Yeⁿꞌe tanꞌdúúcā chi canee chi diiⁿ saⁿꞌā chi obispo
3
Chuū chi ngaⁿꞌá maaⁿ ní cuaacu. ꞌĀā duꞌú nūuⁿ saⁿꞌā chi neⁿꞌe sa cuuvi sa obispo ní cundɛɛ sa cuidado yeⁿꞌe ꞌiiⁿꞌyāⁿ yeⁿꞌe yaācū canee sa chi diiⁿ sa ntiiⁿnyuⁿ chí nꞌdaacā. 2 Ní cáávā chuū saⁿꞌā chí diiⁿ sa ntiiⁿnyuⁿ yeⁿꞌe obispo canee chi ꞌcuɛɛtinee sa nꞌdaacā caati ꞌiiⁿꞌyāⁿ sꞌeeⁿ nguɛ́ɛ́ cuuvi caaⁿꞌmáⁿ yā chi vɛ́ɛ́ nuuⁿndi yeⁿꞌé yā. Ní saⁿꞌā miiⁿ, sáⁿꞌā chi ꞌáámá nūuⁿ nꞌdaataá yeⁿꞌē sa. Ní saⁿꞌā miiⁿ canéé cuuⁿmiⁿ chi serio sa ní diiⁿ sa cueⁿꞌe daāⁿmaⁿ ntiiⁿnyuⁿ chi nꞌdaācā ndúúcū orden. Saⁿꞌā miiⁿ canee chi ꞌcuaaⁿ sa na vaacu sa ꞌiiⁿꞌyāⁿ chi canúúⁿ yúúní. Ní canee chi caꞌcueeⁿ sa nꞌdai. 3 Saⁿꞌā miiⁿ nguɛ́ɛ́ cuuvi ꞌcúúꞌví sá ní nguɛ́ɛ́ inꞌnuuⁿ sa vaadī ꞌcaaꞌva chi ꞌcaaꞌva sa. Ndíí nguɛ́ɛ́ ndúú neⁿꞌe sa diiⁿ sa ganar tuūmī manera chi nguɛ́ɛ́ nꞌdaacā cáávā vicio yeⁿꞌe sa. Sáⁿꞌā obispo miiⁿ canee chi diiⁿ sa ꞌtíícā. Canee chi manso sa ní nguɛ́ɛ́ neⁿꞌe sa ꞌcuuⁿꞌmaⁿ sa ndúúcū ꞌiiⁿꞌyāⁿ, ndíí nguɛ́ɛ́ ndɛɛ sa ꞌaama vicio yeⁿꞌe tuūmī. 4 Saⁿꞌā miiⁿ canee chi ngaⁿꞌā ntiiⁿnyuⁿ sa chi nꞌdaacā na vaacu sa ní diiⁿ sa chi daiya sa ꞌcaandiveéⁿ yā yeⁿꞌē sa ní daiya sa diíⁿ yā respetar chiidá yā. 5 Ní ndúúti chi ꞌáámá saⁿꞌā nguɛ́ɛ́ déénu sa caaⁿꞌmaⁿ ntiiⁿnyuⁿ sa na vaacu sa tuuꞌmi ní ¿táácā cuuvi diiⁿ sa cuidado yeⁿꞌe denduꞌū chi yeⁿꞌe yáacū yeⁿꞌé Ndyuūs? 6 Saⁿꞌā obispo miiⁿ nguɛ́ɛ́ canee sa tanꞌdúúcā ꞌáámá saⁿꞌā chi caama iꞌtéénu sa Jesucristo caati cuuvi nacádíínuuⁿ sa chi chꞌɛɛtɛ maaⁿ sa ti nguɛ́ɛ́ dinuuⁿdi sa tanꞌdúúcā chi diīiⁿ yááⁿnꞌguiinūuⁿ. 7 Ní saⁿꞌā obispo miiⁿ canee ntúūⁿ chi dinꞌdaacā sa nanááⁿ ꞌiiⁿꞌyāⁿ chi nguɛɛ iꞌtéénu yā Señor Jesucristo yeⁿꞌe yú caati ꞌiiⁿꞌyāⁿ sꞌeeⁿ diíⁿ yā honrar saⁿꞌā miiⁿ. Ní ꞌíícú saⁿꞌā obispo miiⁿ nguɛ́ɛ́ cúúví cunee sa ndúúcū vaadī ꞌcuiinuú chi caꞌa sa lugar chi nginncheꞌei yááⁿnꞌguiinūuⁿ saⁿꞌā miiⁿ.Yeⁿꞌē chi canéé chi diiⁿ saⁿꞌā chi diáconos
8 Maaⁿ ní ngaⁿꞌá yeⁿꞌe saⁿꞌā diáconos chi cūnnee sa ndúúcū ntiiⁿnyuⁿ yeⁿꞌe yáacū. ꞌTiicá ntúūⁿ saⁿꞌa sa diáconos canee chí diiⁿ sa ntiiⁿnyuⁿ chi nꞌdaācā ndúúcū orden. Ní canéé cuuⁿmiⁿ chi saⁿꞌā serio sa. Ní canéé chí diiⁿ sa cumplir chiiⁿ chi ngaⁿꞌā sa. Saⁿꞌā miiⁿ ní nguɛ́ɛ́ cuuvi ꞌcúúꞌví sá. Ndíí nguɛ́ɛ́ ndúú neⁿꞌe sa diiⁿ sa ganar tuūmī manera chi nguɛ́ɛ́ nꞌdaacā cáávā vicio yeⁿꞌē sa. 9 Saⁿꞌā diácono canéé chí deenu sa nꞌdaacā nꞌdai nducuéⁿꞌē enseñanza yeⁿꞌē chi iꞌteenu sa yeⁿꞌe chi Ndyuūs chiꞌcueéⁿ yā sꞌuuúⁿ. Ní canee sa ndúúcū vaanicadíínūuⁿ yeⁿꞌē sa chi dɛɛvɛ. 