CARTA YEⁿꞌE SAⁿꞌĀ TITO
1
ꞌÚú Pablo chi apóstol yeⁿꞌé Señor Jesucristo ní diíⁿ ntiiⁿnyuⁿ yeⁿꞌé Ndyuūs. Ndyuūs dichóꞌo yā ꞌúú chi cuuvi inneé ꞌiiⁿꞌyāⁿ sꞌeeⁿ chi Ndyuūs nndɛɛvɛ yā chi cuuvi yeⁿꞌé yā ꞌiiⁿꞌyāⁿ sꞌeeⁿ caati cuꞌteenu cá yā yeⁿꞌe religión yeⁿꞌe yú. 2 Ní cūnee ngiinú yā ndúúcū sꞌuuúⁿ chi Ndyuūs tée yā vida cueⁿꞌe daāⁿmaⁿ sꞌuuúⁿ chi Ndyuūs caⁿꞌa yā chi caꞌa yā ꞌiiⁿꞌyāⁿ chi yeⁿꞌe yā vmnááⁿ vmnaaⁿ chi ꞌāā cuɛ́ɛ́ cūnee iⁿꞌyeeⁿdí ꞌcūū. Ndyuūs miiⁿ ní nguɛ́ɛ́ cuuvi caaⁿꞌmáⁿ yā nduudu yaadi. 3 Ní taachi ndaa tiempo chi neⁿꞌe Ndyuūs, Ndyuūs chꞌiⁿꞌi yā nduudu cuaacu yeⁿꞌé yā cucáávā ꞌiiⁿꞌyāⁿ chi ngaⁿꞌa nduudu cuaacu yeⁿꞌé yā. Maaⁿ ní Ndyuūs yeⁿꞌe yú chi nadanguáⁿꞌai yā sꞌuuúⁿ dichóꞌo yā ꞌúú chi ngaⁿꞌá nduudu cuaacu yeⁿꞌé yā. 4 Maaⁿ ní dinguúⁿ carta ꞌcūū yeⁿꞌē dii, Tito. Ni cuaacu nííⁿnyúⁿ díí ní tanꞌdúúcā daiyá chi ngaⁿꞌá nduudu cuaacu nanááⁿ dii, nduudu chi iꞌteenu yú. Neⁿꞌé chi Ndyuūs chiida yú ndúúcū Señor Jesucristo yeⁿꞌe yú chi nadanguáⁿꞌai yā sꞌuuúⁿ itée yā dii nducuéⁿꞌē chi nꞌdai taavi yeⁿꞌé yā ní yaꞌai ꞌiinu yā dii. Ní tanꞌdúúcā chi yaꞌai ꞌiinú Ndyuūs ꞌiiⁿꞌyāⁿ ꞌtiicá ntúūⁿ diiⁿ di. Ní Ndyuūs tée yā dii vaadī ꞌdiiíⁿ yeⁿꞌé yā.Ntiiⁿnyuⁿ yeⁿꞌe Tito na yáⁿꞌāa Creta
5 Ní cáávā ntiiⁿnyuⁿ chi canee chi diiⁿ di ꞌúú chiꞌneéⁿ dii na isla Creta. Canéé chi dicuaacú di cosas chi nguɛɛ nꞌdaacā. Ní cuꞌneeⁿ dí ꞌiiⁿꞌyāⁿ nꞌgɛɛtɛ chi ngaⁿꞌa ntiiⁿnyúⁿ yā yeⁿꞌē nducuéⁿꞌē yaācū na ꞌáámá ꞌáámá ciudad. ꞌÚú dichoꞌó dii chi diiⁿ di ntiiⁿnyuⁿ ꞌcūū. 6 Ní ꞌiiⁿꞌyāⁿ chi ndɛɛvɛ dí canee chi ꞌcuɛɛtinéé nꞌdaaca yā manera chi nguɛ́ɛ́ cuuvi caaⁿꞌmaⁿ tanáⁿꞌā ꞌiiⁿꞌyāⁿ chi vɛ́ɛ́ nuuⁿndi yeⁿꞌé yā. Ní vɛ́ɛ́ ꞌáámá nūuⁿ nꞌdaataa yeⁿꞌe yā. Ní daiyá yā canéé chí iꞌtéénu yā Ndyuūs, ní nguɛ́ɛ́ daꞌcaiyāa chi travieso yā chi nguɛ́ɛ́ nꞌdaacā idiiⁿ yā, ní nguɛ́ɛ́ daꞌcaiyāa chí yaadíꞌyāa. 