Canéé chi caꞌcueeⁿ di dendúꞌū chi cuaacu
2
Díí, Tito, nducuéⁿꞌē chi caaⁿꞌmaⁿ di canee chi caaⁿꞌmaⁿ di ndúúcū nduudu cuaacu yeⁿꞌé Ndyuūs. 2 Yaaꞌvi di saⁿꞌā ndiicúū chi ngaⁿꞌa ntiiⁿnyuⁿ yeⁿꞌe yaācū naachi ꞌiiⁿꞌyāⁿ iꞌtéénu yā Jesucristo chi canéé chí serio yā. Ní canéé chí nadacádíínuuⁿ yā nꞌdai ní nguɛ́ɛ́ diíⁿ yā denduꞌū chi nguɛɛ nꞌdaacā. Canéé chi cuꞌtéénu yā dámaāⁿ nduudu cuaacu yeⁿꞌé Ndyuūs ní dinéⁿꞌe yā nducyaaca ꞌiiⁿꞌyāⁿ. Ní canéé chi cuchɛ́ɛ yā yeⁿꞌe nducuéⁿꞌē ndúúcū paciencia. 3 ꞌTiicá ntúūⁿ yaaꞌvi di nꞌdaataa sꞌeeⁿ chi ngeⁿꞌe yā na yaācū yeⁿꞌé ꞌiiⁿꞌyā chí iꞌtéénu yā Jesucristo chi ꞌcuɛɛtinéé nꞌdaaca yā tanꞌdúúcā ꞌiiⁿꞌyāⁿ dɛɛvɛ chi yeⁿꞌé Ndyuūs. Nguɛ́ɛ́ caaⁿꞌmáⁿ yā yeⁿꞌē mar ꞌáámá ꞌiiⁿꞌyāⁿ chí nduudu yaadi ní nguɛ́ɛ́ cuuꞌví yā va. Ní canee chi diiⁿ nꞌdaacá yā caati tanáⁿꞌā ꞌiiⁿꞌyāⁿ cuuvi cutaꞌá yā ejemplo yeⁿꞌē nꞌdaataá sꞌeeⁿ. 4 Ní ꞌíícú cuuvi caꞌcueéⁿ yā tanáⁿꞌā nꞌdaataá daꞌcáiyāa tanꞌdúúcā chi canéé chi dinéⁿꞌe yā isaⁿꞌā yeⁿꞌé yā ní dinéⁿꞌe ntúūⁿ yā daiya yā. 5 Ní nꞌdaataa sꞌeeⁿ cuuvi nadacádíínuuⁿ yā chɛɛ chi nꞌdaācā ní diiⁿ yā chuū. Ní diíⁿ yā nducuéⁿꞌē chi neⁿꞌe Ndyuūs. Ní dinꞌdai cá yā na vaacú yā ní nꞌgiindiveéⁿ yā isaⁿꞌā yeⁿꞌe yā. ꞌTíícā ní mar ꞌáámá ꞌiiⁿꞌyāⁿ nguɛ́ɛ́ cuuvi cunncáā caaⁿꞌmaⁿ yā yeⁿꞌē nduudu yeⁿꞌé Ndyuūs.6 ꞌTiicá ntúūⁿ yaaꞌvi di saⁿꞌā nꞌgaiyáā chi nadacadíínuuⁿ yā nꞌdaacā vmnaaⁿ chi diíⁿ yā dɛꞌɛ̄ vɛɛ. 7 Ní díí, Tito, diiⁿ di nꞌdaacā nducuéⁿꞌē chi diiⁿ di ní ꞌíícú ꞌiiⁿꞌyāⁿ cuuvi cutaꞌá yā vida yeⁿꞌē di tanꞌdúúcā ꞌáámá ejemplo. Ní taachi caꞌcueeⁿ di ꞌiiⁿꞌyāⁿ, diiⁿ di ndúúcū núúⁿmáⁿ staava yeⁿꞌē di ní canee di serio di. 8 Ní caꞌcueeⁿ di ndúúcū nduudu chi nꞌdaacā ní ꞌiicu mar ꞌáámá ꞌiiⁿꞌyāⁿ nguɛ́ɛ́ cuuvi caaⁿꞌmáⁿ yā dɛꞌɛ̄ vɛɛ yeⁿꞌe chi ngaⁿꞌa di. Ní ꞌiiⁿꞌyāⁿ chi contra yeⁿꞌē di cuuvi ꞌcuinaáⁿ yā caati nguɛ́ɛ́ cuuvi caaⁿꞌmáⁿ yā mar ꞌáámá contra yeⁿꞌē di.