10 Saⁿꞌā diácono ní saⁿꞌā chi ꞌiiⁿꞌyāⁿ ꞌāā nꞌdiichí yā chi nꞌdaacā chi diiⁿ sa. Ní nduuti chi nguɛ́ɛ́ vɛ́ɛ́ falta yeⁿꞌē sa tuuꞌmi ní cuuvi diiⁿ sa ntiiⁿnyuⁿ yeⁿꞌe saⁿꞌā diáconos. 11 Níícú ꞌtiicá ntúūⁿ nꞌdaataá yeⁿꞌe saⁿꞌā diácono canee chi táⁿꞌā seria ta ní dinꞌdaacā tá. Nguɛ́ɛ́ canee chi caaⁿꞌmaⁿ tá yeⁿꞌe ꞌiiⁿꞌyāⁿ. Ní canee chi dinꞌdáacaā tá yeⁿꞌe tanducuéⁿꞌē chi diiⁿ tá. 12 Níícú saⁿꞌā diácono miiⁿ ní saⁿꞌā chi ꞌáámá nūuⁿ nꞌdaataá yeⁿꞌē sa. Ní canee chi ngaⁿꞌā ntiiⁿnyuⁿ sá chi nꞌdaacā na vaacu sa ní diiⁿ sa chi daiya sa nꞌgiindiveéⁿ yā yeⁿꞌē sa. 13 Caati saⁿꞌā miiⁿ chi diiⁿ nꞌdaacā ntiiⁿnyuⁿ yeⁿꞌe diácono, saⁿꞌā miiⁿ diiⁿ sa ganar lugar yeⁿꞌe ꞌiiⁿꞌyāⁿ chi honrado yā. Ní vɛ́ɛ́ cá confianza yeⁿꞌē sa chi cuuvi caaⁿꞌmaⁿ sa yeⁿꞌe Señor Jesucristo tanꞌdúúcā chi iꞌtéénu sa yeⁿꞌē nduudu yeⁿꞌé yā.
Yeⁿꞌe chi ꞌiiⁿꞌyāⁿ nguɛ́ɛ́ deenú yā chi yeⁿꞌe Ndyuūs
14 Cunee ngiinú chi ndaa nuúⁿ nꞌdiichí dii naati maaⁿ ní chuū idinguúⁿ yeⁿꞌē di. 15 Ní nduuti chi nguɛ́ɛ́ nndaa nuúⁿ tuuꞌmi cuuvi tuumicádíínuuⁿ di táácā chi cuuvi ꞌcuɛɛtinéē ꞌiiⁿꞌyāⁿ sꞌeeⁿ taachi iꞌtéénu yā ní yeⁿꞌé Ndyuūs ꞌiiⁿꞌyāⁿ sꞌeeⁿ. Caati nducyaaca sꞌuuúⁿ chi iꞌteenu yú Señor Jesucristo ní yeⁿꞌé Ndyuūs sꞌuuúⁿ. Ní sꞌuuúⁿ ní yáacū yeⁿꞌe Ndyuūs chi canduuchi, ꞌtíícā sꞌuuúⁿ. Ní sꞌuuúⁿ tanꞌdúúcā cimiento ndúúcū pilar yeⁿꞌe yáācū, ꞌtíícā sꞌuuúⁿ ti ngaⁿꞌa yú nduudu cuaacu yeⁿꞌé Ndyuūs nanááⁿ nducyáácá ꞌiiⁿꞌyāⁿ. 16 Níícú mar ꞌáámá ꞌiiⁿꞌyāⁿ nguɛ́ɛ́ cuuvi caaⁿꞌmáⁿ yā yeⁿꞌe enseñanzas yeⁿꞌé Ndyuūs yeⁿꞌē yú chi nguɛ́ɛ́ chꞌɛɛtɛ taavi ca, enseñanzas chi Ndyuūs chiꞌcueéⁿ yā sꞌuuúⁿ:
Ndyuūs yeⁿꞌe yú ndaá yā na iⁿꞌyeeⁿdi ꞌcūū ndúúcū cuerpo tanꞌdúúcā sꞌuuúⁿ. Ní chꞌiⁿꞌi Espíritu Nꞌdai yeⁿꞌé Ndyuūs chi Cristo ní cuaacu yā. Ní ángeles yeⁿꞌē vaꞌai chɛɛti nguuvi nꞌdiichí yā Cristo. Ní ꞌiiⁿꞌyāⁿ candɛɛ́ yā nduudu cuaacu yeⁿꞌé Cristo nanááⁿ ꞌiiⁿꞌyāⁿ yeⁿꞌe tanducuéⁿꞌē país yeⁿꞌē iⁿꞌyeeⁿdí ꞌcūū. Ní ꞌiiⁿꞌyāⁿ yeⁿꞌe tanducuéⁿꞌē cuaaⁿ yeⁿꞌe iⁿꞌyeeⁿdí ꞌcūū ní chiꞌtéénu yā Cristo. Ní Cristo cunaⁿꞌa ntuúⁿ yā na vaꞌai chɛɛti nguuvi.