi ní ꞌiiⁿꞌyāⁿ sꞌeeⁿ ndaacadaamí yā yeⁿꞌe chi iꞌtéénu yā ní ndii cunncáa cā nguɛ́ɛ́ ti ꞌiiⁿꞌyāⁿ chi nguɛɛ iꞌtéénu yā.

9 Cuuvi dingúūⁿ di na lista yeⁿꞌe nꞌdaataá nguáꞌāa caꞌáámá nꞌdaataá nguáꞌāa chi ꞌāā ngii tá ꞌiinu ngɛɛcu ꞌáámá nduūyū ní ꞌáámá nūuⁿ isaⁿꞌā nduūcū ta. 10 Ní nꞌdaataá nguáꞌāa miiⁿ canee chi ꞌāā chꞌɛɛtinee nꞌdaacā tá ní taaví nꞌdaācā tá daiya tá. Ní canéé chi nꞌguuⁿ tá na vaacu tá ꞌiiⁿꞌyāⁿ chi snúuⁿ yā yúúní, ní ꞌāā naaⁿnu tá caꞌā ꞌiiⁿꞌyāⁿ chí iꞌtéénu yā Ndyuūs tanꞌdúúcā costumbre yeⁿꞌé ꞌiiⁿꞌyāⁿ yeⁿꞌe ndaata yeⁿꞌe yā. Ní chinnee taꞌā tá ꞌiiⁿꞌyāⁿ chi ngiitā, ní diiⁿ tá ꞌāā dɛꞌɛ́ nūuⁿ ntiiⁿnyuⁿ chi nꞌdaacā.

11 Nguɛ́ɛ́ dingúūⁿ di na lista yeⁿꞌe nꞌdaataá nguáꞌāa ꞌáámá nꞌdaataá nguáꞌāa naⁿꞌa chi nguɛ́ɛ́ nduuyu yeⁿꞌe tá caati cuuvi neⁿꞌe ta ꞌcaandavaacu tá ní nguɛ́ɛ́ neⁿꞌe tá diiⁿ tá ntiiⁿnyuⁿ yeⁿꞌe Cristo. 12 Ní cuayiivi miiⁿ ní nꞌdaataá nguáꞌāa miiⁿ vɛ́ɛ́ culpa yeⁿꞌe tá chi nguɛ́ɛ́ diiⁿ tá cumplir compromiso yeⁿꞌe tá chi diiⁿ tá ntiiⁿnyuⁿ yeⁿꞌe Cristo. 13 Ní más cā cuuvi diiⁿ nꞌdaataá nguáꞌāa sꞌeeⁿ. ꞌÍícú cuuvi ꞌdaānꞌdī ntúūⁿ ta taachi ngeⁿꞌē tá ꞌáámá vaꞌai táámá vaꞌai. Níícú nguɛ́ɛ́ dámaāⁿ chi ꞌdaānꞌdī tá ti neené neⁿꞌe nandeē tá yeⁿꞌe ꞌiiⁿꞌyāⁿ ndúúcū nduudu chi nguɛ́ɛ́ cánéé chi caaⁿꞌmaⁿ tá ní diyaādí ta. Ní caⁿꞌa tá miiⁿ caⁿꞌa tá ꞌmuuⁿ ní diiⁿ tá cosas chi nguɛ́ɛ́ ituneeⁿ táⁿꞌā. 14 Cáávā chuū neⁿꞌé chi nꞌdaataá nguaꞌāa chi daꞌcaīyā ta ꞌcaandivaacu tá ni taavi tá daiya tá ní caaⁿꞌmaⁿ ntiiⁿnyuⁿ tá na vaacu tá. ꞌTíícā ní ꞌiiⁿꞌyāⁿ chi nguɛ́ɛ́ iꞌtéénu yā Ndyuūs nguɛ́ɛ́ caaⁿꞌmaⁿ cúnncaa yā yeⁿꞌē tá. 15 Caati nꞌduuví nꞌdaataá nguáꞌāa chi daꞌcaiya tá ꞌāā ndaacadaami tá yeⁿꞌē Cristo ní cueⁿꞌe tá lado yeⁿꞌe yááⁿnꞌguiinūuⁿ.

16 Ní nduuti chi ꞌáámá nꞌdaataá o saⁿꞌā chi iꞌtéénu yā Jesucristo yeⁿꞌē yú ní vɛɛ nꞌdaataá nguáꞌāa chi ꞌiiⁿꞌyāⁿ yeⁿꞌé yā, canéé chí caꞌá yā nꞌdaataá nguáꞌāa dɛꞌɛ̄ chi neⁿꞌe tá. ꞌTíícā ní nguɛ́ɛ́ canéé chi caꞌa ꞌiiⁿꞌyāⁿ yeⁿꞌe yaācū nꞌdaataa nguaꞌáá miiⁿ. ꞌTíícā ní cúúví caꞌa ꞌiiⁿꞌyāⁿ yeⁿꞌe yaācū tanáⁿꞌā nꞌdaataá nguáꞌāa chi cuaacu nííⁿnyúⁿ chi vɛ́ɛ́ necesidades yeⁿꞌe tá.

