Tanꞌdúúcā chi ꞌiiⁿꞌyāⁿ caⁿꞌá yā diíⁿ yā nguuvi chí cúchiī
3
Dii, Timoteo canee chi déenu ntúūⁿ di chuū. Nguuvi chi cuchiī vɛ́ɛ́ cosas chi ngíⁿꞌīi. 2 ꞌIiⁿꞌyāⁿ ní neⁿꞌé yā maáⁿ yā ꞌiiⁿꞌyāⁿ ní dinéⁿꞌe taavi yā tuūmī. Ní caaⁿꞌmáⁿ yā chi neené nꞌgɛɛtɛ maaⁿ yā ní nacádíínuuⁿ yā chi neené nꞌdaacā maáⁿ yā, ní nguɛ́ɛ́ nꞌdaacā dináaⁿ yā yeⁿꞌē tanáⁿꞌā ꞌiiⁿꞌyāⁿ. Ní ngii taaⁿ yā contra yeⁿꞌe Ndyuūs. Ní nguɛ́ɛ́ nꞌgiindiveéⁿ yā yeⁿꞌē chiidá yā ndúúcū chɛɛcú yā. Ní nguɛ́ɛ́ ngaⁿꞌa yā ꞌtíícā: Nꞌdiī Ndyuūs, gracias. Ní nguɛ́ɛ́ nꞌgiindiveéⁿ yā yeⁿꞌē nduudu cuaacu yeⁿꞌé Ndyuūs. 3 Ní nguɛ́ɛ́ dinéⁿꞌe yā ꞌiiⁿꞌyāⁿ tanꞌdúúcā chi canéé chi dineⁿꞌé yā ꞌiiⁿꞌyāⁿ, ndíí nguɛ́ɛ́ ndúú yaꞌāī ꞌiinú yā ꞌiiⁿꞌyāⁿ. Caaⁿꞌmáⁿ yā nuuⁿndi yeⁿꞌe ꞌiiⁿꞌyāⁿ ní nguɛ́ɛ́ ꞌtíícā. Ní nguɛ́ɛ́ diíⁿ yā chi nꞌdaacā caati neⁿꞌé yā caⁿꞌá yā ndúúcū nꞌdaataá ó saⁿꞌā chi nguɛ́ɛ́ yeⁿꞌé yā. Ní neené taaⁿ yā. Ní nguɛ́ɛ́ cuuvi nꞌdiichí yā cosa chi nꞌdaacā. 4 Nééné neⁿꞌe yā vaadī ꞌcaaꞌva ndúúcū ꞌiiⁿꞌyāⁿ. Nguɛ́ɛ́ ꞌvaꞌa yā ꞌāā dɛꞌɛ́ nūuⁿ chi diíⁿ yā ndúúcū ꞌiiⁿꞌyāⁿ Ní neené nadacadíínuuⁿ yā chi nꞌdɛɛvɛ maáⁿ yā. Nééné neⁿꞌe yā diiⁿ yā taanduvɛ́ɛ́ vicio chi vɛ́ɛ́ iⁿꞌyeeⁿdí ꞌcūū. Ní nguɛ́ɛ́ nadacadíínuuⁿ yā yeⁿꞌe Ndyuūs. 5 Nééné nꞌgiⁿꞌi yā chi iꞌtéénu yā Ndyuūs naati nguɛ́ɛ́ diíⁿ yā chiiⁿ chi ngaⁿꞌa nduudu cuaacu yeⁿꞌé Ndyuūs. Díí, Timoteo, divíi di yeⁿꞌe ꞌiiⁿꞌyāⁿ chi ꞌtíícā.6 Caati náⁿꞌā saⁿꞌā sꞌeeⁿ ní ngeⁿꞌe yā ndúú vaꞌai nduu vaꞌai yeⁿꞌe nꞌdaataá chi nguɛ́ɛ́ diiⁿ nꞌdaacá yā. Ní caꞌcueeⁿ sa nduudu chi nguɛ́ɛ́ nꞌdaacā. Ní nꞌdaataa sꞌééⁿ nguɛ́ɛ́ cuuvi ndaacadaamí yā yeⁿꞌē nuuⁿndi yeⁿꞌé yā. 7 Nꞌdaataa sꞌeeⁿ ní nguuvi nguuvi nꞌgeeⁿ yā nduudu miiⁿ naati nguɛ́ɛ́ cuuvi tuumicadíínuuⁿ yā nduudu miiⁿ. 8 Ní iiⁿꞌyāⁿ sꞌeeⁿ chi diiⁿ ꞌtíícā ní contra yeⁿꞌē nduudu cuaacu yeⁿꞌé Ndyuūs. Ní tanꞌdúúcā chi diiⁿ saⁿꞌā ngaatúū Janes ndúúcū Jambres taachi contra yeⁿꞌe Moisés tiempo chi ꞌāā chóꞌōo, ꞌtíícā maaⁿ ní ꞌiiⁿꞌyāⁿ sꞌeeⁿ nguɛ́ɛ́ nꞌdaacā nadicádíínuuⁿ yā. Ní nguɛ́ɛ́ cuaacu chi iꞌtéénu yā Ndyuūs. 9 Ní ꞌiiⁿꞌyāⁿ sꞌeeⁿ nguɛ́ɛ́ cuuvi ꞌcueeⁿ cá yā caati nducyaaca ꞌiiⁿꞌyāⁿ deenú yā táácā idiiⁿ ꞌiiⁿꞌyāⁿ sꞌeeⁿ chi tonto yā tanꞌdúúcā chi ꞌtiicá ntúūⁿ deenú nducyaaca ꞌiiⁿꞌyāⁿ taacā chi diiⁿ ngaatúū Janes ndúúcū Jambres tiempo chi ꞌāā chóꞌōo.