7 ꞌIiⁿꞌyāⁿ chi diíⁿ yā ntiiⁿnyuⁿ yeⁿꞌé Ndyuūs canee chi candɛɛ́ yā cuidado yeⁿꞌe ntiiⁿnyuⁿ yeⁿꞌé Ndyuūs. Ní cáávā chuū ꞌiiⁿꞌyāⁿ sꞌeeⁿ canee chi ꞌcuɛɛtinéé nꞌdaaca yā. Nguɛ́ɛ́ cuuvi ꞌiiⁿꞌyāⁿ chi necio yā, ní nguɛ́ɛ́ ꞌiiⁿꞌyāⁿ chi nduuvi taáⁿ yā, ndíí nguɛ́ɛ́ ndúú ꞌiiⁿꞌyāⁿ chi ngii cuuꞌví yā va ní inꞌnuuⁿ yā vaadī ꞌcaaꞌva. Ní nguɛ́ɛ́ cuuvi ꞌiiⁿꞌyāⁿ chi neⁿꞌé yā diiⁿ yā ganar tuūmī cáávā ntiiⁿnyuⁿ chi diíⁿ yā chi nguɛ́ɛ́ nꞌdaacā. 8 Naati ꞌtíícā canee chi diíⁿ yā. Canéé chi diíⁿ yā recibir na vaacú yā ꞌiiⁿꞌyāⁿ chi canúúⁿ yúúní. Canéé chi neⁿꞌe yā chi dinꞌdaaca yā ní nꞌdaacā nadacadíínuuⁿ yā yeⁿꞌe nducuéⁿꞌē chi caⁿꞌá yā diiⁿ yā, ní diíⁿ yā chiiⁿ chi cuaacu. Ní dɛɛvɛ vida yeⁿꞌe yā, ní nguɛ́ɛ́ canee chi taamá yā caꞌa yā consejo ꞌiiⁿꞌyāⁿ. 9 Ní cundɛ́ɛ́ nꞌdaaca yā nduudu cuaacu yeⁿꞌé Ndyuūs chi chꞌeéⁿ yā ní ꞌtíícā cuuvi caꞌcueéⁿ yā nduudu cuaacu miiⁿ. Ní cuuvi diíⁿ yā cuchɛɛ́ yā ndúúcū ꞌiiⁿꞌyāⁿ chi contra yeⁿꞌe nduudu cuaacu ní cuuvi chꞌiⁿꞌí yā ꞌiiⁿꞌyāⁿ sꞌeeⁿ chi nduudu cuaacu miiⁿ ní cuaacu.
10 Neene nꞌdáí ꞌiiⁿꞌyāⁿ nguaaⁿ ꞌiiⁿꞌyāⁿ judíos sꞌeeⁿ nguɛ́ɛ́ neⁿꞌe yā cuꞌtéénu yā nduudu cuaacu miiⁿ. ꞌIiⁿꞌyāⁿ sꞌeeⁿ ngaⁿꞌá yā cosas chi nguɛ́ɛ́ dichííꞌvɛ̄ ní nginncheꞌéí yā ꞌiiⁿꞌyāⁿ. 11 Canee chi diiⁿ yú chi ꞌiiⁿꞌyāⁿ sꞌeeⁿ nguɛ́ɛ́ cuuvi candɛɛ yā nduudu yeⁿꞌé yā caati ndástaⁿꞌá yā vaadī cadíínūuⁿ yeⁿꞌé ꞌiiⁿꞌyāⁿ. Ní diíⁿ yā chi nducyaaca ꞌiiⁿꞌyāⁿ yeⁿꞌe ꞌáámá vaꞌāī yeⁿꞌē táámá vaꞌāī cuꞌtéénu yā nduudu yeⁿꞌé yā. Ní ngiꞌcueéⁿ yā cosas chi nguɛ́ɛ́ nꞌdaacā cucáávā chi neⁿꞌé yā diiⁿ yā ganar tuūmī manera chi nguɛ́ɛ́ nꞌdaacā.
