Yeⁿꞌe ꞌiiⁿꞌyāⁿ chi nguɛ́ɛ́ ꞌáámá cunee yā ndúúcū chi iꞌtéénu yā
4
Espíritu Nꞌdai yeⁿꞌé Ndyuūs ngaⁿꞌa cuaacu yeⁿꞌē nguuvi chi cuchiī taachi ngaⁿꞌa chí naⁿꞌa ꞌiiⁿꞌyāⁿ caⁿꞌa yā ndaacadaamí yā yeⁿꞌē nduudu cuaacu ní cuꞌneeⁿveéⁿ yā nduudu yeⁿꞌe espíritus chi nginncheꞌei ꞌiiⁿꞌyāⁿ, espíritus chi ngiꞌcueeⁿ cosas chi nguɛ́ɛ́ cuaacu. Ní yááⁿnꞌguiinūuⁿ dichóꞌo sa espíritus. 2 Ní ꞌiiⁿꞌyāⁿ sꞌeeⁿ ꞌcaandiveéⁿ yā nduudu yeⁿꞌe ꞌiiⁿꞌyāⁿ chi ngaⁿꞌá yā chi iꞌtéénu yā Ndyuūs yeⁿꞌē yú, ní nguɛ́ɛ́ cuaacu. Ní caⁿꞌá yā nꞌgiindiveéⁿ yā nduudu yeⁿꞌe ꞌiiⁿꞌyāⁿ chi ngaⁿꞌa nduudu yaadi. Níícú ꞌiiⁿꞌyāⁿ chi nguɛɛ nꞌdaacā idiíⁿ yā canee yā ndúúcū vaanicadíínūuⁿ yeⁿꞌé yā chi nguɛ́ɛ́ nꞌdaacā. Ní nguɛ́ɛ́ yaꞌáí yā yeⁿꞌe chi diíⁿ yā taachi diíⁿ yā cosas chi nguɛ́ɛ́ nꞌdaacā. 3 ꞌIiⁿꞌyāⁿ sꞌeeⁿ nguɛ́ɛ́ nꞌguuⁿ yā chi chꞌiindivaacu ꞌiiⁿꞌyāⁿ. Ní nguɛ́ɛ́ nꞌguuⁿ yā chi ngeꞌe ꞌiiⁿꞌyāⁿ tanducuéⁿꞌē chi ngeꞌe yú. Deenu yú chi Ndyuūs dinꞌdái yā tanducuéⁿꞌē chi ngeꞌe yú. Cáávā chi nducyáácá ꞌiiⁿꞌyāⁿ chi iꞌtéénu yā Ndyuūs ndúúcū ꞌiiⁿꞌyāⁿ chi deenú yā nduudu cuaacu yeⁿꞌé yā cuuvi cheꞌé yā tanducuéⁿꞌē. Ní nducyaaca ꞌiiⁿꞌyāⁿ chi cheꞌé yā canee chi caaⁿꞌmáⁿ yā gracias Ndyuūs cáávā chí cheꞌe yā. 4 Deenu yú chi nducuéⁿꞌē chi dinꞌdái Ndyuūs chi cheꞌe yú ní nꞌdaacā. Ní ꞌiiⁿꞌyāⁿ nguɛ́ɛ́ canee chi cuꞌneeⁿ yā ꞌáámá lado mar ꞌáámá caati canéé chi cutaꞌá yā ní caaⁿꞌmáⁿ yā gracias Ndyuūs. 5 Caati tanducuéⁿꞌē denduꞌú ꞌcūū ní nꞌdaacā ní ꞌiiⁿꞌyāⁿ cuuvi cheꞌé yā chuū ti Dendyuūs ngaⁿꞌá yā ꞌtíícā yeⁿꞌē na libro yeⁿꞌé yā. Maaⁿ ní ngiica yú Ndyuūs chi Ndyuūs diíⁿ yā bendecir chuū chi cheꞌe yú.ꞌIiⁿꞌyāⁿ idiiⁿ ntiiⁿnyuⁿ yā chí nꞌdai yeⁿꞌe Jesucristo
6 Nduuti chi dii, Timoteo, caꞌcueeⁿ dí dendúꞌu ꞌcūū nanááⁿ ꞌiiⁿꞌyāⁿ chi iꞌtéénu Señor Jesucristo tuuꞌmi ní dichííꞌvɛ̄ ca di Señor Jesucristo. Ní taachi caꞌcueeⁿ di nduudu nꞌdáí ꞌcūū yeⁿꞌe Jesucristo ní ꞌcuɛɛtinee di tanꞌdúúcā chi ngaⁿꞌa nduudú ꞌcūū tuuꞌmi ní idiiⁿ di chi dii maaⁿ di chi nꞌgiindiveeⁿ di nduudu yeⁿꞌe di ní cuꞌtéénu ca di yeⁿꞌé Ndyuūs. 