9 Ní yaaꞌvi dí ꞌiiⁿꞌyāⁿ chi ꞌáámá canee chi diíⁿ yā ntiiⁿnyuⁿ, canéé chi nꞌgiindiveéⁿ yā nducuéⁿꞌē yeⁿꞌē ꞌiiví yā. Ní cunee yiinú yā yeⁿꞌe nducuéⁿꞌē yeⁿꞌē ꞌiiví yā. Ní nguɛ́ɛ́ canee chi nguɛɛcútaⁿꞌá yā yeⁿꞌe ꞌiivi yā. 10 Ní nguɛ́ɛ́ canéé chi diduucú yā yeⁿꞌē ꞌiivi yā naati canee chi diiⁿ nꞌdaacá yā ndúúcū ꞌiivi yā ní chꞌiⁿꞌí yā chi dámaāⁿ diíⁿ yā cosas chi nꞌdaacā cáávā ꞌiivi yā. Ní ꞌíícú ndúúcū nducuéⁿꞌē chi diíⁿ yā cuuvi chꞌiⁿꞌí yā ꞌiivi yā ní ꞌiiví yā cuuvi caaⁿꞌmaⁿ nꞌdaacá yā yeⁿꞌe nduudu cuaacu yeⁿꞌé Ndyuūs chi nanguaⁿꞌāī yú.
11 Ndyuūs chꞌiⁿꞌí yā chi díneⁿꞌe yā nducyaaca ꞌiiⁿꞌyāⁿ. Ní chꞌiⁿꞌí yā vaadī nꞌdai taavi yeⁿꞌé yā caati cuuvi nadanguáⁿꞌai yā nducyaaca ꞌiiⁿꞌyāⁿ. 12 Níícú vaadī nꞌdai taavi yeⁿꞌé Ndyuūs ngiꞌcueeⁿ sꞌuuúⁿ chi canee chi divíi yú yeⁿꞌe nducuéⁿꞌē chi nguɛɛ nꞌdaacā ndúúcū nducuéⁿꞌē vicio chi vɛ́ɛ́ iⁿꞌyeeⁿdí ꞌcūū chi neⁿꞌe yú diiⁿ yú. Ní canee chi nadacadiinuuⁿ yú nꞌdaacā yeⁿꞌe nducuéⁿꞌē vmnááⁿ chi diiⁿ yú. Ní ꞌcuɛɛtinéé nꞌdaaca yú ní diiⁿ yú tanducuéⁿꞌē chi neⁿꞌe Ndyuūs ꞌnaaⁿ chi canee yú iⁿꞌyeeⁿdí ꞌcūū. 13 Ní vaadī nꞌdai taavi yeⁿꞌé Ndyuūs ngiꞌcueeⁿ sꞌuuúⁿ chi ꞌcuɛɛtinéé nꞌgiiⁿnu yú nguuvi chꞌɛɛtɛ taachi Cristo diíⁿ yā cumplir nduudu chí ngaⁿꞌa yā. Ní taama vmnéⁿꞌēe ndaa ntúūⁿ Jesucristo yeⁿꞌe yú chi Ndyuūs chí chꞌɛɛtɛ taavi ca chi nadanguáⁿꞌai yā sꞌuuúⁿ. 14 Ní caꞌá yā vida yeⁿꞌe maáⁿ yā chi chꞌīi yā cáávā sꞌuuúⁿ chi nadanguáⁿꞌai yā sꞌuuúⁿ yeⁿꞌe nducuéⁿꞌē nuuⁿndi yeⁿꞌē yú. Ní nadidɛɛvɛ́ yā sꞌuuúⁿ yeⁿꞌe nducuéⁿꞌē nuuⁿndi chi diiⁿ yú chi cuuvi yeⁿꞌé yā sꞌuuúⁿ. Ní ꞌíícú ꞌáámá cunee yú diiⁿ yú ntiiⁿnyuⁿ chi nꞌdaacā.
15 Nducuéⁿꞌē chuū ní canee chi caꞌcueeⁿ di. Ní caꞌa di orden ti dii tanꞌdúúcā ꞌiiⁿntyéⁿꞌē dii. Cunnee di ꞌiiⁿꞌyāⁿ chi díꞌvaachí yā. Caꞌa di consejo ꞌiiⁿꞌyāⁿ chi nguɛɛ nꞌdaacā idiiⁿ yā. Dinꞌdaacá di yeⁿꞌe nducuéⁿꞌē caati mar ꞌáámá ꞌiiⁿꞌyāⁿ cuuvi cunncáā caaⁿꞌmáⁿ yā yeⁿꞌē di.