Yeⁿꞌe chi canéé chi diiⁿ ꞌiiⁿꞌyāⁿ chi iꞌtéénu yā Señor Jesucristo yeⁿꞌe yú
3
Cúúví dí ꞌiiⁿꞌyāⁿ chi iꞌtéénu yā Señor Jesucristo chi nꞌgaacu yā chí canéé maaⁿ poder yeⁿꞌe gobernador ndúúcū tanáⁿꞌā ꞌiiⁿntyéⁿꞌē ní canee chi nꞌgiindiveéⁿ yā yeⁿꞌe yā. Ní ꞌāā vɛɛ yaáⁿ yā chi diíⁿ yā nducuéⁿꞌē ntiiⁿnyuⁿ chi nꞌdaacā. 2 Ní nguɛ́ɛ́ canéé chi caaⁿꞌmaⁿ taaⁿ yā yeⁿꞌe mar ꞌáámá ꞌiiⁿꞌyāⁿ. ꞌTíícā canee chi ꞌcuɛɛtinéé ꞌdiíⁿ yā ndúúcū ꞌiiⁿꞌyāⁿ ní dinꞌdai yā ndúúcu yā. Ní canéé chí chꞌiⁿꞌi yā tanáⁿꞌā ꞌiiⁿꞌyāⁿ ndúúcū tanducuéⁿꞌē chi diíⁿ yā ndúúcu yā chi maaⁿ yā ndiicuuⁿ yā.3 ꞌTiicá ntúūⁿ sꞌuuúⁿ tiempo chi chóꞌōo taachi tonto yú ní nguɛ́ɛ́ nꞌgiindiveeⁿ yú nduudu yeⁿꞌé Ndyuūs ní nguɛ́ɛ́ nꞌdaacā idiiⁿ yú. Ní canee yú tanꞌdúúcā saⁿꞌa esclavo caati yeⁿꞌe chi neⁿꞌe cuerpo yeⁿꞌe yú ní diiⁿ yú ndúúcū nducuéⁿꞌē vicio yeⁿꞌe chi vɛ́ɛ́, ꞌtíícā diīⁿ yú. Ní diiⁿ taáⁿ yú, ní neⁿꞌe ca yú cosas tanꞌdúúcā chi vɛ́ɛ́ yeⁿꞌē tanáⁿꞌā ꞌiiⁿꞌyāⁿ. Ní nguɛ́ɛ́ neⁿꞌe yú ꞌiiⁿꞌyāⁿ. Ndíí nguɛ́ɛ́ ndúú neⁿꞌé yā sꞌuuúⁿ. Ní nguɛ́ɛ́ neⁿꞌe yú ꞌaama yú taama yú. 4 Naati taachi Cristo chi nꞌdai taaví yā ní neⁿꞌé yā nducyaaca ꞌiiⁿꞌyāⁿ ndaa yā nanáaⁿ yú, Cristo chi nadanguáⁿꞌai yā sꞌuuúⁿ, 5 tuuꞌmi ní nadanguáⁿꞌai yā sꞌuuúⁿ. Nguɛ́ɛ́ nadanguáⁿꞌai yā sꞌuuúⁿ cáávā chi diiⁿ yú cosas chi nꞌdaacā naati caati yaꞌāī ꞌiinú yā sꞌuuúⁿ ní nadanguáⁿꞌai yā sꞌuuúⁿ caavā chi naaⁿnú yā sꞌuuúⁿ. Ní chuū neⁿꞌe caaⁿꞌmaⁿ chi chꞌiindiyaaⁿ yú ndúúcū vida ngai cucáávā Espíritu Nꞌdai yeⁿꞌé Ndyuūs. Ní Espíritu miiⁿ tee yā sꞌuuúⁿ ꞌáámá vida chí ngāī. 6 Ní ꞌtíícā cuuvi cucáávā Señor Jesucristo yeⁿꞌe yú chi nadanguáⁿꞌai yā sꞌuuúⁿ, Ndyuūs tee yā núúⁿmáⁿ chꞌɛɛtɛ Espíritu Nꞌdai yeⁿꞌe yā sꞌuuúⁿ. 7 Ní cucáávā Ndyuūs caꞌá yā nducuéⁿꞌē chi nꞌdai yeⁿꞌé yā, diíⁿ yā chi sꞌuuúⁿ nguɛɛ ꞌiiⁿꞌyāⁿ nuuⁿndi yú nanáaⁿ yā ti didɛɛvɛ́ yā sꞌuuúⁿ. Ní maaⁿ ní diiⁿ yā aceptar sꞌuuúⁿ ní caⁿꞌá yā chi tée yā sꞌuuúⁿ vida cueⁿꞌe daāⁿmaⁿ chi cuuvi yeⁿꞌe yú. Ní cunee ngiiⁿnuⁿ yú vida ꞌcūū chi cuuvi yeⁿꞌe yú.