Cuááⁿ ná chꞌiinu ní Pablo dinguúⁿ yā carta ꞌcūū yeⁿꞌe Timoteo
10 Díí, Timoteo, ꞌāā diiⁿ di nducuéⁿꞌē tanꞌdúúcā chi chiꞌcueéⁿ dii. Ní tanꞌdúúcā chi ꞌúú caneé nꞌdaacā, ꞌtiicá ntúūⁿ cunee di nꞌdaacā. Ní diiⁿ di tanducuéⁿꞌē tanꞌdúúcā chi ꞌúú diíⁿ nducuéⁿꞌē cáávā chi iꞌteenu yú Ndyuūs. ꞌTíícā diiⁿ di. Ní iꞌtéénu di tanꞌdúúcā chi ꞌúú iꞌteenú. Ní yaꞌai ꞌiinu di ꞌiiⁿꞌyāⁿ ní dineⁿꞌe di nducyaaca ꞌiiⁿꞌyāⁿ. Ní cuchɛɛ di yeⁿꞌe nducuéⁿꞌē. Tanꞌdúúcā chi diíⁿ ꞌtiicá ntúūⁿ diiⁿ di. 11 Ní deenu di tanducuéⁿꞌē chi chꞌeenú chiī cáávā chi diiⁿ ꞌiiⁿꞌyāⁿ nduucú ní táácā chi chꞌēenú na yáāⁿ Antioquía ndúúcū yáāⁿ Iconio ndúúcū yáāⁿ Listra. Ní chichɛɛ́ tanducuéⁿꞌē chi chꞌeēnú chiī naati Señor Jesucristo yeⁿꞌe yú ní nadanguáⁿꞌai yā ꞌúú yeⁿꞌe nducuéⁿꞌē chúū. 12 ꞌTíícā ní cuaacu. Nducyaaca ꞌiiⁿꞌyāⁿ chi neⁿꞌé yā ꞌcuɛɛtinéé nꞌdaacā vida yeⁿꞌé yā cááva Jesucristo ní caⁿꞌá yā ꞌcueenú yā cuuvi. 13 Naati ꞌiiꞌyā chi nguɛ́ɛ́ nꞌdaacā ní nginncheꞌéí yā ꞌiiⁿꞌyāⁿ. Dachꞌɛɛtɛ dáchꞌɛɛtɛ cá diíⁿ yā. Ní nginncheꞌéí yā tanáⁿꞌā ꞌiiⁿꞌyāⁿ ní ndíí maáⁿ yā nginncheꞌéí yā ꞌiiⁿꞌyāⁿ.
14 Naati dii, Timoteo, canee nꞌdaacā di yeⁿꞌe chi chꞌeeⁿ di caati cuaacu nííⁿnyúⁿ chí deenu di chi cuaacu ní deenu di duꞌú ꞌiiⁿꞌyāⁿ sꞌeeⁿ chi chiꞌcueeⁿ di ꞌtúúcā. 15 Ndíí taachi ꞌlííⁿ dii chicadíínuuⁿ di yeⁿꞌē nduudu yeⁿꞌé Ndyuūs. Ní cáávā nduudu miiⁿ chi caꞌcueeⁿ di cuuvi cadíínuuⁿ di táácā cuuvi ninguaⁿꞌāī di cáávā chi iꞌtéénu di Señor Jesucristo. 16 Ní nducuéⁿꞌē chi canéé nguūⁿ na libro yeⁿꞌé Ndyuūs cucáávā Espíritu Nꞌdai yeⁿꞌe Ndyuūs ní dichííꞌvɛ̄ chi caꞌcueeⁿ yú ꞌiiⁿꞌyāⁿ ní cuuvi yú ꞌiiⁿꞌyāⁿ chɛɛ chi nguɛ́ɛ́ nꞌdaacā chi diíⁿ yā. Ní cuuvi yú ꞌiiⁿꞌyāⁿ táácā chi cuuvi dinꞌdaacá yā. Ní caꞌcueeⁿ yú táácā chi ꞌiiⁿꞌyāⁿ cuuvi ꞌcuɛɛtinéé nꞌdaacá yā nanááⁿ Ndyuūs. 17 Caati ꞌiiⁿꞌyāⁿ chi yeⁿꞌéⁿ Ndyuūs ní dichííꞌvɛ yā Ndyuūs ní cuuvi diíⁿ yā nducuéⁿꞌē ntiiⁿnyuⁿ chi nꞌdaacā.