ꞌAámá soldado yeⁿꞌē Señor Jesucristo chi dinꞌdááca sa
2
Díí, Timoteo, chi tanꞌdúúcā daiyá, cutaꞌa di fuerzas yeⁿꞌē nducuéⁿꞌē vaadī nꞌdai chi cuuvi yeⁿꞌē yú caati maaⁿ ní yeⁿꞌe Jesucristo sꞌuuúⁿ. 2 Ní tanducuéⁿꞌē chi nꞌgiindiveeⁿ di yeⁿꞌe ꞌúú chi ngaⁿꞌá nanááⁿ nꞌdeee nꞌdáí ꞌiiⁿꞌyāⁿ, chuū ní caꞌcueeⁿ di saⁿꞌā sꞌeeⁿ chi iꞌtéénu sa chi ꞌáámá cūnee sa nꞌdaacā ndúúcū chi iꞌtéénu sa, ní saⁿꞌā sꞌeeⁿ ní cuuvi caꞌcueeⁿ sa tanáⁿꞌā ꞌiiⁿꞌyāⁿ.3 Ní taachi canee chi ꞌcueenu dí cuuvi tuuꞌmi ní nꞌgeenu di ngii tanꞌdúúcā ꞌáámá soldado chi nꞌdaacā sa. ꞌTíícā diiⁿ di caati dii ní ꞌáámá soldado yeⁿꞌe Señor Jesucristo. 4 Deenu di tanꞌdúúcā chi ꞌáámá soldado chi canéé na servicio nguɛ́ɛ́ diiⁿ sa tanꞌdúúcā tanáⁿꞌā saⁿꞌā chi nguɛ́ɛ́ canee na servicio caati canee sa diiⁿ sa cumplir tanducuéⁿꞌē chi ngaⁿꞌa comandante yeⁿꞌē sa. 5 ꞌTiicá ntúūⁿ. ꞌIiⁿꞌyāⁿ chi caⁿꞌá na cancha nguɛ́ɛ́ cuuvi cutaꞌa yā mar ꞌáámá premio nduuti chi nguɛ́ɛ́ diíⁿ yā cumplir reglas yeⁿꞌē. 6 ꞌTiicá ntúūⁿ. ꞌIiⁿꞌyāⁿ chi diiⁿ ntiiⁿnyuⁿ na campo yeⁿꞌé yā cuuvi cutaꞌá yā caavā maáⁿ yā cosecha yeⁿꞌé yā chi vmnááⁿ vmnaaⁿ. 7 Dii, Timoteo, nadacádíínūūⁿ di yeⁿꞌē chi ngaⁿꞌá níícú Señor yeⁿꞌē yú diíⁿ yā chi cadíínuuⁿ di tanducuéⁿꞌē.
8 Nꞌgáácú dí ti Jesucristo yeⁿꞌē yú ní yeⁿꞌē ndaata yeⁿꞌē David ꞌiiⁿꞌyāⁿ, ní nnduuchi yā yeⁿꞌē nguaaⁿ tináⁿꞌā. ꞌTúúcā ngaⁿꞌā nduudu cuaacu chi nadinguáⁿꞌāī ꞌiiⁿꞌyāⁿ. 9 Níícú cáávā chi ngaⁿꞌá nduudu cuaacu yeⁿꞌé yā neene nꞌgeenú ngii ní canuúⁿ vácūū ndúúcū cadenas tanꞌdúúcā chi ꞌniiⁿꞌnúⁿ ꞌiiⁿꞌyāⁿ naati nduudu yeⁿꞌé Ndyuūs nguɛ́ɛ́ cuuvi ꞌcuɛɛ̄ chiichí ndúúcū cadenas. 10 Ní cáávā nducuéⁿꞌē chuū ꞌúú cuchɛɛ́ yeⁿꞌe tanducuéⁿꞌē chi nꞌgeenú ngii caavā ꞌiiⁿꞌyāⁿ chi Ndyuūs nndɛɛvɛ yā chi cuuvi yeⁿꞌé yā ꞌiiⁿꞌyāⁿ. Ní ꞌíícú ꞌiiⁿꞌyāⁿ sꞌeeⁿ cuuvi cuꞌtéénu yā Ndyuūs. Ní Ndyuūs cuuvi nadanguaⁿꞌai yā ꞌiiⁿꞌyāⁿ yeⁿꞌe nuuⁿndi yeⁿꞌé yā cáávā Jesucristo. Ní ꞌiiⁿꞌyāⁿ sꞌeeⁿ cuuvi ndaaca yā vida nꞌdai chi vida cueⁿꞌe daāⁿmaⁿ.
11 Nduudú ꞌcūū ní cuaacu chi ngaⁿꞌa ꞌiiⁿꞌyāⁿ:
Nduuti chi diiⁿ yú cuenta chi ꞌāā nꞌdiī yú ndúúcū Cristo tuuꞌmi ní diiⁿ yú cuenta chi cunduuchi ntuūⁿ yú ndúúcu yā.