12 Ní ꞌáámá saⁿꞌā yeⁿꞌe isla Creta chi profeta yeⁿꞌe yáāⁿ miiⁿ ngaⁿꞌa sa ꞌtúúcā yeⁿꞌe ꞌiiⁿꞌyāⁿ yeⁿꞌē yáāⁿ vaacú sa. Ngaⁿꞌa sa chi ꞌiiⁿꞌyāⁿ yeⁿꞌe yáⁿꞌāa Creta ní nééné yaadí yā, ní nééné tááⁿ yā, ní nééné ꞌdaanꞌdí yā, ní nééné nꞌdeēe ngeꞌe yā. 13 Ní saⁿꞌā miiⁿ ní ngaⁿꞌa sa nduudu cuaacu yeⁿꞌe ꞌiiⁿꞌyāⁿ. Níícú cáávā chuū canee chi yaaꞌvi dí ꞌiiⁿꞌyāⁿ sꞌeeⁿ ndúúcū nduudu chɛɛchi caati cuuvi cuꞌtéénu nꞌdaacá yā nduudu cuaacu miiⁿ. 14 Ní nguɛ́ɛ́ diíⁿ yā cuenta yeⁿꞌe nduudu yeⁿꞌe ꞌiiⁿꞌyāⁿ judíos chi nginncheꞌéí yā ꞌiiⁿꞌyāⁿ ndúúcū nduudu chi maáⁿ yā nadacadíínuuⁿ yā ní ngaⁿꞌa yā. Ndíí nguɛ́ɛ́ nꞌgiindiveéⁿ yā orden chi ngaⁿꞌa ꞌiiⁿꞌyāⁿ sꞌeeⁿ chi ndaacadaamí yā yeⁿꞌē nduudu cuaacu yeⁿꞌé Ndyuūs.
15 Ní ꞌiiⁿꞌyāⁿ chi Ndyuūs didɛɛvɛ́ yā staava yeⁿꞌé yā chí dɛɛ̄vɛ nacadíínuuⁿ yā dámaāⁿ yeⁿꞌe denduꞌū chi dɛɛvɛ ní staꞌá yā nducuéⁿꞌē tanꞌdúúcā chi dɛɛvɛ. Naati ꞌiiⁿꞌyāⁿ chi nguɛ́ɛ́ iꞌtéénu yā Ndyuūs nadacadíínuuⁿ yā yeⁿꞌe cosas chi nguɛ́ɛ́ nꞌdaācā. Ní mar ꞌáámá cosa ní nguɛ́ɛ́ dɛɛvɛ yeⁿꞌe ꞌiiⁿꞌyāⁿ miiⁿ. ꞌTiicá ntúūⁿ ní vaanīcadíínūuⁿ yeⁿꞌé yā ní nguɛ́ɛ́ dɛɛvɛ. Ní nducuéⁿꞌē chi vɛ́ɛ́ na staava yeⁿꞌé yā ní nguɛ́ɛ́ dɛɛvɛ. Ndíí nguɛ́ɛ́ ndúú chi inadacádíínuuⁿ yā chí dɛɛvɛ. 16 ꞌIiⁿꞌyāⁿ sꞌeeⁿ ngaⁿꞌa yā chi nꞌdiichí yā Ndyuūs naati denduꞌū chi diíⁿ yā chꞌiⁿꞌī chi nguɛ́ɛ́ cuaacu. ꞌIiⁿꞌyāⁿ sꞌeeⁿ nguɛ́ɛ́ neⁿꞌé yā ꞌiiⁿꞌyāⁿ ní nguɛ́ɛ́ neⁿꞌé yā diiⁿ yā chi ngaⁿꞌa ꞌiiⁿꞌyāⁿ. Nguɛ́ɛ́ nꞌdaacā yā. Ní nguɛ́ɛ́ dichííꞌvɛ̄ chi diíⁿ yā mar ꞌáámá cosa chi nꞌdaācā.