8 Nduudú ꞌcūū chi ngaⁿꞌá ní nduudu cuaacu ní ꞌáámá cūnee. Neⁿꞌé chi diitū cunee di ndúúcū nduudu ꞌcūū ní diitu caaⁿꞌmaⁿ di va. Ní ꞌíícú nduudú ꞌcūū cūnnee ꞌiiⁿꞌyāⁿ chi iꞌtéénu yā Ndyuūs, ní ꞌiiⁿꞌyāⁿ sꞌeeⁿ caⁿꞌá yā diiⁿ yā ntiiⁿnyuⁿ chí nꞌdaācā. Nduudú ꞌcūū ní nꞌdaacā ní dichííꞌvɛ̄ ꞌiiⁿꞌyāⁿ. 9 Nguɛ́ɛ́ cuꞌneeⁿveeⁿ di nduudu chi nguɛ́ɛ́ dichííꞌvɛ̄ chi nꞌdeee nꞌdáí chi nꞌguɛɛcútaⁿꞌā ꞌiiⁿꞌyāⁿ. Ní nguɛ́ɛ́ cuꞌneeⁿveeⁿ ca di nduudu chi canéé nguūⁿ yeⁿꞌe ꞌiiⁿꞌyāⁿ yeⁿꞌe ndaata yeⁿꞌe di. Ndíí nguɛ́ɛ́ ndúú cuꞌneeⁿveeⁿ di yeⁿꞌe ꞌiiⁿꞌyāⁿ chi nguúⁿ yā yeⁿꞌē nduudu yeⁿꞌe ley. Nduudú ꞌcūū nguɛ́ɛ́ dɛꞌɛ̄ vɛɛ ní nguɛ́ɛ́ dichííꞌvɛ̄. Naati cuꞌneeⁿveeⁿ cá di nduudu cuaacu yeⁿꞌé Ndyuūs.
10 Nduuti chi ꞌáámá ꞌiiⁿꞌyāⁿ diíⁿ yā chi vɛ́ɛ́ divisiones nguaaⁿ ꞌiiⁿꞌyāⁿ yeⁿꞌe yaācū yeⁿꞌe ꞌiiⁿyāⁿ chi iꞌtéénu yā Cristo, yaaꞌvi di ꞌiiⁿꞌyāⁿ miiⁿ ꞌáámá cuuvi o ꞌuūvī cuuvi. Ní ndúúti chi nguɛ́ɛ́ nꞌgiindiveéⁿ yā yeⁿꞌē di tuuꞌmi ní tunꞌdáa di ꞌiiⁿꞌyāⁿ miiⁿ yeⁿꞌe yaācū. 11 Deenu di chi ꞌiiⁿꞌyāⁿ miiⁿ nguɛ́ɛ́ nꞌdaacā vaanicadíínūuⁿ yeⁿꞌe yā ní dinuuⁿndí yā. Ní nuuⁿndi chi diíⁿ yā ní caaⁿꞌmaⁿ chi condenado yā.
Pablo caꞌcueéⁿ yā Tito yeⁿꞌē chi canee chi diíⁿ yā
12 Taachi dichoꞌó hermano Artemas o hermano Tíquico nanááⁿ di, diiⁿ di chi diiⁿnúúⁿ yiiⁿnu di chiī di naachi caneé na yáāⁿ Nicópolis caati neⁿꞌé cūneé yáāⁿ miiⁿ tiempo chi ꞌiichɛ. 13 Cunnee di Zenas chi abogado ndúúcū Apolos chi caⁿꞌá yā na yúúní. Ní caꞌa di ꞌiiⁿꞌyāⁿ sꞌuuⁿ nducuéⁿꞌē necesidades yeⁿꞌé yā cáávā viaje yeⁿꞌé yā caati nguɛ́ɛ́ diíⁿ yā falta mar ꞌáámá. 14 Ní yaaꞌvi di hermanos yeⁿꞌe yú chi iꞌtéénu yā Jesucristo chí ꞌcueeⁿ yā taacā chi canee chi dinꞌdaacá yā nducuéⁿꞌē tiempo ní cunneé yā ꞌiiⁿꞌyāⁿ chi vɛ́ɛ́ necesidades yeⁿꞌe yā caati ꞌtíícā dichííꞌvɛ̄ vida yeⁿꞌe yā.
ꞌCuiīnū carta ndúúcū saludos ndúúcū vaadī nꞌdai yeⁿꞌé Ndyuūs
15 Nducyaaca hermanos chi snée yā nduucú: Nꞌdai dii, ngāⁿꞌa yā. Ní díí ngaⁿꞌa di: Nꞌdai yā, nducyaaca ꞌiiⁿꞌyāⁿ chi iꞌtéénu yā Ndyuūs, hermanos chi dineⁿꞌe yú ꞌiiⁿꞌyāⁿ. Neⁿꞌé chi Ndyuūs tée yā ndísꞌtiī nducuéⁿꞌē chi nꞌdai taavi yeⁿꞌé yā. ꞌTíícā cuuvi.