17 Maaⁿ ní saⁿꞌā sꞌeeⁿ chi ngaⁿꞌa ntiiⁿnyuⁿ nꞌdai yeⁿꞌe yaācū ndúúcū saⁿꞌā chi caꞌcueeⁿ nduudu yeⁿꞌe Ndyuūs ndúúcū saⁿꞌā chi candɛɛ nduudu yeⁿꞌe Ndyuūs cuuvi cutaꞌa sa honor chi doble yeⁿꞌe ꞌiiⁿꞌyāⁿ sꞌeeⁿ yeⁿꞌe yaācū. 18 ꞌTíícā canéé nguūⁿ na libro yeⁿꞌe Ndyuūs ndii cuááⁿ vmnaaⁿ. Nguɛ́ɛ́ cuꞌnūu di yaānā duutu ꞌyúúdūu o ꞌitiindu chí indeꞌei nuúⁿ tī nguaaⁿ trigo ní ꞌíícú cuuvi cheꞌé tī yeⁿꞌē. Ní canéé nguūⁿ táámá. Saⁿꞌā chi nídiiⁿ ntiiⁿnyuⁿ cuuvi cutaꞌā sa chiīꞌvɛ̄ yeⁿꞌē sa.

19 Nguɛ́ɛ́ cuꞌtéénu di ꞌiiⁿꞌyāⁿ chi ngaⁿꞌa yā yeⁿꞌe saⁿꞌā chi ngaⁿꞌa ntiiⁿnyuⁿ yeⁿꞌe yaācū nduuti chi nguɛ́ɛ́ vɛ́ɛ́ ꞌuuvī ndúú ꞌiinu testigos yeⁿꞌé yā. 20 Naati canee chi diiⁿ di reprender nanááⁿ nducyáácá ꞌiiⁿꞌyāⁿ yeⁿꞌe yaācū ꞌiiⁿꞌyāⁿ chi nadinuuⁿndí yā. Ní ꞌíícú tanáⁿꞌā ꞌiiⁿꞌyāⁿ ní díꞌvaꞌá yā. 21 Maaⁿ ní ꞌúú Pablo ngaⁿꞌá ngīi dii Timoteo chuū nanááⁿ Dendyuūs ní nanááⁿ Señor Jesucristo ní nanááⁿ ángeles chí Ndyuūs ndɛɛvɛ yā. Diiⁿ di nducuéⁿꞌē chuū ní nguɛ́ɛ́ nadacadíínuuⁿ di chi ꞌáámá yā chi chꞌɛɛtɛ cá yā nguɛ́ɛ́ ti táámá yā. Ní ꞌāā daamá nūuⁿ diiⁿ di ndúúcū nducyaaca ꞌiiⁿꞌyāⁿ. 22 Nguɛ́ɛ́ ndɛɛvɛ nuuⁿ di ꞌáámá saⁿꞌā chi caaⁿꞌmaⁿ ntiiⁿnyuⁿ sa yeⁿꞌe yaācū nduuti chi nguɛ́ɛ́ nꞌdiīchī di saⁿꞌā miiⁿ ꞌnaaⁿ tiempo. Ní nguɛ́ɛ́ vɛ́ɛ́ ꞌáámá parte yeⁿꞌē di ndúúcū saⁿꞌā miiⁿ taachi dinuuⁿndi sa. Divíi di yeⁿꞌe nducuéⁿꞌē chi nguɛ́ɛ́ nꞌdaacā ní nguɛ́ɛ́ dinuuⁿndí maāⁿ di.

23 Maaⁿ ní taachi yaꞌāī chɛɛti di nguɛ́ɛ́ cuꞌu di dámaāⁿ nuūⁿnīⁿ caati cuuvi cuꞌu di ꞌtɛ́ɛ́ vino. Ní taama vmnéⁿꞌēe chi yaꞌāī cuerpo yeⁿꞌē di cuꞌu di ꞌtɛ́ɛ́ vino.

24 Ní nuuⁿndi chi diiⁿ náⁿꞌā ꞌiiⁿꞌyāⁿ, ní deenu yú ti nꞌdiichi yú vmnaaⁿ chi ndaā nguuvi chi Ndyuūs nꞌdiichí yā nuuⁿndi yeⁿꞌe yú. Níícú nguɛ́ɛ́ deenu yú nuuⁿndi chi diiⁿ tanáⁿꞌā ꞌiiⁿꞌyāⁿ naati cuayiivi mííⁿ taachi nꞌdiichi Ndyuūs nuuⁿndi yeⁿꞌe yú tuuꞌmi ní snaaⁿ yú nuuⁿndi yeⁿꞌé yā. 25 ꞌTiicá ntúūⁿ snaaⁿ yú nducuéⁿꞌē chi nꞌdaacā chi diiⁿ ꞌiiⁿꞌyāⁿ. Ní ꞌáárá chí nguɛ́ɛ́ inaaⁿ yú maaⁿ chiiⁿ chi nꞌdaacā chi diíⁿ yā cuayiivi ní Ndyuūs idiiⁿ yā chi cadiinuuⁿ yú táácā yeⁿꞌé ꞌiiⁿꞌyāⁿ sꞌeeⁿ.