12 ꞌTiicá ntúūⁿ. Nduuti chi nꞌgeenū yú ngii cááva yā ndúúcū nducuéⁿꞌē denduꞌū tuuꞌmi ní caaⁿꞌmaⁿ ntiiⁿnyuⁿ yú ndúúcu yā. Ní nduuti chí cueeⁿdiītu yú yeⁿꞌe Cristo tuuꞌmi ní Cristo caⁿꞌá yā caaⁿꞌmaⁿ yā chi sꞌuuúⁿ nguɛ́ɛ́ yeⁿꞌé yā sꞌuuúⁿ.
13 Nduuti chi n̄ꞌdaaⁿ yú ní nguɛ́ɛ́ ꞌaama canee yú ndúúcū chi iꞌteenu yú yeⁿꞌe Jesucristo tuuꞌmi ní Jesucristo nguɛ́ɛ́ n̄ꞌdaaⁿ yā ti ꞌtííca yā ní ꞌáámá canee yā caati Cristo miiⁿ nguɛ́ɛ́ cuuvi cueeⁿdiitú yā yeⁿꞌē maáⁿ yā.
14 Maaⁿ ní dii, Timoteo, nꞌgaacú di yeⁿꞌe nducuéⁿꞌē denduꞌū. Yaaꞌvi di ꞌiiⁿꞌyāⁿ sꞌeeⁿ nanááⁿ ꞌiivú Ndyuūs yeⁿꞌē yú chi canéé chi diíⁿ yā ꞌtúúcā. Yaaꞌvi di ꞌiiⁿꞌyāⁿ sꞌeeⁿ chi nguɛ́ɛ́ cuuvi ꞌcuuⁿꞌmáⁿ yā ndúúcū cheendí yā caati nduudu yeⁿꞌé yā nguɛ́ɛ́ dichííꞌvɛ̄. Nduudu sꞌeeⁿ dámaāⁿ diīiⁿ chi tanáⁿꞌā ꞌiiⁿꞌyāⁿ nadacadíínuuⁿ ca yā yeⁿꞌe chi chꞌiindiveéⁿ yā yeⁿꞌe nduudu yeⁿꞌé yā. 15 Ní díí diiⁿ di tanducuéⁿꞌē chi nꞌdaacā chi cuuvi di caati taachi ndaa di nanááⁿ Dendyuūs cuuvi di ꞌcuuⁿꞌmiⁿ di chi nꞌdaācā diiⁿ di ntiiⁿnyuⁿ yeⁿꞌé yā. Ní nꞌdaacā ngiꞌcueeⁿ di nduudu cuaacu yeⁿꞌé Ndyuūs nanááⁿ ꞌiiⁿyāⁿ. Ní nguɛ́ɛ́ cuuvi ꞌcuináaⁿ di nanááⁿ Ndyuūs. 16 Divíi di yeⁿꞌe ꞌiiⁿꞌyāⁿ chi ngaⁿꞌa nꞌdeee nꞌdáí nduudu chi nguɛ́ɛ́ dáámá ndúúcū nduudu cuaacu yeⁿꞌé Ndyuūs caati nguɛ́ɛ́ dichííꞌvɛ̄. ꞌIiⁿꞌyāⁿ chi ngaⁿꞌa yā ꞌtúúcā diiⁿ cá yā nuuⁿndi. 17 Níícú nduudu chi nguɛ́ɛ́ nꞌdaacā chi ꞌiiⁿꞌyāⁿ sꞌeeⁿ caꞌcueéⁿ yā ꞌiiⁿꞌyāⁿ ní ngéenū tanꞌdúúcā chi caꞌai gangrena ní tanꞌdúúcā chi ngeꞌe ꞌáámá nꞌdaa. ꞌTíícā diiⁿ nduudu yeⁿꞌe saⁿꞌā Himeneo ndúúcū saⁿꞌā Fileto. 18 Sáⁿꞌā sꞌeeⁿ ní divíi yā yeⁿꞌē nduudu cuaacu ní ngaⁿꞌa yā chi ꞌiiⁿꞌyāⁿ nguɛ́ɛ́ nnduuchí yā yeⁿꞌē nguaaⁿ tináⁿꞌā. Ní náⁿꞌā ꞌiiⁿꞌyāⁿ ꞌāā ntɛ́ɛ́ iꞌtéénu yā nducuéⁿꞌē nduudu cuaacu. 19 Naati chííⁿ chi Ndyuūs ꞌāā diíⁿ yā mar ꞌáámá ꞌāā ntɛ́ɛ́ cuuvi nadinꞌnúⁿꞌu yā. Ní ꞌāā canéé nguūⁿ na libro yeⁿꞌé yā ní chiichi canéé tanꞌdúúcā ꞌáámá sello. ꞌTíícā nduudu miiⁿ: Señor Jesucristo yeⁿꞌē yú deenú yā duꞌu ꞌiiⁿꞌyāⁿ chi yeⁿꞌé yā. Níícú nducyaaca ꞌiiⁿꞌyāⁿ chi ngaⁿꞌa yā chi yeⁿꞌe Señor yeⁿꞌe yú canéé chi divíi yā yeⁿꞌe nuuⁿndi.