7 Nguɛ́ɛ́ cuꞌneeⁿveeⁿ di yeⁿꞌe cuentos zonzos chi yeⁿꞌe íⁿꞌyeeⁿdī, cuentos chi nguɛ́ɛ́ ngíícá yeⁿꞌé Ndyuūs caati nguɛ́ɛ́ dichííꞌvɛ̄ chi caaⁿꞌmaⁿ yú chuū nanááⁿ ꞌiiⁿꞌyāⁿ. Ní tanducuéⁿꞌē chi diiⁿ di, cueⁿꞌe daāⁿmaⁿ diiⁿ di tanꞌdúúcā Ndyuūs neⁿꞌé yā chi diiⁿ di. 8 Deenu yú chi taachi diiⁿ yú ejercicios cáávā cuerpo yeⁿꞌe yú taaⁿ ꞌlííⁿ chuundi dichííꞌvɛ̄ sꞌuuúⁿ. Níícú taachí diiⁿ yú chííⁿ chí neⁿꞌe Ndyuūs tanducuéⁿꞌē dichííꞌvɛ̄ yú caati diiⁿ yú chi nꞌdaacā cáávā sꞌuuúⁿ nguuvi sꞌeeⁿ chi canee yú iⁿꞌyeeⁿdí ꞌcūū níícú cucáávā nguuvi chi cuchiī. 9 Nduudú ꞌcūū ní cuaacu chí cuaacu, níícú nducyáácá ꞌiiⁿꞌyāⁿ canéé chi cuꞌtéénu yā nduudú ꞌcūū. 10 Ní cáávā nduudú ꞌcūū ní diiⁿ yú ntiiⁿnyuⁿ. Ní nꞌgeenu yú ngii ti ꞌiiⁿꞌyāⁿ ngaⁿꞌa taáⁿ yā yeⁿꞌē yú. ꞌTíícā chóꞌōo yeⁿꞌē yú caati iꞌteenu yú Jesucristo ní canéé ngiinu yú Ndyuūs chi canduuchi chí cuuvi nadanguáⁿꞌai yā nducyaaca ꞌiiⁿꞌyāⁿ ní nadanguáⁿꞌai yā nducyaaca ꞌiiⁿꞌyāⁿ chi iꞌtéénu yā ꞌyā.
11 Níícú dííⁿ, Timoteo, ꞌúú ngaⁿꞌá chi canee chi caꞌcueeⁿ di nduudú ꞌcūū. 12 Nguɛ́ɛ́ ꞌcuaaⁿ di lugar chi ꞌiiⁿꞌyāⁿ nguɛ́ɛ́ neⁿꞌe yā dii cucáávā chi duūꞌvi nguuví yeⁿꞌē di. Dinꞌdaacā di ndúúcū tanducuéⁿꞌē chi diiⁿ di, yeꞌē chi ngaⁿꞌa di, yeⁿꞌē chi diiⁿ di. Ní dineꞌe di nducyáácá ꞌiiⁿꞌyāⁿ. Ní diitu canee di ndúúcū chi iꞌtéénu di. Ní diiⁿ di chi vida yeⁿꞌē di ní nꞌdaacā nanááⁿ nducyáácá ꞌiiⁿꞌyāⁿ. Ní vida yeⁿꞌē di canee tanꞌdúúcā ꞌáámá ejemplo. 13 Níícú ꞌnaaⁿ tiempo chi ꞌāā cuɛ́ɛ́ ndaá nanááⁿ di ꞌcueeⁿ di libro yeⁿꞌé Ndyuūs nanááⁿ ꞌiiⁿꞌyāⁿ. Ní yaaꞌvi di ꞌiiⁿꞌyāⁿ chi ꞌcaandiveéⁿ yā nduudu yeⁿꞌé Ndyuūs. Ní caꞌcueeⁿ di ꞌiiⁿꞌyāⁿ tanducuéⁿꞌē chi yeⁿꞌé Ndyuūs neⁿꞌe chi ndaá. 14 Ní diiⁿ di tanducuéⁿꞌē chi cuuvi di yeⁿꞌē ntiiⁿnyuⁿ chi Ndyuūs tee yā dii taachi saⁿꞌā chi ꞌcueeⁿ nduudu yeⁿꞌe Ndyuūs ngaⁿꞌá yā yeⁿꞌē chi diiⁿ di. Ní saⁿꞌā chi ngaⁿꞌa ntiiⁿnyuⁿ yeⁿꞌe yáacū sꞌnúuⁿ yā taꞌa yā ná tiiⁿ di cáávā chi choꞌó yā dii chi diiⁿ di ntiiⁿnyuⁿ yeⁿꞌé Ndyuūs.
15 Canéé chí diiⁿ di nducuéꞌē chi ngaⁿꞌá dii ní diiⁿ di tanꞌdúúcā chi ꞌāā ꞌcueeⁿ di. Ní ꞌíícú ꞌiiⁿꞌyāⁿ cuuvi deenú yā chi cuꞌtéénu ca di nguuvi nguuvi. 16 Ní díí, Timoteo, cundɛ́ɛ di cuidado yeⁿꞌē maaⁿ di, ní yeⁿꞌē tanducuéⁿꞌē chi diiⁿ di, ní yeⁿꞌē chi caꞌcueeⁿ di ꞌiiⁿꞌyāⁿ. Caati nduuti chi diiⁿ di ꞌtúúcā nadinguáⁿꞌai maāⁿ di dii ndúúcū ꞌiiⁿꞌyāⁿ chi nꞌgiindiveéⁿ yā nduudu yeⁿꞌē di.