Yeⁿꞌe chí cuuvi caaⁿꞌmaⁿnguaꞌa yú
2
Vmnááⁿ vmnaaⁿ ngiicá dii Timoteo chi caaⁿꞌmaⁿnguaꞌā di cáávā nducyáácá ꞌiiⁿꞌyāⁿ ní caꞌa di gracias Ndyuūs cáávā nducyáácá ꞌiiⁿꞌyāⁿ. 2 Ní canee cuuⁿmiⁿ chi caaⁿꞌmaⁿnguaꞌa di cáávā saⁿꞌā reyes níícú cáávā nducyáácá ꞌiiⁿꞌyāⁿ ꞌiiⁿntyéⁿꞌē caati cuuvi ꞌcuɛɛtinee yú nꞌdaacā ní nguɛ́ɛ́ ndúúcū vaadī ꞌcaaꞌva ti ꞌcuɛɛtinee yú ndúúcū vaadī ꞌdiiíⁿ. Ní diiⁿ yú tanducuéⁿꞌē tanꞌdúúcā chi Ndyuūs neⁿꞌé yā chi diiⁿ yú. Ní ꞌcuɛɛtinée yú nꞌdaacā yeⁿꞌe nducuéⁿꞌē ndúúcū ꞌiiⁿꞌyāⁿ. 3 Ti chuū ní nꞌdaacā nanááⁿ Ndyuūs ní inéé yiinūu taaví yā taachí diiⁿ yú ꞌtíícā. Ndyuūs yeⁿꞌē yú nadanguáⁿꞌai yā sꞌuuúⁿ. 4 Ní neⁿꞌé yā chi nducyaaca ꞌiiⁿꞌyāⁿ ninguaⁿꞌai yā ní tuumicádíínuuⁿ yā chɛ́ɛ́ chí nduudu cuaacu yeⁿꞌé Ndyuūs. 5 Deenu yú chi vɛ́ɛ́ ꞌáámá Ndyuūs. Ní vɛ́ɛ́ ꞌáámá ꞌiiⁿꞌyāⁿ chi caaⁿꞌmáⁿ yā na lugar yeⁿꞌē yú nanááⁿ Ndyuūs. Ní ꞌiiⁿꞌyāⁿ miiⁿ ní Saⁿꞌā chi Daiyá yā chi Señor Jesucristo yeⁿꞌē yú. 6 Ní Jesucristo caꞌá yā vida yeⁿꞌe maáⁿ yā chi chꞌīi yā cáávā chi nadííꞌvɛ yā nuuⁿndi yeⁿꞌē nducyáácá ꞌiiⁿꞌyāⁿ ní ꞌiicu cuuvi nadinguáⁿꞌai yā nducyaaca ꞌiiⁿꞌyāⁿ. Chuū ní Cristo diíⁿ yā tiempo chi nꞌdaacā ꞌíícú ꞌcuuⁿꞌmiⁿ yā chi Ndyuūs neⁿꞌé yā chi nducyaaca ꞌiiⁿꞌyāⁿ cuuvi ninguaⁿꞌāī. 7 Ní cáávā chuū Ndyuūs dichóꞌo yā ꞌúú chi ꞌúú cuuvi apóstol yeⁿꞌé yā. Ní ꞌúú caꞌcueéⁿ ꞌiiⁿꞌyāⁿ nduudu cuaacu yeⁿꞌé Ndyuūs nanááⁿ ꞌiiⁿꞌyāⁿ gentiles chi nguɛ́ɛ́ yeⁿꞌē ndaata ꞌiiⁿꞌyāⁿ Israel. ꞌÚú ngaⁿꞌá nduudu cuaacu yeⁿꞌé Ndyuūs ní ꞌíícú ꞌiiⁿꞌyāⁿ cuuvi cuꞌtéénu yā. Nguɛ́ɛ́ ngaⁿꞌá nduudu yaadi.8 Neⁿꞌé chi ndii nducuéⁿꞌē cuaaⁿ nducyáácá ꞌiiⁿꞌyāⁿ cááⁿꞌmáⁿnguaꞌa yā ndúúcū nuuⁿmaⁿ staava yeⁿꞌé yā chi dɛɛvɛ. Ní nguɛ́ɛ́ nduuvi taáⁿ yā, ndíí nguɛ́ɛ́ ndúú ꞌcuuⁿꞌmaⁿ yā. 9 Ní ꞌtiicá ntúūⁿ nꞌdaataá canéé chí cunúu yā catecai yā chi nꞌdaacā chi nguɛ́ɛ́ yaⁿꞌāī ca chiiꞌvɛ ní nguɛ́ɛ́ neené nꞌdɛɛvɛɛ́. Ní nguɛ́ɛ́ canéé chí dichꞌɛɛtɛ yā maáⁿ yā. Ní nguɛ́ɛ́ diíⁿ yā ꞌaama peinada tiíⁿ yā chi nguɛ́ɛ́ nꞌdaacā. Ní nguɛ́ɛ́ snuuⁿ yā vmnaaⁿ cuerpo yeⁿꞌé yā nꞌdeee nꞌdáí ꞌdííⁿnguāaⁿ ndíí nguɛ́ɛ́ ndúú perlas. Ní nguɛ́ɛ́ cunúuⁿ yā tiīnūuⁿ chi yaⁿꞌai chííꞌvɛ̄. 10 Naati nꞌdaata sꞌeeⁿ canee chi dinꞌdaaca yā nanááⁿ ꞌiiⁿꞌyāⁿ tanꞌdúúcā chi Ndyuūs neⁿꞌe yā ní tanꞌdúúcā chi canee chi diiⁿ nducyaaca nꞌdaataá chi cuaacu chi iꞌtéénu yā ꞌiivú Ndyuūs. 11 Ní nꞌdaataá sꞌeeⁿ canee chi nꞌgeeⁿ yā chííⁿ chi nꞌgiindiveeⁿ yā ní cuneé yā chi ndiicúuⁿ yā. 12 Nguɛ́ɛ́ neⁿꞌé chi nꞌdaataá caꞌcueeⁿ yā saⁿꞌā chɛɛti yaacū ní nguɛ́ɛ́ cunee yā lado yeⁿꞌe ꞌiiⁿntyéⁿꞌē chi caaⁿꞌmaⁿ ntiiⁿnyuⁿ yā yeⁿꞌe saⁿꞌā. Ní nguɛ́ɛ́ canéé chi caaⁿꞌmaⁿ nꞌdaataá sꞌeeⁿ chɛɛti yaācū. 13 Caati Ndyuūs vmnááⁿ vmnaaⁿ dinꞌdái yā saⁿꞌā Adán ní cuayiivi miiⁿ ní dinꞌdái yā nꞌdaataá Eva. 14 Ní yááⁿnꞌgiinūuⁿ nguɛ́ɛ́ chinncheꞌei sa Adán miiⁿ naati chinncheꞌei sa nꞌdaataá Eva miiⁿ ní dinuuⁿndi tá. 15 Dɛꞌɛ̄ chúúcā nꞌdai ꞌáámá nꞌdaataá chi vɛ́ɛ́ daiyá tá. Cuuvi nguáⁿꞌai tá nduuti chi ꞌáámá cunee tá ndúúcū chi iꞌteenu tá, ní nduuti chi dinéⁿꞌe tá nducyaaca ꞌiiⁿꞌyāⁿ. Ní chꞌiⁿꞌi tá chi yeⁿꞌe Ndyuūs, ní diiⁿ ta cosas chi seria.