20 Taachi caⁿꞌa yú cuaaⁿ chɛɛti vaꞌai chí chꞌɛɛtɛ taavi ca nꞌdiichi yú nguɛ́ɛ́ dámaāⁿ platos ndúúcū ꞌcuūtu yeⁿꞌe ꞌdííⁿnguaaⁿ o ꞌdííⁿnguɛɛ naati nꞌdiichi yú ntúūⁿ ꞌcuūtu yeⁿꞌē yáⁿꞌá ní yeⁿꞌē ínchɛɛtí. Nꞌduuvi ꞌcuūtu ꞌiiⁿꞌyāⁿ cutaꞌá yā cáávā ntiiⁿnyuⁿ especiales ní náⁿꞌā ꞌcuūtu ní ꞌiiⁿꞌyāⁿ staꞌá yā chi ꞌcuíi yā cosas chi nguɛ́ɛ́ dichííꞌvɛ̄. 21 Ní taachi ꞌaama yú neⁿꞌe yú diiⁿ yú ntiiⁿnyuⁿ yeⁿꞌe Señor Jesucristo yeⁿꞌē yú canee chi ꞌcuɛɛtinéé nꞌdaacā yú ní divíi yú yeⁿꞌe tanducuéⁿꞌē chi nguɛ́ɛ́ dichííꞌvɛ̄. ꞌTíícā diiⁿ yú maaⁿ níícú cuuvi diiⁿ yú ꞌāā dɛꞌɛ́ nūuⁿ ntiiⁿnyuⁿ chi nꞌdaacā.
22 ꞌTiicá ntúūⁿ. Dii, Timoteo, divíi di yeⁿꞌe vicios yeⁿꞌe saⁿꞌā nꞌgaiyáā. Cunée di nꞌdaacā ní diiⁿ di tanducuéⁿꞌē chi nꞌdaacā. Cuꞌtéénu ca di Ndyuūs, dinéⁿꞌe di nducyaaca ꞌiiⁿꞌyāⁿ, ní cunée di ndúúcū vaādī ꞌdiiíⁿ ndúúcū nducyáácá ꞌiiⁿꞌyāⁿ chi Ndyuūs nadidɛɛvɛ́ yā yeⁿꞌē nuuⁿndi yeⁿꞌé yā. Ní maaⁿ ní ngaⁿꞌanguaꞌá yā ndúúcū ꞌiiⁿꞌyāⁿ chi yeⁿꞌe Señor Jesucristo yeⁿꞌe yú. 23 Ní dii, Timoteo, nguɛ́ɛ́ diiⁿ di cuenta yeⁿꞌe ꞌiiⁿꞌyāⁿ chi nꞌdeee nꞌdáí neⁿꞌé yā caaⁿꞌmáⁿ yā ndúúcū dii ndúúcū nduudu chi zonza caati nguɛɛ déénu yā. ꞌĀā déénu di chi naachi ꞌcuiīnū nduudu miiⁿ ní ndaacā vaadī ꞌcaaꞌva. 24 Deenu di chi mar ꞌáámá ꞌiiⁿꞌyāⁿ chi dichííꞌvɛ Señor Jesucristo yeⁿꞌe yú nguɛ́ɛ́ cánéé chi ꞌcuuⁿꞌmáⁿ yā ndúúcū ꞌiiⁿꞌyāⁿ naati canéé chí ndíícúuⁿ yā ndúúcū nducyaaca ꞌiiⁿꞌyā. Ní canee chi ngiꞌcueeⁿ nꞌdáácá yā. Ní canee chi diiⁿ yā tanducuéⁿꞌē ndúúcū paciencia. 25 Ní canee chi dííⁿ di componer ꞌiiⁿꞌyāⁿ chi yáádiꞌyāa ndúúcū núúⁿmáⁿ staava yeⁿꞌe di. Ní ꞌiiⁿꞌyāⁿ miiⁿ canee chi cūnee ngiinú yā chi Ndyuūs n̄ꞌdaáⁿ yā vida yeⁿꞌe ꞌiiⁿꞌyāⁿ rebelde caati cuuvi deenú yā nduudu chi cuaacu. 26 ꞌTíícā ní ꞌiiⁿꞌyāⁿ sꞌeeⁿ canée yā tanꞌdúúcā chi cyaadú yā níícú cuayiivi ní canduuchí yā ní ꞌíícú cuuvi ngeenú yā tanꞌduucā chi diíⁿ yā cuáⁿꞌai yā yeⁿꞌe trampa yeⁿꞌe yááⁿnꞌguiinūuⁿ. Ní nguɛ́ɛ́ preso yā yeⁿꞌe yááⁿnꞌguiinūuⁿ chi yááⁿnꞌguiinūuⁿ cuuvi diiⁿ sa chiiⁿ chi neⁿꞌe sa nduucú yā. Ní maaⁿ ní ꞌiiⁿꞌyāⁿ cuuvi diíⁿ yā chííⁿ chí neⁿꞌe Ndyuūs.